Eski U Finn Gayn “Lespri Laverite”?

“Mo Papa . . . pu donn zot enn lot asistan ki pu avek zot pu tuletan, lespri laverite.”—ZAN 14:16, 17.

1. Ki ranseynman inportan Zezi ti donn so bann disip dan so bann dernye ler ki li ti pas avek zot dan enn lasam lao dan Zerizalem?

“SENYER, kot to pe ale?” Sa ti enn parmi bann kestyon ki bann zapot Zezi ti poz li dan bann dernye ler ki li ti pas avek zot dan enn lasam lao dan Zerizalem. (Zan 13:36) Alor ki reynion la pe derule, Zezi fer zot kone ki asterla ler finn arive pu li kit zot, ek li return kot so Papa. (Zan 14:28; 16:28) Li pu nepli avek zot an personn pu anseyn zot ek pu reponn zot bann kestyon. Me, li finn rasir zot kan mem par sa bann parol la: “Mo pu demann [mo] Papa, ek Li pu donn zot enn lot asistan [uswa enn konsolater] ki pu avek zot pu tuletan.”—Zan 14:16, not.

2. Ki Zezi ti promet li pu avoy so bann disip apre ki li pu fini ale?

² Zezi ti idantifye sa asistan la ek li ti explike kuma li ti pu ed so bann disip. Li ti dir zot: “Me, sa bann kitsoz la, mo pa finn dir zot sa avan, parski mo ti avek zot. Me asterla mo pe al kot sa Kikenn ki ti avoy mwa la . . . Li dan zot lavantaz ki mo pe ale. Parski si mo pa ale, asistan la pa pu kapav vinn ver zot; me si mo ale, mo pu avoy zot li. . . . Kan li pu vini, lespri laverite la, li pu gid zot dan laverite.”—Zan 16:4, 5, 7, 13.

3. (a) Kan eski bann premye Kretyin ti gayn “lespri laverite”? (b) Kuma eski, dan enn fason inportan, lespri ti enn “asistan” pu zot?

³ Sa promes la ti realize zur fet Lapantkot lane 33 N.L., kan lapot Pyer ti dir: “Sa Zezi la, Bondye finn resisit li; sa li enn kitsoz ki nu tu temwin. Alor, parski li finn gayn enn pozisyon elve dan drwat Bondye ek li finn gayn ar so Papa lespri sin ki Li ti promet li, li finn devers seki zot pe truve ek zot pe tande.” (Akt 2:32, 33) Kuma nu pu truve plitar, lespri sin ki bann premye Kretyin ti gayne zur fet Lapantkot, ti akonpli buku kitsoz pu zot. Me Zezi ti promet ki sirtu “lespri laverite” ti pu ‘rapel zot tu bann kitsoz ki li ti finn dir zot.’ (Zan 14:26) Li ti pu permet zot rapel minister ek bann lanseynman Zezi, mem so bann parol egzak ki zot ti pu ekrir apre. Lespri sin ti pu ed sirtu lapot Zan pu ekrir so Levanzil, parski li ti byin aze kan li finn kumanse ver lafin premye syek N.L. Ek dan so Levanzil mem ki ena bann konsey ki ena gran valer ki Zezi ti done kan li ti etabli Memoryal so lamor—Zan, sapit 13-17.

4. Kuma eski “lespri laverite” ti ed bann premye Kretyin win?

⁴ Zezi ti promet bann premye disip usi ki lespri ti pu ‘anseyn zot tu kitsoz’ ek li ti pu ‘gid zot dan tu laverite.’ Lespri ti pu ed zot pu konpran bann kitsoz pli profon ki ena dan Labib ek pu prezerv zot mem fason panse ek konpran, ek zot mem lobzektif. (1 Korintyin 2:10; Efezyin 4:3) Donk, lespri sin finn donn bann premye Kretyin lotorite pu azir kuma enn grup “esklav fidel ek avize” pu donn sak Kretyin win sa lepok la ‘nuritir spirityel dan ler ki bizin.’—Matye 24:45.

Lespri Donn Temwaynaz

5. (a) Ki nuvo posibilite pu lavenir Zezi ti met devan so bann disip lanwit le 14 Nizan, lane 33 N.L.? (b) Ki rol lespri sin ti pu zwe pu realiz sa promes Zezi la?

⁵ Lanwit le 14 Nizan, lane 33 N.L., Zezi ti revel so bann disip ki plitar li ti pu akey zot ek zot ti pu res ansam avek li ek so Papa dan lesyel. Li ti dir zot: “Dan lakaz mo Papa ena buku plas pu reste. Sinon, mo ti pu’nn dir zot, parski mo pe al prepar enn plas pu zot. Anplis, si mo pe al prepar enn plas pu zot, mo pu returne ek mo pu akey zot kot mwa, pu ki kot mo ete zot usi zot la.” (Zan 13:36; 14:2, 3) So bann disip ti pu reyn avek li dan so Rwayom. (Lik 22:28-30) Pu zot gayn sa lesperans al dan lesyel la, zot ti pu bizin “ne avek lespri” kuma bann garson spirityel Bondye ek gayn lespri sin pu servi kuma lerwa ek pret avek Kris dan lesyel.—Zan 3:5-8; 2 Korintyin 1:21, 22; Tit 3:5-7; 1 Pyer 1:3, 4; Revelasyon 20:6.

6. (a) Kan eski lapel pu al dan lesyel finn kumanse, ek komye dimunn gayn sa lapel la? (b) Dan ki kitsoz bann ki gayn sa lapel la, zot batize?

⁶ Sa “lapel pu al dan lesyel” la ti kumanse zur fet Lapantkot lane 33 N.L. ek, an prinsip sa finn fini enn tipe apre lane 1930. (Ebre 3:1) Se 144,000 dimunn ki “finn aste parmi limanite” ki finn konfirme par lespri sin pu fer parti dan Izrael spirityel. (Revelasyon 7:4; 14:1-4) Sa bann dimunn la finn batize dan lekor spirityel Kris, dan so kongregasyon, ek dan so lamor. (Romin 6:3; 1 Korintyin 12:12, 13, 27; Efezyin 1:22, 23) Apre zot batem dan delo ek apre ki zot finn gayn lespri sin, zot kumans enn lavi sakrifis, setadir enn lavi fidel ziska zot lamor.—Romin 6:4, 5.

7. Kifer eski zis bann manb 144,000 ki ankor lor later ki gayn drwa pran dipin ek divin dan Memoryal?

⁷ Antan ki bann Izraelit spirityel, sa bann manb 144,000 la fer parti dan nuvo lalyans ki Zeova finn fer avek “Izrael Bondye.” (Galat 6:16; Zeremi 31:31-34) Sa nuvo lalyans la ti gayn so valer grasa disan ki Zezi finn verse. Zezi ti mansyonn sa kan li ti etabli Memoryal so lamor. Lik rakonte: “Li finn pran enn dipin, li finn remersye Bondye, li finn kas dipin la, ek lerla li finn donn zot li ek li finn dir: ‘Sa reprezant mo lekor ki pu bizin done pu zot. Kontiyn fer sa an mo memwar.’ Li finn pran kup la usi apre ki zot finn fini zot repa diswar, li finn dir: ‘Sa kup la reprezant nuvo lalyans grasa mo disan, ki mo pu verse pu zot.’” (Lik 22:19, 20) Zis leres bann manb 144,000 ki ankor lor later gayn drwa pran dipin ek divin kan selebre Memoryal lamor Kris.

8. Kuma eski bann manb 144,000 ki lor later kone ki zot finn gayn lapel pu al dan lesyel?

⁸ Kuma eski sa bann manb 144,000 lor later la kone ki zot finn gayn lapel pu al dan lesyel? Pena dut, zot gayn temwaynaz lespri sin. Sa mem ki lapot Pol ti ekrir sa bann dimunn la: “Parski tu bann ki lespri sin dirize, sa bannla zot bann garson Bondye. . . . Lespri limem donn temwaynaz avek nu lespri ki nu bann zanfan Bondye. Alor, si nu so bann zanfan, nu bann zeritye usi: wi zeritye Bondye, me zeritye ansam avek Kris, purvi ki nu sufer ansam avek li pu ki nu kapav gayn laglwar avek li.” (Romin 8:14-17) Sa temwaynaz lespri sin la li telman for ki bann ki ena mem enn ti dut ki zot finn gayn lapel pu al dan lesyel, kapav rann zot kont finalman ki sa lapel la pa pu zot. Alor, zot pa pu pran lanblem pandan Memoryal.

Lespri ek Bann Lezot Muton

9. Ki de grup diferan mansyone dan bann Levanzil ek dan liv Revelasyon?

⁹ Pwiski Zezi ti kone ki ti pu ena zis enn ti grup Kretyin dan Izrael spirityel, li ti konpar zot ar enn “ti trupo.” Zot dan “lanklo” nuvo lalyans, kontrerman ar gran kantite “bann lezot muton” ki pa kapav konte, ki Zezi ti dir li bizin usi rasanble. (Lik 12:32; Zan 10:16) Bann lezot muton ki pe rasanble dan lepok lafin pu form “gran laful” ki pu sape dan “gran detres” ek ki ena lespwar pu viv pu tuletan lor later ki pu vinn enn paradi. Li interesan pu note ki vizyon ki Zan ti gayne dan lafin premye syek N.L. fer diferans ant sa gran laful la ek bann manb 144,000 Izrael spirityel. (Revelasyon 7:4, 9, 14) Eski bann lezot muton usi gayn lespri sin? Si wi, ki linflyans sa ena lor zot lavi?

10. Kuma eski bann lezot muton zot batize “onon Papa, onon Garson ek onon lespri sin”?

¹⁰ Lespri sin zwe vremem enn rol inportan dan lavi bann lezot muton. Pu montre zot langazman ar Zeova, zot pran batem “onon Papa, onon Garson ek onon lespri sin.” (Matye 28:19) Zot rekonet drwa ki Zeova ena pu reyne. Zot sumet ar Kris kuma zot Lerwa ek sa Kikenn ki sov zot la. Ek zot sumet ar linflyans lespri Bondye, uswa so lafors aktif, dan zot lavi. Zur apre zur, zot fer zefor pu devlop “frwi lespri,” kuma “lamur, lazwa, lape, pasyans, bonker, bonte, lafwa, duser, kontrol nu mem.”—Galat 5:22, 23.

11, 12. (a) Kuma eski bann manb 144,000 sanktifye dan enn fason byin spesyal? (b) Dan ki fason bann lezot muton sanktifye ek vinn sin?

¹¹ Bann lezot muton bizin usi permet Parol Bondye ek so lespri sin pirifye uswa sanktifye zot. Bann manb 144,000 finn fini sanktifye dan enn fason byin spesyal, ek devan Bondye zot drwat ek sin parey kuma enn lamarye pu Kris. (Zan 17:17; 1 Korintyin 6:11; Efezyin 5:23-27) Profet Danyel apel zot “bann sin sa Kikenn ki Siprem la,” ki gayn Rwayom anba lotorite “garson enn zom,” setadir Kris Zezi. (Danyel 7:13, 14, 18, 27) Byin avan, par Moiz ek Aaron, Zeova ti dir nasyon Izrael: “Mwa mo Zeova zot Bondye, ek zot bizin sanktifye zot ek montre ki zot sin, parski mo sin”—Levitik 11:44.

¹² “Sanktifye” enn kikenn vedir sirtu “fer li vinn sin, separe uswa met li apar pu Zeova servi li; pirifye li.” Deza depi 1938, Latur Degard ti dir ki bann Yonadab, uswa bann lezot muton “bizin aprann ki pu sak dimunn ki anvi fer parti dan gran laful ek viv lor later, li inportan ki li angaz li [ar Bondye] ek li sanktifye li.” Dan vizyon ki ena dan liv Revelasyon, bann manb gran laful “finn lav zot rob ek zot finn fer li vinn blan dan disan Lanyo” ek zot pe rann Zeova enn “servis sakre lanwit lizur dan so tanp.” (Revelasyon 7:9, 14, 15) Avek led lespri sin, bann lezot muton fer tu zot posib pu res sin dapre seki Zeova demande.—2 Korintyin 7:1.

Fer Dibyin Anver Bann Frer Kris

13, 14. (a) Dapre parabol Zezi lor bann muton ek kabri, lor ki kitsoz delivrans sa bann muton la depann? (b) Dan sa lepok lafin la, kuma eski bann lezot muton finn fer dibyin anver bann frer Kris?

¹³ Zezi ti donn enn parabol lor bann muton ek bann kabri, ki ti pu bizin realize dan lepok lafin. Dan sa parabol la, li ti atir latansyon lor lyin solid ki ena ant bann lezot muton ek bann manb ti trupo. Kris finn montre klerman ki delivrans bann lezot muton depann lor zot kondwit anver bann manb 144,000 ki lor later, ki li’nn apel “mo bann frer.” Li ti dir: “Lerwa pu dir bann ki dan so kote drwat, ‘Vini, zot ki finn beni par mo Papa, erit rwayom ki finn prepare pu zot depi fondasyon lemond. . . . Vremem mo dir zot, Sa kantite ki zot finn fer pu pli tipti parmi mo bann frer, abe kuma dir pu mo mem ki zot finn fer sa.’”—Matye 24:3; 25:31-34, 40.

¹⁴ Lexpresyon “kantite ki zot finn fer,” vedir isi led ek sutyin avek lamur ki bann lezot muton finn donn bann frer Zezi ki finn gayn lespri sin. Parkont, lemond Satan li, li finn tret bannla kuma bann etranze, ek finn mem zet sertin dan prizon. Sa bann frer Zezi la ti mank manze, linz ek swin lasante. (Matye 25:35, 36, not) Dan sa lepok lafin la, depi 1914, buku manb 144,000 lor later finn truv zot dan sa bann kalite sityasyon la. Listwar modern bann Temwin Zeova montre ki zot finn gayn led zot konpaynon fidel, bann lezot muton, ki ti motive par lespri sin.

15, 16. (a) Dan ki laktivite bann lezot muton finn sirtu ed bann frer win Zezi Kris ki lor later? (b) Kuma eski bann frer win Kris finn exprim zot rekonesans pu bann lezot muton?

¹⁵ Dan sa lepok lafin la, bann frer win Zezi Kris lor later finn sirtu gayn led aktif bann lezot muton pu akonpli travay ki Bondye finn donn zot pu ‘pres labonn nuvel rwayom partu kot dimunn reste lor later kuma enn temwaynaz pu bann nasyon.’ (Matye 24:14; Zan 14:12) Amezir lane pase, bann manb 144,000 pe diminye lor later, ek bann lezot muton zot, zot pe ogmante ziska plizir milyon. Plizir milye parmi zot finn servi kuma bann predikater labonn nuvel aplintan—pyonye ek misyoner—pu transmet labonn nuvel lor Rwayom ziska “parti pli lwin lor later.” (Akt 1:8) Lezot pran par dan travay donn temwaynaz otan ki zot kapav ek zot fer bann don materyel pu sutenir avek lazwa sa travay inportan la.

¹⁶ Bann frer win Zezi Kris ki lor later vremem byin apresye sutyin fidel ki zot bann konpaynon lezot muton pe done! Liv Sécurité universelle sous le Règne du “ Prince de paix, “ ki klas esklav ti pibliye an 1986 montre byin zot bann santiman. Li dir: “Depi Dezyem lager Mondyal, profesi Zezi lor ‘lafin sa sistem’ la pe realize an gran parti akoz travay ki ‘gran laful bann lezot muton’ pe fer. . . . Wi, nu dir enn gran mersi sa ‘gran laful’ bann frer ek ser internasyonal ki koz enn kantite lang, pu seki zot pe fer dan enn fason aktif pu realiz profesi [Zezi] dan Matye 24:14!”

‘Pa Vinn Parfe San Pas Par Nu’

17. Dan ki fason bann fidel letan pase ki pu resisite lor later pa pu “vinn parfe san” bann manb 144,000?

¹⁷ Lapot Pol, ki li usi enn manb 144,000, ti fer referans ar bann zom ek bann fam fidel ki ti viv avan Zezi, kan li ti ekrir: “Tu sa bannla, mem si zot finn gayn temwaynaz atraver zot lafwa, zot pa finn gayn [realizasyon] promes la, parski Bondye ti prevwar enn kitsoz meyer pu nu [bann manb 144,000], pu ki zot pa vinn parfe san pas par nu.” (Ebre 11:35, 39, 40) Pandan Reyn Milan, Kris ek so bann 144,000 frer ki dan lesyel pu azir kuma lerwa ek pret ek zot pu devers bann benediksyon ranson sakrifis Kris lor later. Lerla, bann lezot muton pu gayn enn lekor ek enn lespri ki pu “vinn parfe.”—Revelasyon 22:1, 2.

18. (a) Ki bann lezot muton bizin apresye kan zot egzaminn seki Labib dir? (b) Avek ki lesperans bann lezot muton pe atann “revelasyon bann garson Bondye”?

¹⁸ Tusala bizin byin grave dan lespri bann lezot muton pu fer zot konpran kifer bann Lekritir Grek Kretyin atir telman latansyon lor Kris ek so bann frer win ek lor zot rol inportan pu realiz bann proze Zeova. Donk, bann lezot muton konsider sa kuma enn privilez pu sutenir dan tu fason posib klas esklav ki pe atann “revelasyon bann garson Bondye” dan Armagedonn ek pandan Reyn Milan. Zot kapav atann avek inpasyans pu “libere ar esklavaz pese ek pu gayn enn liberte extraodiner kuma bann zanfan Bondye.”—Romin 8:19-21.

Ini dan Lespri Pandan Memoryal

19. Ki “lespri laverite” finn fer pu leres bann manb 144,000 ek zot bann konpaynon, ek kuma zot pu sirtu ini dan sware 28 Mars?

¹⁹ Lanwit le 14 Nizan, lane 33 N.L., dan so lapriyer final, Zezi ti dir: “Mo pe fer enn demann . . pu ki zot kapav vinn enn sel, parey kuma twa, Papa, to ini avek mwa, ek mwa mo ini avek twa, zot usi zot ini avek nu; pu ki kumsa lemond kapav krwar ki to finn avoy mwa.” (Zan 17:20, 21) Parski Li kontan nu, Bondye finn avoy so Garson pu donn so lavi pu sov bann Kretyin ki pu al viv dan lesyel ek lemond bann dimunn ki obeir. (1 Zan 2:2) “Lespri laverite” finn ini bann frer Kris ek bann lezot muton. Dan sware 28 Mars, apre kuse soley, tulede klas pu zwenn ansam pu selebre lamor Kris ek pu rapel tu seki Zeova finn fer pu zot atraver sakrifis so Garson byineme, Kris Zezi. Nu swete ki zot prezans dan sa lokazyon inportan la fortifye zot linite ek renuvle zot determinasyon pu kontiyn fer volonte Bondye, ek montre kumsa ki zot ere ki zot parmi bann ki Zeova kontan.

Revizyon

• Kan eski ti avoy “lespri laverite” lor bann premye Kretyin ek kuma li finn pruve ki li enn “asistan”?

• Kuma eski bann manb 144,000 kone ki zot finn gayn lapel pu al dan lesyel?

• Dan ki bann fason lespri Bondye azir lor bann lezot muton?

• Kuma eski bann lezot muton finn fer dibyin anver bann frer Kris, ek kifer zot pa pu “vinn parfe san” bann win?

[Zimaz lor paz 29]

“Lespri laverite” ti devers lor bann disip zur fet Lapantkot lane 33 N.L.

[Zimaz lor paz 31]

Bann lezot muton finn fer dibyin anver bann frer Kris kan zot finn sutenir bannla pu akonpli lord Bondye pu prese