Kontiyn Servi Zeova Avek enn Leker Ferm
“Mo leker ferm, A Bondye, mo leker ferm.”—PSOM 57:7.
1. Kifer eski nu kapav ena lasirans parey kuma David ti ena?
ZEOVA kapav fer nu vinn ferm dan nu lafwa Kretyin pu ki nu kapav res atase ar vre Relizyon Kretyin kuma so bann serviter ki finn angaze ar Li. (Romin 14:4) Alor, nu kapav ena mem lasirans ki ekrivin psom David ti ena. Li ti santi li puse pu sante: “Mo leker ferm, A Bondye.” (Psom 108:1) Si nu leker ferm, nu pu motive pu viv an akor avek nu langazman ar Bondye. Ek si nu kont lor Li pu gayn direksyon ek lafors, nu pu vinn ferm dan nu determinasyon ek nu konviksyon kuma bann ki fidelman res atase ar Bondye ek nu pu “ena tuzur buku pu fer dan travay Senyer.”—1 Korintyin 15:58.
2, 3. Ki Pol ti pe rod dir par bann konsey ki ena dan 1 Korintyin 16:13?
2 Lapot Pol ti konsey bann premye disip Zezi dan ansyin lavil Korint ek sa konsey la kapav aplik ar nu’si. Li finn dir: “Res eveye, tini ferm dan lafwa, azir kuma bann zom, vinn for.” (1 Korintyin 16:13) An Grek, sakenn sa bann lord la zot dan prezan; donk zot ankuraz enn aksyon ki kontinye. Ki Pol ti pe rod dir par sa konsey la?
3 Nu kapav “res eveye” lor plan spirityel kan nu reziste kont Dyab ek nu vinn pros ar Bondye. (Zak 4:7, 8) Si nu fer Zeova konfyans, sa pu permet nu res ini ek ‘res ferm dan lafwa Kretyin.’ Nu tu—mem tu sa bann madam ki ena parmi nu la—nu bizin “azir kuma bann zom,” setadir servi Bondye avek kuraz kuma bann predikater Rwayom. (Psom 68:11) Nu “vinn for” kan nu kont lor nu Papa ki dan lesyel pu gayn lafors pu fer so volonte.—Filipyin 4:13.
4. Ki ti amenn nu ver nu batem kuma bann Kretyin?
4 Nu ti montre ki nu ti’nn aksepte laverite, kan nu ti angaz nu net ar Zeova ek kan nu ti montre sa par batem dan delo. Me ki finn amenn nu ver batem? Premyerman, nu ti gayn enn konesans egzak Parol Bondye. (Zan 17:3) Sa finn fer nu gayn lafwa ek finn pus nu pu repanti, setadir manifeste enn profon regre pu bann move kitsoz ki nu ti’nn fer avan. (Akt 3:19; Ebre 11:6) Apre sa, nu finn konverti, nu finn vir ledo ar nu bann move pratik pu viv an akor avek volonte Bondye. (Romin 12:2; Efezyin 4:23, 24) Lerla, dan lapriyer nu finn angaz nu avek tu nu leker ar Zeova. (Matye 16:24; 1 Pyer 2:21) Nu finn demann Bondye enn bon konsyans ek nu finn batize pu montre nu langazman avek Li. (1 Pyer 3:21) Si nu reflesi lor sa bann etap la, sa pu ed nu pu fixe nu lespri lor linportans pu kontiyn fer zefor pu viv an akor avek nu langazman ek kontiyn servi Zeova avek enn leker ferm.
Kontiyne U Resers pu Gayn Konesans Egzak
5. Kifer eski nu bizin kontiyn absorb konesans Labib?
5 Pu viv an akor avek nu langazman ar Bondye, nu bizin kontiyn gayn konesans Labib ki fortifye nu lafwa. Kan nu ti fek konn laverite lor Bondye, li ti vremem enn plezir pu pran manze spirityel! (Matye 24:45-47) Sa bann “repa” la ti ena bon gu—ek zot finn nuri nu byin lor plan spirityel. Asterla, li inportan ki nu kontiyn pran manze spirityel ki nurisan pu ki nu gard enn leker ferm kuma bann serviter Zeova ki finn angaze ar Li.
6. Kuma eski u kapav finn gayn led pu devlop dan fon u leker enn rekonesans pu laverite ki ena dan Labib?
6 Nu bizin fer zefor pu gayn plis konesans Labib. Li parey kumadir nu pe rod bann trezor ki finn kasyet—sa demann zefor. Me kan nu truv “konesans Bondye” li vremem enn rekonpans! (Proverb 2:1-6) Kan pu premye fwa enn proklamater ti etidye Labib avek u, sirman li ti servi liv Konesans Ki Amenn ver Lavi pu Tuletan. Devet zot finn pas buku letan, kitfwa plis ki enn sesyon, pu kuver sak sapit. U ti tir buku profi kan ti lir ek ti explik bann verse ki site. Si enn pwin ti difisil pu konpran, proklamater la ti explik u li. Li ti prepar li byin, li ti priye pu gayn lespri Bondye, ek li ti ed u pu devlop dan fon u leker enn rekonesans pu laverite.
7. Ki kalifye enn dimunn pu li anseyn lezot laverite lor Bondye?
7 Sa zefor la ti apropriye, parski Pol ti ekrir: “Les sa kikenn ki pe aprann laparol enn fason oral la, partaz dan tu bon kitsoz avek sa kikenn ki pe donn li sa lanseynman la.” (Galat 6:6) Isi, tex Grek la indike ki ti pe fer bann lanseynman Parol Bondye rant dan lespri ek leker sa kikenn ki ti “pe aprann laparol enn fason oral” la. Kan u gayn lanseynman kumsa, sa kalifye u pu anseyn lezot ankor. (Akt 18:25) Pu respekte u langazman, u bizin gard u bon lasante spirityel ek res ferm. Pu kapav fer sa, u bizin kontiyn etidye Parol Bondye.—1 Timote 4:13; Tit 1:13; 2:2.
Rapel Kan U Ti Repanti ek Konverti
8. Kuma eski li posib gard enn kondwit ki fer Bondye plezir?
8 Eski u rapel sulazman ki u ti resanti kan u ti konn laverite, kan u ti repanti ek resanti pardon Bondye ki baze lor u lafwa dan ranson sakrifis Zezi? (Psom 32:1-5; Romin 5:8; 1 Pyer 3:18) Sirman u pa anvi return dan enn lavi pese. (2 Pyer 2:20-22) Parmi bann lezot kitsoz ki pu ed u, ena lapriyer. Si u priye Zeova regilyerman, sa pu ed u gard enn bon kondwit, viv an akor avek u langazman ek kontiyn servi Zeova fidelman.—2 Pyer 3:11, 12.
9. Enn fwa ki u finn aret u bann move pratik, ki semin u bizin swiv?
9 Pwiski u finn fini konverti ek aret bann move pratik, kontiyn rod led Bondye pu gard u leker ferm. Li inpe parey kumadir u ti pe al dan enn move direksyon, me apre ki u finn get enn map ki pena erer, u kumans pran bon semin. Asterla, pa perdi semin la. Kontiyn kont lor direksyon Bondye, ek determine pu res lor sa semin lavi la.—Izai 30:20, 21; Matye 7:13, 14.
Zame Pa Bliye U Langazman ek U Batem
10. Ki bann pwin nu bizin gard byin dan nu lespri konsernan nu langazman avek Bondye?
10 Rapel byin ki u ti fer enn langazman ar Zeova dan lapriyer, avek lide pu servi Li pu tuletan dan lavenir. (Zid 20, 21) Angaze vedir met apar, uswa separe, pu fer enn kitsoz sakre. (Levitik 15:31; 22:2) U langazman pa ti ni enn lakor tanporer ni enn lobligasyon anver bann zom. Li ti enn langazman permanan ar Suverin Liniver, ek pu viv an akor avek sa langazman la, nu bizin res fidel ar Bondye tutlong nu lavi. Wi, ‘ki nu viv uswa ki nu mor, nu pu Zeova.’ (Romin 14:7, 8) Nu boner depann lor si nu sumet ar so volonte ek si nu kontiyn servi Li avek enn leker ferm.
11. Kifer eski u bizin rapel u batem ek so sinifikasyon?
11 Rapel tuletan u batem kuma enn sinbol langazman ki u ti fer ar Bondye avek tu u leker. Personn pa ti fors u pu batize, parski u ti pran sa desizyon la par umem. Asterla, eski u determine pu swazir pu viv an akor avek volonte Bondye tutlong u lavi? U ti demann Bondye enn bon konsyans ek u ti batize pu montre u langazman avek Li. Respekte u langazman, kumsa u pu prezerv sa bon konsyans la. Lerla, Zeova pu avoy bann gran benediksyon lor u.—Proverb 10:22.
U Prop Volonte Zwe enn Rol
12, 13. Ki rapor ena ant nu prop volonte avek langazman ek batem?
12 Langazman ek batem finn amenn vremem bann gran-gran benediksyon lor plizir milyon dimunn partu lor later. Kan nu montre nu langazman ar Bondye par batem delo, nu mor an seki konsern nu lavi pase, me nu tuzur kapav swazir seki nu anvi fer. Avredir nu, antan ki bann krwayan ki finn gayn bon linstriksyon, par nu prop volonte ki nu ti angaz nu ar Bondye dan lapriyer ek pu pran batem. Pu angaz nu ar Bondye ek pu pran batem, nu bizin determine ki ete volonte Bondye ek lerla swazir numem pu fer li. (Efezyin 5:17) Lerla, nu imit Zezi, ki ti swazir volonterman pu les travay sarpantye dekote. Li ti pran batem ek li ti donn limem net pu fer volonte so Papa ki dan lesyel.—Psom 40:7, 8; Zan 6:38-40.
13 Dapre proze Bondye Zeova, so Garson ti pu vinn “parfe atraver bann sufrans.” Alor, Zezi ti bizin swazir volonterman pu siport sa bann sufrans la fidelman. Pu sa li finn “sipliye ek li finn [demande] . . . avek bann kriye byin for ek larm, ek [Bondye] finn ekut li akoz lakrint ki li ti ena pu Li.” (Ebre 2:10, 18; 5:7, 8) Si nu ena sa mem kalite lakrint ranpli ar respe la pu Bondye, nu’si nu kapav sir ki Bondye pu ‘ekut’ nu avek faver, ek nu kapav ena lasirans ki Zeova pu rann nu ferm kuma so bann Temwin ki finn angaze.—Izai 43:10.
U Kapav Gard enn Leker Ferm
14. Kifer eski nu bizin lir Labib tulezur?
14 Ki pu ed u pu gard enn leker ferm ek kumsa viv an akor avek u langazman ar Bondye? Lir Labib tulezur avek lobzektif pu kontiyn ogmant u konesans Parol Bondye. Sa li enn kitsoz ki “esklav fidel ek avize” pa aret ankuraz nu pu fer. Nu gayn sa konsey la parski nu bizin kontiyn mars dan laverite Bondye pu nu kapav viv an akor avek nu langazman. Si lorganizasyon Zeova an tut konesans ti aksepte bann fos lanseynman, abe zame pa ti pu konsey bann Temwin Zeova, ni bann avek ki zot prese, pu lir Labib.
15. (a) Ki nu bizin pran an konsiderasyon kan nu pran bann desizyon? (b) Kifer eski nu kapav dir ki travay pas an dezyem dan lavi enn Kretyin?
15 Kan u pran bann desizyon, u bizin tuletan gete ki lefe sa kapav ena lor manyer ki u respekte u langazman avek Zeova. Sa kapav konsern u travay. Eski u fer zefor enn fason ki u travay permet u progrese dan vre ladorasyon? Bann patron an zeneral truve ki bann Temwin Zeova bann travayer efikas, lor ki zot kapav konte. Zot finn usi remarke ki sa bann Kretyin angaze ar Bondye la pa motive par lanbisyon pu vinn enn kikenn dan sa lemond la ek zot pa fer konpetisyon ar lezot pu gayn bann bel-bel pozisyon pu fer buku kas. Kifer? Parski bann Temwin pa galup deryer dibyin, laglwar, grander, uswa puvwar. Fer volonte Bondye, sa mem kitsoz ki pli inportan pu bann ki viv an akor avek zot langazman. Enn travay profann ki permet zot gayn bann kitsoz neseser pu viv, sa li pas an dezyem dan zot lavi. Parey kuma lapot Pol, zot travay prinsipal se zot minister Kretyin. (Akt 18:3, 4; 2 Tesalonisyin 3:7, 8; 1 Timote 5:8) Eski u gard bann lintere Rwayom dan premye plas dan u lavi?—Matye 6:25-33.
16. Ki nu kapav fer si enn lekse traka fer nu gayn difikilte pu viv an akor avek nu langazman avek Bondye?
16 Sertin ti kitfwa santi zot kraze par tu sort kalite traka avan ki zot ti konn laverite. Me komye zot leker ti deborde ar lazwa, rekonesans, ek lamur pu Bondye kan zot ti’nn adopte lesperans Rwayom! Si zot reflesi lor bann benediksyon ki zot pe gayne depi sa, sa kapav ed zot pu viv an akor avek zot langazman ar Zeova. Asterla, ki kapav fer si enn lekse traka lor bann problem ki ena tulezur dan sa sistem la pe menas pu tuf “laparol Bondye,” parey kuma bann pikan anpes bann ti plant grandi? (Lik 8:7, 11, 14; Matye 13:22; Mark 4:18, 19) Si u santi ki sa pe kumans ariv u uswa u fami, zet u traka lor Zeova ek priye ki Li pu ed u pu grandi dan lamur ek rekonesans. Si u zet u fardo lor Li, Li pu sutenir u ek Li pu donn u kuraz pu kontiyn servi Li dan lazwa avek enn leker ferm.—Psom 55:22; Filipyin 4:6, 7; Revelasyon 2:4.
17. Kuma eski li posib fer fas ar bann sityasyon byin-byin difisil?
17 Kontiyn priye Zeova regilyerman, parey kuma u ti priye kan u ti angaz u ar Li. (Psom 65:2) Kan u tante pu fer seki move uswa kan u fer fas ar enn sityasyon byin difisil, rod direksyon Bondye ek so led pu swiv sa direksyon la. Rapel byin ki nu bizin lafwa, parski disip Zak ti ekrir: “Alor, si kikenn parmi zot mank sazes [pu fer fas ar enn sityasyon difisil], les li kontiyn demann Bondye, parski Li kontan donn tu seki demann li, san fer repros; ek li pu gayn sa. Me, les li kontiyn demann sa dan lafwa, san ki li ena dut, parski seki dute li parey kuma enn vag lamer ki puse par divan ek ki balote. Avredir, fode pa enn zom kumsa panse ki li pu gayn kitsoz ar Zeova; li enn zom indesi, ki pa stab dan so bann semin.” (Zak 1:5-8) Si enn leprev pe pez telman lur lor nu, nu kapav gard sa lasirans la: “Okenn lezot tantasyon pa finn vinn lor zot, eksepte seki tu dimunn gayne. Me Bondye fidel, ek Li pa pu les zot gayn enn tantasyon ki zot pa pu kapav siporte, me ansam avek sa tantasyon la, Li pu usi uver enn semin pu ki zot kapav siport li.”—1 Korintyin 10:13.
18. Ki nu kapav fer si enn pese ki nu pe fer an kasyet pe afebli nu determinasyon pu viv an akor avek nu langazman ar Bondye?
18 Asterla, ki u pu fer si enn pese ki u fer an kasyet pe fatig u konsyans ek pe afebli u determinasyon pu viv an akor avek u langazman ar Bondye? Si u repanti, u kapav sulaze kan u aprann ki Zeova ‘pa pu mepriz enn leker ki’nn kase ek ki’nn kraze.’ (Psom 51:17) Rod led bann ansyin pwiski u kone ki, parey kuma Zeova, zot pu pran byin serye u dezir pu regayn enn bon relasyon avek u Papa ki dan lesyel. (Psom 103:10-14; Zak 5:13-15) Lerla, avek enn lafors spirityel renuvle ek enn leker ferm, u pu kapav mars lor bann semin drwat ek u pu truve ki li posib pu viv an akor avek u langazman ar Bondye.—Ebre 12:12, 13.
Kontiyn Servi Avek enn Leker Ferm
19, 20. Kifer eski li byin inportan ki nu kontiyn viv an akor avek nu langazman?
19 Dan sa bann letan difisil la, nu bizin fer buku zefor pu viv an akor avek nu langazman ek kontiyn servi Bondye avek enn leker ferm. Zezi ti dir: “Seki pu andire ziska lafin ki pu sape.” (Matye 24:13) Pwiski nu pe viv dan bann “dernye zur,” lafin kapav vini dan ninport ki moman. (2 Timote 3:1) Anplis, personn parmi nu pa kapav sir ki demin li pu ankor tuzur vivan. (Zak 4:13, 14) Ala kifer li byin inportan ki nu kontiyn viv an akor avek nu langazman zordi!
20 Lapot Pyer ti atir latansyon lor la dan so dezyem let. Li ti montre ki parey kuma bann ki pa ti obeir Bondye ti mor dan Deliz, later sinbolik usi, setadir move sosyete imin, pu detrir pandan “zur Zeova.” Alor Pyer dir: “Ki kalite dimunn zot bizin ete dan bann aksyon ki montre zot kondwit sin ek zot latasman avek Bondye”! Li finn donn usi sa bann parol lankurazman la: “Byineme, zot ki konn sa bann kitsoz la an avans, res lor zot gard pu ki zot pa les zot gayne [par bann fos anseynan ek bann dimunn ki pa obeir Bondye] ek zot pa perdi zot prop pozisyon ferm.” (2 Pyer 3:5-17) Li pu vremem tris si enn kikenn batize kit semin laverite ek apre li mor kuma enn kikenn ki pa finn reysi gard enn leker ferm!
21, 22. Kuma eski bann parol ki ena dan Psom 57:7 ti aplike dan ka David ek dan ka bann vre Kretyin?
21 U pu fortifye u determinasyon pu viv an akor avek u langazman ar Bondye si u mazinn sa zur ere kan u ti pran batem la ek si u rod led Bondye pu ki u bann parol ek u bann aksyon fer so leker kontan. (Proverb 27:11) Zeova zame pa desevwar so pep, alor nu bizin res fidel ar Li. (Psom 94:14) Li ti montre enn gran konsiderasyon ek pitye kan Li ti kas plan bann lennmi ek Li ti sap David. Avek rekonesans, David ti dir ki li ti ena enn lamur byin ferm ek ki pa kapav detrir pu sa Kikenn ki ti’nn sap li la. Avek enn profon santiman, li ti sante: “Mo leker ferm, A Bondye, mo leker ferm. Mo pu sante ek mo pu fer bann melodi.”—Psom 57:7.
22 Parey kuma David, bann vre Kretyin pa les zot latasman avek Bondye afebli. Avek enn leker ferm, zot rekonet ki Zeova sov zot ek Li prezerv zot lavi. Alor, avek lazwa zot sant bann luanz pu Li. Si u leker ferm, li pu fer Bondye konfyans, ek avek so led u pu kapav respekte u langazman. Wi, u pu kapav resanble “sa kikenn drwat” lor ki sa ekrivin psom la ti sante: “Li pa pu per bann move nuvel. So leker ferm, li ena konfyans an Zeova.” (Psom 112:6, 7) Avek lafwa ek ful konfyans an Bondye, u kapav viv an akor avek u langazman ek kontiyn servi Zeova avek enn leker ferm.
Eski U Rapel?
• Kifer eski nu bizin kontinye absorb konesans egzak ki ena dan Labib?
• Kifer eski nu bizin tuletan rapel kan nu ti repanti ek konverti?
• Ki profi nu tire kan nu rapel nu langazman ek nu batem?
• Ki pu ed nu kontiyn servi Zeova avek enn leker ferm?
[Zimaz lor paz 28]
Si nu fer nu minister Kretyin vinn nu travay prinsipal, sa pu ed nu pu servi Zeova avek enn leker ferm
[Zimaz lor paz 28]
Eski u pe kontiyn lir Parol Bondye tulezur pu gard u lasante spirityel?