Res Ferm, ek Gayn Lakurs pu Lavi

SI U ti ena pu vwayaze lor enn lamer an plin siklonn, ki kalite bato u ti pu swazire? Eski u ti pu swazir enn ti bato frel-frel, uswa enn gran bato byin solid? Pena dut ki u ti pu swazir sa gran bato la, parski li pu kapav travers bann vag byin vyolan.

Amezir ki nu pe pas dan sa lemond azite ek danzere la, nu fer fas ar bann leprev ki destabiliz nu. Bann zenn par egzanp, defwa kapav santi zot dan konfizyon. Zot pa tro sir ki semin zot bizin pran dan sa lemond kot ena tu kalite lide ek lamod la. Sertin ki finn fek vinn Kretyin kapav ankor ena bann dut. Mem bann ki pandan lontan finn res ferm dan servis fidel pu Bondye, zot kapav pe pas par enn leprev parski seki zot ti pe atann pa finn realize net.

Se pa zis dan nu lepok ki bann dimunn ena sa bann santiman la. Bann fidel serviter Zeova, kuma Moiz, Zob ek David, zot usi defwa zot ti santi zot destabilize. (Nonm 11:14, 15; Zob 3:1-4; Psom 55:4) Me purtan, zot finn amenn enn lavi ki ti montre zot latasman solid pu Zeova. Zot bon legzanp ankuraz nu pu res ferm parey kuma zot. Me, Satan anvi ki nu kit sa lakurs pu lavi pu tuletan la. (Lik 22:31) Alor, kuma eski nu kapav res ferm, “solid dan lafwa”? (1 Pyer 5:9) Ek kuma eski nu kapav fortifye nu bann frer ek ser?

Zeova Ule ki Nu Res Ferm

Si nu fidel ar Zeova, Li pu tuletan la pu ed nu pu res stab. David, enn ekrivin Psom ti fer fas ar buku sityasyon byin difisil. Me li ti fer Bondye konfyans ek akoz sa li ti kapav sante: “[Zeova] finn tir mwa dan enn tru kot delo pe desann avek enn gran tapaz, dan labu profon. Li finn met mwa debut lor enn ros byin ot ek Li finn fer mo bann pa vinn solid.”—Psom 40:2.

Zeova fer nu vinn for pu nu kapav konbat “sa bon lager pu lafwa la.” Kumsa nu pu kapav “byin sezi lavi eternel.” (1 Timote 6:12) Li pran usi bann dispozisyon pu ed nu res stab ek gayn viktwar dan nu lager spirityel. Lapot Pol ti ankuraz bann Kretyin pu “kontiyn gayn puvwar dan Senyer ek dan pwisans so lafors.” Li finn usi ankuraz zot pu “met ekipman lager spirityel Bondye pu ki zot kapav tini ferm kont bann pyez ki Dyab instale.” (Efezyin 6:10-17) Me ki kapav destabiliz nu? Ek kuma eski nu kapav protez nu kont bann linflyans danzere ki kapav anpes nu pu res stab?

Fer Atansyon Bann Kitsoz Ki Kapav Anpes Nu pu Res Stab

Li bon ki nu rapel sa kitsoz byin inportan la: Bann desizyon ki nu pran kapav enn zur afekte, swa dan enn fason pozitif uswa negatif, nu stabilite antan ki Kretyin. Bann zenn truv zot devan bann desizyon ki konsern par egzanp zot karyer, enn ledikasyon byin avanse, ek maryaz. Bann adilt kitfwa bizin deside si zot pu al res dan enn lot landrwa uswa si zot pu aksepte enn travay siplemanter. Tulezur nu pran bann desizyon lor kuma nu pu servi nu letan ek lor enn kantite lezot kitsoz ankor. Ki pu ed nu pu pran bann bon desizyon ki pu fer nu vinn bann serviter Bondye ankor pli stab? Enn ser ki Kretyin depi byin lontan finn dir: “Kan mo bizin pran bann desizyon, mo demann Zeova pu ed mwa. Mo panse ki li byin inportan ki nu aksepte ek nu aplik bann konsey ki truv dan Labib, ki nu gayne dan bann reynion, par bann ansyin ek dan bann piblikasyon baze lor Labib.”

Kan nu pran bann desizyon, nu bizin demann numem: ‘Dan sinkan uswa dan dizan, eski mo pu kontan ki mo’nn pran sa bann desizyon ki mo pe pran la zordi, uswa mo pu regrete? Eski mo fer tu pu asir mwa ki mo bann desizyon pa pu anpes mwa pu res stab lor plan spirityel, me okontrer pu ed mwa pu progrese lor plan spirityel?’—Filipyin 3:16.

Sertin frer ek ser batize finn arive amenn enn lavi ki pa stab. Kifer? Se parski zot finn sede devan bann tantasyon uswa zot finn les zot ale ziska enn pwin kot zot ti pre pu dezobeir bann lalwa Bondye. Sertin ki finn exkli dan kongregasyon parski zot finn kontiyn pratik enn pese ek zot pa’nn repanti, finn travay dir pu zot kapav reintegre. Me parfwa, enn tipe apre, zot re-exkli akoz mem kalite erer. Eski se parski zot pa finn priye pu gayn led Bondye pu ‘degut seki byin move ek res atase avek seki bon’? (Romin 12:9; Psom 97:10) Nu tu nu bizin ‘kontiyne fer bann semin vinn drwat pu [nu] lipye.’ (Ebre 12:13) Donk, anu get sertin pwin ki kapav ed nu pu res stab lor plan spirityel.

Res Ferm Grasa Laktivite Kretyin

Enn mwayin pu gard enn vites regilye dan nu lakurs pu lavi se kan nu ena buku pu fer dan laktivite predikasyon lor Rwayom Bondye. Wi, nu minister Kretyin li enn gran led. Kuma? Li ed nu pu gard nu leker ek nu lespri byin konsantre pu fer volonte Bondye ek byin fixe lor pri ki nu pu gayne setadir lavi pu tuletan. Dan sa domenn la, Pol ti ankuraz bann Korintyin: “Mo bann frer byineme, vinn ferm ek solid, ena tuzur buku pu fer dan travay Senyer, parski zot kone ki zot lapenn pa pu dan vid devan Senyer.” (1 Korintyin 15:58) Enn kikenn ki “ferm” se enn kikenn ki “res byin fix dan so plas.” Enn kikenn ki “solid” li parey kuma enn bato ki ‘res byin amare ar so lank ek li pa les nanyin detas li kot li’nn amare.’ Donk, kan nu res okipe dan nu minister sa kapav ed nu pu res stab dan nu lakurs Kretyin. Ed bann dimunn pu aprann konn Zeova, sa donn nu lavi enn sans ek sa rann nu ere.—Akt 20:35.

Pauline se enn ser ki finn pas plis ki 30 an kuma enn misyoner ek lezot form servis predikasyon aplintan. Li dir: “Predikasyon se enn proteksyon parski kan mo koz avek lezot sa donn mwa ankor plis lasirans ki mo ena laverite.” Nu gayn sa kalite lasirans la kan regilyerman nu partisip usi dan lezot aktivite Kretyin, kuma par egzanp asiste bann reynion kot nu al ador Bondye ek etidye Labib personelman.

Nu Res Stab Grasa Nu Bann Frer ek Ser Ki Ini par Lamur

Nu form parti dan enn lorganizasyon internasyonal bann vre adorater Bondye. Sa kapav ena enn gran lefe lor nu ek ed nu pu res stab. Wi, li vremem enn benediksyon ki nu form parti dan sa fami internasyonal la ki ini par lamur! (1 Pyer 2:17) Ek nu’si nu kapav ed nu bann frer ek ser pu res stab lor plan spirityel.

Anu get legzanp Zob, ki ti enn kikenn ki drwat, ek anu get bann bon aksyon ki li ti fer pu ed lezot. Mem Elifaz, so fos konsolater, ti bizin rekonet sa: “To bann parol ti relev sa kikenn ki’nn tonbe la, ek to ti fortifye bann zenu ki’nn feb.” (Zob 4:4) Eski nu pe reysi dan sa domenn la? Nu tu nu ena responsabilite pu ed nu bann frer ek ser spirityel pu kontiyne dan servis Bondye. Kan nu ansam avek nu bann frer ek ser, nu kapav azir an akor avek sa bann parol la: “Fortifye bann lamin ki feb, ranforsi bann zenu ki pe tonbe.” (Izai 35:3) Kifer eski u pa met lobzektif pu fortifye ek ankuraz enn uswa de konpaynon sak fwa ki u ansam avek zot? (Ebre 10: 24, 25) Wi, nu kapav vremem ed nu bann frer ek ser ki res ferm avek lespwar pu gayn lakurs pu lavi. Kuma? Se kan nu felisit zot ek nu montre nu rekonesans par nu bann parol ankurazan pu bann zefor ki zot pe kontiyn fer pu fer Zeova plezir.

Bann ansyin kapav fer buku pu ankuraz bann nuvo. Zot kapav fer sa kan zot donn bann sigzesyon byin itil ek bann bon konsey ki sorti dan Labib ek kan zot travay avek bannla dan predikasyon. Lapot Pol ti tuletan sezi tu lokazyon pu fortifye lezot. Li ti byin anvi truv bann Kretyin dan Rom, pu ki li kapav fortifye zot lor plan spirityel. (Romin 1:11) Li ti konsider so bann frer ek ser dan Filip, ki li ti byin kontan, kuma so “lazwa ek so kuronn.” Li ti ankuraz zot pu “res ferm kumsa mem dan Senyer.” (Filipyin 4:1) Kan Pol finn tann bann difikilte ki bann frer dan Tesalonik ti pe gayne, li finn avoy Timote pu ‘fortifye zot ek rekonfort zot, pu ki personn pa afekte akoz bann maler.’—1 Tesalonisyin 3:1-3.

Lapot Pol ek lapot Pyer ti rekonet ek ti apresye zefor fidel zot bann frer ek ser. (Kolosyin 2:5; 1 Tesalonisyin 3:7, 8; 2 Pyer 1:12) Anu fer parey kuma zot, setadir pa konsantre nu zis lor febles nu bann frer. Okontrer, anu get zot bann bon kalite ek zot konba ki zot pe amene pu res ferm ek donn Zeova loner.

Si nu negatif uswa nu kontan kritike, san ki nu rann nu kont, fason ki nu fer kapav fer lezot truv li pli difisil pu res ferm dan lafwa. Wi, li bon ki nu rapel ki nu bann frer zot “bulverse” par bann problem dan sa lemond la! (Matye 9:36) Dan kongregasyon, zot bizin kapav atann pu gayn rekonfor ek sulazman. Donk, ki nu tu, nu fer tu seki nu kapav pu fortifye nu bann frer ek ser ek ed zot pu res ferm.

Defwa, li kapav arive ki ena ki tret nu dan enn sertin fason ki nu dekuraze, ek sa kapav diminye nu determinasyon pu res ferm. Eski nu pu les enn komanter uswa enn aksyon inpe dir ralanti nu dan nu servis pu Zeova? Fode zame nu les kikenn fer nu perdi nu determinasyon pu res ferm!—2 Pyer 3:17.

Bann Promes Bondye Ed Nu pu Res Stab

Promes Zeova konsernan lavenir merveye ki nu pu ena kan so Rwayom pu reyne, donn nu enn lespwar. Ek sa ed nu pu res ferm. (Ebre 6:19) Lasirans ki nu ena ki Bondye pu realiz so bann promes, pus nu pu ‘res eveye ek tini ferm dan lafwa.’ (1 Korintyin 16:13; Ebre 3:6) Me nu lafwa kapav teste si nu panse ki realizasyon sertin bann promes Bondye pe tarde. Donk, li byin inportan ki nu res lor nu gard, atansyon nu les nu anbete par bann fos lanseynman ek nu abandonn nu lesperans.—Kolosyin 1:23; Ebre 13:9.

Move legzanp bann Izraelit ki ti truv lamor parski zot pa ti ena lafwa dan bann promes Zeova, bizin kuma enn lavertisman pu nu. (Psom 78:37) Olye ki nu fer kuma zot, anu res ferm ek servi Bondye ek tuzur mazine ki nu pe viv dan bann dernye zur. Enn ansyin ki ena buku lexperyans dir: “Tulezur mo viv kumadir demin gran zur Zeova pu vini.”—Yoel 1:15.

Wi, gran zur Zeova byin pre. Me tank nu res pros ar Bondye, nu pena nanyin pu per. Si nu res atase ar so bann prinsip ki drwat ek nu res ferm, nu pu kapav reysi galup sa lakurs pu lavi pu tuletan la!—Proverb 11:19; 1 Timote 6:12, 17-19.

[Zimage page 19]

The Complete Encyclopedia of Illustration/J. G. Heck

[Zimage page 21]

Eski u pe fer tu seki u kapav pu ed bann frer ek ser pu res ferm?