Kuma Bann Andikap Pu Disparet

MAZINN enn ku: Lizye enn aveg truv kler, zorey enn surd tann tu son, lalang bann ki pa koze kriye for avek lazwa, ek lipye bann bwate vinn ferm ek kapav marse! Nu pa pe koz lor bann nuvo progre dan domenn medikal, me lor bann rezilta ki pu ena kan Bondye Limem pu azir an faver limanite. Labib anonse: “Sa lepok la lizye bann aveg pu uver, ek zorey ban surd pu debuse. Sa lepok la sa kikenn ki bwate la pu sote parey kuma serf, ek lalang bann ki pa konn koze pu kriye dan lazwa.” (Izai 35:5, 6) Me kuma eski nu kapav sir ki sa profesi extraordiner ki vre la pu realize?

Premyerman, kan Zezi Kris ti lor later, li ti vremem geri tu sort kalite maladi ek andikap. Anplis, buku temwin—mem so bann lennmi—ti truv laplipar so bann mirak. Avredir, dan omwin enn lokazyon, bann lennmi ki pa ti krwar li, ti fer enn lanket byin detaye lor enn gerizon ki li ti fer pu zot kapav abes Zezi. Me, zot ti byin dekonserte, parski seki zot ti fer ti konfirm so mirak. (Zan 9:1, 5-34) Apre ki Zezi ti fer enn lot mirak ki pa ti kapav proteste, zot ti agase ek zot ti dir: “Ki nu bizin fer, parski sa zom la pe akonpli tro buku siyn?” (Zan 11:47) Parkont, bann dimunn ordiner pa ti indiferan, parski buku ti kumans ena lafwa dan Zezi.—Zan 2:23; 10:41, 42; 12:9-11.

Bann Mirak Zezi —Enn Avangu Gerizon Iniversel

Bann mirak Zezi pa ti zis pruve ki limem li ti Mesi ek Garson Bondye. Zot ti furni enn baz pu ena lafwa dan bann promes Labib ki limanite ki obeir pu geri dan lavenir. Parmi sa bann promes la ena profesi Izai sapit 35, ki mansyone dan premye paragraf. Izai 33:24 dir konsernan lasante fitir bann dimunn ki ena lakrint pu Bondye: “Okenn abitan pa pu dir: ‘Mo malad.’” Pareyman, Revelasyon 21:4 promet: “[Bondye] pu suy tu larm dan zot lizye, ek pa pu ena lamor, pu nepli ena dey, kriye ek duler. Bann kitsoz avan [bann problem ek sufrans ki ena zordi] finn disparet.”

Dimunn priye regilyerman pu ki sa bann promes la realize kan zot repet lapriyer model Zezi. Enn parti sa lapriyer la dir: “Ki to rwayom vini. Ki to volonte fer lor later parey kuma dan lesyel.” (Matye 6:10) Wi, parmi volonte Bondye ena later ek limanite. Maladi ek bann andikap, mem si pe permet zot pu enn sertenn rezon, byinto zot pu nepli egziste; zot pu nepli gat “marspye” Bondye pu tuzur.—Izai 66:1.a

Geri San Peye

Zezi ti geri ninport ki sufrans ki dimunn ti gayne, san okenn difikilte, san tarde, ek san demann larzan. Byinsir, sa nuvel la ti fane kuma dir dife, ek dan enn ti moman,“bann gran laful pa finn tarde pu koste ar li, zot ti ena avek zot bann dimunn bwate, andikape, aveg, ki pa ti kapav koze, ek buku lezot malad, ek kumadir zot finn zet bannla devan lipye Zezi, ek li finn geri zot.” Kuma eski bann dimunn la ti reazir? Matye ki ti temwin sa levennman la kontiyn rakonte: “Laful ti etone kan zot finn truv seki pa kapav koze pe koze ek seki bwate pe marse ek seki aveg pe truv kler, ek zot finn donn laglwar Bondye Izrael.”—Matye 15:30, 31.

Note ki Zezi pa ti swazir bann dimunn dan laful pu li geri zot—enn trik ki bann ki anbet dimunn servi. Okontrer, bann fami ek kamarad bann ki ti malad la “kumadir [ti] zet bannla devan lipye [Zezi], ek li [ti] geri zot.” Asterla anu reget detrwa legzanp presi lor kapasite Zezi pu geri.

Aveg: Kan Zezi ti Zerizalem, li ti fer enn misye ki ti “aveg depi so nesans” truv kler. Dan lavil, ti konn sa misye la kuma enn aveg ki demann sarite. Donk u kapav mazinn lazwa ek tapaz ki ti ena kan bann dimunn ti truve ki li ti pe marse ek li ti truv kler! Purtan, pa tu dimunn ti kontan. Dekonserte par seki Zezi ti dir zot lor zot mesanste, bann Farizyin, sertin manb enn sekt Zwif inportan ki ti ena enn gran linflyans, ti pe rod kutkekut bann prev pu pyez Zezi. (Zan 8:13, 42-44; 9:1, 6-31) Alor, zot ti kestyonn sa misye ki ti’nn geri la. Apre sa, zot ti kestyonn so bann paran, ek apre zot ti’nn repoz sa misye la bann kestyon. Me lanket bann Farizyin ti sinpleman konfirm mirak Zezi, ek sa ti met zot ankoler. Soke par mesanste bann relizye ipokrit, sa misye ki ti’nn geri la ti dir: “Depi lepok lontan zame nu pa finn tande ki enn kikenn finn fer enn aveg depi so nesans truv kler. Si sa misye la pa sorti kot Bondye, li pa ti pu kapav fer nanyin.” (Zan 9:32, 33) Parski li ti’nn exprim so lafwa fran-fran ek dan enn fason byin reflesi, bann Farizyin “ti zet li deor,” setadir zot ti met li deor dan sinagog.—Zan 9:22, 34.

Surd: Kan Zezi ti dan Dekapol, enn landrwa dan Les Larivyer Zurdin, “bann dimunn sa landrwa la ti amenn enn misye ki ti surd ek ki pa ti kapav koze, ar li.” (Mark 7:31, 32) Zezi pa ti zis geri sa dimunn la, me li ti servi usi so kapasite pu diserne ek pu konpran santiman bann surd, ki kitfwa ti zene dan bann laful. Labib dir nu ki Zezi ti amenn sa misye surd la “apar, andeor laful” ek li ti geri li. Ankor enn fwa, bann ki ti temwin ti “etone dan enn fason extraordiner,” ek zot ti dir: “Li finn fer tu kitsoz byin. Li finn mem fer bann surd tande ek bann ki pa konn koze, koze.”—Mark 7:33-37.

Paralize: Alor ki Zezi ti dan Kapernaom, bann dimunn ti amenn enn misye paralize lor enn lili. (Matye 9:2) Verse 6 ziska 8 dekrir seki finn arive. “[Zezi] finn dir paralize la: ‘Leve, pran to lili, ek al to lakaz.’ Dimunn la finn leve ek li finn al kot li. Kan bann laful ti truv sa, zot ti gayn per, ek zot ti donn Bondye laglwar, parski Li finn donn dimunn sa lotorite la.” Zezi ti fer sa mirak la an prezans so bann disip ek so bann lennmi tulede. Note ki bann disip Zezi, ki pa ti avegle par laenn ek move panse lor lezot, “ti donn Bondye laglwar” pu seki zot ti’nn temwin.

Maladi: “Enn kikenn ki ti ena lalep usi ti vinn ver [Zezi], li ti sipliy li azenu, ek li ti dir li: ‘Si to anvi, to kapav rann mwa pir.’ Kan li finn tann sa, li finn resanti pitye, li finn avans so lamin, ek li finn tus misye la, ek li finn dir li: ‘Mo anvi. Vinn pir.’ Ek deswit so lalep finn disparet lor li.” (Mark 1:40-42) Note ki Zezi pa ti geri sa dimunn la akoz kiafer, me plito parski li ti ena bann santiman profon pu li. Fer kumadir u ti ena lalep. Ki u ti pu resanti si ti geri u enn sel ku ek san demann u larzan ar enn maladi terib ki deplizanpli pe defigir u lekor ek pe fer u vinn enn kikenn ki rezete par lasosyete? Alor, sirman u konpran kifer enn lot dimunn ki ti ena lalep ek ki ti’nn geri par enn mirak “ti bes so latet ek li ti tom azenu devan lipye Zezi, pu remersye li.”—Lik 17:12-16.

Blesir: Dernye mirak ki Zezi ti fer avan ki aret li ek met li lor poto, ti enn gerizon. Dan enn muvman rapid kont bann ki ti’nn vinn aret Zezi, lapot Pyer, “ki ti ena enn lepe, finn tir li ek li finn tap esklav gran pret enn kut sa ek li finn sot so zorey drwat.” (Zan 18:3-5, 10) Dan sa mem resi ki Lik finn ekrir la nu lir ki Zezi “ti tus zorey la ek li ti geri li.” (Lik 22:50, 51) Ankor enn fwa, li ti fer sa bon aksyon la devan so bann kamarad ek devan so bann lennmi usi—dan sa lokazyon la, devan bann ki ti’nn vinn aret li.

Wi, plis nu egzaminn bann mirak Zezi, plis nu pu disern bann siyn ki montre ki vremem sa ti arive. (2 Timote 3:16) Kuma finn mansyone pli lao, sa kalite letid la ranforsi nu lafwa dan promes Bondye ki Li pu geri tu bann dimunn ki obeir. Labib defini lafwa Kretyin kuma “enn ferm lasirans bann kitsoz ki nu pe espere, enn manifestasyon kler bann kitsoz reel ki nu pa kapav truve.” (Ebre 11:1) Me li vre ki Bondye pa ankuraz nu krwar lizye ferme uswa zis swete ki sa kalite lesperans la akonpli. Plito, Li ankuraz nu ena enn lafwa solid ki baze lor bann prev. (1 Zan 4:1) Amezir nu gayn sa kalite lafwa la, nu truv numem vinn pli solid lor plan spirityel, nu gayn enn pli bon lasante, ek nu pli ere.—Matye 5:3; Romin 10:17.

Gerizon Spirityel Bizin Vinn an Premye!

Buku dimunn ki purtan ena enn bon lasante fizik, zot malere. Ena mem ki swisid zot parski zot pena okenn lesperans pu lavenir, uswa parski zot santi zot kraze avek bann problem. Avredir, zot malad lor plan spirityel—enn sityasyon byin pli grav devan lizye Bondye ki enn andikap fizik. (Zan 9:41) Lot kote, buku dimunn ki andikape fizikman viv enn lavi byin ranpli ek ere. Kifer? Parski zot an bonn sante lor plan spirityel ek zot ena lenerzi grasa lesperans sir ki baze lor Labib.

Konsernan bezwin spirityel ki zis bann imin ena, Zezi ti dir: “Enn zom bizin viv, pa zis avek dipin, me avek tu parol ki sorti dan labus Zeova.” (Matye 4:4) Wi, kontrerman ar bann zanimo, bann imin pa bizin zis bann bezwin materyel. Pwiski nu finn kre dan “resanblans” Bondye, nu bizin nuritir spirityel—konesans lor Bondye ek kone ki nu rol dan so proze ek usi pu fer so volonte. (Zenez 1:27; Zan 4:34) Konesans Bondye donn nu lavi enn sans ek donn nu motivasyon pu servi Bondye. Li usi poz baz pu lavi pu tuletan dan enn paradi lor later. Zezi ti dir: “Sa mem seki vedir lavi pu tuletan, ki zot aprann konn twa, sel vre Bondye ek Zezi Kris, sa kikenn ki to finn anvwaye la.”—Zan 17:3.

Li interesan pu note ki bann ki ti viv dan mem lepok ki Zezi pa ti apel li “Geriser,” me plito “Anseynan.” (Lik 3:12; 7:40) Kifer? Parski Zezi ti anseyn bann dimunn lor solisyon permanan bann problem limanite—Rwayom Bondye. (Lik 4:43; Zan 6:26, 27) Sa guvernman dan lesyel ki dan lamin Zezi Kris la pu diriz later antye ek pu realiz bann promes Labib konsernan retablisman konplet ek dirab bann dimunn drwat ek landrwa kot zot pu reste lor later. (Revelasyon 11:15) Akoz sa mem, dan so lapriyer model, Zezi ti asosye larive Rwayom Bondye avek so volonte ki bizin fer lor later.—Matye 6:10.

Pu buku dimunn ki ena bann andikap, kan zot finn aprann lor sa lesperans inspire la, sa finn fer zot bann larm tristes sanze ek vinn bann larm lazwa. (Lik 6:21) Dayer, volonte Bondye pu fer plis ki zis anlev maladi ek andikap; li pu efas tu seki fer dimunn sufer—pese limem. Izai 33:24 ek Matye 9:2-7, ki finn site pli lao, asosye maladi ar nu kondisyon peser. (Romin 5:12) Donk, kan pese pu elimine, limanite pu zwir anfin “liberte extraordiner bann zanfan Bondye,” kot zot lekor ek lespri usi pu vinn parfe.—Romin 8:21.

Bann ki zwir enn ase bon lasante kapav bliye fasilman valer enn bon lasante. Me bann ki pe konn sa lexperyans dezagreab ek dekurazan la akoz zot bann andikap, pa kapav bliye sa fasilman. Zot kone ki kantite valer lasante ek lavi ena ek kuma enn sel ku, san ki atann, sityasyon kapav sanze. (Eklezyast 9:11) Alor, nu espere ki bann ki andikape parmi nu bann lekter pu pran byin kont bann promes extraordiner Bondye ki ena dan Labib. Zezi finn donn so lavi kuma enn garanti ki sa bann promes la pu realize. Eski kapav ena enn pli bon garanti ki sa?—Matye 8:16, 17; Zan 3:16.

[Not anba paz]