Ki U Lopinyon lor Lamor?

LAMOR ena enn lefe dekurazan lor nu amezir nu fer nu bann laktivite tulezur, ki nu ena enn bon lasante uswa ki nu ris. Nu kapav truv lamor prosenn fwa nu travers lari uswa nu lor nu lili. Bann katastrof kuma latak teroris le 11 Septam, 2001, dan Lavil New York ek Washington, fer nu realize ki lamor, nu “dernye lennmi,” ramas so bann viktim parmi bann dimunn ki dan ninport ki ran sosyal ek ekonomik ek parmi bann dimunn tu laz. Defwa li pran plizir milye lavi dan zis detrwa minit.—1 Korintyin 15:26.

Mem si lamor fer per kumsa, li paret ki li kapte latansyon bann dimunn. Nanyin pa ti pu paret ogmant lavant lagazet uswa atir plis dimunn devan zot televizyon ki bann nuvel lamor, sirtu lamor buku dimunn dan bann sirkonstans ki fer per. Dimunn pa paret fatige pu tann bann nuvel lamor, ki li lamor akoz lager, katastrof natirel, krim, uswa akoz maladi. Nu truv kote pli etonan sa lintere obsede pu lamor la sirtu dan fason ki bann dimunn exprim zot sagrin kan bann gran personaz ek bann dimunn seleb mor.

Pa kapav nye tu sa bann reaksyon lor lamor la. Lamor—lamor lezot—kontiyn kapte latansyon bann dimunn. Parkont kan bizin fer fas ar zot prop lamor zot per pu reflesi lor la. Laplipar parmi nu pa anvi mazinn nu prop lamor.

Eski U Intrige par Lamor?

Pans lor nu prop lamor, sa li tuzur dezagreab ek li pu tuzur kumsa. Kifer? Parski Bondye finn met dan nu enn gran dezir pu viv pu tuletan. Eklezyast 3:11, dapre La Bible de Crampon (1905) dir: “Li’nn usi met leternite dan zot leker.” Lamor, enn kitsoz ki pa kapav bare, finn kre enn lalit andan bann dimunn; li enn lespes kontradiksyon ki pe tultan kontiyne. Pu reysi fer fas avek sa lalit ki andan nu la ek pu satisfer dezir natirel pu kontiyn viv, bann imin finn invant tu sort kalite krwayans ki kumans par doktrinn nam imortel ziska krwayans reinkarnasyon.

Antuka, lamor li enn levennman ki truble dimunn, ki fer per, ek lakrint lamor li egziste partu. Donk, fode pa nu soke kan sosyete imin an zeneral konsider lamor kuma enn kitsoz ki fer per. Premyerman, lamor montre nu ki enn lavi ki zis rod rises ek gayn puvwar lor lezot, li pa vo nanyin finalman.

Mor Tusel?

Dan lepase, suvan ti permet enn dimunn ki malad ek ki pre pu mor uswa enn dimunn ki’nn blese amor, al mor kot so fami ek dan so prop lakaz, dan lanturaz kot li abitye, parmi bann ki li kontan. Kumsa mem suvan ti ete dan lepok biblik, ek li tuzur kumsa dan sertin kiltir. (Zenez 49:1, 2, 33) Dan bann ka kumsa, lafami reyni, ek bann zanfan usi pran par dan konversasyon. Sa donn sak manb lafami santiman ki pa li tusel ki sagrin ek sa amenn konsolasyon parski li santi ki responsabilite ek dey partaze.

Sa li kontrer ar seki arive dan enn sosyete kot defann koz lor lamor, parski li konsidere kuma enn size ki fer per. Akoz sa, bann zanfan pa gayn drwa prezan parski sa kapav “sok zot sansibilite.” Zordi lamor li diferan dan buku fason, ek suvan ena ki mor tusel. Malgre ki laplipar ti pu prefer mor kot zot, anpe ek kot zot fami ti pu pran zot swin avek lamur, pu buku larealite li byin kriyel parski zot mor dan enn lopital, zeneralman tusel ek dan duler. Zot konekte ar enn kantite laparey modern ki fer per. Lot kote, plizir milyon dimunn mor san mem ki lezot konn zot idantite,—zot bann viktim bann lager pu eliminn enn ras, lafaminn, SIDA, lager sivil, uswa zis akoz gran-gran lamizer.

Enn Size pu Reflesi

Labib pa dekuraz reflesi avek atansyon lor lamor. Dayer Eklezyast 7:2 dir nu: “Vomye al dan lakaz kot ena dey ki al dan lakaz kot ena fet, parski se lafin tu dimunn.” Kan nu fer fas ar realite lamor, kitfwa nu kapav aret konsantre nu lor bann aktivite tulezur ek fixe nu lor sa lavi ki byin kurt la. Sa kapav ed nu pu amenn enn lavi ki ena plis sans, olye nu amenn enn lavi san okenn bi uswa nu gaspiy li.

Ki u lopinyon lor lamor? Eski u finn egzaminn u bann santiman, u bann krwayans, u bann lespwar, ek u bann lakrint lor lafin u lavi?

Parey kuma zom pa kapav explik, ni konpran natir lavi, li pa kapav usi fer parey pu natir lamor. Zis nu Kreater tusel ki enn lotorite ki nu kapav fer konfyans lor sa size la. Avek Li ena “lasurs lavi, “ ek avek Li “ena bann semin pu sape dan lamor.” (Psom 36:9; 68:20) Mem si sa kapav etonn nu, enn legzamin sir lor bann krwayans popiler konsernan lamor avek led Parol Bondye pu ankuraz nu ek rekonfort nu. Li pu montre ki lamor li pa neseserman lafin tu kitsoz.

[Komater lor paz 4]

Pwiski lamor paret inevitab, sa ed nu pu viv enn lavi ki ena plis sans