Kestyon Bann Lekter

Si enn kikenn swisid li, eski enn minis Kretyin kapav fer enn diskur lanterman?

Sak minis Kretyin pu bizin deside pu limem si li pu kapav, avek enn konsyans kler devan Bondye, fer enn diskur lanterman pu enn kikenn ki paret finn swiside. Kan li pe pran desizyon, li bizin pran sa bann kestyon la an konsiderasyon: Kuma Zeova konsider swisid? Eski vremem dimunn la mem ki’nn provok so prop lamor? Eski se enn problem mantal uswa emosyonel ki’nn provok sa swisid la? Kuma dimunn dan landrwa konsider swisid?

Antan ki Kretyin, nu interese pu kone kuma Zeova konsider swisid. Pu Zeova, lavi dimunn presye ek sakre. (Zenez 9:5; Psom 36:9) Enn dimunn ki volonterman tuy limem komet enn krim kont limem. Donk, sa li enn kitsoz ki pa bon devan lizye Bondye. (Egzod 20:13; 1 Zan 3:15) Eski sa vedir ki pa kapav fer enn diskur lanterman pu enn dimunn ki’nn komet swisid?

Get seki ti ariv Sail, lerwa Izrael. Kan li ti realize ki li pa ti pu reysi sape dan batay final kont bann Filistin, olye ki li les so lennmi maltret li, “Sail ti pran so lepe ek li ti tonb lor la.” Kan bann Filistin ti truv so lekor, zot ti atas li lor miray lavil Bet-sann. Ler bann abitan Yabes-Gilead ti’nn kone seki bann Filistin ti’nn fer, zot ti tir lekor la ek zot ti bril li. Apre sa, zot ti pran so bann lezo, zot ti antere. Zot ti mem res karem pandan set zur; sa li enn kutim dey tradisyonel ki bann Izraelit ti pe swiv. (1 Samyel 31:4, 8-13; Zenez 50:10) Kan David, lerwa ki Zeova ti finn swazir, ti aprann seki bann abitan Yabes-Gilead ti’nn fer, li ti dir: “Ki Zeova beni zot parski zot finn montre lamur fidel anver mo senyer, anver Sail, zot finn anter li. Ek asterla ki Zeova montre lamur fidel ek fidelite anver zot.” (2 Samyel 2:5, 6) Labib pa dir nu ki bann abitan Yabes-Gilead ti kondane parski zot ti’nn akonpli seki kapav konsidere kuma enn seremoni lanterman pu Lerwa Sail. Anu konpar sa ka la avek ka bann ki pa ti gayn enn lanterman parski zot ti’nn mal azir. (Zeremi 25:32, 33) Enn minis Kretyin kapav reflesi lor sa resi Labib la kan li deside si li pu fer enn diskur lanterman pu enn dimunn ki’nn swisid li, uswa non.

Minis la kapav anvi usi reflesi lor lobzektif enn diskur lanterman. Kontrerman ar bann dimunn ki krwar ki nam pa mor, bann Temwin Zeova pa fer bann lanterman avek fos lide ki dimunn mor la finn al dan enn lot lemond. Lobzektif prinsipal enn servis lanterman se pa pu ed dimunn mor la; me plito pu konsol bann ki an dey ek pu donn bann ki asiste lanterman enn temwaynaz lor kondisyon bann mor. (Eklezyast 9:5, 10; 2 Korintyin 1:3-5) Enn lot lobzektif inportan enn diskur lanterman, se pu ed tu bann ki prezan pu reflesi lor lavi ki byin kurt. (Eklezyast 7:2) Eski sa diskur lanterman pu sa dimunn ki’nn swisid li la pu reysi realiz sa bann lobzektif la?

Li vre, sertin kapav panse ki sa dimunn la finn tir so lavi volonterman, ek ki li ti byin kone ki li ti pe fer enn pese kont Zeova. Me eski li tuzur posib pu pruv sa? Eski li’nn kapav azir sirleku? Sertin ki sey swisid zot, sanz lide ek zot pa fer li. Enn dimunn ki’nn fini mor pa kapav repanti pu seki li’nn fer.

Enn lot fakter inportan, se bann problem mantal ek emosyonel ki inplike dan buku swisid. Kapav apel sa bann dimunn ki gayn sa kalite problem la bann viktim swisid. Dapre sertin statistik, 90 pursan bann ki’nn komet swisid ti ena swa enn sertin problem mantal, emosyonel uswa zot ti dan enn leta depandans, zot ti esklav ladrog, lalkol uswa lezot kitsoz ankor. Eski Zeova pu pardonn swisid bann dimunn ki dan enn leta mantal kumsa? Nu pa kapav zize si sa dimunn ki’nn mor la finn fer enn pese ki pa kapav pardone devan lizye Zeova. Enn minis Kretyin kapav pran an konsiderasyon sityasyon ek leta lasante sa dimunn ki’nn mor la kan li pans pu fer so diskur lanterman.

Ena enn lot laspe ki nu bizin pran an konsiderasyon: Kuma eski bann dimunn dan landrwa konsider swisid ek lamor sa dimunn la? Sa li konsern sirtu bann ansyin ki susye pu repitasyon kongregasyon lokal bann Temwin Zeova. Tu depann lor latitid zeneral konsernan swisid dan sa landrwa la, ek sirtu dan sa ka swisid partikilye la. Bann ansyin pu konsider sa ek zot kapav truve ki li preferab pa donn okenn sutyin piblik pu sa lanterman la, ni permet ki fer enn diskur piblik dan Lasal DiRwayom.

Me selman, si demann enn minis Kretyin pu prezid enn lanterman ki finn organize par lezot, li kapav deside personelman (pa antan ki enn reprezantan kongregasyon) pu aksepte. Si li desid pu fer sa, li bizin fer atansyon pu pa fer okenn deklarasyon presi lor posibilite ki ena enn rezireksyon. Tu lespwar pu lavenir sa dimunn mor la dan lamin Zeova, ek personn pa kapav dir si li pu resisite uswa non. Minis la kapav konsantre so bann remark lor bann laverite ki ena dan Labib konsernan lamor ek ofer rekonfor pu bann ki an dey.