Bann l’enterrement chretien ki digne, ki modeste, ek ki faire Bondié plaisir

PARTOUT kapav tann bann dimoune pé criyé pé ploré fort-fort. Bann dimoune ki en deuil tellement chagrin ki zot pé maye sa dimoune ki’nn mort-la. Lezot pé mangé-boire ek pé joué carte. Ena lezot encore ki’nn sou tellement zot inn boire rhum ek la biere. Ki bann dimoune pé celebré? Dan certain l’endroit dan le monde, c’est bann kitsoz ki bann dimoune par centaine faire pendant enn l’enterrement pou dire enn dernier aurevoir bann dimoune ki’nn mort.

Ena beaucoup Témoins de Jéhovah ki reste dan bann l’endroit kot zot bann parent ou-soit zot bann voisin croire beaucoup dan bann superstition ek bien peur bann mort. Dimoune par million croire ki kan enn dimoune mort, li vinn enn l’esprit ki ena capacité pou aide ou-soit faire di-tort bann ki vivant. Sa croyance-la li ena enn rapport avek beaucoup coutume ki faire dan bann l’enterrement. Bien sur, li normal pou ressenti chagrin kan enn kikenn mort. Jésus ek so bann disciple aussi ti ploré kan bann dimoune ki zot ti content ti mort. (Jean 11:33-35, 38; Actes 8:2; 9:39) Pourtant, jamais zot pa ti faire enn tas kitsoz pou montré ki zot chagrin pareil couma bann dimoune faire zordi. (Luc 23:27, 28; 1 Thess. 4:13) Kifer? Enn raison c’est parski zot ti konn la verité concernant la mort.

Dan enn fason clair, la Bible dire: “Bann ki vivant koné ki zot pou mort; mais bann dimoune mort zot, zot pa konn nanyin ditou . . . Zot l’amour, zot la haine ek zot jalousie finn fini disparette . . . Pena ni travail, ni plan, ni connaissance, ni sagesse dan shéol [tombe kot tou dimoune allé], place kot to pé allé.” (Eccl. 9:5, 6, 10) Sa bann verset la Bible ki’nn inspiré-la faire bien comprend ki kan enn dimoune mort, li nepli conscient. Li pa kapav pensé, ressenti kitsoz, communiké, ni comprend nanyin. Parski nou comprend sa verité ki ena dan la Bible-la, couma sa bizin influence fason ki bann chretien faire bann l’enterrement?

“Arrete touche bann kitsoz ki impur”

Tou bann Témoins de Jéhovah, n’importe ki race ou-soit n’importe ki culture kot li sorti evite net bann coutume ki associé avek croyance ki dire ki bann dimoune mort zot conscient ek ki zot kapav influence bann ki vivant. Bann coutume couma par exemple, passe la nuit, garde careme, bann celebration l’anniversaire la mort, envoye enn poignée la terre lor cercueil, bann sacrifice pou bann mort ek bann systeme pou bann veuve, tousala forme parti dan bann coutume ki impur lor plan spirituel ek ki Bondié pa content parski zot ena enn rapport avek l’enseignement bann demon ki pa sorti dan la Bible ki enseigné ki nâme ou-soit l’esprit pa mort. (Ézék. 18:4) Bann vrai chretien “pa kapav participe lor ‘la table Jéhovah’ ek lor la table bann demon.” Alors, zot pa participe dan sa bann coutume-la. (1 Cor. 10:21) Zot obeir commandement ki dire: “Separé ar zot, ek arrete touche bann kitsoz impur.” (2 Cor. 6:17) Selman, li pa toujours facile pou reste separé avek sa bann coutume-la.

En Afrique ek dan lezot pays, beaucoup dimoune croire ki si zot pa suive certain coutume, sa pou offense l’esprit bann ancetre. Bann dimoune pensé ki sa pou enn offense bien grave, ki kapav faire tou bann dimoune dan l’endroit gagne malediction ou-soit malchance. Parski zot pa finn participe dan bann rite ki pa en accord avek la Bible ek ki bann dimoune faire pendant bann l’enterrement, beaucoup Témoins de Jéhovah finn gagne bann critik, bann insulte, ek bann dimoune dan zot village ou-soit beaucoup dimoune dan zot famille finn traite zot couma bann dimoune ki pena zot place dan la societé. Ena ki finn accuse zot ki zot bann dimoune ki pa sociable ek ki zot pena respé pou bann dimoune mort. Parfois, bann ki pa Témoin de Jéhovah finn servi la force pou organise l’enterrement enn chretien. Alors, couma nou kapav evite gagne probleme avek bann ki insisté beaucoup pou suive bann coutume ki pa faire Bondié plaisir dan bann l’enterrement? Pli important encore, ki nou kapav faire pou reste separé ar bann coutume ek bann pratik impur ki kapav gate nou relation avek Jéhovah?

Faire lezot konn bien ou position

Dan certain partie dan le monde, c’est enn coutume ki bann famille eloigné ek bann grand dimoune dan enn clan dire dan ki fason bizin faire enn l’enterrement. Lerla, enn chretien ki fidele bizin faire zot bien comprend ki sa l’enterrement-la pou faire dan fason ki bann Témoins de Jéhovah faire, enn fason faire ki basé lor bann principe la Bible. (2 Cor. 6:14-16) Fodé pa ki seki passé dan enn l’enterrement chretien blesse conscience bann lezot Témoins ki la ou-soit faire lezot dimoune ki konn nou croyance ek seki nou enseigné concernant bann mort, tombé lor plan spirituel.

Kan demann enn congregation pou organise enn l’enterrement, bann ancien kapav donne bann bon conseil ek enn soutien spirituel pou ki tou bann arrangement deroule dan enn fason ki en accord avek bann principe biblik. Si certain dimoune ki pa Témoin envie faire bann pratik impur, li bien important pou reste ferme ek avek courage explik nou position en tant ki chretien dan enn fason ki montré bonté ek respé. (1 Pierre 3:15) Mais couma pou faire kan bann famille ki pena mem croyance ki nou pé insisté malgré sa? La, bann membre la famille croyant kapav decidé pou quitte sa l’enterrement-la. (1 Cor. 10:20) Dan sa cas-la, pou kapav faire enn simple discours en memoire sa dimoune ki’nn mort-la dan la Salle du Royaume ki dan l’endroit ou-soit enn lot place approprié; nou pou kapav donne “consolation ki nou gagné dan bann l’Ecriture” ar bann ki vrai-mem chagrin a cause la mort enn kikenn ki zot content. (Rom. 15:4) Mem si lekor dimoune-la pa la, sa ceremonie-la pou digne ek li pou enn kitsoz ki pou bien acceptable devant Jéhovah. (Deut. 34:5, 6, 8) Kan bann dimoune ki pa partage nou croyance vinn derange enn l’enterrement sa kapav ajoute plus tension ek chagrin. Selman, nou kapav gagne reconfort kan nou pensé ki Jéhovah, sa Bondié ki kapav donne nou “sa puissance ki plus ki seki normal-la” finn trouve nou determination pou faire seki droite.—2 Cor. 4:7.

Ecrire ou bann decision

Kan enn dimoune ecrire so bann decision personnel concernant l’arrangement ki pou faire pendant so l’enterrement, li pli facile pou raisonne avek bann famille ki pa Témoins, parski souvent zot respecté volonté enn dimoune mort. Li important pou ecrire bann detail couma par exemple, fason ki pou faire l’enterrement, kot-sa bizin faire sa, ek kisannla tousel ki pou ena l’autorité pou organise ek prend en charge sa l’enterrement-la. (Gen. 50:5) Kan signe enn document devant bann temoin, document-la pou pli valable encore. Bann ki pense pou l’avenir avek perspicacité ek avek enn sagesse ki basé lor bann principe la Bible koné ki zot pa bizin attann ki zot vinn bien vié ou-soit kan zot pré pou mort a cause enn maladie, pou zot prend sa bann disposition-la.—Prov. 22:3; Eccl. 9:12.

Certain trouve sa difficile pou ecrire zot decision. Selman, kan zot faire sa, zot montré ki zot bann chretien mur ek ki ena l’amour pou lezot. (Phil. 2:4) Li pli bon ki enn dimoune mette bann kitsoz au clair li-mem personnellement ki li laisse bann famille ki pou en deuil reglé sa. Ek pa bizin dire ki zot kapav gagne bann pression pou accepté bann pratik impur ki sa dimoune ki’nn mort-la pa ti croire ni ti approuvé.

Faire bann l’enterrement bien simple

Dan beaucoup l’endroit en Afrique, beaucoup dimoune pensé ki l’esprit bann ancetre pou en colere si enn l’enterrement pa grandiose ek si pena enn tas dimoune. Lezot saisi l’occasion dan bann l’enterrement pou “faire l’etalage” zot position social ek zot situation lor plan economik. (1 Jean 2:16) Dimoune consacré beaucoup le temps, zeffort, ek aussi zot l’argent pou faire enn l’enterrement ki bann dimoune dan le monde considere couma enn kitsoz approprié. Pou attire plus dimoune possible, ena mette bann grand poster sa dimoune ki’nn mort-la dan different l’endroit. Bann dimoune mette photo sa dimoune mort-la lor bann tee-shirt ek donne sa bann ki en deuil pou ki zot mette sa. Dimoune faire bann cercueil sophistiké ki bien cher pou impressionne bann dimoune ki vinn guetté. Dan enn pays l’Afrique, ena dimoune inn al ziska faire bann cercueil ki ressemblé bann l’auto, bann avion, bann bateau, ek lezot kitsoz encore. Bann dimoune faire tousala pou montré zot richesse, ek zot grandeur. Li arrivé aussi ki tire cadavre-la dan so cercueil pou mette li lor enn lili bien decoré. Si c’est enn madame ki’nn mort, bannla faire li mette enn robe la-marié blanc, avek beaucoup bijou, perle, ek bien maquillé. Eski li bon ki bann serviteur Bondié faire bann pratik coumsa?

Bann chretien mur trouve la sagesse ki ena pou evite bann kitsoz exageré ki bann dimoune faire parski zot pa konn bann principe Bondié, ni zot interessé ar sa. Nou koné ki bann coutume ek bann pratik ki pa montré modestie ek ki pa en accord avek la Bible ‘pa sorti kot Bondié, mais sorti dan le monde ki pé al fini.’ (1 Jean 2:15-17) Nou bizin faire bien attention pou nou pa laisse enn l’esprit competition influence nou ek essaye faire plus ki lezot; enn l’attitude ki pa chretien ditou. (Gal. 5:26) L’experience montré ki kan la peur pou bann dimoune mort li enn kitsoz bien important dan la vie social ek culture bann dimoune, souvent zot faire bann l’enterrement bien bien grand ki difficile pou controlé ek a cause sa, kapav facilement perdi controle. Zot desir pou honore bann mort kapav facilement pousse bann ki pa Témoins pou pratik bann kitsoz ki pa bon pou bann chretien. Dan sa qualité l’enterrement-la, li kapav arrivé ki bann dimoune ploré fort-fort ek zot pa peur pou maye lekor dimoune mort-la, koz ar li coumadir li encore vivant ek mette kass ek lezot kitsoz lor li. Si bann kitsoz coumsa arrivé dan enn l’enterrement enn chretien, sa pou jette deshonneur lor nom Jéhovah ek lor so peuple.—1 Pierre 1:14-16.

Parski nou konn vrai condition bann dimoune mort, sa bizin donne nou courage pou faire nou bann l’enterrement dan enn fason kot pena okenn trace l’esprit le monde. (Éph. 4:17-19) Mem Jésus, dimoune pli grand ek pli important ki finn vive lor la terre, finn enterré dan enn fason bien simple sans okenn tapage. (Jean 19:40-42) Pou bann ki ena “pensée Christ,” pena okenn la honte dan sa qualité l’enterrement-la. (1 Cor. 2:16) Pena doute lor la; kan bann l’enterrement bann chretien faire avek simplicité ek modestie, c’est pli bon fason pou evite seki impur dapré la Bible ek pou garde enn l’atmosphere calme, ki digne, ki montré ki nou ena gout, ek ki approprié pou bann ki content Bondié.

Eski kapav organise bann fête?

Dan certain pays, li kapav enn coutume ki apré l’enterrement bann famille, bann voisin, ek lezot connaissance joinde ensam pou mangé-boire ek dansé alors ki pé joué la musik bien-bien fort. Sa bann fête-la souvent donne bann dimoune l’occasion pou boire beaucoup ek souvent sa fini par relation sexuel immoral. Certain dimoune dire ki sa bann fête-la aidé zot pou tire chagrin ki ena kan enn dimoune mort. Lezot pensé ki sa li zis forme partie dan zot culture. Selman, beaucoup pensé ki sa bann fête kot pena controle-la zot necessaire parski li honore sa dimoune ki’nn mort-la ek li permette ki so nâme allé pou ki li al joinde so bann ancetre.

Bann vrai chretien trouve sagesse ki ena dan seki sa verset la Bible-la dire: “Vaut mieux nou chagrin ki nou riyé, parski c’est kan nou figure triste ki nou leker vinn pli bon.” (Eccl. 7:3) En plus, zot konn bienfait ki ena pou reflechi avek calme, lor la vie ki bien courte ek lor l’esperance resurrection. Oui, pou bann ki ena enn relation personnel ki bien solide avek Jéhovah, “jour la mort vaut plus ki jour naissance.” (Eccl. 7:1) Alors,parski zot koné ki sa bann fête-la ena enn lien avek bann croyance spiritisme, pou bann vrai chretien li pa approprié ki zot organise ni assisté sa bann fête-la. Si nou retrouve nou ensam avek sa qualité dimoune-la, sa pou montré ki nou pena okenn respé pou Bondié ek pou conscience nou bann frere ek soeur.

Montré ki ou different

Nou vrai-mem bien reconnaissant ki nou liberé ar la crainte la mort-la, enn la crainte ki pa bon ditou, enn la crainte ki beaucoup dimoune ki pa konn la verité ena! (Jean 8:32) En tant ki bann “zenfant la lumiere,” nou montré nou tristesse ek nou chagrin dan enn fason ki prouvé ki nou pé marche dan la lumiere spirituel, setadir dan enn fason modeste, ki montré respé, ek ki equilibré par l’esperance solide concernant la resurrection. (Éph. 5:8; Jean 5:28, 29) Sa l’esperance-la pou empeche nou ena bann reaction extreme ki montré ki nou chagrin, bann kitsoz ki souvent nou trouvé parmi bann “ki pena okenn l’esperance.” (1 Thess. 4:13) Sa pou donne nou courage pou reste ferme lor nou position concernant l’adoration ki pur ek pou pa cedé devant la crainte pou bann zom.—1 Pierre 3:13, 14.

Kan nou applik avek fidelité bann principe la Bible, sa pou donne bann dimoune l’occasion pou ‘trouve difference entre bann ki servi Bondié ek bann ki pa servi Li.’ (Mal. 3:18) Enn jour, la mort nepli pou existé. (Rév. 21:4) Alors ki nou pé attann ki sa promesse-la realisé, anou faire tou pou ki Jéhovah trouve nou sans tache ek sans defaut, ek ki nou separé net ar sa le monde mauvais-la ek so bann pratik ki deshonore Bondié.—2 Pierre 3:14.

[Zimage lor page 30]

La sagesse pousse nou pou ecrire a l’avance nou decision personnel lor fason ki nou l’enterrement bizin faire

[Zimage lor page 31]

Bann l’enterrement chretien bizin modeste ek digne