Méfié Coutumes Ki Bondié Pa Content

SOLEIL pé tape fort. Au milieu enn la-cour en Afrique, éna enn cercueil ki ouvert. Parmi bann dimoune ki pé passe en ligne devant sa cercueil-la pou exprime zot chagrin, enn missié âgé arrêté. So lizié plein ar tristesse, li baisse li près avec figure sa missié ki’nn mort-la ek li commence dire li: “Kifer to pa ti dire moi to pou allé? Kifer to’nn quitte moi coumsa? Asterla ki to’nn retourné, eski to pou contigné aide moi?”

Dans enn l’autre partie l’Afrique, enn ti-baba inn né. Personne pa gagne droit trouve li. Bizin laisse inpé lé-temps passé avant amène ti-baba-la en public ek faire enn cérémonie kot donne li enn nom.

Pou certains, li kapav parette bizarre pou koz avec enn dimoune mort ou-soit pou empêche lézot trouve enn ti-baba ki fek né. Mais, dans certains cultures ek sociétés, beaucoup dimoune éna conviction ki bann morts pa vrai-mem mort, mais ki zot vivant et ki zot koné ki passé autour zot. Sa croyance-la influence zot conduite et zot façon pensé lor la mort ek naissance.

Sa croyance-la tellement fort ki li’nn rentre partout dans bann coutumes ek bann cérémonies ki concerne presque tou bann domaines la-vie. Par exemple, par millions dimoune croire ki bann l’étapes important dans nou la-vie—couma naissance, croissance pou vinn adulte, mariage, gagne zenfant, ek la mort—zot bann différent changements ki amène nou dans le monde kot l’esprits bann ancêtres été. Là, zot croire ki sa dimoune mort-la contigne participe dans la vie bann dimoune ki li’nn quitté par derrière. Et so la-vie kapav contigné à travers enn nouveau naissance.

Pou assuré ki sa bann changements-la passe bien entre tou bann l’étapes, éna enn quantité coutumes ek cérémonies pou faire. Sa bann coutumes-la influencé par croyance ki éna enn kitsoz ki contigne vive après la mort. Bann vrai Chrétiens évite tou bann coutumes ki éna enn rapport avec sa croyance-la. Kifer?

Dans Ki Condition Bann Dimoune Mort Été?

La Bible bien clair kan li expliqué dans ki condition bann morts été. Li zis dire: “Bann dimoune vivant koné ki zot pou mort, mais bann dimoune mort pa konn nanyin ditou . . . Zot l’amour, zot la-haine ek zot jalousie finn fini disparette . . . Péna ni travail, ni plan, ni connaissance, ni sagesse dans Shéol [tombe tou bann humains], place kot to pé allé.” (Ecclésiaste 9:5, 6, 10) Depuis longtemps, bann vrai adorateurs Bondié inn accepté sa vérité-la. Zot inn comprend ki nâme pa immortel mais plutôt ki li kapav mort et ki kapav détruire li. (Ézékiel 18:4) Zot inn aussi aprann ki l’esprit bann morts pa existé. (Psaume 146:4) Dans le temps passé, Jéhovah ti donne so peuple enn l’ordre ferme pou zot sépare zot net avec tou bann coutumes ou-soit cérémonies ki ti éna enn rapport avec croyance ki bann morts koné ki pé passé et ki zot kapav influence bann vivants.—Deutéronome 14:1;18:9-13; Isaïe 8:19, 20.

Bann Chrétiens premier siècle, zot aussi, ti évite tou bann coutumes ou-soit cérémonies traditionnel ki ti éna enn rapport avec l’enseignement bann fausse religions. (2 Corinthiens 6:15-17) Zordi, n’importe ki race, tribu, ou-soit culture ki zot sorti, bann Témoins de Jéhovah rejette bann traditions ek bann coutumes ki éna enn rapport avec sa fausse l’enseignement ki dire ki éna enn kitsoz ki contigne vive kan enn dimoune mort.

En tant ki Chrétiens, ki kapav aide nou pou décidé si nou pou observe enn certaine coutume ou-soit non? Nou bizin réfléchi bien si li éna rapport avec kit l’enseignement ki pa Biblique, couma par exemple, croyance ki l’esprit bann morts influence la vie bann vivants. En plus, éna dimoune ki konn croyance ek l’enseignement bann Témoins de Jéhovah,et nou bizin faire attention ki nou participation dans enn coutume ou-soit enn cérémonie coumsa, pa choque zot et mem faire zot tombé. Avec sa bann points-la dans nou l’esprit, anou examine deux domaines ki bien important—naissance ek la mort.

Bann Cérémonies Ki Concerne Naissance et Donne Nom Bann Ti-Baba

Beaucoup coutumes ki éna enn rapport avec naissance enn zenfant, pa mauvais. Seulement, bann vrai Chrétiens bizin faire attention dans bann l’endroits kot dimoune pensé ki kan enn ti-baba né, li pé sorti dans le monde l’esprits bann ancêtres, pou li vinn vive parmi bann humains. Par exemple, dans certains parties l’Afrique, zot garde enn ti-baba ki fek né dans lakaz et zot pa donne li enn nom tant ki enn certaine période lé-temps pa’nn passé. Lé-temps ki bizin atann pa pareil partout, mais li fini par enn cérémonie kot donne zenfant-la enn nom et c’est lerla ki amène li dehors ek présente li officiellement ar tou bann parents ek camarades. C’est aussi lerla ki annonce so nom officiellement devant tou bann ki présent.

Livre Ghana—Understanding the People and Their Culture expliqué ki sa coutume-la veut-dire: “Bann dimoune croire ki, pendant premier sept jours so la-vie, enn ti-baba soi-disant en ‘visite’ ek li dans enn période changement entre so la-vie dans le monde bann l’esprits ek so la-vie lor la terre. . . . Normalement zot garde ti-baba-la endan ek personne, à part so famille, pa gagne droit trouve li.”

Kifer bizin atann enn certaine lé-temps avant faire cérémonie pou donne ti-baba-la so nom? Livre Ghana in Retrospect expliqué: “Soi-disant ti-baba-la pa vinn enn humain, avant huitième jour. Li plus ou moins associé avec le monde bann l’esprit kot li’nn sorti.” Livre-la ajouté: “Parski c’est so nom ki faire enn zenfant vinn enn humain, si enn couple peur ki zot zenfant pou mort, normalement zot pou renvoye sa cérémonie pou donne zenfant-la so nom pou plitar kan zot sûr ki li pou vive. . . . C’est à cause sa ki zot pensé ki sa cérémonie ki marque sa changement-la, et ki zot appelle parfois présentation public zenfant, li éna bann grand conséquences pou zenfant-la ek pou so parents. C’est sa cérémonie-la ki faire zenfant-la rentre dans le monde bann humains.”

Normalement, enn membre la-famille ki pli âgé faire sa cérémonie-la. Façon ki cérémonie-la déroulé pa pareil partout, mais souvent éna bann services, prié l’esprits bann ancêtres pou montré reconnaissance pou le fait ki zenfant-la inn bien arrivé, ek lézot coutumes encore.

Moment pli important dans cérémonie-la, c’est kan annonce nom zenfant-la. Mem si c’est bann parents ki responsable pou donne nom zot propre zenfants, souvent lézot membres la-famille éna enn grand l’influence lor nom ki choisir. Certains noms kapav éna enn signification symbolique dans langage local, couma par exemple, “inn allé ek inn retourné,” “Mama inn vini enn deuxième fois,” ou-soit “Papa inn vini encore.” Lézot noms éna bann significations exprès pou décourage bann ancêtres pou reprend ti-baba-la dans le monde bann morts.

Bien-sûr, péna nanyin de mal pou réjouir kan enn zenfant né. Appelle enn zenfant pareil couma enn l’autre dimoune ek donne li enn nom ki reflète bann circonstances so naissance, c’est bann coutumes ki nou kapav accepté. C’est aussi enn décision personnel pou décidé kan pou donne enn zenfant so nom, tant ki respecté délai ki la loi donné pou déclare enn zenfant. Mais, bann Chrétiens ki envie faire plaisir Bondié, faire attention pou évite bann coutumes ou-soit bann cérémonies ki donne l’impression ki zot d’accord avec l’idée ki enn ti-baba ki fek né, li enn “visiteur” ki pé sorti dans le monde bann l’esprits bann ancêtres pou vinn vive lor la terre.

En plus, mem si beaucoup dimoune pensé ki sa cérémonie donne nom-la, li enn coutume important ki marque enn grand changement, bann Chrétiens bizin prend compte conscience lézot ek aussi l’impression ki bann ki pa croyants kapav gagné. Par exemple, ki certains pou pensé, si enn famille Chrétien empêche lézot guette zot ti-baba ki fek né, tant ki pankor faire cérémonie pou donne li so nom? Ki l’impression sa pou donné si zot choisir bann noms ki en contradiction avec séki zot dire zot été, c’est-à-dire, bann enseignants la-vérité ki éna dans la Bible?

Donc, kan zot décidé couma ek kan pou donne nom zot zenfants, bann Chrétiens faire tou séki zot kapav pou “faire tou kitsoz pou la gloire Bondié” pou ki zot pa choque lézot ek mem faire zot tombé. (1 Corinthiens 10:31-33) Zot pa ‘néglige commandement Bondié pou garde tradition’ ki’nn faire finalement pou honore bann morts. Au contraire, zot donne l’honneur ek la gloire Jéhovah, Bondié ki vivant.—Marc 7:9, 13.

Sorti Dans la Mort pou Vinn à la Vie

Beaucoup pensé ki la mort, couma la vie, li enn période changement; enn dimoune ki mort, sorti dans le monde visible pou al dans le monde invisible kot éna l’esprits bann morts. Beaucoup croire ki si zot pa suive certains coutumes ek faire certains cérémonies pou l’enterrement, l’esprits bann ancêtres ki éna pouvoir pou puni ou récompense bann vivants, pou en colère. Sa croyance-la souvent influence façon ki faire bann l’enterrements.

Bann l’enterrements ki faire pou pa offense bann morts souvent implique plusieurs qualités l’émotions—depuis bann grand-grand ploré ek crié devant lé-corps-la là ziska bann l’amusements après l’enterrement. Souvent parmi sa bann coutumes l’enterrement-la, éna bann fêtes kot péna okenn contrôle, dimoune sou, ek dansé avec la musique ki joué bien fort. Bann dimoune accorde tellement l’importance ar bann l’enterrements ki mem bann familles ki bien misère souvent faire bann gros zeffort pou trouve assez l’argent pou kapav faire “enn l’enterrement couma bizin,” mem si zot bizin prive zot ou-soit faire dette.

Depuis longtemps, bann Témoins de Jéhovah inn démasqué bann coutumes l’enterrement ki pa en accord avec la Bible.a Parmi bann kitsoz ki faire parti dans sa bann coutumes-la, éna ki passe la nuit, ki koz avec bann morts et demann zot kitsoz, ek éna aussi bann services ek bann célébrations l’anniversaire la-mort, ek bann lézot coutumes encore ki basé lor croyance ki éna enn kitsoz dans nou ki contigne vive après la mort. Bann coutumes coumsa ki déshonore Bondié, zot “impur,” zot “enn tromperie ki dans vide” ki basé lor “tradition bann zom” et pa lor la Parole Bondié ki la vérité.—Isaïe 52:11; Colossiens 2:8.

Bann Pressions pou Faire Pareil

Li’nn bien difficile pou certains évite bann coutumes traditionnel, surtout dans bann pays kot bann dimoune pensé ki li vrai-mem important pou honore bann morts. Parski zot pa’nn suive sa qualité coutumes-la, bann dimoune inn méfié bann Témoins de Jéhovah ou-soit inn dire ki zot pa content fréquente lézot et ki zot pa respecté bann dimoune mort. Malgré ki zot comprend bien la vérité ki éna dans la Bible, certains Chrétiens finn peur pou montré ki zot vrai-mem différent, à cause bann critiques ek bann pressions ki bien fort. (1 Pierre 3:14) Lézot inn pensé ki sa bann coutumes-la forme partie dans zot culture ek pa kapav évite zot net. Certains encore, inn croire ki si zot refuse suive sa bann coutumes-la, bann dimoune dans zot l’endroit pou kapav mal juge bann Témoins de Jéhovah.

Nou pa envie offense lézot pou nanyin. Mais seulement, la Bible averti nou ki le monde ki éloigné ar Bondié pa pou d’accord avec nou kan nou prend enn position ferme pou la vérité. (Jean 15:18, 19; 2 Timothée 3:12; 1 Jean 5:19) Nou prend enn position coumsa volontairement, parski nou koné ki nou bizin différent ar bann ki dans noirté spirituel. (Malaki 3:18; Galates 6:12) Pareil couma Jésus ti résisté kont tentation ki Satan ti mette devant li pou faire kitsoz ki Bondié pa content, nou aussi, nou résisté pression pou agir dans enn façon ki pa faire Bondié plaisir. (Matthieu 4:3-7) Au lieu ki zot laisse zot influencé par la crainte pou bann zom, bann vrai Chrétiens envie avant tout faire plaisir Jéhovah et honore li en tant ki Bondié la-vérité. Zot faire sa kan malgré pression ki lézot faire lor zot, zot pa casse contour avec bann principes la-Bible ki concerne vrai l’adoration.—Proverbes 29:25; Actes 5:29.

Honore Jéhovah par Façon Ki Nou Considère Bann Morts

Li normal ki nou ressenti enn douleur profond ek enn grand chagrin kan nou perdi enn dimoune ki nou content. (Jean 11:33, 35) Kan nou rappelle avec affection souvenir dimoune ki nou ti content-la ek faire enn l’enterrement couma bizin, c’est bann façons convenable pou exprime nou l’amour. Mais, bann Témoins de Jéhovah faire face ar sa grand chagrin ki la mort amené-la sans ki zot adopté bann pratiques traditionnel ki pa faire Bondié plaisir. Sa li pa facile pou bann ki’nn grandi dans bann cultures kot la crainte pou bann morts bien fort. Li kapav bien difficile pou garde nou l’équilibre kan nou dans grand chagrin parski nou’nn perdi enn dimoune ki proche ar nou. Malgré tout, Jéhovah, ‘Bondié tou consolation,’ fortifié bann Chrétiens fidèles, ek zot aussi gagne enn soutien rempli ar l’amour avec zot bann frères ek soeurs. (2 Corinthiens 1:3, 4) Bann vrai Chrétiens éna conviction ki bann morts ki pa konn nanyin ek ki dans souvenir Bondié, pou ré-vive enn jour. Sa conviction-la donne zot tou raison pou sépare zot net avec bann coutumes l’enterrement ki pa Chrétien et ki démenti la résurrection.

Eski sa pa donne nou enn grand la-joie ki Jéhovah “finn tire [nou] dans marée noir pou mette nou dans so la-lumière extraordinaire”? (1 Pierre 2:9) Kan nou dans la joie à cause enn naissance ou-soit dans chagrin à cause enn la-mort, nou bizin bien décidé pou faire séki bon ek laisse touletan nou l’amour profond pou Jéhovah pousse nou pou “contigne marche couma bann zenfants la-lumière.” Pa laisse nou jamais contaminé lor plan spirituel par bann coutumes ki pa Chrétiens et ki pa faire Bondié plaisir.—Éphésiens 5:8.

[Note]