Protege ou kont bann mauvais l’esprit

JAMES ti grandi dan enn l’endroit bien retiré lor l’île Malaita, ki forme partie dan bann zîle Salomon. Depuis bien jeune, finn aprann li pou honore bann l’esprit. Li dire: “Jamais mo pa ti pou demann bann l’esprit pou faire lezot dimoune di-tort, mais mo ti pensé ki li ti pou impossible pou ena enn la vie heureux sans servi rarafono [bann pratik traditionnel kot bann dimoune rod l’aide ar bann l’esprit] pou protege moi kont le mal.”

Pareil couma dan plusieurs lezot partie le monde, bann dimoune ki vive lor bann zîle Salomon pensé ki bann l’esprit kapav soit aide enn dimoune, soit faire li di-tort. En realité, beaucoup Mélanésien zot pa peur, au contraire, zot content sa bann l’esprit ki soit-disant faire di-bien-la.

Bann dimoune montré ki zot croire dan bann l’esprit dan plusieurs fason. Par exemple, kan James ti jeune, bann madame dan so village ti degazé faire zot zenfant rente dan lakaz, n’importe kan zot ti tann korokoro (enn zoiseau, couma coucou) criyé. Kifer? Zot ti pensé ki kan sa zoiseau-la criyé sa vedir ki enn kikenn pou gagne enn malheur.

Certain villageois mette enn roche special ki ti couleur blanc lor la porte zot lakaz. James aussi ti faire sa, parski li ti croire ki sa roche-la ti pou protege li kont bann mauvais l’esprit. Ek kan James ti dan so travail, li ti ramasse tou bann mangé ki li pa ti mangé dan enn sac pou li jetté plitar. Li ti surtout peur ki enn sorcier trouve sa mangé-la ek servi sa pou jette enn sort ki ti pou faire li tombe malade.

Mem si bann pratik coumsa zot rare dan ou l’endroit, kitfois pareil couma James ou’nn senti ki li necessaire pou suive bann coutume traditionnel pou gagne protection kont bann mauvais l’esprit. Kitfois ou pensé ki li important ki ou suive sa bann coutume-la pou ou vive bien.

Si ou ena respé pou la Bible, surement ou pou envie koné ki li dire lor sa bann question-la: (1) Couma bann mauvais l’esprit kapav faire ou di-tort? (2) Si ou suive certain coutume traditionnel eski sa kapav amenn bann demon pou faire ou di-tort? (3) Couma ou kapav gagne vrai protection kont bann mauvais l’esprit ek vive heureux?

Couma bann mauvais l’esprit faire di-tort

La Bible montré ki bann mauvais l’esprit pa kapav l’esprit bann mort. La Bible dire: “Bann ki vivant koné ki zot pou mort; mais bann dimoune mort zot, zot pa konn nanyin ditou.” (Ecclésiaste 9:5) En realité, bann mauvais l’esprit c’est bann ange rebelle ki finn joinde Satan pou essaye trompe bann dimoune.—Révélation 12:9.

Bann l’Ecriture montré dan enn fason clair ki nou bizin protection kont bann mauvais l’esprit. L’apotre Paul ti ecrire bann chretien Éphèse: “Nou bizin lutté, pa kont di-sang ek la chair, mais kont . . . bann mauvais l’esprit ki trouve dan le ciel.” L’apotre Pierre ti decrire chef tou bann demon, Satan le Diable, couma “enn lion ki pé criyé ek ki pé rod kikenn pou devoré.”—Éphésiens 6:12; 1 Pierre 5:8.

Satan faire bann dimoune di-tort surtout kan li trompe zot, embete zot ou-soit tente zot pou faire bann kitsoz ki offense Bondié. La Bible dire ki Satan “contigne transforme-li couma enn ange la lumiere.” (2 Corinthiens 11:14) Li pretann ki li enn l’esprit ki protege bann dimoune, mais en realité, li ena bann mauvais l’intention. Satan aveuglé l’esprit bann dimoune pou empeche zot konn la verité lor li ek lor Bondié. (2 Corinthiens 4:4) Pou ki raison li trompe bann dimoune?

Satan ena enn grand desir pou gagne l’adoration ek li envie ki bann dimoune donne li sa l’adoration-la volontairement ou-soit sans ki zot koné. Kan prop Garson Bondié, Jésus, ti lor la terre, Satan ti envie ki Jésus ‘tombe devant li ek adore’ li. Jésus ti dire: “Sorti la allé Satan! Parski finn ecrire: ‘C’est Jéhovah to Bondié ki to bizin adoré.’ ” (Matthieu 4:9, 10) Jésus ti refuse faire n’importe ki kitsoz ki ti pou montré ki li ti pé soumette ar Satan, ek ki li pé adore li.

Jéhovah Li pli puissant ki tou bann l’esprit ek Li pa pou permette ki bann ki obeir Li gagne enn malheur ki pa pou kapav reparé. (Psaume 83:18; Romains 16:20) Mais, si nou envie faire Jéhovah plaisir pareil couma Jésus ti faire, nou bizin evite soumette-nou ar Satan ou-soit ar so bann demon, parski sa pou montré ki nou pé adore li. Pou evite faire sa, nou bizin identifié ki bann pratik traditionnel ki donne bann mauvais l’esprit l’honneur ek l’adoration. Couma ou kapav faire sa?

Identifié bann coutume ki pa faire Bondié plaisir

Jéhovah ti averti bann Israélite, peuple ki Li ti ena longtemps, pou pa imite certain tradition ki bann nation tout autour ti pé faire. Li ti dire: “Fodé pa ki parmi zot, ena kikenn . . . ki rod konn l’avenir, okenn magicien, ou-soit enn kikenn ki rod bann signe pou konn l’avenir, ou-soit okenn sorcier, ou-soit enn kikenn ki jette sort lor lezot.” Concernant bann ki ti suive sa bann coutume-la, la Bible dire: “Tou dimoune ki faire sa bann kitsoz-la, c’est enn kitsoz detestable pou Jéhovah.”—Deutéronome 18:10-12.

Alors, kan ou examine bann coutume ki ena dan ou l’endroit pose ou-mem sa bann question-la: Eski sa coutume-la pé encourage ou croire dan bann signe ki soit-disant faire konn l’avenir? Eski dapré sa coutume-la, certain objet ena pouvoir magik pou protege bann dimoune? Eski li ena enn rapport ar jette bann sort ou-soit gagne protection kont bann sort? Eski ou pou bizin soumette-ou ar enn lot l’esprit a part Jéhovah ou-soit Jésus, so representant ki Li’nn choisir?—Romains 14:11; Philippiens 2:9, 10.

Li bien important ki ou rejette tou bann coutume ki encourage sa bann pratik-la. Kifer? L’apotre Paul ti inspiré pou ecrire: “Zot pa kapav participe lor ‘la table Jéhovah’ ek lor la table bann demon.” Li ti faire koné ki bann ki en mem temps essaye faire Jéhovah plaisir ensam avek lezot l’esprit, pou “excite jalousie Jéhovah.” (1 Corinthiens 10:20-22) Jéhovah demann ek merite enn attachement zis pou Li tousel.—Exode 20:4, 5.

Guette aussi, sa question-la: Eski sa coutume-la li encourage l’idée ki enn dimoune li pa responsable so bann action? Par exemple, beaucoup culture pa d’accord avek l’adultere ek gagne relation avant mariage ek c’est bann pratik ki la Bible condamné. (1 Corinthiens 6:9, 10) Mais, dan certain culture dan Pacifique, bann dimoune pa pou dire nanyin kont sa bann pratik-la si enn tifi pretann ki enn zom finn jette enn sorta lor li ek ki li’nn senti li attiré pou gagne relation avek li.

Mais la Bible li, li enseigné ki nou responsable nou bann action. (Romains 14:12; Galates 6:7) Par exemple, premier femme, Ève, ti pretann ki c’est Satan ki ti trompe li pou desobeir Bondié. Ève ti dire: “Sa serpent-la—li’nn trompe moi ek lerla mo’nn mangé.” Mais, Jéhovah ti demann Ève bann compte pou so bann action. (Genèse 3:13, 16, 19) Li aussi demann nou bann compte pou nou bann action.—Hébreux 4:13.

Ki ou bizin faire?

Si ou envie faire Bondié plaisir ek vive en accord avek bann principe la Bible, ou bizin faire tou seki ou kapav pou protege ou kont Satan ek kont so bann demon. Bann dimoune sincere ki ti vive dan Éphèse dan premier siecle finn laisse enn bon l’exemple dan sa domaine-la. Pou separe zot-mem ar l’influence bann mauvais l’esprit, zot ti ramasse tou zot bann livre ki ti ena enn rapport avek bann pratik spiritisme ek zot “ti brule sa devant tou dimoune.”—Actes 19:19.

Avant ki zot ti brule sa bann livre-la, sa bann dimoune-la “ti vinn confessé ek dire devant zot tou bann kitsoz ki zot ti pé pratiké.” (Actes 19:18) Zot leker ti tellement touché par l’enseignement Paul concernant Christ, ki sa ti motive zot pou detruire zot bann livre ki ti ena enn rapport avek spiritisme. Zot ti change aussi zot fason pensé concernant zot bann pratik traditionnel.

Li vrai ki li pa facile pou abandonne bann pratik traditionnel. James, ki nou ti cité dan sa lartik-la, ti faire face ar sa difficulté-la. Li ti commence etudié la Bible avek bann Témoins de Jéhovah ek li ti content seki li ti pé aprann. Malgré sa, li ti pé contigne faire rarafono. Kan li finn examine bann sentiment ki li ti ena envers sa bann pratik-la, li’nn rann-li compte ki li ti croire dan bann promesse ki Jéhovah inn faire pou l’avenir, mais pou li gagne enn protection kont bann malheur li ti senti ki li ti encore bizin sa bann pratik traditionnel-la.

Ki finn aide James pou change so l’attitude? Li dire: “Mo ti prié Jéhovah pou gagne so protection ek ki Li aide moi pou faire Li confiance. En mem temps mo finn abandonne sa bann pratik traditionnel-la.” Eski li finn konn kit malheur? James dire: “Non, tou seki finn arrivé, c’est mo finn aprann faire Jéhovah confiance. Mo finn trouvé couma Jéhovah kapav vinn enn camarade bien proche.” En realité, pendant sa sept dernier l’année-la, James finn servi couma enn predicateur a plein temps, ek finn aide lezot dimoune pou koné ki la Bible enseigné.

Kifer ou pa suive l’exemple James? Observe bien bann coutume ki bann dimoune faire dan ou culture, ek servi ou “capacité pou raisonné” pou guetté si zot en accord avek “volonté Bondié.” (Romains 12:1, 2) Apré sa, ena courage pou separe ou ar bann pratik ki ena enn rapport avek superstition. Si ou faire sa, ou kapav ena confiance ki Jéhovah ‘pou accueil ou’ ek pou protege ou. (2 Corinthiens 6:16-18) Pareil couma James, ou pou trouvé couma sa promesse la Bible-la li vrai: “Nom Jéhovah li enn la tour solide. Enn dimoune juste galopé al ladan ek li gagne protection.”—Proverbes 18:10.

[Note]

[Zimage lor page 30]

“Korokoro”

[Remerciement photo]

Avek permission Dr. Bakshi Jehangir

[Zimage lor page 30]

Enn tifi ramasse mangé ki’nn laissé pou ki lezot pa servi sa pou jette enn sort