Bann Bon Vwazin Inportan

“Vomye enn vwazin pros ki enn frer ki elwayne.”—Proverb 27:10.

ENN kikenn ki ti byin konn Lalwa dan premye syek N.L. ti demann Zezi: “Kisannla vremem mo prosin?” Zezi ti reponn li, pa kisannla so prosin ete, me ki kitsoz fer vinn enn vre prosin. Sirman u’si u konn byin sa legzanp ki Zezi ti pran la. Buku dimunn apel sa legzanp la, parabol bon Samaritin. Nu truv li dan Levanzil Lik. Ala ki manyer Zezi ti rakont sa zistwar la:

“Bann voler finn atak enn zom ki ti sorti Zerizalem ek ki ti pe al Zeriko. Zot finn pran tu seki li ti ena ek zot finn bat li. Zot finn les li la demi-mor. Par azar, enn pret ti pe desann par sa semin la, me kan li’nn truv li, li’nn travers lot kote semin. Enn Levit usi ti pas dan sa semin la ek kan li’nn truv li, li’nn sot semin. Me enn Samaritin ki ti pe pas par la, finn truv li. Li’nn gayn buku pitye letan li’nn get li. Li’nn koste pre ar li ek li’nn vid delwil ek divin lor so bann blesir. Lerla li’nn met enn bandaz lor la. Apre sa li’nn met li lor so prop burik ek li’nn amenn li dan enn loberz ek li’nn pran li byin swin. Landemin li’nn donn propryeter loberz de denye ek li’nn dir li, ‘Pran sa misye ki’nn blese la swin, tu seki to depanse anplis, mo pu donn twa kan mo returne.’ Dapre twa, lekel parmi sa trwa zom la finn montre ki li prosin sa zom ki bann voler ti atake la?”—Lik 10:29-36.

Dapre lord, sa kikenn ki ti byin konn Lalwa la ti konpran pwin inportan sa parabol la. San ezite li’nn dir byin kisannla ti prosin sa zom ki ti’nn blese la: “Sa kikenn ki ti ena pitye pu li la.” Lerla Zezi ti dir li: “Ale, ek twa usi fer parey.” (Lik 10:37) Sa legzanp la ena buku pwa, li’nn montre kisannla nu prosin uswa nu vwazin. Parabol Zezi kapav fer nu demann numem: ‘Ki kalite prosin uswa ki kalite vwazin mwa mo ete? Eski mo ras uswa mo lanvironnman kot mo’nn grandi inflyans mwa kan mo bizin deside kisannla mo prosin? Eski sa bann pwin la diminye mo devwar anver mo prosin ki dan problem? Eski mo fer buku zefor pu vinn enn bon prosin?’

Kotsa pu Kumanse?

Si nu santi ki nu bizin amelyor nu dan sa domenn la, nu bizin kumans par nu latitid. Nu bizin vinn enn bon vwazin. Sa usi kapav ed nu pu gayn bann bon vwazin. Ena anviron de milan, dan so Sermon lor Montayn ki tu dimunn kone, Zezi ti byin montre sa prinsip inportan ki fer bann dimunn viv byin ant zot la. Li ti dir: “Donk, tu kitsoz ki zot anvi dimunn fer pu zot, zot usi zot bizin fer parey pu bannla.” (Matye 7:12) Kan nu bon ek kan nu respekte lezot, zot usi zot pu fer parey pu nu.

Dan enn lartik ki apel “Kontan U Vwazinaz,” zurnalis Lise Funderburg ti sit sertin ti kitsoz ki kapav fer pu ankuraz bann dimunn dan vwazinaz pu viv byin ant zot. Li’nn ekrir: ‘Mo’le. . . ki bann dimunn montre ki zot interese ar zot bann vwazin kan zot rann bannla plizir ti servis. Par egzanp aste zot zurnal, zet enn kudey lor zot zanfan, pran enn komisyon pu zot labutik. Dan lemond dimunn nepli an sekirite akoz laper ek krim. Ala kifer mo’le ki ena sa bon lantant la ant vwazin. Pwiski u bizin kumans enn plas, kifer eski u pa kumans avek vwazin ki pli pros ar u?’

Enn magazinn ki apel Canadian Geographic ti sit usi enn pwin ki kapav ed bann vwazin pu devlop enn bon latitid anver zot kamarad. Enn ekrivin ki apel Marni Jackson ti dir ki: “Parey kuma nu pa kapav swazir nu bann fami, nu pa kapav swazir kisannla pu vinn nu vwazin usi. Pu viv byin avek nu bann vwazin, nu bizin fer atansyon ki nu ena bann bon manyer ek respekte seki zot panse ek seki zot ete.”

Bann Bon Vwazin Dispoze pu Fer Premye Pa

Li vre ki buku parmi nu kapav santi nu malalez pu apros ar nu bann vwazin. Kitfwa li pli fasil pu res tusel ek viv kuma etranze. Me, Labib dir ki “ena buku plis boner kan done ki kan gayne.” (Akt 20:35) Donk, enn bon vwazin fer zefor pu fer konesans avek bann dimunn ki otur li. Li pa neseser ki li devlop enn lamitye solid, me li pu fer zefor pu gayn enn bon konversasyon detanzantan. Pu bann premye fwa li kapav zis fer enn surir uswa enn siyn-detet.

Kuma finn dir lao, ‘bann plizir ti kitsoz’ ki bann vwazin fer pu zot kamarad li vremem inportan pu ena ek pu gard lantant ant vwazin. Alor, li bon ki u montre bann ti latansyon pu enn vwazin parski sa pu ankuraz respe ek korperasyon. Anplis, si nu fer sa nu pu swiv lord ki Labib done: “Pa refiz fer dibyin anver bann dimunn ki merit li, sak fwa ki to truve to kapav fer li.”—Proverb 3:27; Zak 2:14-17.

Bann Bon Vwazin Ena Rekonesans

Li ti pu extra si nu ti kapav dir ki tu dimunn ki gayn led ek bann kado ena rekonesans. Malerezman, pa tultan ki sa arive. Buku dimunn ki ofer led ek bann kado avek bon lintansyon pa finn gayn sa rekonesans la. Lerla kitfwa sa dimunn sinser la kapav panse, ‘Dernye fwa mo fer sa!’ Defwa, u fer zefor pu dir enn bonzur ek lev enn lamin ar u bann vwazin. Rezilta, zot kapav zis fer enn siyn-detet parski kiafer.

Mem si enn kikenn paret pena rekonesans, sa pa vedir ki li vremem kumsa. Kitfwa so kiltir fer li ezite uswa malalez ek fer li reazir kuma enn kikenn ki pa kas latet. Lot kote, parski nu pe viv dan enn lemond kot pena rekonesans, sertin dimunn kapav truv drol ki u amikal, uswa zot mem kapav supsonn u bann lintansyon. Kitfwa zot bizin ki u rasir zot inpe. Donk, pu gayn enn bon lantant bizin letan ek pasyans. Me, bann vwazin ki fer premye pa ek ki ena rekonesans pu ankuraz enn bon lanbyans dan vwazinaz kot ena lape ek boner.

Kan Ena Problem

Enn bon vwazin sirtu inportan kan ena bann problem. Dan bann moman difisil nu kapav truve ki bann vwazin vremem interese ar zot kamarad. Ena buku legzanp bann vwazin ki finn montre zot lamur dan sa bann moman la. Kan zot tu pe pas par mem maler bann vwazin korpere ek fer tu pu zot kamarad. Suvan, mem bann ki pa dakor pu travay ansam.

Par egzanp, The New York Times ti rakonte ki kan an 1999 ti ena enn tranbleman deter an Turquie, bann ki lennmi depi lontan ti montre ki zot ti dispoze pu ed zot bann vwazin. Enn zurnalis an Grèce ki apel Anna Stergiou ti ekrir sa dan enn zurnal: “Pandan plizir lane finn anseyn nu pu deteste bann Tirk. Me nu pa’nn kontan kan nu’nn truv zot gran sufrans. Nu ti bulverse, nu ti plore. Kan nu’nn truv bann tibaba mor, sa laenn ki ti dat depi lontan la ti disparet.” Kan bann sekur ti arete, bann lekip sekur Grek ti refiz abandonn rod bann sirvivan.

Li vremem enn bon aksyon kan al sap lavi bann dimunn apre bann katastrof. Kan averti enn vwazin avan enn maler, pu sap so lavi, li konsidere kuma enn aksyon ki ena plis valer ankor. Malerezman, listwar montre ki suvan bann dimunn pa apresye kan zot vwazin vinn averti zot enn maler. Sa arive parski, kan pe anons sa, zot pa vremem truv sa katastrof ki pe menas zot la. Suvan bann ki lans bann lavertisman zwenn bann dimunn ki ena dut. Tu dimunn ki pe sey ed bann seki pa konsyan ki zot an danze, bizin kontiyn persiste ek ena lespri sakrifis.

Pli Gran Kitsoz enn Vwazin Kapav Fer

Zordi, enn kitsoz byin pli inportan ki enn katastrof natirel pe vinn lor bann dimunn. Se travay Bondye Tu-Pwisan ki pu tir krim, mesanste, ek bann lezot problem lor later ki asosye ar sa de problem la. Sa zur la finn fini anonse. (Revelasyon 16:16; 21:3, 4) Sa levennman inportan la pa enn ti zafer ki nu pa sir pu arive, me li enn realite. Bann Temwin Zeova anvi partaz sa konesans la avek otan dimunn posib. Kumsa sa bann dimunn la kapav gayn lavi kan sa levennman ki byin pros la arive. Ala kifer zot pe tuletan partisip dan zot aktivite predikasyon ki dimunn partu dan lemond kone. (Matye 24:14) Zot fer sa volonterman parski zot kontan Bondye ek zot prosin.

U kapav ena u prop lide lor zot, ek kitfwa u kapav mem agase. Me pa les sa anpes u ekute kan bann Temwin vinn kot u uswa koz ar u ninport kot sa u ete. Zot pe fer zefor pu vinn bann bon vwazin. Alor aksepte zot linvitasyon pu etidye Labib avek u. Aprann kuma Parol Bondye promet nu ki byinto nu pu konn enn lavenir ere kot tu dimunn pu viv byin ansam avek zot vwazin. Lerla, pu nepli ena diskriminasyon rasyal, relizye, uswa sosyal pu gat bann bon relasyon ki laplipar ant nu vremem anvi.

[Zimaz lor paz 5]

Li bon ki u rann bann dimunn dan u vwazinaz servis

[Bann foto]