Donn Temwaynaz Kuma enn Bon Vwazin
1 Zezi ti dir ki u ‘bizin kontan u prosin kuma u mem.’ (Matye 22:39) Pena dut ki u pe “fer dibyin” anver u bann frer krwayan, me eski u kapav usi montre lamur pu bann dimunn ki res pre kot u? (Galat 6:10) Kuma?
2 Si U Fer Lezot Konn U: Eski u bann vwazin kone ki u enn Temwin? Si zot pa kone, kifer eski u pa pres ar zot kan randevu dan u landrwa? Bann rezilta ki u pu gayne kapav etonn u! Uswa u kapav fer temwaynaz okazyonel ar zot, si u truve ki u pu pli alez. Parfwa deor, u kapav truv zot pe travay dan zot zardin uswa pe promne lor simin. Apros zot avek enn surir salere. Fer enn zefor pu koz lor u bann krwayans, explike ki kote Lasal Rwayom truve, ek seki fer laba, ek fer zot kone usi kisannla ankor dan landrwa al lasal. Donn zot enn fey linvitasyon pu reynion. Fer u enn devwar pu donn enn temwaynaz konple lor bon nuvel ar tu dimunn ki u kone.—Akt 10:42; 28:23.
3 Par Legzanp U Kondwit: U kondwit amikal rann enn gran temwaynaz lor u ek li uver simin pu u kapav prese. Sa ‘donn lanseynman Bondye valer.’ (Tit 2:7, 10) Montre ki u vremem interese ar u bann vwazin. Res amikal, ek konpran zot. Respekte zot lavi prive ek zot trankilite. Si enn parmi zot tom malad, pran li kont ek ofer li u led. Si enn nuvo fami pe vinn res dan u vwazinaz, pas kot zot pu swet zot byinveni. Sa bann bon aksyon la donn enn bon linpresyon ek zot fer Zeova plezir.—Ebre 13:16.
4 Par Laparans Bann Kitsoz Ki U Posede: Enn bon vwazin bizin usi pran byin swin so lakaz pu ki li paret prezantab. Enn lakaz ek enn lakur ki prop ek atiran, rann enn bon temwaynaz. Me byinsir enn lakaz malprop, kot bann kitsoz pe trenn-trene partu kapav fer lezot kritik nu mesaz. Donk, li byin inportan ki u gard u lakaz, u lakur, ek u veykil prop, ek dan enn bon leta.
5 U lintere pu bann dimunn ki an deor kongregasyon Kretyin montre lamur ki u ena pu u prosin. Ki rezilta sa kapav done? Ebyin, ‘parski sa bann dimunn la finn temwin avek zot lizye u bann bon aksyon,’ ena parmi zot pu kapav donn “Bondye laglwar.”—1 Pyer 2:12.