Kontiyn Met an Pratik Bann Kitsoz Ki Zot Finn Aprann

“Met an pratik bann kitsoz ki zot finn aprann, ki zot finn aksepte, ki zot finn tande ek truve lor mwa, ek Bondye ki donn lape pu avek zot.”—FILIPYIN 4:9.

1, 2. An zeneral, eski vremem Labib pe inflyans lavi bann dimunn ki dir zot relizye? Explike.

“LINFLYANS relizyon pe ogmante, me linflyans bann prinsip moral pe diminye.” Se tit ki nu kapav lir lor enn zurnal ki apel Emerging Trends. Li ti fer enn rezime lor rezilta enn rapor dan l’Amérique. Li paret ki dan sa peyi la, ena pli buku dimunn aster ki al legliz ek zot dir ki relizyon ena enn plas inportan dan zot lavi. Me get seki sa rapor la dir: “Malgre sa bann gran-gran sif la, bann Amerikin pa tro sir ki relizyon pe inflyans lavi sak dimunn ek lasosyete an zeneral.”

² Nu pa truv sa sityasyon la zis dan sa peyi la. Partu dan lemond ena buku dimunn ki dir zot aksepte Labib ek zot relizye. Me zot pa pe les Labib inflyans zot lavi. (2 Timote 3:5) Enn kikenn ki sef dan enn grup resers finn dir: “Nu tuzur ena buku lestim pu Labib, me pu pran letan pu lir li, pu etidye li ek pu aplik li, depi lontan nu’nn aret fer sa.”

3. (a) Kuma eski Labib ena enn lefe lor bann dimunn ki vinn bann vre Kretyin? (b) Kuma eski bann disip Zezi aplik konsey Pol ki nu truve dan Filipyin 4:9?

³ Me, pu bann vre Kretyin, li diferan. Kan zot finn aplik bann konsey Labib dan zot lavi, zot finn fer bann sanzman dan zot fason panse ek dan zot kondwit. Ek bann dimunn remark fasilman zot nuvo personalite. (Kolosyin 3:5-10) Pu bann Kretyin, Labib li pa enn liv ki zot met dan enn kwin ek ki pe ramas lapusyer lor enn tablet. Non, okontrer, get seki Lapot Pol ti dir bann Kretyin ki res dan lavil Filip: “Met an pratik bann kitsoz ki zot finn aprann, ki zot finn aksepte, ki zot finn tande ek truve lor mwa, ek Bondye ki donn lape pu avek zot.” (Filipyin 4:9) Bann Kretyin, pa zis aksepte laverite ki truv dan Parol Bondye. Zot met an pratik seki zot aprann. Zot kontiyn aplik bann konsey Labib, ki li dan zot fami, dan zot travay, uswa dan ninport ki domenn zot lavi.

4. Kifer eski li byin difisil pu met an pratik bann lalwa Bondye?

⁴ Me, li pa fasil pu met an pratik bann lalwa ek bann prinsip Bondye. Nu pe viv dan enn lemond ki dirize par puvwar Satan. Labib apel li “bondye sa lemond la.” (2 Korintyin 4:4; 1 Zan 5:19) Donk, li byin inportan ki nu fer atansyon kont ninport ki kitsoz ki kapav anpes nu pu res fidel ar Zeova. Me kuma eski nu kapav res fidel?

Gard Byin “Model Bann Parol Laverite”

5. Kan Zezi ti dir “kontiyn swiv mwa,” ki li ti pe rod dir par la?

⁵ Pu nu met an pratik seki nu finn aprann, ena enn kitsoz ki byin neseser. Nu bizin sutenir vre relizyon avek tu nu leker, mem si bann dimunn ki pa krwayan fer tu pu anpes nu. Pu nu andire, nu bizin fer buku zefor. Zezi ti dir: ‘Si kikenn anvi swiv mwa, li bizin aksepte kit tu ek pran so poto ek kontiyn swiv mwa.’ (Matye 16:24) Zezi pa’nn dir ki nu bizin swiv li zis pu enn semenn, enn mwa uswa enn lane. Okontrer, li finn dir: “Kontiyn swiv mwa.” Sa bann parol la montre nu ki nu pa kapav vinn enn disip Zezi zis pu enn tigit letan. Nu pa kapav enn disip Zezi zordi, ek demin nu nepli ena sa mem latasman la. Sutenir vre relizyon avek tu nu leker vedir andire dan sa semin ki nu finn swazire la, ninport ki arive. Me kuma eski nu kapav fer sa?

6. Ki ete model ki Pol ti anseyn bann Kretyin dan premye syek?

⁶ Lapot Pol ti donn Timote sa lankurazman la: “Kontiyn gard model bann parol laverite ki mo finn anseyn twa, avek lamur ek lafwa an akor avek Kris Zezi.” (2 Timote 1:13) Ki Pol ti pe rod dir par la? Mo grek ki tradir “model” li fer referans ar bann form ki enn artis fer avan ki li kumans desine. Mem si zot pa byin detaye, nu kapav konpran ki artis la pe rod desine. Li parey pu model bann parol laverite ki Pol ti anseyn Timote ek lezot Kretyin. Dan sa model la, nu pa truv bann repons egzak pu sak kestyon. Me selman, tu sa bann lanseynman la ti ase pu gid zot. Zot ti parey kuma enn plan ki gid bann dimunn sinser, kumsa zot kapav konpran ki se Zeova ki pe demann zot pu fer. Donk, pu zot fer Bondye plezir, zot ti bizin gard byin model bann parol laverite. Kuma zot ti pu fer sa? Se kan zot ti pu met an pratik seki zot ti pe aprann.

7. Kuma eski bann Kretyin ti gard byin model bann parol laverite?

⁷ Dan premye syek, ti ena bann dimunn kuma Imene, Alexand, ek Filet, ki ti pe anseyn bann kitsoz ki pa ti form parti dan “model bann parol laverite.” (1 Timote 1:18-20; 2 Timote 2:16, 17) Me kuma eski bann premye Kretyin ti pu kapav evit tom dan pyez sa bann aposta la? Zot ti bizin etidye Parol Bondye byin ek aplik li dan zot lavi. Bann ki ti swiv legzanp Pol ek lezot fidel, ti kapav rekonet ek rezet tu seki pa ti an akor avek model bann parol laverite ki zot ti aprann. (Filipyin 3:17; Ebre 5:14) Zot finn kontiyn gard zot latasman avek Bondye, olye ki zot ‘fatig zot pu fer bann diskisyon ek bann deba lor bann mo.’ (1 Timote 6:3-6) Kan nu kontiyn met an pratik laverite ki nu finn aprann, nu’si nu kapav gard nu latasman avek Bondye. Wi, nu lafwa vinn pli for kan nu truv bann milyon dimunn ki pe servi Zeova lor later antye kontiyn gard byin model bann parol laverite ki zot finn aprann ek ki truv dan Labib.—1 Tesalonisyin 1:2-5.

Rezet “Bann Fos Zistwar”

8. (a) Kuma eski Satan sey detrir nu lafwa zordi? (b) Ki lavertisman Pol finn donn nu dan 2 Timote 4:3, 4?

⁸ Satan sey detrir nu fidelite. Kuma? Li fer nu gayn dut lor bann kitsoz ki nu finn aprann. Zordi, parey kuma dan premye syek, bann aposta ek lezot dimunn ankor sey detrir lafwa bann inosan. (Galat 2:4; 5:7, 8) Parfwa zot servi televizyon, radyo, ek lagazet, pu fann bann move linformasyon lor bann serviter Bondye. Uswa zot mem dir bann mansonz lor bann metod ki bann serviter Bondye servi, ek seki pus zot pu servi Bondye. Pol ti donn lavertisman ki, pu ena sertin ki pu turn ledo ar laverite. Li ti ekrir: “Pu ariv enn letan kot zot pu nepli toler lanseynman laverite. Me zot pu swiv zot prop dezir, zot pu rasanble enn kantite anseynan otur zot ki pu dir zot seki zot ule tande. Zot pu nepli ule ekut laverite, me zot pu prefer ekut bann fos zistwar.”—2 Timote 4:3, 4.

9. Ki Pol kitfwa ti pe panse kan li ti koz lor bann “fos zistwar”?

⁹ Sertin finn interese pu kone ki ete sa bann “fos zistwar” olye ki zot gard byin model bann parol laverite. Ki sa bann fos zistwar la sa? Kan Pol ti dir sa, sirman li ti pans bann zistwar ki bann dimunn ti invante, parey kuma ti ena dan liv Tobit, enn liv ki pa biblik.a Parmi ti ena usi bann gran-gran rimer ki ti pus bann dimunn pu rod kone ki pe pase. Se kumsa usi ki, kitfwa sertin finn swiv zot prop dezir. Zot finn les zot anbete swa par bann dimunn ki ti toler bann kitsoz ki kont bann prinsip Bondye, uswa bann ki ti pe kritik bann frer ki ti pe diriz kongregasyon. (3 Zan 9, 10; Zid 4) Me mem ki kitsoz ki ti fer zot tonbe, kitfwa sertin ti prefer bann foste olye laverite ki truv dan Labib. Byin-byin vit, zot finn aret pratik bann kitsoz ki zot ti pe aprann. Ek sa finn amenn zot maler.—2 Pyer 3:15, 16.

10. Ki detrwa fos zistwar ena zordi, ek kuma eski Zan finn montre ki nu bizin fer byin atansyon?

¹⁰ Si nu egzaminn byin ek nu swazir byin tu seki nu ekute ek tu seki nu lir, nu pu kapav turn ledo ar bann fos zistwar ki ena zordi. Par egzanp, televizyon, radyo ek lagazet, suvan ankuraz enn move kondwit. Buku dimunn fer krwar ki nu pa kapav konn Bondye, uswa ki Li pa egziste, ek zot ankuraz bann dimunn pu ena sa mem lide la. Bann gran-gran bann dimunn ki analiz Labib, zot riye kan zot tann dir ki se Bondye ki finn fer ekrir Labib. Ek bann aposta lepok modern, pe sey met bann dut dan lespri bann Kretyin pu detrir zot lafwa. Se seki bann fos profet ti fer dan premye syek. Akoz sa, lapot Zan ti donn sa lavertisman la: “Mo bann zanfan ki mo byin kontan, pa krwar dan tu parol ki swadizan sorti kot Bondye, me teste zot pu gete si vremem zot sorti ar Bondye, parski buku fos profet finn sorti dan lemond.” (1 Zan 4:1) Donk, nu bizin fer byin atansyon.

11. Dan ki fason nu kapav teste pu get si vremem nu pe gard byin bann lanseynman Kretyin?

¹¹ Gete ki Pol finn ekrir lor sa size la: “Kontiyn teste zotmem pu gete si zot dan lafwa.” (2 Korintyin 13:5) Li ankuraz nu pu kontiyn teste numem pu gete si vremem nu pe gard byin bann lanseynman Kretyin. Si nu ena tandans pu ekut bann ki tuletan pe pleyne, nu bizin egzaminn numem dan lapriyer. (Psom 139:23, 24) Eski nu ena tandans pu truv erer bann serviter Zeova? Si wi, kifer? Eski kikenn finn dir kitsoz uswa finn fer kitsoz ki finn bles nu? Si wi, eski nu pe get bann kitsoz kuma bizin? Ninport ki problem nu bizin fer fas dan sa lemond la, li pa pu kontiyne pu tuletan. (2 Korintyin 4:17) Mem si nu konn sertin sityasyon difisil dan kongregasyon, eski akoz sa nu bizin aret servi Bondye? Si ena enn kitsoz ki finn bulvers nu, eski li pa pli bon ki nu fer seki nu kapav pu regle problem la, ek apre les li dan lamin Zeova?—Psom 4:4; Proverb 3:5, 6; Efezyin 4:26.

12. Kuma eski bann Berein finn les enn bon legzanp pu nu?

¹² Olye ki nu zis kritike, anu gard enn bon fason panse lor bann ranseynman ki nu gayne dan nu letid personel ek dan bann reynion. (1 Korintyin 2:14, 15) Ek olye nu dut Parol Bondye, li ti pu pli bon ki nu ena mem latitid ki bann Berein. Zot ti egzaminn Parol Bondye avek buku latansyon! (Akt 17:10, 11) Donk, anu met an pratik seki nu aprann letan nu rezet bann fos zistwar ek res atase ar laverite.

13. Kuma eski, san ki nu fer par expre, nu kapav pe fann bann fos zistwar?

¹³ Ena enn lot kalite fos zistwar kont ki nu bizin fer byin atansyon. Ena enn kantite lexperyans ki paret extraordiner, ki sirkile suvan par E-mail. Li bon ki nu fer byin atansyon ar sa bann zistwar la, sirtu si nu pa kone kot zot sorti. Mem si se enn Kretyin ki ena enn bon repitasyon ki finn avoy nu sa, kitfwa li pa finn tann sa direkteman avek sa dimunn ki’nn fer sa lexperyans la. Akoz sa, li inportan ki nu fer atansyon pu pa repet uswa avoy bann zistwar ki nu pa sir si zot vre. Wi, sirman nu pa pu anvi repet bann ‘zistwar ki pena okenn respe pu Bondye,’ uswa “bann zistwar ki kont bann kitsoz ki sin.” (1 Timote 4:7; New International Version) Nu ena lobligasyon pu koz laverite avek nu kamarad, akoz sa li pu bon si nu evit fann bann nuvel ki pa vre, mem si nu pa fer li par expre.—Efezyin 4:25.

Bann Bon Rezilta Ki Nu Gayne kan Nu Met an Pratik Laverite

14. Ki bann byinfe nu kapav gayne kan nu pratik bann kitsoz ki nu finn aprann dan Parol Bondye?

¹⁴ Kan nu met an pratik bann kitsoz ki nu’nn aprann dan nu letid personel ek dan bann reynion, nu gayn buku byinfe. Par egzanp, nu kapav truve ki nu relasyon avek nu bann frer ek ser pu amelyore.(Galat 6:10) Kan nu aplik bann prinsip ki truv dan Labib, nu pu ena enn pli bon latitid. (Psom 19:8) Anplis, nu ‘fer lanseynman Bondye paret pli zoli’ ek nu kapav atir lezot dimunn ver vre ladorasyon.—Tit 2:6-10.

15. (a) Kuma eski enn zenn finn gayn kuraz pu rann temwaynaz dan lekol? (b) Ki u finn aprann dan sa legzanp la?

¹⁵ Dan lorganizasyon Zeova, ena buku bann zenn ki met an pratik seki zot finn aprann dan zot letid Labib personel, dan bann piblikasyon, ek usi dan bann reynion kongregasyon. Par zot bon kondwit, zot donn enn gran temwaynaz zot bann profeser ek zot bann kamarad dan lekol. (1 Pyer 2:12) Anu get legzanp Leslie enn tifi ki ena 13 an ek ki res l’Amérique. Li rekonet ki defwa li ti truv li byin difisil pu koz ar so bann kamarad lekol lor so krwayans. Me, enn zur sa sityasyon la finn sanze. “Dan klas, zot ti pe koz lor bann dimunn ki sey fer u aste bann kitsoz. Enn tifi finn lev so lamin ek li finn sit legzanp bann Temwin Zeova.” Antan ki enn Temwin, ki Leslie finn fer? Li rakonte: “Mo finn defann mo lafwa, ek mo sir ki lezot pa’nn atann ki mo ti pu fer sa parski lapliparditan mo byin trankil dan klas.” Ki rezilta Leslie finn gayne? Li dir: “Mo finn kapav plas enn brosir ek enn trak avek enn zelev, parski li ti ena buku lezot kestyon.” Wi, komye devet Zeova kontan kan li truv bann zenn ki pe pratik seki zot finn aprann, gayn kuraz pu rann temwaynaz dan lekol!—Proverb 27:11; Ebre 6:10.

16. Ki byinfe enn zenn Temwin finn gayne grasa Lekol Minister Teokratik?

¹⁶ Anu pran legzanp Elizabeth. Depi ki li ena set an, ek pandan tu bann lane ki li finn pase dan lekol primer, sak fwa ki li ti ena enn devwar pu fer dan Lekol Minister Teokratik, li finn invit so bann profeser pu vinn Lasal. Si enn profeser pa ti kapav vini, Elizabeth ti reste apre lekol, ek li ti fer so devwar devan sa profeser la. Pandan so dernye lane dan kolez, Elizabeth finn ekrir enn rapor dis paz lor bann byinfe ki li finn gayne dan Lekol Minister Teokratik. Ek li finn prezant sa rapor la devan kat profeser. Li finn gayn linvitasyon usi pu koz lor enn size, dapre model ki nu swiv dan Lekol Minister Teokratik. Li finn swazir size “Kifer Bondye Permet Mesanste?” Elizabeth finn byin profit sa program lanseynman ki bann Temwin Zeova gayne grasa Lekol Minister Teokratik. Li enn parmi bann zenn Kretyin ki donn Zeova laglwar kan zot met an pratik seki zot aprann dan so Parol.

17, 18. (a) Kan Labib dir nu ki nu bizin onet, ki konsey li donn nu lor la? (b) Ki lefe, kondwit onet enn Temwin Zeova finn ena lor enn misye?

¹⁷ Labib ankuraz bann Kretyin pu azir dan enn fason onet dan tu kitsoz. (Ebre 13:18) Kan nu fer malonet, sa kapav detrir nu relasyon avek lezot, ek pli inportan ankor, sa kapav detrir nu relasyon avek Zeova Limem. (Proverb 12:22) Nu bon kondwit montre ki nu pe met an pratik seki nu’nn aprann. Ek sa fer lezot ena enn pli gran respe pu bann Temwin Zeova.

¹⁸ Anu get legzanp enn misye ki ti apel Filip, ki ti dan larme. Par erer Li finn mal plas enn chek siyne, ek pa ti ena okenn som larzan ekrir lor la. Se kan enn kikenn finn return li sa chek la par lapos, ki li finn realize ki li’nn fer sa erer la. Se enn Temwin Zeova ki ti truv sa chek la, ek li finn ekrir enn ti not kot li dir ki se so bann krwayans relizye ki finn pus li pu return sa chek la. Filip ti gayn sok. Li finn dir: “Mo ti pu kapav perdi tu mo kas!” Enn fwa, li ti perdi so sapo dan legliz. Sa ti byin bulvers li. Li posib ki se enn kikenn ki li ti kone ki’nn pran so sapo, alor ki la, se enn etranze ki finn return li enn chek ki ti vo plizir milye dolar! Wi, bann Kretyin ki azir dan enn fason onet, zot donn Zeova loner!

Kontiyn Met an Pratik Seki U Finn Aprann

19, 20. Ki byinfe nu pu gayne si nu azir dapre seki nu finn aprann dan Labib?

¹⁹ Bann ki met an pratik seki zot finn aprann dan Parol Bondye, gayn buku byinfe. Disip Zak finn ekrir: “Enn kikenn ki fuy dan lalwa parfe ki donn liberte ek ki kontiyn fer sa, li pu enn kikenn ki ere, parski li pa finn vinn enn kikenn ki bliye, me enn kikenn ki azir.” (Zak 1:2) Wi, si nu azir dapre seki nu finn aprann dan Labib, nu pu gayn vre boner, ek nu pu pli kapav fer fas ar bann presyon lavi. Me pli inportan ankor, Zeova pu beni nu ek nu pu gayn lespwar pu viv pu tuletan!—Proverb 10:22; 1 Timote 6:6.

²⁰ Donk, anu fer tu seki nu kapav pu kontiyne etidye Parol Bondye. Anu kontiyn rasanble ansam avek bann adorater Zeova, ek kontiyn pran kont seki pe dir dan bann reynion. Aplik seki u pe aprann, kontiyn met li an pratik, ek “Bondye ki donn lape pu avek u.”—Filipyin:4:9.

[Not anba paz]

Eski U Ankor Rapel?

• Ki ete “model bann parol laverite,” ek kuma eski nu kapav kontiyn gard li byin?

• Ki ete bann “fos zistwar” ek kifer eski nu bizin rezet zot?

• Ki byinfe, bann ki met an pratik seki zot finn aprann dan Parol Bondye, gayne?

[Zimaz lor paz 15]

Kuma eski bann premye Kretyin ti kapav evit tom dan pyez bann aposta?

[Zimaz lor paz 16]

Televizyon, radyo, lagazet, Internet, ek bann aposta, kapav fer nu gayn bann dut

[Zimaz lor paz 17]

Li pa bon ki nu fann bann zistwar ki nu pa sir zot vre

[Zimaz lor paz 18]

Bann Temwin Zeova aplik seki zot finn lir dan Parol Bondye, dan travay, dan lekol ek ninport kot zot ete