Konsolasyon Grasa Konesans Egzak lor Bondye

PU SERTIN dimunn, seki Labib dir lor lamur ek Bondye ek lor santiman ki Li ena pu bann dimunn, sulev bann kestyon ki bulvers zot. Zot demann zot: Si Bondye anvi tir lemal, si Li kone kuma pu fer li, ek si Li ena puvwar pu fer li, kifer eski lemal tuzur egziste? Pu zot, li difisil pu aksepte ki: (1) Bondye tu-pwisan; (2) Li ena lamur ek Li bon; ek an mem tan (3) bann katastrof pe kontiyne. Dapre zot, sirman sa de premye lide la fos: swa Bondye pa kapav tir lemal uswa Li pa kas latet.

Plizir zur apre ki World Trade Center dan New York ti kraze, enn sef relizye byin popiler dan États-Unis ti dir: “Dan mo lavi, plizir fwa dimunn finn demann mwa kifer Bondye permet sufrans ek maler. Mo bizin rekonet ki momem mo pa tro konn so repons.”

Konsernan seki sa sef relizye la ti dir, enn profeser ki etidye larelizyon ti ekrir ki li ti inpresyone par ‘bon lanseynman relizye’ ki sa sef relizye la ti prese. Li ti usi dakor ar seki enn spesyalis ti ekrir: ‘Parski nu pa kapav konpran Bondye, sa mem nu pa kapav konpran kifer ena sufrans.’ Me eski li vremem inposib pu konpran kifer Bondye permet lemal?

Kuma Lemal Finn Kumanse

Kontrerman ar seki bann sef relizye kapav dir, Labib montre ki nu kapav konpran kifer Bondye permet lemal. Pu nu konpran sa, nu bizin rekonet ki Zeova pa finn kre enn move lemond. Li ti kre premye kup imin parfe, san okenn pese. Kan Zeova ti get seki Li ti’nn kre, Li ti truve ki li ti “byin bon.” (Zenez 1:26, 31) Dapre so proze, Adan ek Ev ti pu fer later antye vinn kuma Paradi Edenn ek zot ti pu ranpli li avek bann dimunn ki ere. Se Bondye Limem ki ti pu diriz zot avek lamur.—Izai 45:18.

Lemal ti kumanse kan enn anz, ki ti fidel ar Bondye, finn anvi ki dimunn ador li, ek li’nn devlop sa dezir la. (Zak 1:14, 15) Li’nn montre ki li enn rebel kan li’nn inflyans Adan ek Ev pu vinn dan so kote, pu zot kont Bondye. Olye ki zot sumet ar lord byin kler ki Bondye ti donn zot, setadir pa manz ek pa tus frwi pye konesans bon ek move, Adan ek Ev finn dezobeir ek zot finn fer lekontrer. (Zenez 3:1-6) Par sa, zot pa ti zis montre ki zot ti dezobeir Bondye, me zot ti montre ki zot ti nepli anvi ki Li diriz zot.

Eski Bondye Diriz Bann Dimunn Kuma Bizin?

Ala kestyon ki finn suleve kan Adan ek Ev finn dezobeir dan zardin Edenn. Wi, sa bann imin rebel la finn les bann dut lor fason ki Zeova diriz so bann kreatir. Eski Bondye ena drwa demann limanite enn lobeisans total? Eski bann dimunn ti pu pli byin si zot ti diriz zot par zotmem?

Pu regle sa problem konsernan so dominasyon la, Zeova finn bizin aplik an mem tan so lamur, so lazistis, so sazes, ek so pwisans. Li ti byin kapav servi so pwisans pu tir sa rebelyon la enn sel kut. Ek kumsa ti pu ena lazistis, parski Li ti ena drwa fer sa. Me si Li ti fer sa, sa pa ti pu reponn kuma bizin sa kestyon ki ti suleve la. Lot kote, Li ti kapav ferm so lizye lor pese ki’nn fer. Dayer, zordi sertin kapav panse ki se enn bon desizyon. Me, sa usi pa ti pu reponn kestyon Satan ek pa ti pu montre ki bann dimunn ti pu pli byin si zot diriz zot par zotmem. Apretu, eski sa pa ti pu ankuraz lezot usi pu deturn zot ar Zeova? Ki ti pu arive lerla? Zame sufrans pa ti pu fini.

Avek sazes, Zeova finn permet bann imin diriz zot par zotmem pandan enn letan. Mem si sa ti pu vedir permet lemal pu enn letan selman, bann dimunn ti pu gayn lokazyon montre si zot reysi diriz zot par zotmem ek viv dapre zot bann prop prinsip lor seki bon ek move. Ki so rezilta? Tutlong listwar finn ena lager, linzistis, sufrans, ek dimunn finn tuletan fer dominer ar so kamarad. Avredir, pwiski li kler ki bann dimunn pa kapav diriz zot par zotmem, sa mem ase pu reponn bann kestyon ki ti suleve an Edenn.

An mem tan, Bondye finn montre so lamur kan Li’nn donn so Garson Zezi Kris, ki’nn mor an sakrifis. Sa permet bann dimunn obeisan pu libere ar pese ek lamor ki nu’nn gayne akoz dezobeisans Adan. Grasa ranson ki Zezi finn peye, tu bann ki ena lafwa dan Zezi pu kapav gayn lavi pu tuletan.—Zan 3:16.

Zeova konsol nu kan Li donn nu garanti ki sufrans ki bann dimunn pe gayne pa pu kontiyn egziste pu tuletan. Enn ekrivin Psom ti ekrir: “Dan zis enn tigit letan ankor, sa kikenn ki move la pu disparet. To pu rod li dan so plas, me li pu nepli la. Me bann ki dispoze pu abes zot, pu gayn later. Zot pu gayn enn labondans lape.”—Psom 37:10, 11.

Enn Lavenir Kot Pu Ena Sekirite ek Boner

Realizasyon bann profesi Labib montre ki Bondye pre pu tir maladi, tristes, ek lamor. Get ki avangu bann kitsoz extraordiner lapot Zan ti gayne dan enn vizyon. Li’nn ekrir: “Mo finn truv enn nuvo lesyel ek enn nuvo later, parski ansyin lesyel ek ansyin later finn disparet, ek nepli ena lamer. . . . Bondye Limem Li pu avek [limanite]. Li pu suy tu larm dan zot lizye, lamor pu nepli egziste. Bann dimunn pu nepli an dey, ek personn pa pu pleyne, ni sufer. Bann kitsoz ki avan ti egziste, finn disparet.” Pu montre ki sa bann promes la pu vremem arive, Zan ti tann sa bann parol la: “Ekrir, parski sa bann parol la zot fidel ek vre.”—Revelasyon 21:1-5.

Ki pu ariv bann milyar dimunn inosan ki’nn mor depi ki Adan ek Ev finn rebele? Zeova promet ki li pu resisit bann dimunn ki’nn mor. Lapot Pol ti dir: “Mo ena lespwar dan Bondye . . . ki pu ena enn rezireksyon bann move dimunn ek bann bon dimunn tulede.” (Akt 24:15) Sa bann dimunn la pu gayn lokazyon viv dan enn lemond “kot pu ena lazistis.”—2 Pyer 3:13.

Enn papa ki kontan so garson pu permet ki li fer enn loperasyon grav, parski li kone ki apre li pu byin. Parey kumsa mem, Zeova usi finn permet ki bann dimunn konn lemal pu enn moman lor later. Me, bann ki fer volonte Bondye pu gayn bann benediksyon pu tuletan. Pol ti explike ki: “Bann kreatir lor later finn vinn esklav pese ek lamor, pa parski zot ki finn ule sa, me par sa kikenn ki’nn met zot ladan la. Me ena enn lespwar ki zot pu libere ar esklavaz pese ek zot pu gayn enn liberte extraodiner kuma bann zanfan Bondye.”—Romin 8:20, 21.

Wi, sa se enn bon nuvel. Li pa kuma bann nuvel ki nu tande dan televizyon ek ki nu lir dan zurnal. Sa mem pli bon nuvel ki ena ek li sorti ar “Bondye ki donn konsolasyon.” Sa Bondye la vremem pran nu kont.—2 Korintyin 1:3.

[Zimaz lor paz 6]

Letan finn montre ki limanite pa kapav diriz li byin san Bondye

[Bann foto]

Enn fami ki res Somali: UN PHOTO 159849/M. GRANT; bom atomik: USAF photo; kan konsantrasyon: U.S. National Archives photo