Kot Sa U Kapav Truv Bann Vre Valer Spirityel?

RODOLPHE tap enn kut kontrer ek li dir: “Si to pu swiv enn relizyon zis akoz bann tradisyon familyal, be kifer to pa swazir relizyon Seltik ki nu bann anset ti pratike 2000 an avan?” Kan sa zenom ki pe ekut li la finn tann sa, li fer enn ti surir.

Rodolphe explike: “Mo relasyon avek Bondye li byin inportan pu mwa. Mo kont lide ki mo oblize ena bann krwayans relizye zis pu akoz bann kutim, setadir zis parski bann manb dan mo fami ki finn viv dis uswa mem san tan avan, ti pratik enn sertin relizyon.” Rodolphe ti kalkil byin bann kitsoz. Li pa ti konsider sa kestyon byin inportan la zis kuma enn kitsoz ki li finn erite.

Li vre ki zordi, demwin-anmwin nu truv bann dimunn transmet enn relizyon zenerasyon an zenerasyon. Me, mazorite dimunn ankor tuzur res atase ar relizyon zot fami. Me eski li tuzur bon ki nu res atase ar bann valer relizye nu bann paran? Ki Labib dir lor la?

Apre 40 an dan dezer, Zozye, ki ti ranplas Moiz, ti met enn swa devan bann Izraelit: “Me asterla, si zot truve ki li pabon ki zot servi Zeova, zordi zot bizin swazir pu zotmem seki zot pu servi, swa bann bondye ki zot anset ki ti lot kote Larivyer ti servi, swa bann bondye bann Amorit, peyi kot zot pe reste. Me an seki konsern mwa ek mo fami, nu pu servi Zeova.”—Zozye 24:15.

Enn bann “anset” lor ki Zozye ti koze, ti Tera, papa Abraam. Li ti res dan lavil Ur, lepok kot lavil la ti truv dan les Larivyer Lefrat. Labib pa koz buku lor Tera, apart ki li ti ador bann lezot bondye. (Zozye 24:2) Mem si so garson Abraam pa ti konpran net volonte Bondye, li ti aksepte pu kit so lavil ek al kot Zeova ti donn li lord pu ale. Wi, Abraam ti swazir enn relizyon diferan ar relizyon so papa. Parski li finn fer sa, Abraam finn gayn bann benediksyon ki Bondye ti promet pu donn li. Ek li finn vinn sa kikenn ki buku relizyon rekonet kuma “papa tu bann ki krwar an Bondye.”—Romin 4:11, Today’s English Version.

Labib koz an byin lor Rit, enn anset Zezi Kris. Rit ti enn Moabit ki ti marye ar enn Izraelit. Plitar li’nn vinn vev ek li ti bizin fer enn swa. Li ti bizin swazir: swa li res dan so prop peyi, swa li return avek so belmer an Izrael. Rit ti rekonet ki ladorasyon Zeova ti ena enn pli gran valer ki ladorasyon bann idol ki so bann paran ti pe pratike. Akoz sa li finn dir so belmer: “To pep pu vinn mo pep, ek to Bondye pu vinn mo Bondye.”—Rit 1:16, 17.

Dictionnaire de la Bible fer enn komanter lor sinifikasyon sa resi la dan Labib. Li explike ki sa resi la montre kuma ‘enn fam ki’nn ne dan enn lot peyi, parmi bann payin ki ti lennmi bann Izraelit ek ki bann Izraelit ti deteste, . . . finn vinn enn anset Lerwa David, san ki li atann, akoz so lamur pu pep Zeova ek so ladorasyon.’ Rit pa ti ezite pu swazir enn relizyon ki ti diferan ar relizyon so bann paran. Rezilta: Bondye finn beni li.

Seki ti pase okumansman vre relizyon Kretyin, montre dan enn fason byin kler kifer bann disip Zezi ti abandonn relizyon zot bann anset. Dan enn diskur byin konvinkan, Lapot Pyer ti invit bann dimunn ki ti pe ekut li pu “separ zot ek sove ar sa zenerasyon ki byin-byin move la.” (Akt 2:37-41) Enn parmi bann pli gran legzanp, se legzanp Sol. Li ti enn Zwif ki ti persekit bann Kretyin. Alor ki li ti lor larut pu al ver Damas, li ti truv enn vizyon lor Kris. Plitar Sol finn vinn enn Kretyin, ek li’nn gayn non lapot Pol.—Akt 9:1-9.

Mazorite bann premye Kretyin pa finn fer sa mem lexperyans extraodiner ki Pol la. Me, zot tu finn bizin kit swa relizyon bann Zwif, uswa aret ador bann bondye payin. Bann ki finn aksepte vre relizyon Kretyin, finn fer sa apre ki zot finn konn byin tu bann fe. Ek suvan zot finn pran sa desizyon la apre ki zot finn gayn long-long diskisyon lor rol Zezi antan ki Mesi. (Akt 8:26-40; 13:16-43; 17:22-34) Sa bann premye Kretyin la ti konn byin ki zot bizin fer bann sanzman dan zot lavi. Zot tu ti gayn sa linvitasyon la, bann Zwif ek bann ki pa ti Zwif. Mesaz la ti parey pu zot tu. Donk, pu fer Bondye plezir, zot ti byin bizin swiv enn nuvo form ladorasyon, setadir Vre Relizyon Kretyin.

Enn Swa Ki Byin Inportan pu Nu

Pena dut ki bann Kretyin dan premye syek ti bizin ena kuraz pu rezet bann tradisyon relizye zot fami. Par egzanp ti ena Relizyon bann Zwif ek ladorasyon lanperer uswa ladorasyon bann bondye payin. Wi, zot ti bizin kuraz pu swiv enn relizyon ki bann Zwif ek bann Romin ti meprize. Akoz sa swa la, zot pa finn tarde pu konn enn persekisyon byin dir. Zordi, nu bizin sa mem kuraz la pu refiz “les nu gayne ek tom dan sa pyez kot buku dimunn finn tonbe la, setadir swiv laful.” Se seki Hippolyte Simon, levek Katolik lavil Clermont-⁠Ferrand, finn ekrir dan so liv Vers une France païenne? Wi, nu bizin kuraz pu nu asosye nu ar enn ti muvman relizye ki parfwa gayn byin kritik, setadir bann Temwin Zeova.

Paul, li enn zenn garson ki res Bastia, an Corse. Li ti grandi dan relizyon Kaltolik, ek detanzantan li ti partisip dan bann laktivite legliz, kuma par egzanp vann bann gato pu ramas kas pu enn lorganizasyon saritab Katolik. Li ti anvi gayn enn pli bon konpreansyon lor Labib. Donk, li finn aksepte pu gayn bann diskisyon regilye avek bann Temwin Zeova. Avek letan, li finn realize ki seki li pe aprann pu fer li gayn bann benediksyon dirab. Avek tu so leker, Paul finn aksepte bann lanseynman ki ena dan Labib ek li’nn vinn enn Temwin Zeova. So bann paran finn respekte so swa, ek sa pa finn afekte bon relasyon ki li ena avek so fami.

Amélie res dan sid La France. Bann manb so fami Temwin Zeova depi kat zenerasyon. Kifer eski li finn swazir pu aksepte bann valer relizye so bann paran? Get seki li dir: “U pa vinn enn Temwin Zeova zis parski u paran uswa u bann gran paran zot bann Temwin Zeova. Me enn zur pa enn zur, u dir umem: ‘Se mo relizyon parski mo krwar dan sa bann lanseyman la.’ ” Parey kuma enn kantite lezot zenn Tewmin Zeova, Amélie kone ki so bann krwayans relizye ki byin solid donn so lavi enn sans ek fer li gayn enn boner dirab.

Kifer Nu Bizin Aksepte Bann Lanseynman Bondye

Liv Proverb sapit 6 verse 20, donn enn lankurazman bann ki anvi fer Bondye plezir. Li dir: “A mo garson, obzerv komannman to papa, ek pa abandonn lalwa to mama.” Sa konsey la pa ankuraz nu pu obeir dan enn fason aveg. Okontrer li ankuraz bann zenn pu aksepte bann prinsip Bondye. Kuma? Se kan zot ogmant zot lafwa ek zot pran pozisyon pu Bondye. Lapot Pol ti invit so bann konpaynon pu “verifye tu bann kitsoz.” Zot ti bizin tyeke pu gete si lanseyman ki zot finn gayne li an akor avek Parol Bondye, ek So volonte, ek fer zefor pu azir an armoni avek sa.—1 Tesalonisyin 5:21.

Plis ki sis milyon Temwin Zeova, ki zot zenn uswa aze, ki zot finn grandi dan enn fami Kretyin uswa non, zot finn pran sa desizyon la. Grasa enn letid Labib byin atantif, zot finn truv bann repons egzak konsernan bann kestyon lor sans nu lavi. Zot finn byin konpran volonte Bondye pu tu bann dimunn. Deswit kuma zot finn gayn sa konesans la, zot finn aksepte bann lanseynman Bondye ek zot finn fer tu pu fer volonte Bondye.

Ki u enn kikenn ki suvan lir sa magazinn la uswa non, kifer eski u pa aksepte linvitasyon bann Temwin Zeova pu ed u examinn bann valer spirityel ki ena dan Labib? Kumsa, u pu kapav “gute ek gete kuma Zeova Li bon” ek u pu gayn konesans. Enn konesans ki, si u met li an pratik, pu fer u gayn lavi pu tuletan.—Psom 34:8; Zan 17:3.

[Zimaz lor paz 3]

Kat zenerasyon enn fami Temwin Zeova an France

[Zimaz lor paz 5]

Rit ti swazir pu servi Zeova olye ki bann bondye so bann anset