Pa Buze ek Gete Kuma Zeova Pu Sov Zot!
“Pran zot pozisyon, pa buze ek gete kuma Zeova pu sov zot.” —2 KRONIK 20:17.
1, 2. Kifer konsekans latak “Gog ki dan peyi Magog,” ki pre pu arive, li pli grav ki menas teroris internasyonal?
SERTIN finn dir ki latak teroris se enn latak kont lemond antye, mem kont sivilizasyon limem. Li alor normal ki nu bizin pran sa menas la serye. Me de lot kote, ena enn lot latak ki pu ena enn konsekans pli grav ankor ek lemond pa pe tro pran sa kont uswa zot pa pe pran sa kont ditu mem. Ki sa latak la sa?
2 Se latak “Gog ki dan peyi Magog,” ek Labib koz lor la dan Ezekyel sapit 38. Eski nu pe egzazere kan nu dir ki sa latak la ena enn konsekans pli grav ki menas teroris internasyonal? Non paditu, parski latak Gog li plis ki enn latak kont bann guvernman imin. Li atak guvernman Bondye ki dan lesyel! Me selman, bann dimunn zot, kan ena bann latak kont zot sistem, zot pa tuzur reysi konbat sa. Me nu Kreater Li, Li byin kapav fer fas avek latak Gog ki pli vyolan.
Enn Latak Kont Guvernman Bondye
3. Ki bann dirizan lemond finn invite pu fer depi 1914, ek kuma zot finn reazir?
3 Rwayom Bondye finn etabli dan lesyel an 1914. Depi sa, finn kontiyne ena lager ant move sistem ki Satan dirize ek Lerwa ki Bondye inn etabli ek ki pe dirize zordi. Kan Rwayom Bondye ti etabli, bann dirizan lemond ti informe ki zot bizin sumet ar sa Lerwa ki Bondye finn swazir la. Me zot ti refiz pu fer sa. Se seki enn pasaz Labib ti anonse pu arive, li ti dir: “Bann lerwa lor later finn pran pozisyon ek bann gran ofisye finn rasanble kuma enn sel kont Zeova ek kont sa kikenn ki li finn swazire la. Zot ti dir: ‘Anu kup zot bann lyin ek zet zot lakord lwin ar nu!’ ” (Psom 2:1-3) Li pu kler ki lopozisyon kont dominasyon Rwayom Bondye pu ariv so moman pli for pandan latak Gog ki dan peyi Magog.
4, 5. Kuma bann dimunn kapav lager kont guvernman Bondye ki enn guvernman invizib ki truv dan lesyel?
4 Nu kapav demann numem kuma bann dimunn kapav lager kont enn guvernman invizib ki truv dan lesyel. Labib dir ki “san karant-kat mil [dimunn], ki finn aste depi lor later,” ansam avek “Lanyo,” Zezi Kris, fer parti dan sa guvernman la. (Revelasyon 14:1, 3; Zan 1:29) Labib apel sa guvernman la “nuvo lesyel” parski li truv dan lesyel, ek bann dimunn lor ki li pu guverne, apel zot “nuvo later” parski zot pu res lor later. (Izai 65:17; 2 Pyer 3:13) Laplipar bann manb 144,000 ki pu reyn avek Kris finn fini konplet zot lavi lor later avek fidelite. Donk, zot finn montre ki zot merite kumans zot nuvo fonksyon dan lesyel.
5 Me, ena enn tigit parmi sa bann manb 144,000 la ki ankor lor later. An 2002, ti ena plis ki 15,000,000 dimunn ki ti asiste Memoryal, me parmi zot, zis 8,760 ki ti montre ki zot ena lespwar ki fi’nn swazir zot pu gayn sa privilez la dan lesyel. Ninport kisannla ki oze atak sa bann manb ki pu fer parti dan Rwayom Bondye la, pe atak anrealite Rwayom Bondye.—Revelasyon 12:17.
Lerwa Konplet So Viktwar
6. Kuma Zeova ek Zezi konsider lopozisyon ki dirize kont pep Bondye?
6 Labib ti dir an avans kuma Zeova pu reazir anver lopozisyon ki ena kont so Rwayom ki’nn fini etabli dan lesyel. Nu kapav lir sa bann parol la: “Sa Kikenn ki pe asiz dan lesyel la pu riye; Zeova Limem pu mok zot. Ek lerla, dan so gran koler Li pu koz ar zot ek Li pu truble zot. Li pu dir zot: ‘Mwa, mo finn instal mo lerwa lor Syon, mo montayn sakre.’ ” (Psom 2:4-6) Asterla, lepok inn arive pu Zezi “konplet so viktwar” anba direksyon Zeova. (Revelasyon 6:2) Kuma Zeova konsider lopozisyon ki ena kont so pep pandan lepok ki pu ena sa viktwar final la? Anrealite, Zeova konsider sa kuma enn lopozisyon kont Li ek kont so Lerwa ki pe reyne. Zeova dir: “Seki pe tus zot, pe tus mo lagrin lizye.” (Zekarya 2:8) Ek Zezi ti byin dir ki li pran kont seki bann dimunn fer uswa pa fer anver so bann frer. Li konsider sa kuma bann kitsoz ki pe fer uswa ki pa pe fer anver limem.—Matye 25:40, 45.
7. Pu ki rezon bann manb “gran laful” ki mansyone dan Revelasyon 7:9, pu resanti gran koler Gog?
7 Byinsir, bann dimunn ki sutenir dan enn fason aktif bann manb 144,000 ki ankor lor later, zot usi zot pu resanti gran koler Gog. Sa bann dimunn ki pu fer parti dan “nuvo later” la, zot “enn gran laful,” ek zot finn swazire “dan tu nasyon, tribi, lepep ek lang.” (Revelasyon 7:9) Labib dir ki zot “pe debute devan tronn ek devan Lanyo, abiye avek bann long rob blan.” Sa vedir ki zot apruve par Bondye ek par Zezi Kris. Zot “ena bann brans palmye dan zot lamin,” zot donn luanz Zeova byin for ek zot rekonet ki Limem Suverin legal dan liniver. Zot rekonet usi ki dominasyon Zeova li reprezante par reyn so Lerwa ki Li’nn etabli, setadir Zezi Kris, “Lanyo Bondye.”—Zan 1:29, 36.
8. Kan Gog pu atake, ki sa pu pus Zezi pu fer ek ki rezilta sa pu amene?
8 Kan Gog pu atake, sa pu fer Lerwa ki Zeova inn etabli pran bann aksyon ek fer lager Armagedonn. (Revelasyon 16:14, 16) Bann ki finn refize pu rekonet suverennte Zeova, zot pu detrir. De lot kote, bann dimunn ki finn siport bann gran difikilte parski zot fidel anver Rwayom Bondye, zot pu gayn enn sulazman pu tuletan. Lapot Pol ti ekrir lor la, li ti dir: “Sa se enn prev ki zizman Bondye li drwat, ek akoz sa pu ziz zot diyn pu gayn enn plas dan Rwayom Bondye, se pu sa Rwayom la ki zot pe sufer vremem. Sa pran an konsiderasyon ki pu Bondye, li enn lazistis pu return maler lor bann ki pe fer zot konn maler. Me, pu zot ki pe pas par bann maler asterla, Li pu donn zot sulazman ansam avek nu, kan nu Senyer Zezi pu manifeste depi lesyel avek so bann anz pwisan. Wi, li pu vinn atraver bann laflam dife kan li pu amenn vanzans lor bann ki pa konn Bondye ek lor bann ki pa pe obeir labonn nuvel konsernan nu Senyer Zezi.”—2 Tesalonisyin 1:5-8.
9, 10. (a) Kuma Zeova ti donn Zida laviktwar kont enn gran lennmi? (b) Ki bann Kretyin bizin kontiyn fer zordi?
9 Pandan gran detres ki pe vini ek ki pu fini avek lager Armagedonn, Kris pu fer lager kont tu seki move. Me so bann disip pa pu bizin lager parey kuma li pa ti neseser pu bann abitan de tribi rwayom Zida lager plizir milye lane desela. Sa lager la ti pu Zeova, ek Li ti donn zot laviktwar. Nu kapav lir seki ti arive: “Zeova finn plas bann zom an kasyet pu atak bann garson Amonn, Moab ek rezyon montayn Seir ki ti pe vinn dan Zida, ek zot finn kumans lager ant zotmem. Alor, bann garson Amonn ek Moab ti turn kont bann abitan rezyon montayn Seir pu detrir zot konpletman. Kan zot inn fini detrir bann abitan Seir, sakenn finn ede pu tuy so kamarad. Me, Zida li, li ti ariv kot latur degard ki ti dan dezer. Letan zot finn turn ver laful, ebyin, ti ena zis bann kadav, personn pa finn sape.”—2 Kronik 20:22-24.
10 Sa ti pase egzakteman kuma Zeova ti anonse: “Zot pa pu bizin lager.” (2 Kronik 20:17) Sa les enn model pu bann Kretyin swiv kan Zezi Kris pu azir pu “konplet so viktwar.” Me antretan zot kontiyne konbat seki move, pa avek bann vre zarm, me avek bann zarm spirityel. Kan zot fer sa, zot “kontiyn vink lemal par lebyin.”—Romin 6:13; 12:17-21; 13:12; 2 Korintyin 10:3-5.
Kisannla Pu Diriz Latak Gog?
11. (a) Ki bann grup Gog pu servi pu atake? (b) Res lor nu gard dan domenn spirityel, ki sa inplike?
11 Gog ki dan peyi Magog reprezant Satan ki apel usi Dyab dan so pozisyon kot li’nn abese depi 1914. Pwiski Satan se enn kreatir invizib, li pa kapav atake direkteman limem. Me, li pu servi bann grup dimunn pu fer so travay. Ki sa bann grup ki li pu servi la? Labib pa donn okenn detay lor la. Me, li donn nu bann indikasyon ki kapav ed nu pu kone ki zot pu ete. Amezir ki bann levennman dan lemond pe realiz bann profesi Labib, tigit par tigit nu pu truv pli kler lor sa size la. Bann Temwin Zeova evit fer bann sipozisyon, me zot res lor zot gard dan domenn spirityel. Zot pran byin kont bann devlopman ki pase dan politik ek dan relizyon ki koresponn avek realizasyon bann profesi Labib.
12, 13. Kuma profet Danyel ti anons enn latak final kont pep Bondye?
12 Profet Danyel donn plis ranseynman lor enn dernye latak ki pu ena kont pep Bondye. Li ti ekrir: “Li [lerwa dinor] pu sorti avek enn gran koler pu li detrir buku dimunn. Ek li pu plas so bann latant ki kuma bann pale, ant gran lamer ek montayn sakre Dekorasyon.”—Danyel 11:44, 45.
13 Dan lepok ki ti ekrir Labib, “gran lamer” ti lamer Méditerranée ek “montayn sakre” ti Syon. Zeova ti dir konsernan Syon: “Mwa, mo finn instal mo lerwa lor Syon, mo montayn sakre.” (Psom 2:6; Zozye 1:4) Donk, dan enn sans spirityel, peyi ki truv “ant gran lamer ek montayn sakre” reprezant kondisyon spirityel prosper bann Kretyin ki Zeova finn swazire pu al dan lesyel. Zot nepli idantifye zot avek lamer ki reprezant limanite ki elwayne ar Bondye, ek zot pe atann pu reyn avek Zezi Kris dan so Rwayom ki dan lesyel. Dapre profesi Danyel, lerwa dinor pu diriz so latak byin vyolan kont bann Kretyin ki Bondye finn swazire pu al reyne dan lesyel, ek zot bann konpaynon fidel, bann manb gran laful.—Izai 57:20; Ebre 12:22; Revelasyon 14:1.
Kuma Bann Serviter Bondye Pu Reazir?
14. Ki trwa kitsoz eski pep Bondye pu fer kan pu atak li?
14 Ki nu atann bann serviter Bondye pu fer, enn fwa ki atak zot? Ankor enn fwa, nu ena enn model dapre seki pep Bondye dan lepok Yeosafat ti fer. Remarke ki bannla ti gayn lord pu fer trwa kitsoz: (1) pran zot pozisyon, (2) pa buze, ek (3) gete kuma Zeova pu sov zot. Kuma eski pep Bondye pu swiv sa bann parol la dan nu lepok?—2 Kronik 20:17.
15. Dan ki sans bann serviter Zeova pu pran zot pozisyon?
15 Pran zot pozisyon: Pep Bondye pu res ferm, zot pu kontiyn gard zot pozisyon ek sutenir Rwayom Bondye enn fason aktif. Zot pu kontiyn gard zot pozisyon netralite, setadir pu pa pran par pu okenn parti dan lemond. Zot pu res “ferm ek solid” dan zot servis fidel pu Zeova ek zot pu kontiyn donn Li laglwar devan tu dimunn akoz so lamur fidel. (1 Korintyin 15:58; Psom 118:28, 29) Okenn presyon ki zot pu kapav gayne zordi uswa dan lavenir, pa pu kapav fer zot abandonn sa pozisyon ki apruve par Bondye la.
16. Dan ki fason eski bann serviter Zeova pa pu buze?
16 Pa Buze: Bann serviter Bondye pa pu esey sov zot par zotmem, me zot pu met tu zot konfyans dan Zeova. Li tusel kapav sov so bann serviter dan sa lemond ki anba-lao la ek Li’nn promet pu fer sa. (Izai 43:10, 11; 54:15; Lamantasyon 3:26) Fer Zeova konfyans vedir usi fer konfyans mwayin vizib ki Li finn servi pandan plis ki santan pu akonpli so bann proze ek ki Li ankor pe servi zordi. Plis ki zame, bann vre Kretyin pu bizin fer konfyans zot bann konpaynon Kretyin ki finn gayn lotorite par Zeova ek so Lerwa pu pran latet dan so lorganizasyon. Sa bann Kretyin fidel la pu diriz lepep Bondye. Si nu pa swiv zot direksyon, sa kapav fini mal pu nu.—Matye 24:45-47; Ebre 13:7, 17.
17. Kifer eski bann serviter fidel Bondye pu truve kuma Zeova sov zot?
17 Gete kuma Zeova pu sov zot: Bann seki gard zot pozisyon antan ki bann Kretyin fidel devan Zeova pu rekonpanse kan Li pu sov zot. Zot bizin usi ena konfyans ki Zeova pu delivre zot. Ziska dernye ler—ek otan ki zot kapav—zot pu anonse ki zur zizman Zeova pe vini. Tu dimunn bizin kone ki Zeova vre Bondye ek ki Li ena bann serviter fidel lor later. Zame ankor pa pu bizin ena enn long dezakor lor drwa ki Zeova ena pu dirize.—Ezekyel 33:33; 36:23.
18, 19. (a) Kuma eski kantik laviktwar ki ena dan Egzod sapit 15 montre santiman bann ki pu sape kan Gog pu atake? (b) Ki li bon pep Bondye fer asterla?
18 Bann serviter Bondye pu rant dan nuvo lemond avek plis lenerzi ankor. Lerla zot pu inpasyan pu sant enn kantik pu fet laviktwar Zeova lor so bann lennmi. Zot pu fer parey kuma bann Izraelit ti fer apre ki zot ti delivre dan Lamer Ruz. Zot pu tuletan rekonesan anver Zeova akoz so proteksyon. Sakenn parmi zot, ek usi antan ki enn grup, zot pu repet sa bann parol ki ti deza prononse lontan la: “Les mo sant pu Zeova parski Li finn elev Limem byin ot. . . . Zeova enn gerye pwisan. Zeova se so non. . . . To lamin drwat A Zeova kapav kas enn lennmi but-but. Telman to siperyer, to kapav ranvers tu bann ki dres kont twa; to avoy to koler ki kuma enn gran dife, li bril zot enn sel ku, kuma lapay sek. . . . Avek lamur fidel, to finn gid sa pep ki to’nn delivre la. Wi, avek lafors to pu kondir zot ver to landrwa sakre. To pu amenn zot ek to pu plant zot dan montayn ki to posede, dan enn plas fix ki to’nn prepare pu to reste, A Zeova, sa plas sakre la, A Zeova, ki to finn etabli avek to lamin. Zeova pu reyne pu enn peryod letan indefini, wi pu tuzur.”—Egzod 15:1-19.
19 Zordi, lespwar pu viv pu tuletan finn vinn ankor plis sir ki zame avan. Se enn bon lepok pu bann serviter Bondye montre zot latasman ar Zeova. Zot bizin usi renuvle zot determinasyon pu servi Li parski Li zot Lerwa pu tuletan!—1 Kronik 29:11-13.
Eski U Kapav Explike?
• Kifer eski latak Gog pu dirize kont bann leres manb 144,000 ek bann lezot muton?
• Dan ki sans pep Bondye pu pran zot pozisyon?
• Ki sa vedir pa buze?
• Kuma pep Bondye pu truv Zeova sov zot?
[Zimage page 28]
Zeova ti donn Yeosafat ek so pep laviktwar san ki zot ti bizin lager
[Zimage page 30]
Bann leres manb 144,000 ek bann lezot muton sutenir suverennte Zeova ansam
[Zimage page 31]
Parey kuma bann Izraelit dan lepase, byinto pep Bondye pu sant enn kantik laviktwar