“Bondye Li Lamur”

“Kikenn ki pena lamur pa finn arive konn Bondye, parski Bondye Li lamur.”—1 ZAN 4:8.

1-3. (a) Ki lexpresyon Labib servi konsernan lamur Zeova, ek kifer pa kapav servi sa lexpresyon la pu so bann lezot kalite? (b) Kifer eski Labib dir ki “Bondye Li lamur”?

TU BANN kalite ki Zeova ena, zot extraordiner, zot parfe ek zot atiran. Me ena enn ki plis atiran ki tu, se lamur. Pena nanyin ki atir nu otan ver Zeova ki so lamur. Dayer, lamur se enn kalite ki dominn personalite Zeova. Kuma eski nu konn sa?

² Labib dir nu enn kitsoz lor lamur ki zame li pa dir pu bann lezot prinsipal kalite Zeova. Labib pa dir ki Bondye Li pwisans uswa ki Bondye Li lazistis uswa mem ki Bondye Li lasazes. Li posed sa bann kalite la ek Li tusel ki lasurs sa trwa kalite la. Me 1 Zan 4:8 dir nu enn kitsoz pli profon lor lamur, li dir: “Bondye Li lamur.” Wi, Zeova Li ranpli ar lamur. Sa dominn so personalite. Avredir, nu kapav konpran sa kumsa: pwisans Zeova permet Li pu azir. So lazistis ek so sazes gid fason ki Li azir. Me selman, se so lamur ki pus Li pu azir. Ek nu truv so lamur tuletan dan fason ki Li servi so bann lezot kalite prinsipal.

³ Suvan nu dir ki Zeova Li reprezantasyon lamur mem. Donk, si nu anvi aprann lor lamur, nu bizin aprann lor Zeova. Alor, anu egzaminn sertin faset konsernan lamur Zeova, enn lamur ki pena so egal.

Pli Gran Manifestasyon Lamur

4, 5. (a) Ki pli gran manifestasyon lamur dan listwar? (b) Kifer eski nu kapav dir ki ant Zeova ek so Garson ena pli gran lamur ki zame pa finn egziste avan?

⁴ Zeova finn montre so lamur dan buku fason, me ena enn kitsoz ki Li’nn fer ki pli remarkab ki tu. Ki sa kitsoz la sa? Se kan Li’nn avoy so Garson pu sufer ek pu mor pu nu. Nu kapav dir san ki nu fer erer, ki sa se pli gran manifestasyon lamur ki finn ena dan listwar. Kifer nu kapav dir sa?

⁵ Labib apel Zezi, “premye-ne dan tu kreasyon.” (Kolosyin 1:15) Pans inpe—Garson Zeova ti egziste avan ki liniver egziste. Komye letan alor eski Zeova ek so Garson ti ansam? Sertin syantifik panse ki liniver ena apepre 13 milyar lane. Me, mem si sa egzak, sa letan la pa ti pu ase long pu reprezant kantite letan ki Garson premye-ne Zeova ti viv dan lesyel! Ki Zezi ti fer pandan tu sa letan la? Li ti servi so Papa avek plezir antan ki so “zuvriye kalifye.” (Proverb 8:30; Zan 1:3) Zeova ek so Garson ti travay ansam pu kre tu bann lezot kitsoz. Zot ti vremem pas bann bon moman extraordiner ansam! Kisannla parmi nu kapav vremem konpran ki kantite sa latasman ki’nn egziste pandan sa kantite letan la, li for? Li kler donk, ki ant Zeova ek so Garson ti ena enn gran lamur ki zame pa finn egziste avan.

6. Letan Zezi ti pran batem, kuma eski Zeova ti exprim So santiman pu So Garson?

⁶ Purtan, Zeova finn avoy so Garson lor later pu li pran nesans kuma enn imin. Sa vedir ki Zeova finn bizin aksepte, pandan plis ki 30 an, res san so Garson ki Li byin kontan. Se avek enn gran lintere ki Zeova ti pe obzerv Zezi grandi lor later, ziska ki li vinn enn zom parfe. Kan Zezi ti ena apepre 30 an, li ti pran batem. Dan sa moman la, so Papa ti koz personelman depi lesyel, Li ti dir: “Sa mo Garson, mo byineme, limem mo finn aksepte.” (Matye 3:17) Sirman Zeova ti byin kontan kan Li ti truv Zezi akonpli fidelman tu seki ti profetize ek tu seki ti demann li fer!—Zan 5:36; 17:4.

7, 8. (a) Ki Zezi finn bizin andire le 14 Nizan, lane 33 N.L, ek ki so Papa ti resanti? (b) Kifer eski Zeova finn les so Garson sufer ek mor?

⁷ Me, ki Zeova ti resanti le 14 Nizan, lane 33 N.L., kan ti trayir Zezi ek kan enn laful ankoler ti vinn aret li? Ki Li ti resanti kan dimunn ti bufonn Zezi, kras lor li ek bat li kudpwin? Kan ti pe fwet li ek so lapo lor so ledo ti desire? Kan ti kulut so lamin ek so lipye lor enn poto ek ti les li apandan lor la, pandan ki bann dimunn ti insilte li? Ki sa Papa la ti resanti kan so Garson byineme ti pe kriye ver Li telman li ti pe sufer? Ki Li ti resanti kan Zezi ti pran so dernye suf ek kan pu premye fwa depi kumansman kreasyon, So Garson, ki Li ti byin kontan, ti’nn aret egziste?—Matye 26:14-16, 46, 47, 56, 59, 67; 27:26, 38-44, 46; Zan 19:1.

⁸ Pwiski Zeova ena bann santiman, pena mo pu explike ki kantite Li finn bizin sufer kan so Garson finn mor. Me seki kapav explike, se rezon ki Zeova ti ena pu Li les sa arive. Kifer eski Zeova finn aksepte sufer kumsa? Zeova fer nu dekuver enn kitsoz extraordiner dan Zan 3:16. Sa verse Labib la telman inportan ki finn apel sa “Levanzil an minyatir.” Sa verse la dir: “Bondye finn telman kontan lemond ki Li finn donn so sel Garson ki Li finn kre direk, pu ki tu seki ena lafwa an li pa detrir, me gayn lavi pu tuletan.” Donk, ala rezon kifer Zeova ti azir kumsa: lamur. Zame personn pa finn montre enn pli gran lamur ki sa.

Kuma Zeova Donn Nu Lasirans ki Li Kontan Nu

9. Ki Satan anvi fer nu krwar konsernan fason ki Zeova konsider nu, me ki lasirans Zeova donn nu?

⁹ Me selman, ena enn kestyon inportan ki nu bizin reponn: Eski Bondye kontan nu personelman? Sertin kapav dakor ki Bondye kontan bann dimunn an zeneral, kuma Zan 3:16 dir. Me anrealite, zot ena sa santiman la: ‘Zame Bondye pa pu kapav kontan mwa personelman.’ Avredir, se Satan ki byin anvi fer nu krwar ki Zeova pa kontan nu ek ki nu pena valer pu Li. Nu, petet nu panse ki nu pa merit lamur personn, uswa nu ena santiman ki nu pa vo nanyin. Purtan, Zeova donn nu lasirans ki sakenn parmi so bann serviter fidel ena valer pu Li.

10, 11. Kuma legzanp ki Zezi ti servi lor bann mwano, montre nu ki nu ena valer pu Zeova?

¹⁰ Par egzanp, get seki Zezi ti dir dan Matye 10:29-31. Pu montre ki valer so bann disip ena, Zezi ti dir: “Eski pa vann de mwano pu enn pyes larzan ki ena enn tigit valer? Purtan, pa mem enn sel pu tom ater san ki zot Papa kone. Me, Li mem kone ki kantite seve ena lor zot latet. Donk, pa gayn per: zot vo plis ki buku mwano.” Anu gete ki sa bann parol la ti vedir pu bann dimunn ki ti pe ekut Zezi dan premye syek.

¹¹ Dan lepok Zezi, enn mwano ti zwazo pli bomarse ki enn kikenn ti kapav aste pu li manze. Pu enn pyes larzan ki ti ena enn tigit valer, enn dimunn ti kapav aste de mwano. Me Zezi ti dir plitar dan Lik 12:6, 7 ki, si enn dimunn depans de pyes larzan, li pa ti gayn kat mwano, me li ti gayn sink. Avredir, sa sinkyem zwazo la, ti donn sa kuma enn baksis, kumadir li pa ti ena okenn valer ditu. Petet pu bann zom, sa bann zwazo la pa ti ena okenn valer. Me, nu Kreater Li, kuma eski Li ti konsider zot? Zezi ti dir: “Pa mem enn sel parmi zot [pa mem sa enn ki ti donn kuma baksis la], Bondye pa bliye.” Asterla, nu kapav konpran seki Zezi ti pe rod dir. Si pu Zeova, enn sinp mwano ena sa kantite valer la, ki kantite plis valer alor enn dimunn ena! Kuma Zezi ti dir, Zeova konn tu ti detay lor nu. Wi, Li mem kone ki kantite seve ena lor nu latet!

12. Kifer nu kapav sir ki Zezi pa ti pe egzazere kan li ti dir ki Bondye kone ki kantite seve ena lor nu latet?

¹² Sertin kapav panse ki Zezi ti pe egzazere kan li ti dir sa. Me reflesi lor rezireksyon. Ki kantite Zeova bizin byin konn nu personelman, pu ki Li kapav rekre nu! Nu ena telman valer pu Li ki Li rapel sak detay lor nu, mem nu kod zenetik ki konplike. Li rapel usi tu nu bann suvenir ek bann lexperyans ki nu finn ena pandan plizir lane. Donk, an konparezon avek sa, se enn gadyak pu Zeova pu kont seve ki ena lor latet enn dimunn—an mwayenn enn dimunn ena 100,000 seve lor so latet. Sa bann zoli parol Zezi la vremem donn nu lasirans ki Zeova pran nu swin personelman!

13. Kuma ka Lerwa Yeosafat montre ki Zeova rod seki bon dan nu, mem si nu inparfe?

¹³ Labib fer nu dekuver enn lot kitsoz ki donn nu lasirans ki Zeova kontan nu. Li rod seki bon dan nu ek Li apresye sa. Nu pran legzanp bon Lerwa Yeosafat. Kan sa lerwa la ti azir san reflesi, profet Zeova ti dir li: “Akoz samem Zeova ankoler avek twa.” Sa bann parol la fer nu reflesi! Me, mesaz Zeova pa ti aret la. Li ti kontiyne: “Me kanmem sa, [mo] finn truv bann bon kitsoz dan twa.” (2 Kronik 19:1-3) Alor, mem si koler Zeova ti zistifye, sa pa ti anpes Li truv bann “bon kitsoz” konsernan Yeosafat. Eski sa pa rasir nu kan nu kone ki nu Bondye rod seki bon dan nu, mem si nu inparfe?

Enn Bondye Ki “Pre pu Pardone”

14. Kan nu fer pese, ki santiman kapav pez lor nu, me kuma nu kapav gayn pardon Zeova?

¹⁴ Kan nu fer pese, nu santi nu abat parski nu’nn dezobeir Bondye, nu onte ek nu santi nu kupab. Sa bann santiman la kapav fer nu panse ki zame nu pa pu kapav diyn pu servi Zeova. Me selman, rapel ki Zeova “pre pu pardone.” (Psom 86:5) Wi, si nu regret pese ki nu’nn fer ek nu fer bann gran zefor pu pa refer zot ankor, nu kapav gayn pardon Zeova. Anu gete kuma Labib dekrir sa faset lamur Zeova la.

15. Ki kantite eski Zeova met nu bann pese lwin ar nu?

¹⁵ Dan enn so bann psom, David ti servi enn lexpresyon byin vivan pu dekrir pardon Zeova. Li ti dir: “Ant nu ek nu bann pese, Li met enn distans ki parey ar distans ki ena ant les ek lwes.” (Se nu ki finn met sa an italik; Psom 103:12, La Bible en français courant) Ki distans ena ant les ek lwes? An prinsip, les li tuzur enn distans pli lwin ar lwes. Sa de la zame pu kapav zwenn. Enn spesyalis dan letid Labib dir ki sa lexpresyon la vedir “pli lwin ki posib; pli lwin ki nu kapav mazine.” Bann parol inspire ki David inn ekrir montre nu ki kan Zeova pardone, Li met nu bann pese pli lwin ki posib ar nu.

16. Kan Zeova pardonn nu pese, kifer nu kapav ena lasirans ki Li truv nu prop apre?

¹⁶ Eski u finn deza esey tir enn tas lor enn linz kuler pal? Li posib ki malgre tu u zefor, tas la ankor tuzur paret. Remarke kuma Zeova dekrir so kapasite pu pardone: “Mem si zot pese kuler ruz vif, zot pu vinn blan kuma lanez; mem si zot ruz kuma enn linz ruz fonse, zot pu vinn kuma lalenn.” (Izai 1:18)a Lontan, parmi bann kuler ki ti servi pu tenn bann tisi, ti servi ruz fonse. Par numem, zame nu pu kapav tir sa tas ki reprezant nu bann pese la. Me, Zeova Li, Li kapav. Si nu bann pese kuma ruz fonse, zot pu vinn blan kuma lanez uswa kuma lalenn ki pa’nn tenn. Alor, kan Zeova pardonn nu bann pese, fode pa nu santi ki sa bann pese la pu res kuma enn tas lor nu pu leres nu lavi.

17. Dan ki sans eski Zeova zet nu bann pese deryer so ledo?

¹⁷ Izkiya ti konpoz enn kantik byin tusan pu exprim so rekonesans parski Zeova ti geri li ar enn maladi mortel. Dan sa kantik la, li ti dir Zeova: “To finn zet tu mo bann pese deryer to ledo.” (Izai 38:17) Sa verse la dekrir Zeova kumadir Li pe pran bann pese enn dimunn ki’nn repanti, ek Li zet sa deryer Li. Kumsa, Li pa truv sa bann pese la ek Li pa pran sa kont. Dapre enn liv, nu kapav exprim lide sa verse la kumsa: “To finn fer kumadir [mo bann pese] pa finn egziste.” Eski sa pa rekonfort nu?

18. Kuma eski Mika montre ki kan Zeova pardone, Li tir nu bann pese pu tuletan?

¹⁸ Profet Mika ti ekrir enn promes konsernan pep Bondye ki ti pu retabli dan so peyi. Dan sa promes la, li ti dir ki li sir ki Zeova ti pu pardonn So pep ki finn repanti. Li ti dir: “Kisannla ki enn Bondye kuma twa, . . . ki pas lor pese bann ki reste dan so leritaz? . . . Ek to pu zet tu zot bann pese dan profonder lamer.” (Mika 7:18, 19) Esey mazine ki sa bann parol la ti vedir pu bann dimunn dan letan Biblik. Si ti’nn zet enn kitsoz dan “profonder lamer,” eski ti ena kit sans pu regayn sa? Donk, bann parol Mika montre ki kan Zeova pardone, Li anlev nu bann pese pu tuletan.

“Bondye Manifeste So Konpasyon Avek Tandres Anver Nu”

19, 20. (a) Ki sinifikasyon verb Ebre, ki tradir par “montre mizerikord” uswa “ena pitye”? (b) Kuma Labib servi santiman ki enn mama ena pu so tibaba, pu anseyn nu lor konpasyon Zeova?

¹⁹ Konpasyon se enn lot faset lamur Zeova. Ki sa vedir konpasyon? Dan Labib, konpasyon byin pros ar mizerikord. Ena plizir mo Ebre ek Grek ki fer nu konpran ki ete konpasyon. Par egzanp, suvan tradir verb Ebre raham par “montre mizerikord” uswa “ena pitye.” Se enn term Ebre ki Zeova aplik ar Limem ek ki pros avek enn lot term ki vedir “vant enn mama.” Donk, raham kapav dekrir usi “konpasyon ki enn mama ena.”

²⁰ Labib servi bann santiman ki enn mama ena pu so tibaba pu anseyn nu lor konpasyon Zeova. Dan Izai 49:15, nu lir: “Eski enn fam kapav bliye so tibaba ki pe ankor bwar ar li, ek pena okenn konpasyon [raham] pu garson ki sorti dan so vant? Wi, sa bann fam la kapav bliye, me mwa mo pa pu bliye twa.” (Darby) Li difisil pu mazinn enn mama ki bliye donn so tibaba bwar ek pran li swin. Apre tu, enn tibaba li san defans, lanwit lizur li bizin latansyon so mama. Me, li byin tris pu dir ki, kanmem, ena bann mama ki negliz zot zanfan, sirtu dan sa “letan kritik” ki nu pe viv la. (2 Timote 3:1, 3) Zeova dir: “Me mwa mo pa pu bliye twa.” Konpasyon ki Zeova manifeste avek tandres anver so bann serviter, sa li byin-byin for. Li buku pli for ki ninport ki pli profon santiman natirel ki enn imin kapav montre, wi li mem depas santiman konpasyon ki enn mama normalman ena pu so tibaba.

21, 22. Ki sityasyon bann Izraelit ti kone dan Lezip, ek kuma eski Zeova ti reazir kan zot ti kriye ver Li?

²¹ Kuma eski, parey kuma enn paran ki kontan so zanfan, Zeova montre so konpasyon? Nu truv sa kalite la byin, dan fason ki Zeova ti azir avek ansyin nasyon Izrael. Ver lafin 16 em syek A.N.L., bann Izraelit ki ti kont par milyon, ti esklav dan Lezip, kot ti pe fer byin dominer avek zot. (Egzod 1:11, 14) Dan zot sufrans, bann Izraelit ti kriye ver Zeova. Kuma eski Zeova, ki ena konpasyon, ti reazir?

²² Sa ti tus leker Zeova. Li ti dir: “Mo finn truve kuma mo pep pe pas mizer dan Lezip, ek mo finn tann zot kriye . . . mo konn byin bann duler ki zot pe siporte.” (Egzod 3:7) Zeova pa ti pu kapav truv so pep sufer ek tann zot kriye san ki Li sufer avek zot. Zeova enn Bondye ki konpran sufrans lezot ek ki resanti lapenn ki lezot ena. Sa santiman la, li pros avek konpasyon. Me selman, Zeova pa ti zis ena bann santiman pu so pep; Li ti santi Li puse pu azir dan zot faver. Dan Izai 63:9, nu lir: “Dan so lamur ek dan so konpasyon, Limem Li ti reaste zot.” Avek enn “lamin pwisan” Li ti delivre bann Izraelit dan Lezip. (Deteronom 4:34) Apre sa, atraver bann mirak, Li ti donn zot manze ek Li ti fer zot rant dan enn peyi fertil ki ti pu vinn pu zot.

23. (a) Kuma parol enn ekrivin psom donn nu lasirans ki Zeova ena enn gran konsiderasyon pu sakenn parmi nu personelman? (b) Dan ki bann fason Zeova ed nu?

²³ Zeova pa montre konpasyon pu so pep zis antan ki enn grup. Nu bon Kreater ena enn gran konsiderasyon pu sakenn parmi nu personelman. Li konn byin ninport ki sufrans ki nu kapav gayne. Enn ekrivin psom ti dir: “Lizye Zeova lor bann dimunn drwat, ek so zorey tann zot siplikasyon pu gayn led. Zeova pre ar bann dimunn ki ena enn gran sagrin dan zot leker, ek Li sov bann ki demoralize.” (Psom 34:15, 18) Kuma eski Zeova ed sakenn parmi nu personelman? Li pa neseserman anlev bann kitsoz ki fer nu sufer. Me, Li finn pran enn kantite dispozisyon pu bann ki sipliy Li pu gayn so led. Dan so Parol, ena bann konsey byin pratik ki kapav ed nu buku. Dan kongregasyon, Zeova donn nu bann sirveyan ki kalifye lor plan spirityel ek ki fer tu pu ed lezot avek konpasyon parey kuma Zeova. (Zak 5:14, 15) Pwiski Zeova Li enn “Kikenn ki tann lapriyer,” Li donn “lespri sin bann ki demann Li.” (Psom 65:2; Lik 11:13) Tu sa bann dispozisyon la zot bann mwayin ki Bondye servi pu manifeste ‘so konpasyon avek tandres’ anver nu.—Lik 1:78.

24. Kuma eski u pu reazir anver lamur Zeova?

²⁴ Eski sa pa tus nu buku kan nu reflesi lor lamur nu Papa Zeova? Lartik avan ti rapel nu ki Zeova finn manifeste so pwisans, so lazistis ek so sazes pu nu profi, dan bann fason ki montre so lamur. Dan sa lartik la, nu’nn truve ki Zeova inn montre so lamur direkteman anver limanite—ek anver sakenn parmi nu personelman—dan bann fason remarkab. Asterla, sakenn parmi nu bizin demande, ‘Kuma eski mo pu reazir anver lamur Zeova?’ Nu swete ki u pu montre sa kan u kontan Li avek tu u leker, tu u lespri, tu u nam ek tu u lafors. (Mark 12:29, 30) Nu swete usi ki fason ki u amenn u lavi sak zur, montre u dezir sinser pu vinn ankor pli pros ar Zeova. Ek nu swete ki Zeova, sa Bondye ki lamur la, vinn ankor pli pros avek u—pu tuletan!—Zak 4:8.

[Notes]

Eski U Rapel?

• Kuma eski nu kone ki lamur se enn kalite ki dominn personalite Zeova?

• Zeova finn avoy so Garson pu sufer ek pu mor pu nu. Kifer eski nu kapav dir ki sa mem pli gran manifestasyon lamur ki finn kapav ena?

• Kuma eski Zeova donn nu lasirans ki Li kontan sakenn parmi nu personelman?

• Dan ki bann fason byin vivan Labib dekrir pardon Zeova?

[Zimage page 24]

“Bondye . . . finn donn so sel Garson ki Li finn kre direk”

[Zimage page 25]

“Zot vo plis ki buku mwano”

[Credit Line]

© J. Heidecker/VIREO

[Zimage page 26]

Santiman enn mama pu so tibaba kapav anseyn nu lor konpasyon ki Zeova ena