“Sa Inn Ranpli enn Vid dan Mo Leker”

“MO REMERSYE zot avek tu mo leker pu sa zoli kado Approchez-vous de Jéhovah, ki zot inn donn nu. Sa inn ranpli enn vid dan mo leker—mo ti anvi resanti ki Zeova kontan mwa ek ki Li ena enn gran lafeksyon ranpli ar tandres pu mwa. Asterla, mo santi mwa telman pli pros ar Zeova ek so Garson. Mo anvi koz lor sa liv la ar tu dimunn ek donn enn kopi tu bann ki mo byin kontan.” Sa se santiman enn Temwin Zeova konsernan sa nuvo liv 320 paz la ki ti paret dan lasanble distrik “Bann Proklamater Rwayom Ki Zele,” ki ti ena an 2002/03. Anu get sertin kitsoz interesan ki ena dan sa nuvo liv la ek kifer inn pibliye sa.

Sertin Kitsoz Interesan Ki Ena dan Sa Nuvo Liv La

Ki ena dan sa nuvo liv la? Tu bann ranseynman ki ena dan de lartik letid ki ena dan sa peryodik la—ek enn pake lezot ranseynman ankor! Ena 31 sapit dan sa liv la, sak sapit mem longer ar enn lartik letid Latur Degard. Apre lintrodiksyon, ek apre trwa premye sapit, liv la divize an kat parti. Sak parti koz lor enn kalite prinsipal Zeova. Sak parti kumans avek enn ti lintrodiksyon lor sa kalite ki pu egzamine la. Bann sapit ki vini apre, egzamine kuma Zeova manifeste sa kalite la. Dan sak parti ena enn sapit lor Zezi. Kifer? Parski Zezi ti dir: “Kikenn ki finn truv mwa, finn truv mo Papa usi.” (Zan 14:9) Zezi ti reflet enn fason parfe personalite Zeova, donk li donn nu bann legzanp frapan kuma bann kalite Bondye manifeste dan lapratik. Sak parti terminn avek enn sapit ki anseyn nu kuma nu kapav imit Zeova kan numem nu manifeste sa kalite ki pe egzamine la. Kan li koz lor bann kalite Zeova, sa nuvo liv la fer referans avek tu bann liv ki ena dan Labib.

Dan liv Approchez-vous de Jéhovah, ena usi bann lezot kitsoz interesan. Apartir sapit 2, sak sapit ena enn lankadre ki apel “Éléments de méditation.” Si finn sit bann verse Labib ek bann kestyon ladan, se pa la pu fer enn revizyon sa sapit la. Plito se pu ed u pu servi Labib pu medit an profonder lor size ki finn diskite dan sa sapit la. Li bon ki u lir sak verse avek atansyon. Apre sa, medit lor kestyon ki poze ek fer zefor pu met an pratik seki u aprann. Sa fason medite la pu tus u leker ek pu ed u vinn ankor pli pros ar Zeova.—Psom 19:14.

Dan liv Approchez-vous de Jéhovah, ena usi bann zimaz ki finn prepare ek kalkile avek swin pu anseyn nu ek motiv nu. Dan 17 sapit ki ena dan sa liv la, sakenn ena enn zoli zimaz ki dekrir enn senn Labib, ek sa zimaz la kuver enn paz an antye.

Kifer Inn Pibliye Sa Liv La?

Kifer eski finn pibliye liv Approchez-vous de Jéhovah? Enn rezon prinsipal, se pu ed nu pu konn Zeova pli byin pu ki nu kapav ranforsi nu relasyon personel avek nu Bondye.

Eski u pans enn kikenn ki pu kapav profit liv Approchez-vous de Jéhovah, swa enn dimunn ki pe etidye Labib, uswa mem enn frer ubyin enn ser Kretyin ki inaktif? Me umem, eski u finn kumans lir sa nuvo liv la? Si u pankor fer li, kifer u pa etabli enn program pu u kapav kumanse pli vit ki posib? Pran letan pu reflesi lor seki u lir. Nu swete ki sa piblikasyon la ed u pu vinn ankor pli pros ar nu Bondye Zeova. Lerla, u pu pres labonn nuvel lor so Rwayom avek buku plis lazwa ek zel!