Anu Tir Profi kan Nu Etidye Liv Approchez-vous de Jéhovah
1 Nu tu ti byin kontan kan nu ti gayn liv Approchez-vous de Jéhovah dan Lasanble Distrik, “Les proclamateurs zélés du Royaume.” Alor ki buku ti kumans lir liv-la tutswit, pu lezot, se tex-de-lane 2003 ki ti motiv zot pu lir li. Nu rapel ki tex-de-lane 2003 ti: “Vinn pros ar Bondye, ek Li pu vinn pros ar zot.”—Jacq. 4:8.
2 An Mars, nu pu kumans etidye liv Approchez-vous de Jéhovah dan Letid-de-Liv. Ki nu kapav fer pu ti tir maximem profi dan sa letid-de-liv-la? Nu bizin fer enn bon preparasyon. Sak semenn nu pu etidye la mwatye enn sapit. Pa pu gayn tro buku paragraf pu egzamine; pu ena donk ase letan pu bann asistan exprim zot avek zot leker lor seki zot inn etidye ek medite. Anplis, dan bann semenn kot pu etidye lafin enn sapit, pu ena mwins paragraf ankor pu egzamine, afin ki kapav pas byin letan avek lankadre “Élements de méditation.”
3 Sirman u finn remarke ki apartir sapit 2, lankadre “Élements de méditation” paret a la fin sak sapit. Kan finn fini egzaminn dernye paragraf enn sapit, sirveyan Letid-de-Liv pu egzaminn sa lankadre-la avek bann asistan. Li pu ankuraz so grup pu exprim zot bann panse, ek dir ki bann bon pwin ki zot inn truve apre ki zot inn medit lor bann tex Biblik site dan lankadre. (Prov. 20:5) Apar bann kestyon ki site dan lankadre, sirveyan letid-de-liv kapav detanzantan poz lezot kestyon, kuma par egzanp: “Ki sa aprann nu lor Jéhovah? Ki lefe sa ena lor nu lavi? Kuma eski nu kapav servi sa pu ed lezot?” Byinsir, sirveyan letid-de-liv pa pu poz sa bann kestyon-la kumadir li pe fer quiz ar so grup. Zot lobzektif plito, se fer zot exprim seki ena dan zot leker.
4 Liv Approchez-vous de Jéhovah li enn liv apar, pa kuma lezot liv. Li vre ki tu lezot piblikasyon ki “esklav fidel ek avize” finn prepare, zot glorifye Jéhovah. Me sa liv-la egzaminn an profonder bann kalite ki Jéhovah ena. (Mat. 24:45-47) Wi, se enn lokazyon an or ki nu pe gayne pu konn Jéhovah pli byin! Nu pu tir buku profi si nu etidye personalite Jéhovah byin an profonder. Anu swete ki sa liv-la rapros nu plis ar nu Papa ki dan lesyel, ek fer nu vinn pli efikas pu ed lezot pu fer parey.