Letid dan Liv Approchez-vous de Jéhovah Pou Koumanse Semenn 6 Zanvie
1. Apartir semenn 6 Zanvie, ki lokazion nou pou ena pou vinn pli pros ar Jéhovah?
1 Jéhovah anvi ki nou vinn pros ar Li. (Jacq. 4:8) Pou ed nou fer sa, apartir semenn 6 Zanvie, nou pou etidie liv Approchez-vous de Jéhovah dan Letid Biblik Kongregasion. Konsernan lobzektif sa liv-la, dan so premie paz nou lir: “Kan nou reflesi lor fason ki Jéhovah inn manifeste sak kalite ki Li ena, kan nou trouve kouma Jésus Christ inn manifeste sa bann kalite-la dan enn fason parfe, ek kan nou konpran kouma nou osi nou kapav kiltiv sa bann kalite-la, sa fer nou vinn pli pros ar Bondie.” Dan lepase, an 2004 ek 2005, bann kongregasion ti examinn sa liv-la. Selman, depi sa lepok-la ena anviron de milyon proklamater ki’nn vinn dan laverite. Ek pou boukou parmi zot, se premie fwa ki zot pou examinn bann zoli kalite Jéhovah an detay. Pou bann ki’nn deza etidie sa liv-la avan, sa bann rapel-la pou ed zot apresie ankor plis bann kalite Jéhovah.—Ps. 119:14.
2. Kouma nou pou etidie liv Approchez-vous de Jéhovah?
2 Kouma Nou Pou Etidie Sa Liv-La?: Frer ki pe kondir letid pou koumanse avek enn ti lintrodiksion, kitfwa enn ouswa de fraz. Dan liv-la pa dir ki bann verse bizin lir, alor pandan letid frer-la pou swazir bann verse inportan pou lir. Alafin sak leson, kapav poz enn ouswa de kestion pou fer revizion. Si ena osi lankadre « Éléments de méditation » pou examine, pou servi sa lankadre-la pou fer revizion. Si letan permet, frer ki pe kondir letid kapav demann enn kikenn pou lir sertin verse ki’nn site dan lankadre. Ek apre li pou poz bann kestion segonder pou ankouraz lasistans pou partisipe.
3. Kan pou examinn sa liv-la, ki nou bizin fer ek kifer?
3 Gagn Bann Gran Bienfe: Prepar ou liv an-avans mem si dan lepase ou’nn deza etidie li. Fer bann komanter parski sa pou donn laglwar Jéhovah, ed ou rapel bann lide, ek ed lezot dan lasistans tir profi. (Ps. 35:18; Héb. 10:24, 25) Letan ou medit lor bann kalite extraordiner ki Jéhovah ena, ou pou vinn pli pros ar Li. (Ps. 77:11-13) An retour, ou pou plis determine pou obeir bann komannman Bondie ek plis motive pou koz lor Li ar lezot.—Ps. 150:1-6.