Zeova, Bondye Laverite

“To finn sov mwa, A Zeova, Bondye laverite.”—PSOM 31:5.

1. Ki bann kondisyon ki ti egziste dan lesyel ek lor later kan pa ti ena okenn foste?

TI ENA enn lepok kot foste pa ti egziste ditu. Dan lesyel, ti ena bann kreatir spirityel parfe ki ti pe servi zot Kreater, zot “Bondye laverite.” (Psom 31:5) Personn pa ti koz manti, ek personn pa ti tronp lezot. Zeova ti tuzur koz laverite avek so bann garson spirityel. Li ti fer sa parski Li ti kontan zot ek parski Li ti interese buku ar zot byinet. Lor later usi ti parey. Zeova ti kre premye zom ek premye fam. Ek atraver enn mwayin ki Li ti etabli, li ti tuletan koz avek zot dan enn fason kler, direk ek onet. Tusala ti vremem byin bon!

2. Kisannla ti kumans servi foste, ek kifer?

² Me lerla, avek buku larogans, enn garson spirityel Bondye finn al kont Zeova ek li finn esey etabli limem kuma enn bondye rival. Sa kreatir spirityel la ti gayn non Satan ek Dyab. Li ti anvi ki lezot ador li. Pu realiz so lobzektif, li’nn kumans servi foste kuma enn mwayin pu amenn lezot anba so puvwar. Kan li finn fer sa, li’nn vinn “enn manter ek papa mansonz.”—Zan 8:44.

3. Kuma eski Adan ek Ev ti reazir kan Satan ti koz zot manti, ek ki konsekans sa finn ena?

³ Satan ti servi enn serpan pu koz avek premye fam, Ev. Li ti dir li ki si li dezobeir komannman Bondye ek li manz sa frwi ki Bondye ti defann la, li pa pu mor. Sa ti enn mansonz. Li ti dir li usi ki lerla, li pu vinn parey kuma Bondye, li pu konn seki bon ek seki move. Sa usi ti enn mansonz. Zame avan, personn pa ti koz manti avek Ev. Mem sa, sirman li finn bizin rekonet ki seki serpan la ti pe dir, pa ti an akor avek seki Bondye ti dir so mari, Adan. Me purtan, li finn prefer krwar Satan olye ki Zeova. Wi, Satan finn tronp Ev konpletman! Alor, li finn pran frwi la, li’nn manze. Plitar, Adan finn manz frwi la, li usi. (Zenez 3:1-6) Parey kuma Ev, Adan usi zame pa ti tann enn mansonz avan. Selman, Adan pa finn tronpe. (1 Timote 2:14) Donk, par so bann aksyon, Adan ti montre ki li ti rezet so Kreater. Bann konsekans lor limanite ti byin-byin grav. Akoz dezobeisans Adan, pese ek lamor—ek usi, koripsyon ek enn detres extraordiner—finn fane ar tu so bann desandan.—Romin 5:12.

4. (a) Ki bann mansonz Satan ti koze dan Edenn? (b) Ki nu bizin fer pu anpes Satan met nu dan lerer?

⁴ Foste usi finn fane partu. Nu bizin rekonet ki sa bann mansonz dan zardin Edenn la, ti enn latak personel lor Bondye. Etandone ki Zeova enn Kikenn ki tuletan koz laverite, Satan ti anvi gat So repitasyon. Satan ti pretann ki swadizan Zeova ti kasyet ek priv premye kup imin enn kitsoz ki bon. Byinsir, sa pa ti vre. Dezobeisans Adan ek Ev pa finn servi zot nanyin. Zot finn mor, parey kuma Zeova ti averti zot. Me Satan finn kontiyn atak Zeova pu gat So repitasyon. Ala kifer, plizir syek plitar lapot Zan finn ekrir par linspirasyon Bondye, ki Satan “pe met tu bann dimunn lor later dan lerer.” (Revelasyon 12:9) Pu anpes Satan met nu dan lerer, nu bizin ena ful konfyans ki Zeova tuletan koz laverite ek ki so Parol usi tuletan dir seki vre. Kuma eski u kapav devlop ek fortifye u konfyans an Zeova? Ek kuma eski u kapav fortifye umem kont foste ek mansonz ki Lennmi Bondye pe fane partu?

Zeova Konn Laverite

5, 6. (a) Ki konesans Zeova ena? (b) Ki diferans ena ant konesans ki Zeova ena ek konesans ki bann imin ena?

⁵ Suvan Labib idantifye Zeova kuma “Kreater tu kitsoz.” (Efezyin 3:9) Limem “ki’nn fer lesyel, later ek lamer ek tu seki dan lesyel, lor later ek dan lamer.” (Akt 4:24) Etandone ki Zeova li Kreater, Li konn laverite lor tu kitsoz. Anu pran enn legzanp: Enn misye fer plan so lakaz ek li ranz so lakaz limem. Li fer tu travay par limem. Pena dut ki li pu konn tu ti kwin so lakaz ek li pu konpran li pli byin ki ninport ki lot dimunn. Wi, bann dimunn konn byin bann kitsoz ki zot fer zotmem. Donk pareyman, nu Kreater konn tu ti detay lor seki Li finn kre.

⁶ Profet Izai finn byin fer nu konpran profonder konesans Zeova. Nu lir: “Kisannla ki finn mezir bann gran sirfas delo dan so lamin, ek kisannla ki finn mezir lesyel avek bann ledwa so lamin? Ek kisannla ki finn met tu lapusyer later dan enn ti mezir? Kisannla ki finn pez bann montayn ek bann kolinn dan enn ti balans? Kisannla ki finn mezir lespri Zeova, ek kisannla ki kapav donn Li konsey? Avek kisannla Zeova inn al rod konsey pu Li konpran? Ubyin kisannla ki finn anseyn Li lazistis, uswa konesans, uswa kisannla ki kapav montre Li kuma konpran kitsoz?” (Izai 40:12-14) Wi vremem, Zeova enn “Bondye konesans” ek Li ena enn “konesans parfe.” (1 Samyel 2:3; Zob 36:4; 37:16) Konpare ar Zeova, nu, nu konn byin tigit kitsoz! Li vre ki bann imin finn ramas enn bon bagaz konesans. Me, seki nu kone lor lakreasyon pa mem tus ‘bann rebor semin Bondye.’ Nu konesans li kuma ‘lavwa enn dimunn ki nu preske pa tande,’ konpare avek konesans Zeova ki kuma ‘tapaz enn loraz.’—Zob 26:14.

7. Ki David ti rekonet konsernan konesans ki Bondye ena, ek donk ki nu’si nu bizin rekonet?

⁷ Pwiski se Zeova ki’nn kre nu, li normal ki Li konn nu byin. Lerwa David ti rekonet sa. Li ti ekrir: “A Zeova, to finn egzaminn mwa byin, ek to konn mwa. To’nn konn mwa kan mo pe asize ek kan mo pe leve. To’nn konn mo panse depi byin lwin. Kan mo vwayaze ek kan mo alonze, to’nn vey lor mwa depre. Ek to’nn konn byin tu bann fason ki mo azir. A Zeova, pena enn parol dan mo labus, ki to pa kone alavans.” (Psom 139:1-4) Byinsir, David ti kone ki bann imin ena liberte pu swazire—Bondye finn donn nu kapasite, swa pu obeir Li swa pu dezobeir Li. (Deteronom 30:19, 20; Zozye 24:15) Me kan mem sa, Zeova konn nu pli byin ki nu konn numem. Li anvi seki pli bon pu nu ek Li kapav diriz nu bann pa kan nu marse. (Zeremi 10:23) Wi, pena okenn profeser, ni okenn exper, ni okenn konseye ki pli byin ekipe ki Bondye, pu anseyn nu laverite ek rann nu saz ek ere.

Zeova Tuletan Koz Laverite

8. Kuma eski nu kone ki Zeova tuletan koz laverite?

⁸ Konn laverite sa se enn kitsoz, me dir laverite, sa se enn lot kitsoz. Par egzanp, Dyab li, li finn swazir pu pa “tini ferm dan laverite.” (Zan 8:44) Parkont, Zeova Li, Li “ranpli ar . . . laverite.” (Egzod 34:6) Labib suvan rapel nu ki Zeova enn Kikenn ki tuletan koz laverite. Lapot Pol ti dir ki “li inposib pu Bondye koz manti,” ek ki Bondye “pa kapav koz manti.” (Ebre 6:18; Tit 1:2) Wi, Zeova tuletan koz laverite; se enn parti inportan dan so personalite. Donk, nu kapav kont lor Li ek fer Li konfyans. Zame, Li pa anbet so bann serviter fidel.

9. Ki lyin ena ant non Zeova ek laverite?

⁹ Non Zeova mem temwayne ki Bondye Li ranpli ar laverite. So non vedir “Li Fer Arive.” Sa idantifye Zeova kuma enn Kikenn ki tigit par tigit realiz so bann promes. Apart Li, personn pa kapav fer sa. Parski Zeova Li Siprem, nanyin pa kapav anpes so bann proze realize. Zeova pa selman koz laverite, me Li tusel ki ena puvwar ek sazes pu realiz tu seki Li dir.

10. (a) Kuma eski Zozye ti temwin ki Zeova tuletan koz laverite? (b) Ki bann promes Zeova ki finn realize, u finn truve?

¹⁰ Buku dimunn finn temwin bann evennman remarkab ki montre ki Zeova tuletan koz laverite. Parmi, ena Zozye. Zozye ti dan Lezip kan Zeova ti amenn dis ple lor sa nasyon la. Ek li ti kone kuma Zeova ti anons sak ple alavans. Zeova ti anonse usi ki Li ti pu delivre bann Izraelit dan Lezip ek Li ti pu amenn zot dan Peyi ki Li ti promet zot. Ek zot ti pu konkerir bann larme Kananein ki ti pu fer lopozisyon kont zot. Tusala, Zozye finn temwin avek so lizye. Alor, ver lafin so lavi, Zozye ti dir bann ansyin dan nasyon Izrael: “Zot konn byin avek tu zot leker ek avek tu zot nam ki pena enn parol parmi tu bann bon parol ki Zeova zot Bondye finn dir zot, ki pa finn reysi. Tu finn realize pu zot. Enn parol pa finn rate.” (Zozye 23:14) Byinsir, u pa finn temwin bann mirak ki Zozye ti truve. Me, eski dan lavi, u finn deza fer lexperyans personelman kuma Zeova Li realiz so bann promes?

Zeova Fer Konn Laverite

11. Ki montre ki Zeova anvi kominik laverite avek bann imin?

¹¹ Pans enn paran ki ena enn gran bagaz konesans, me ki rarman koz avek so bann zanfan. Eski u pa rekonesan anver Zeova ki Li pa kumsa? Avek lamur, Zeova kominik avek bann imin ek anplis, Li pa krab dan sa domenn la. Labib apel Li “Gran Instrikter.” (Izai 30:20) Dan so lamur fidel, Li sey rant an kontak mem avek bann ki pa dispoze pu ekut Li. Par egzanp, Ezekyel ti bizin al pres avek bann dimunn ki Zeova ti kone, pa pu ekute. Zeova ti dir li: “Twa, garson enn zom, al koz avek mo pep Izrael, ek to bizin dir zot mo bann parol.” Lerla Zeova ti averti Ezekyel: “Zot pa pu anvi ekut twa, parski zot pa anvi ekut mwa; parski tu bann Izraelit zot bann latet dir ek leker dir.” Pa fasil sa misyon la! Me Ezekyel ti fer so travay fidelman. Ek kan li ti fer sa, li ti reflekte santiman pitye ki Zeova ena pu bann dimunn. Si u’si u pe bizin pres dan enn teritwar difisil, fer Bondye konfyans. Lerla, u kapav sir ki Li pu fortifye u parey kuma Li ti fortifye profet Ezekyel.—Ezekyel 3:4, 7-9.

12, 13. Par ki bann mwayin Bondye finn kominik avek bann imin?

¹² Zeova anvi ki “tut sort kalite dimunn sove ek gayn enn konesans egzak lor laverite.” (1 Timote 2:4) Li finn koz atraver bann profet, atraver bann anz, ek mem atraver so Garson ki Li byin kontan, Zezi Kris. (Ebre 1:1, 2; 2:2) Zezi ti dir Pilat: “Pu sa ki mo finn ne, ek pu sa ki mo finn vinn dan lemond, pu donn temwanyaz lor laverite. Tu seki dan kote laverite ekut mo lavwa.” Enn lokazyon ki pa gayne defwa, ti prezant devan Pilat! Li ti kapav aprann laverite direkteman ar Garson Bondye lor laranzman ki Bondye inn fer pu sov bann dimunn! Me, Pilat pa ti dan kote laverite, ek li pa ti anvi aprann ar Zezi. Olye sa, li ti demann Zezi, san okenn konviksyon: “Ki ete laverite?” (Zan 18:37, 38) Byin tris pu li! Kan mem sa, buku ti ekut laverite ki Zezi ti proklame. Zezi ti dir so bann disip: “[Kapav dir] ki zot lizye ere parski zot inn truve, ek [kapav dir] ki zot zorey ere, parski zot inn tande.”—Matye 13:16.

¹³ Zeova finn prezerv laverite par mwayin Labib ek Li’nn fer ansort ki tu dimunn kapav lir sa ninport ki kote zot reste. Labib fer nu dekuver bann kitsoz kuma zot ete vremem. Li dekrir bann kalite prinsipal ki Bondye ena, li dekrir so bann proze ek so bann komannman. Li fer nu konpran usi kuma lemond ete vremem. Dan enn lapriyer, Zezi ti dir so Papa: “To parol li laverite.” (Zan 17:17) Akoz sa, Labib li enn liv ki pena so dezyem. Selman Labib ki finn ekrir par linspirasyon Bondye ki konn tu kitsoz. (2 Timote 3:16) Se enn kado ki ena buku valer ki limanite finn gayne ek ki bann serviter Bondye apresye buku. Nu pu montre ki nu saz si nu lir li tulezur.

Tini Ferm Laverite

14. Sit sertin kitsoz ki Zeova dir Li pu fer, ek kifer eski nu kapav krwar Li?

¹⁴ Nu bizin pran byin kont seki Zeova dir nu dan so Parol. Seki Zeova dir nu Li ete, se sa mem ki Li ete, ek seki Li dir nu Li pu fer, se sa mem ki Li pu fer. Nu ena tu bann rezon pu fer Bondye konfyans. Nu kapav krwar Zeova kan Li dir ki Li pu “amenn vanzans lor bann ki pa konn Bondye ek lor bann ki pa pe obeir labonn nuvel konsernan nu Senyer Zezi.” (2 Tesalonisyin 1:8) Nu kapav usi fer Li konfyans kan Li dir ki Li kontan bann ki resers lazistis. Nu kapav kont lor Li kan Li dir ki Li pu donn lavi pu tuletan bann ki pe montre lafwa. Ek nu kapav krwar Li, kan Li dir ki Li pu anlev duler konpletman, ek ki personn pu nepli kriye akoz problem ek mem lamor pu disparet. Wi, sa promes la, Zeova finn montre ki kantite nu kapav kont lor la, kan Li ti donn lapot Zan sa instriksyon la: “Ekrir, parski sa bann parol la zot fidel ek vre.”—Revelasyon 21:4, 5; Proverb 15:9; Zan 3:36.

15. Sit sertin mansonz ki Satan fane partu.

¹⁵ Satan li tu lekontrer seki Zeova ete. Olye met bann dimunn dan lalimyer, li pe met zot dan lerer. Pu reysi deturn bann dimunn ar vre ladorasyon, Satan fann enn gran kantite mansonz. Par egzanp, Satan anvi fer nu krwar ki Bondye frwa ek Li pena lafeksyon pu nu. Uswa, kan Li truv nu sufrans lor later, sa pa fer Li nanyin. Me, Labib montre ki Zeova ena buku konsiderasyon pu so bann kreatir ek Li deteste mesanste ek sufrans. (Akt 17:24-30) Satan anvi fer bann dimunn krwar usi ki zot pu perdi zot letan si zot galup deryer bann lobzektif spirityel. Parkont, Labib donn nu lasirans ki “Bondye pa inzis pu bliye nu travay ek lamur ki nu finn montre pu so non.’ Anplis, Labib dir klerman ki Bondye “rekonpans bann ki fer zefor pu rod Li.”—Ebre 6:10; 11:6.

16. Kifer bann Kretyin bizin res lor zot gard ek tini ferm laverite?

¹⁶ Konsernan Satan, lapot Pol ti ekrir: “Bondye sa sistem la finn avegle lespri bann ki pa’le krwar, pu ki lalimyer labonn nuvel konsernan Kris, ki zimaz Bondye, pa perse.” (2 Korintyin 4:4) Satan finn tronp sertin konpletman, parey kuma li ti fer avek Ev. Lezot swiv legzanp Adan, ki pa ti tronpe me ki ti swazir par limem pu dezobeir. (Zid 5, 11) Donk, li byin inportan ki bann Kretyin res lor zot gard ek ki zot tini ferm laverite.

Zeova Ule ki Nu Montre enn “Lafwa Ki Pa Ipokrit”

17. Ki nu bizin fer pu gayn faver Zeova?

¹⁷ Zeova azir avek laverite dan tu seki Li fer. Ala kifer, Li atann ki so bann adorater zot usi, zot azir avek laverite. Dan enn psom, ekrivin la ti dir: “A Zeova, kisannla to pu invite dan to latant? Kisannla ki pu res dan to montayn sin? Seki pe mars drwat ek ki pe pratik lazistis, ek ki dir laverite dan so leker.” (Psom 15:1, 2) Pu bann Zwif ki ti sant sa bann parol la, montayn sin Zeova ti sirman fer zot pans Montayn Syon. Se laba mem ki Lerwa David ti fer amenn lars lalyans dan latant ki li ti fer monte. (2 Samyel 6:12, 17) Montayn ek latant ti fer zot pans landrwa kot Zeova ti reste dan enn sans sinbolik. Laba, lepep ti kapav apros Bondye pu sipliy Li pu Li donn zot so faver.

18. (a) Ki nu bizin fer pu gayn lamitye Bondye? (b) Ki nu pu egzamine dan prosin lartik?

¹⁸ Ninport kisannla ki anvi gayn lamitye Zeova, bizin koz laverite “dan so leker,” pa zis ar so lalev. Bann vre kamarad Bondye bizin ena enn leker onet ek zot bizin montre enn “lafwa ki pa ipokrit.” Parski se nu leker ki pus nu pu azir avek laverite. (1 Timote 1:5; Matye 12:34, 35) Enn kamarad Bondye pa tronp lezot ek li pa koz manti, parski “Zeova deteste enn zom . . . ki tronp lezot.” (Psom 5:6) Partu lor later, bann Temwin Zeova pe fer buku zefor pu koz laverite, parey kuma zot Bondye. Prosin lartik pu koz lor la.

Ki U Pu Reponn?

• Kifer eski Zeova konn laverite lor tu kitsoz?

• Ki kitsoz ki montre ki Zeova tuletan koz laverite?

• Kuma eski Zeova finn fer konn laverite?

• An rapor avek laverite, ki Bondye pe demann nu?

[Zimage page 23]

Bondye laverite konn tu kitsoz lor seki Li’nn kre

[Zimage page 25]

Bann promes Zeova pu realize