Imit Bondye Laverite

“Imit Bondye, kuma bann zanfan ki Li byin kontan.”—EFEZYIN 5:1.

1. Ki sertin krwar lor laverite, ek kifer eski zot rezonnman pa solid?

“KI ETE laverite?” (Zan 18:38) Se seki Pons Pilat ti demande, san okenn konviksyon, anviron 2,000 an desela. Sa kestyon la rod fer konpran ki laverite tro difisil pu reserse. Zordi, buku partaz sa lopinyon la. Avredir, ena buku dut lor seki laverite ete vremem. Sirman u finn deza tann sa koze ki dir ki sak dimunn ena so lopinyon personel lor seki laverite ete. Ubyin sertin dir ki pena enn sel laverite; laverite pe tuletan sanze. Me se pa enn rezonnman solid. Avredir, kifer bann dimunn fer bann resers ek kifer zot rod gran-gran ledikasyon? Ebyin, se pu dekuver bann ranseynman ek aprann laverite lor sa lemond kot nu pe viv la. Donk, laverite se pa enn kitsoz lor ki sakenn kapav fer so lopinyon personel. Par egzanp, swa nu dir ki nu nam li mor, swa li pa mor. Swa Satan egziste, swa li pa egziste. Swa lavi ena enn sans, swa li pena okenn sans. Wi, dan sak ka, ena zis enn sel repons. Enn ladan vre ek lot la fos. Tulede pa kapav vre.

2. Dan ki bann fason Zeova Li Bondye laverite, ek ki bann kestyon nu pu egzamine asterla?

² Dan lartik avan, nu ti etidye ki Zeova Li Bondye laverite. Li konn laverite lor tu kitsoz. Li byin diferan ar Satan. Alor ki Dyab tronp lezot, Zeova Li, tuletan Li koz laverite. Anplis, Zeova pa tik-tike pu fer lezot konn laverite; Li fer sa avek bonker. Lapot Pol ti donn so bann konpaynon Kretyin sa konsey la: “Imit Bondye, kuma bann zanfan ki Li byin kontan.” (Efezyin 5:1) Antan ki Temwin Zeova, kuma eski nu kapav imit Li kan nu koz laverite ek nu viv laverite? Kifer li inportan ki nu fer sa? Ek ki lasirans nu ena ki Zeova apruv bann ki pratik laverite? Anu gete.

3, 4. Kuma eski lapot Pol ek lapot Pyer ti dekrir seki ti pu arive dan “bann dernye zur”?

³ Nu pe viv dan enn lepok kot ena buku foste lor plan relizye. Avredir, par linspirasyon Bondye, lapot Pol ti predir ki dan “bann dernye zur,” buku dimunn pu ena enn form latasman ar Bondye, me zot pu trayir so puvwar. Sertin kont laverite parski “zot lespri finn gate konpletman.” Pa fini, ‘bann dimunn move ek bann foser pe vinn pli pir, zot pe anbet lezot ek anbet zotmem.’ Malgre ki tu sa bann kalite dimunn la pe aprann, zame zot pu reysi gayn “konesans egzak laverite.”—2 Timote 3:1, 5, 7, 8, 13.

⁴ Lapot Pyer usi ti inspire pu ekrir konsernan bann dernye zur. Egzakteman parey kuma li ti profetize, bann dimunn pa zis rezet laverite, me usi, zot mok Parol Bondye ek bann ki pe proklam laverite ki ena ladan. “Selon zot dezir,” sa bann dimunn la refiz pran kont ki later ti inonde par enn Deliz dan lepok Noe, ek ki sa li enn model pu zur zizman ki pu vini byinto. Pwiski zot pa pe get larealite anfas, sa pu sinifi enn gran maler pu zot kan Bondye detrir bann ki pa obeir Li.—2 Pyer 3:3-7.

Bann Serviter Zeova Konn Laverite

5. Dapre profet Danyel, ki ti pu arive dan “lepok lafin,” ek kuma eski so profesi pe realize?

⁵ Dan enn deskripsyon ki profet Danyel ti fer lor “lepok lafin,” li ti anonse ki parmi lepep Bondye, enn kitsoz byin diferan ti pu pase. Laverite lor plan relizye ti pu reaparet. Li ti ekrir: “Buku pu rod-rode, me vre konesans pu vinn an abondans.” (Danyel 12:4) Satan pa’nn kapav met lepep Zeova dan konfizyon, ni avegle zot. Grasa bann resers ki zot inn fer atraver bann paz Labib, zot finn reysi gayn vre konesans. Dan premye syek, Zezi ti ekler so bann disip. Li “ti uver zot lespri konpletman pu ki zot sezi sinifikasyon bann Lekritir.” (Lik 24:45) Dan nu lepok usi, Zeova finn fer parey. Atraver so Parol, so lespri ek so lorganizasyon, Li finn permet plizir milyon dimunn atraver later konpran seki Li, Li kone deza—setadir laverite.

6. Ki bann verite ki ena dan Labib lepep Bondye konpran zordi?

⁶ Antan ki pep Bondye, nu konpran buku kitsoz ki nu pa ti pu konpran si nu pa ti servi Zeova. Nu kapav reponn bann kestyon ki bann dimunn swadizan saz dan sa lemond la finn diskite pandan plizir milye lane, san vremem gayn enn repons. Par egzanp, nu kone kifer sufrans egziste, kifer dimunn mor, ek kifer bann imin pa kapav etabli lape ek linite partu lor later. Nu finn gayn usi enn vizyon lor seki lavenir pe rezerv nu—Rwayom Bondye, enn paradi lor later, ek lavi parfe pu tuletan. Nu finn konn Zeova, personaz Siprem dan liniver. Nu finn aprann konn so personalite. Ek nu finn aprann usi seki nu bizin fer pu gayn so benediksyon. Etandone ki nu konn laverite, sa permet nu rekonet seki fos. Kan nu aplik laverite dan nu lavi, sa anpes nu galup deryer bann kitsoz ki pena valer. Sa fer nu profit seki ena meyer dan lavi ek donn nu enn lespwar extraordiner pu lavenir.

7. Ki bann ki ena privilez pu konpran laverite ki ena dan Labib, ek ki bann ki pena sa posibilite la?

⁷ Eski u konpran laverite ki ena dan Labib? Si wi, u finn gayn enn gran benediksyon. Kan enn ekrivin ekrir enn liv, zeneralman li ekrir pu tus enn grup dimunn an partikilye. Par egzanp, sertin liv finn ekrir pu bann dimunn ki ena enn gran ledikasyon. Ena lezot ki finn ekrir pu bann zanfan, uswa pu bann dimunn ki exper dan sertin domenn. Labib usi parey. Mem si tu dimunn ena posibilite pu lir Labib, sa liv la finn fer pu ki enn grup dimunn an partikilye kapav konpran li ek apresye li. Ki sa grup la sa? Zeova finn fer ekrir Labib pu bann dimunn ki ena limilite, pu bann ki pa vantar. Se sa bann kalite dimunn la ki kapav sezi seki Labib dir. Bondye pa get zot ledikasyon, zot kiltir, zot ran sosyal uswa zot ras. (1 Timote 2:3, 4) Parkont, ena dimunn ki kapav byin intelizan uswa ena enn gran ledikasyon, me zot leker pa byin dispoze. Bondye pa permet sa bann kalite dimunn la konpran laverite ki ena dan Labib. Bann dimunn ki vantar, ki arogan, pa kapav sezi bann verite ki ena dan Parol Bondye. (Matye 13:11-15; Lik 10:21; Akt 13:48) Zis Bondye ki kapav fer enn liv kumsa.

Bann Serviter Zeova Koz Laverite Tuletan

8. Kifer eski Zezi limem laverite?

⁸ Parey kuma Zeova, so bann Temwin fidel koz laverite tuletan. Zezi Kris, pli gran Temwin Zeova ki’nn egziste, ti koz laverite par bann kitsoz ki li ti anseyne ek par fason ki li ti viv ek li ti mor. Li ti sutenir laverite ki ena dan parol Zeova ek dan So bann promes. Ala kifer, li ti dir ki limem li laverite.—Zan 14:6; Revelasyon 3:14; 19:10.

9. Ki Labib dir lor koz laverite?

⁹ Zezi ti “ranpli ar faver ek laverite” ek “li pa ti tronp personn avek so labus.” (Zan 1:14; Izai 53:9) Bann vre Kretyin swiv model ki Zezi inn lese kan zot koz laverite ar lezot. Pol ti donn so bann konpaynon Kretyin sa konsey la: “Sakenn parmi zot bizin koz laverite avek so kamarad, parski nu tu nu bann manb enn sel lekor.” (Efezyin 4:25) Plizir lane avan, profet Zekarya ti ekrir: “Koz laverite sakenn ar so kamarad.” (Zekarya 8:16) Bann Kretyin koz laverite parski zot anvi fer Bondye plezir. Zeova tuletan koz laverite, ek Li kone ki ditor foste kapav fer. Donk, Li atann ki so bann serviter koz laverite, zot usi.

10. Kifer bann dimunn koz manti, ek ki move konsekans sa ena?

¹⁰ Pu sertin, koz manti se enn mwayin byin fasil pu gayn sertin lavantaz. Dimunn koz manti pu evit enn pinisyon, pu tir enn sertenn profi, uswa pu gayn ladmirasyon lezot. Me, pran labitid koz manti, li enn byin move tandans sa. Ek seki pli grav ankor, enn manter pa kapav gayn faver Bondye. (Revelasyon 21:8, 27; 22:15) Kan nu ena repitasyon enn kikenn ki tuletan koz laverite, lezot krwar seki nu dir; zot fer nu konfyans. Me, si finn dekuver ki nu’nn koz manti, petet enn ti manti mem, lezot pu dut ninport ki kitsoz nu dir dan lavenir. Enn proverb Afrikin dir: “Enn manti gat mil parol vre.” Enn lot proverb dir: “Personn pa pu krwar enn manter, mem kan li koz vre.”

11. Kifer eski li pa sifi sinpleman koz laverite?

¹¹ Me li pa sifi montre laverite zis par nu parol. Nu bizin usi viv laverite, kumsa nu montre kisannla nu ete vremem. Nu fer lezot dimunn konn laverite pa zis par seki nu dir, me usi par seki nu fer. Lapot Pol ti poz sa bann kestyon la: “Twa ki pe anseyn enn lot dimunn, eski to pa anseyn tomem? Twa, ki pe prese: “Pa kokin,” tomem to kokin? Twa, ki dir: “Pa komet ladilter,” tomem to komet ladilter?” (Romin 2:21, 22) Si nu anvi anseyn lezot laverite, numem nu bizin montre laverite dan tu nu bann fason azir. Si nu ena repitasyon enn kikenn ki koz laverite ek ki onet, sa pu ena enn gran lefe lor fason ki bann dimunn pran kont seki nu anseyne.

12, 13. Ki enn zenn ti ekrir lor lonete, ek pu ki rezon li ti swiv enn prinsip moral elve?

¹² Bann zenn Temwin Zeova usi konpran linportans pu pratik laverite dan zot lavi. Jenny ki sa lepok la ti ena 13 an, ti gayn enn redaksyon pu fer dan lekol. Ladan li ti ekrir: “Pu mwa, lonete li enn gran zafer. Malerezman, pena buku dimunn ki res san pursan onet zordi. Mwa, mo finn fer momem enn promes ki tuletan mo pu res onet dan mo lavi. Mo pu res onet mem si sa pa dan mo lavantaz, uswa dan lavantaz mo bann kamarad. Mo vey byin ar kisannla mo fer kamarad; zot bizin bann dimunn ki koz vre ek ki onet.”

¹³ Kan so profeser ti pe fer komanter lor sa redaksyon la, li ti fer sa remark la: “To ankor byin zenn, me purtan to finn devlop enn prinsip moral byin for dan twa. Mo kone ki to pu reysi respekte sa prinsip la parski to ena enn bon lafors moral.” Ki ti donn sa zenn tifi la lafors moral? Dan lintrodiksyon so redaksyon, Jenny ti ekrir ki so relizyon “etabli bann prinsip pu [li] swiv dan [so] lavi.” Set lane finn pase depi ki Jenny ti fer sa redaksyon la. Kuma so profeser ti panse, Jenny pe kontiyn swiv enn prinsip moral elve dan so lavi antan ki Temwin Zeova.

Bann Serviter Zeova Fer Konn Laverite

14. Kifer eski bann serviter Bondye ena enn gran responsabilite pu sutenir seki vre?

¹⁴ Byinsir, apart bann Temwin Zeova, ena lezot dimunn ki koz laverite ek ki fer zefor pu res onet. Me, antan ki bann serviter Bondye, nu ena partikilyerman enn gran responsabilite pu sutenir seki vre. Bondye finn konfye nu bann verite ki ena dan Labib—sa bann verite la kapav amenn enn kikenn pu gayn lavi pu tuletan. Donk, nu ena enn obligasyon pu partaz sa konesans la avek lezot. Zezi ti dir: “Kan finn donn enn kikenn buku, anretur pu demann li buku.” (Lik 12:48) Wi, bann ki’nn gayn konesans Bondye, anretur Bondye pu ‘demann zot buku.’

15. Ki lazwa u gayne kan u partaz laverite ki ena dan Labib avek lezot?

¹⁵ Nu ere kan nu partaz laverite ki ena dan Labib avek lezot. Parey kuma bann disip Zezi dan premye syek, nu pe anons labonn nuvel. Se enn mesaz lespwar ki sulaz bann dimunn. Nu pe pres sa mesaz la ar bann dimunn ki “maltrete ek byin dezespere kuma bann muton ki pena berze.” Nu pres avek bann ki’nn avegle ek ki’nn tom dan konfizyon par “bann lanseynman demon.” (Matye 9:36; 1 Timote 4:1) Lapot Zan ti ekrir: “Pena nanyin ki fer mwa pli rekonesan, ki kan mo aprann ki mo bann zanfan pe kontiyn mars dan laverite.” (3 Zan 4) Kitfwa, sa bann “zanfan” la ti aprann laverite ar Zan. Zot fidelite ti donn li enn gran lazwa. Wi, nu ere kan nu truv bann dimunn aksepte Parol Bondye avek rekonesans.

16, 17. (a) Kifer tu dimunn pa aksepte laverite? (b) Ki lazwa u kapav kone amezir ki u proklam laverite ki ena dan Labib?

¹⁶ Byinsir, pa tu dimunn ki pu aksepte laverite. Zezi ti koz laverite lor Bondye, malgre ki mazorite dimunn ti rezet so mesaz. Li ti dir bann Zwif ki ti kont li: “Kifer zot pa krwar mwa? Seki tann parol Bondye ekut seki Bondye dir. Akoz sa zot, zot pa ekute, parski zot pa tann parol Bondye.”—Zan 8:46, 47.

¹⁷ Parey kuma Zezi, nu pa tini-tini pu koz laverite lor Zeova. Nu pa atann ki tu dimunn pu aksepte seki nu dir zot, parski pa tu dimunn ki ti aksepte seki Zezi ti dir. Kan mem sa, nu kone ki nu pe fer seki drwat, ek sa rann nu ere. Zeova, dan so lamur fidel, anvi ki limanite aprann konn laverite. Bann Kretyin posed laverite, donk zot bizin ekler bann ki dan nwarte sa lemond la. Nu kapav fer laverite eklere par nu bann parol ek par nu bann aksyon. Kan nu fer sa, nu pu ed lezot pu donn laglwar nu Papa ki dan lesyel. (Matye 5:14, 16) Nu fer tu dimunn kone ki nu rezet fos versyon laverite ki Satan pe prezante. Ek nu montre ki nu sutenir Parol Bondye ki pir ek ki pa’nn melanze avek nanyin ki fos. Laverite ki nu kone ek ki nu pe fer lezot kone, kapav donn vre liberte bann ki aksepte sa.—Zan 8:32.

Kontiyn Viv Laverite

18. Kifer ek kuma eski Zezi ti donn Natanael so faver?

¹⁸ Zezi ti kontan laverite ek li ti koz laverite. Pandan so minister lor later, li ti montre so faver anver bann ki ti pratik laverite. Konsernan Natanael, Zezi ti dir: “Gete, sa enn vre Izraelit, pena okenn foste dan li.” (Zan 1:47) Ek zisteman, apre, Zezi ti swazir Natanael ki ti apel usi Bartelemi, kuma enn so bann 12 zapot. (Matye 10:2-4) Sa ti vremem enn gran loner pu li!

19-21. Kuma eski enn zom ki ti aveg ti gayn benediksyon parski li ti koz laverite avek kuraz?

¹⁹ Enn sapit antye dan Levanzil Zan rakont zistwar enn zom onet ki Zezi ti beni. Nu pa konn non sa zom la. Seki nu kone se ki li ti enn mandyan ki ti aveg depi so nesans. Bann dimunn ti inpresyone kan Zezi ti fer sa zom la truv kler. Nuvel sa mirak la ti ariv dan zorey sertin Farizyin, ki ti deteste laverite. Si enn kikenn egzers lafwa an Zezi, sa bann Farizyin la ti tom dakor pu met li deor depi dan sinagog. Ek bann paran sa zom ki ti aveg la, ti byin konn sa. Alor, parski zot ti gayn per, zot ti koz manti ar bann Farizyin. Zot ti dir ki zot pa kone kuma zot garson pe kapav truve asterla, ni zot kone kisannla ki’nn fer li truv kler.—Zan 9:1-23.

²⁰ Ankor enn fwa, bann Farizyin ti fer apel sa zom ki ti’nn geri la. Sa zom la ti koz laverite avek kuraz; li pa ti kas latet ar bann konsekans ki sa ti kapav ena pu li. Li ti explike kuma li ti’nn geri ek ki se Zezi ki ti fer sa. Sa ti etonn li ki sa bann zom ki purtan byin inportan ek edike la, pale krwar ki Zezi sorti kot Bondye. Akoz sa, san okenn laper, li ti ankuraz zot pu aksepte seki ti byin kler: “Si sa zom la pa ti sorti kot Bondye, li pa ti pu kapav fer nanyin ditu.” Bann Farizyin pa ti kone ki pu reponn li. Donk, zot ti dir ki swadizan li pe fer gran labus ar zot ek zot inn zet li deor.—Zan 9:24-34.

²¹ Kan Zezi ti aprann sa, avek lamur li ti pran letan pu al rod sa zom la. Lerla, kan li finn retruv li, Zezi finn ogmant lafwa sa zom la plis ankor. Devan tu seki ti la, li finn idantifye limem kuma Mesi. Wi, sa zom la finn gayn enn benediksyon parski li ti koz laverite! Pena dut ki Bondye donn so faver bann ki koz laverite.—Zan 9:35-37.

22. Kifer eski nu bizin kontiyn viv laverite?

²² Nu bizin kontiyn viv laverite. Se enn kitsoz ki nu bizin vey byin. Li inportan ki nu devlop ek nu gard bann bon relasyon avek bann dimunn ek avek Bondye. Enn kikenn ki viv laverite, se enn kikenn ki uver ek sinser. Dimunn apros li fasilman ek fer li konfyans, ek sa fer li gayn faver Zeova. (Psom 15:1, 2) Enn kikenn ki pa viv laverite se enn kikenn ki tronp lezot ek ki pa sinser. Pa kapav kont lor li ek li pa pu gayn faver Zeova. (Proverb 6:16-19) Donk, pran determinasyon pu kontiyn viv laverite. Wi, pu imit nu Bondye ki ranpli ar laverite, nu bizin konn laverite, koz laverite, ek viv laverite.

Kuma U Pu Reponn?

• Kifer nu kapav rekonesan ki nu konn laverite?

• Kuma eski nu imit Zeova kan nu koz laverite?

• Ki bann byinfe nu gayne kan nu partaz laverite ar lezot?

• Kifer li inportan ki nu kontiyn viv laverite?

[Zimage page 29]

Bondye finn konfye bann Kretyin laverite ki ena dan Labib, akoz sa, zot partaz sa ar lezot avek zel

[Zimage page 31]

Sa zom aveg ki Zezi ti geri la, ti gayn enn gran benediksyon parski li ti koz laverite