Fer Zeova Konfyans dan Bann Peryod Difisil
“Bondye enn proteksyon ek enn lafors pu nu. Dan bann moman difisil, se ar Limem ki nu gayn sekur fasilman.”—PSOM 46:1.
1, 2. (a) Ki legzanp montre ki li pa sifi zis dir ki nu fer Bondye konfyans? (b) Kifer nu bizin fer plis ki sa?
‘NU FER Bondye konfyans,’ sa li fasil pu dir, me pa tuzur fasil pu montre par nu bann aksyon. Depi lontan, lor bann biye ek pyes lamone Amerikin, finn mark sa fraz la: “Nu Fer Bondye Konfyans.”a An 1956, Kongre Amerikin ti pas enn lalwa pu dir ki sa fraz la pu vinn dan enn sertenn sans, sinbol l’Amérique. Me anfennkont, ki li dan l’Amérique uswa dan lezot peyi, buku dimunn met zot konfyans plis dan larzan ek dan larises materyel, ki an Bondye.—Lik 12:16-21.
2 Antan ki Kretyin, nu pa kapav kontant nu zis dir ki nu fer Zeova konfyans. Parey kuma “lafwa, san bann aksyon, li mor,” se par nu aksyon ki nu bizin montre ki nu fer Zeova konfyans. (Zak 2:26) Dan lartik avan, nu finn aprann ki nu montre nu konfyans an Zeova kan nu priye Li, kan nu rod direksyon so Parol ek kan nu les so lorganizasyon gid nu. Asterla, anu gete kuma nu kapav fer sa trwa kitsoz la kan nu pas par bann peryod difisil.
Kan Nu Perdi Nu Plas Travay Uswa kan Lapey Tro Tigit
3. Ki bann problem ekonomik bann serviter Zeova pe kone dan sa “letan kritik” la, ek kuma eski nu kone ki Bondye dispoze pu ed nu?
3 Dan sa “letan kritik” kot nu pe viv la, bann Kretyin usi gayn bann problem ekonomik parey kuma tu dimunn. (2 Timote 3:1) Enn ku, nu kapav perdi nu travay. Uswa, nu oblize travay ziska tar pu enn lapey byin mins. Dan bann sityasyon kumsa, li difisil pu ‘donn nu fami seki zot bizin.’ (1 Timote 5:8) Eski Bondye dispoze pu ed nu dan sa bann moman la? Byinsir! Li vre ki Zeova pa protez nu kont tu problem ki nu gayne dan sa lemond la. Me si nu fer Li konfyans, bann parol Psom 46:1 pu aplik ar nu: “Bondye enn proteksyon ek enn lafors pu nu. Dan bann moman difisil, se ar Limem ki nu gayn sekur fasilman.” Kuma eski nu kapav montre ki nu ena enn konfyans total an Zeova kan nu ena problem finans?
4. Kan nu ena problem finans, ki nu kapav demande dan nu lapriyer, ek kuma eski Zeova reponn sa bann kalite lapriyer la?
4 Enn fason ki nu montre nu konfyans an Zeova, se kan nu priye Li. Ki nu pu demann Li? Ebyin, kan nu ena problem finans, se lasazes sirtu ki nu pu pli bizin. Alor fode pa nu ezite; nu bizin priye pu gayn lasazes. Parol Zeova donn nu sa lasirans la: “Si kikenn parmi zot mank lasazes, li bizin kontiyn demann Bondye, parski Bondye donn tu dimunn avek bonker ek san fer repros.” (Zak 1:5) Wi, demann Zeova lasazes—kapasite pu servi u konesans, u lintelizans ek u bon zizman—pu pran bann bon desizyon ek pu fer bann bon swa. Nu bon Papa dan lesyel asir nu ki Li pu ekut sa bann lapriyer la. Bann ki fer Li konfyans avek tu zot leker, Zeova tuletan dispoze pu fer zot semin vinn drwat.—Psom 65:2; Proverb 3:5, 6.
5, 6. (a) Kifer Labib kapav gid nu pu fer fas ar bann problem ekonomik? (b) Ki nu kapav fer pu diminye nu traka si nu’nn perdi nu travay?
5 Enn lot fason ki nu montre nu konfyans an Zeova, se kan nu rod direksyon so Parol. Labib donn nu bann rapel ki saz ek lor ki nu “kapav tuzur konte.” (Psom 93:5) Li vre ki finn gayn plis ki 1900 an depi ki finn ekrir Labib. Me dan sa liv inspire la, ena bann bon konsey byin saz ki kapav ed nu pu fer fas avek problem ekonomik. Anu get detrwa legzanp kuma Labib donn bann konsey saz.
6 Byin lontan, saz Lerwa Salomon ti fer sa remark la: “Enn kikenn ki servi, fer enn bon somey kan li dormi, ki li’nn byin manze uswa non. Me labondans ki enn ris posede, sa mem ki anpes li dormi.” (Eklezyast 5:12) Bann kitsoz materyel ki nu ena, nu bizin letan ek larzan pu repar zot, netway zot, antretenir zot ek protez zot. Asterla, si nu finn perdi nu travay, se enn bon moman pu reegzaminn nu lavi ek gete ki kitsoz ki nu vremem bizin pu viv. Pu diminye nu traka, kitfwa li pu bon fer sertin sanzman. Par egzanp, eski nu kapav sinplifye nu lavi, al res dan enn lakaz ki pli tipti uswa eliminn bann kitsoz materyel ki pa neseser?—Matye 6:22.
7, 8. (a) Kuma eski Zezi ti montre ki li kone ki bann imin ena tandans pu trakas zot tro pu bann kitsoz materyel? (Get not usi.) (b) Ki bon konsey Zezi ti done pu evit pran traka pu nanyin?
7 Dan so Sermon lor Montayn, Zezi ti donn sa konsey la: “Aret trakas zot pu zot nam, ki zot pu manze, uswa ki zot pu bwar. Aret trakas zot pu zot lekor, ki zot pu mete.”b (Matye 6:25) Zezi ti konsyan ki bann imin ena sa tandans natirel la, pu trakas zot pu zot bann nesesite lavi. Me, kuma eski nu kapav “aret trakas” nu pu sa bann kitsoz la? Zezi ti dir: “Avan tu kitsoz, kontiyn rod rwayom.” Ninport ki problem nu gayne, nu bizin kontiyn donn priorite nu servis pu Zeova. Si nu fer sa, nu Papa ‘pu azut’ lezot kitsoz ki neseser pu nu viv. Li pu truv enn mwayin pu donn nu seki nu bizin.—Matye 6:33.
8 Zezi finn donn enn lot konsey ankor: “Zame pa pran traka demin, parski demin pu ena so prop traka.” (Matye 6:34) Li pa bon ki nu pran traka pu nanyin pu seki demin kapav rezerv nu. Enn spesyalis dan bann letid Labib ti fer sa remark la: “Byin suvan, nu bann lakrint zot enn tipe egzazere. Avredir, larealite pa osi move ki seki nu, nu ti pe per.” Wi, nu bizin aksepte avek limilite bann konsey Labib. Labib ankuraz nu pu konsantre lor nu bann priorite ek pu viv enn zur alafwa. Si nu fer sa, nu pu evit pran traka pu nanyin.—1 Pyer 5:6, 7.
9. Kan nu konn problem finans, ki led nu kapav gayne dan bann piblikasyon “esklav fidel ki ena bon zizman”?
9 Kan nu konn problem finans, nu kapav usi montre nu konfyans an Zeova, kan nu les nu gide par bann piblikasyon “esklav fidel ki ena bon zizman.” (Matye 24:45) Detanzantan, Réveillez-vous ! pibliy bann lartik ki donn bann ti konsey ek sigzesyon pratik pu fer fas ar difikilte ekonomik. Par egzanp, dan edisyon 8 Ut, 1991, ti ena lartik “Au chômage — Que faire?” Sa lartik la ti donn wit konsey ki finn ed buku pu res stab lor plan finansye ek afektif malgre ki zot pena travay.c Byinsir, pu aplik sa bann konsey la, enn kikenn bizin, an mem tan, ena enn lopinyon ekilibre lor vre linportans larzan. Zisteman, enn lot lartik dan sa mem Réveillez-vous ! la ti tret sa size la, “Plus important que l’argent.”—Eklezyast 7:12.
Kan Nu Ena Problem Lasante
10. Kuma eski legzanp Lerwa David montre ki nu kapav kont lor Zeova kan nu pe sufer enn maladi grav?
10 Si nu pe sufer enn maladi grav, eski la usi nu kapav fer Zeova konfyans? Wi, byinsir! Zeova sufer ansam avek so bann serviter ki malad, ek Li anvi ed zot. Get par egzanp Lerwa David. Kan David ti ekrir kuma Zeova tret enn dimunn drwat ki malad, kitfwa limem li ti byin malad. Li ti dir: “Zeova pu sutenir li kan li dan duler lor so lili ek Li pu sulaz li ar tu so maladi.” (Psom 41:1, 3, 7, 8) David ti gard enn konfyans solid an Zeova, ek alafin, li ti retruv so lasante. Me, kuma eski nu kapav montre nu konfyans an Zeova kan nu ena problem lasante?
11. Si nu pe sufer akoz maladi, ki nu kapav demann nu Papa?
11 Kan nu malad, enn fason pu montre nu konfyans an Zeova se kan nu sipliy so led dan lapriyer pu nu andire. Nu kapav demann Li “lasazes” pu rod enn nivo lasante, dapre seki nu sityasyon permet nu. (Proverb 3:21) Nu kapav demann Li usi led pu siport nu maladi avek pasyans. Me avan tu, nu pu anvi dir Zeova sutenir nu ek donn nu lafors pu nu kontiyn res fidel ar Li. Wi, nu anvi ki Bondye ed nu pu gard nu lekilib, malgre ki kapav arive. (Filipyin 4:13) Seki nu anvi plis prezerve, se pa sa lavi ki nu ena asterla, me nu fidelite anver Zeova. Parski si nu res fidel ziska lafin, Bondye pu ofer nu, an rekonpans, enn lavi ek enn lasante parfe, pu leternite.—Ebre 11:6.
12. Ki bann prinsip Labib ki kapav ed nu pu swazir bann bon tretman?
12 Nu konfyans an Zeova pus nu usi pu rod direksyon so Parol, Labib. Bann prinsip Labib kapav gid nu pu swazir bann bon tretman. Par egzanp, nu kone ki Labib kondann “pratik spiritis.” Donk, nu pu evit ninport ki tretman ki ena enn lyin avek spiritis. (Galat 5:19-21; Deteronom 18:10-12) Get enn lot prinsip saz ki ena dan Labib: “Enn kikenn ki pena lexperyans, li pu krwar tu seki li tande, me enn kikenn ki ena lintelizans pu vey byin so bann pa.” (Proverb 14:15) Donk, si nu pe pans swiv enn tretman, li bon ki nu rod bann ranseynman sir olye ki nu ‘krwar tu seki nu tande.’ Wi, si nu servi nu “bon zizman,” sa pu permet nu byin konsider bann diferan posibilite ki ena devan nu. Ek kumsa, nu pu pran enn desizyon ki byin reflesi.—Tit 2:12.
13, 14. (a) Ki bann lartik interesan lor maladi Latur Degard ek Réveillez-vous ! finn pibliye? (Get lankadre lor paz 31.) (b) Ki konsey Réveillez-vous ! 22 Zanvye, 2001 ti done pu viv avek enn maladi kronik?
13 Nu kapav usi montre nu konfyans an Zeova kan nu egzaminn bann piblikasyon esklav fidel. Suvan, Latur Degard ek Réveillez-vous ! finn pibliy bann lartik interesan lor enn kantite diferan maladi.d Finn ena usi bann lartik kot sertin dimunn ki finn reysi fer fas ar tut sort kalite maladi ek andikap, finn rakont zot lavi. Pa fini, sertin lartik finn donn bann sigzesyon Biblik ek konsey pratik pu viv avek bann maladi kronik.
14 Par egzanp, dan Réveillez-vous ! 22 Zanvye, 2001, ti ena enn seri lartik lor sa tem la, “Maladie, infirmité : du réconfort.” Sa bann lartik la finn prezant bann prinsip Labib byin itil. Ek zot finn donn usi bann ranseynman ki Réveillez-vous ! inn gayne kan li’nn intervyue bann dimunn ki finn viv avek sa bann maladi la depi plizir lane. Lartik, “Comment vivre au mieux avec votre déficience physique,” ti donn sa konsey la: Inform u, kantite ki u kapav lor u maladi. (Proverb 24:5) Fixe bann lobzektif pratik. Fixe lobzektif pu ed lezot, me u bizin rekonet kan mem, ki kitfwa u pa pu kapav fer seki lezot pe fer. (Akt 20:35; Galat 6:4) Evit res dan u kwin. (Proverb 18:1) Kan dimunn vizit u, esey rann sa bann moman la agreab pu zot. (Proverb 17:22) Pli inportan ki tu, res pros avek Zeova ek avek u kongregasyon. (Naum 1:7; Romin 1:11, 12) Eski nu pa rekonesan anver Zeova pu direksyon sir ki Li donn nu atraver so lorganizasyon?
Kan enn Febles Pe Dominn Nu
15. Kuma eski lapot Pol ti kapav sirmont so bann febles, ek ki lasirans nu kapav ena?
15 “Dan mo lekor, pena nanyin ki bon,” se seki lapot Pol ti ekrir. (Romin 7:18) Par so prop lexperyans, Pol ti kone ki kantite li difisil pu lit kont bann dezir ek bann febles nu lekor inparfe. Me, li ti ena konfyans ki li ti pu kapav sirmont so bann febles. (1 Korintyin 9:26, 27) Kuma? Se grasa enn konfyans total an Zeova. Ala kifer Pol ti kapav dir: “Zom malere ki mo ete! Kisannla ki pu tir mwa dan sa lekor ki pe al mor la? Mersi Bondye atraver Zezi Kris nu Senyer!” (Romin 7:24, 25) Nu’si, nu pe bizin lager kont bann febles nu lekor. Dan sa lalit la, li fasil pu perdi konfyans an numem, ek gayn santiman ki zame nu pu reysi. Me, Zeova pu ed nu, si parey kuma Pol, nu fer Li vremem konfyans, olye ki nu fye zis lor nu prop lafors.
16. Si enn febles pe kontiyn dominn nu, ki nu bizin demann Zeova dan lapriyer, ek ki nu bizin fer si nu retonbe?
16 Kan enn febles pe dominn nu, nu kapav montre nu konfyans an Zeova kan nu sipliy Li dan lapriyer. Wi, nu bizin demann Li, mem sipliy Li pu gayn led so lespri sin. (Lik 11:9-13) Nu kapav demann Zeova led pu kontrol numem; se enn kalite dan frwi lespri Bondye. (Galat 5:22, 23) Defwa, apre ki nu’nn reysi kontrol numem pandan enn bon letan, nu retom dan sa febles la. Ki nu bizin fer? Fode zame nu bes lebra. Nu bizin kontiyn priye Bondye avek limilite pu gayn so pardon ek so led. Zame Zeova pu rezet enn dimunn ki ena enn leker “kraze” akoz santiman kilpabilite ki pe pez lor li. (Psom 51:17) Si nu repanti ek nu sipliy Li avek enn leker sinser, Zeova pu ed nu pu reziste bann tantasyon.—Filipyin 4:6, 7.
17. (a) Kan nu reflesi lor seki Zeova panse lor nu febles, kifer sa kapav ed nu? (b) Ki bann tex Labib nu kapav aprann parker si nu pe travay pu kontrol nu koler? pu vey lor seki nu dir? pu pa les nu atire par bann distraksyon ki pa korek?
17 Nu kapav usi montre nu konfyans an Zeova kan nu rod led dan so Parol. Avek led enn konkordans Labib uswa Index des publications Watch Tower, nu kapav rod repons sa kestyon la, ‘Ki Zeova panse lor sa febles kont ki mo pe lite la?’ Kan nu reflesi lor seki Zeova panse lor nu febles, sa kapav ranforsi nu dezir pu fer Li plezir. Lerla, nu pu kumans ena mem santiman ki Zeova ek nu pu ayir seki Li ayir. (Psom 97:10) Sertin finn mem aprann parker bann tex Labib an rapor avek zot febles. Zot truve ki sa ed zot. Par egzanp, eski nu pe travay pu kontrol nu koler? Alor, nu kapav memoriz bann tex kuma Proverb 14:17 ek Efezyin 4:31. Eski nu gayn difikilte pu vey lor seki nu dir? Nu kapav aprann parker bann tex kuma Proverb 12:18 ek Efezyin 4:29. Eski nu atire par bann divertisman ki pa korek? Nu kapav sey gard dan nu lespri bann verse kuma Efezyin 5:3 ek Kolosyin 3:5.
18. Si nu anvi sirmont enn febles, kifer fode pa nu ezite pu rod led bann ansyin, mem si nu santi nu zene?
18 Enn lot fason ki nu montre nu konfyans an Zeova, se kan nu rod led bann ansyin. (Akt 20:28) Apretu, se enn laranzman ki Zeova finn fer atraver Zezi Kris pu protez so trupo ek pran zot swin. (Efezyin 4:7, 8, 11-14) Se vre ki li pa fasil pu demann led pu konbat enn febles. Petet nu santi nu zene, nu per pangar bann ansyin ena enn move lopinyon lor nu. Me, se bann zom ki ena matirite spirityel. Okontrer, zot pu respekte nu pu kuraz ki nu finn ena pu demann led. Anplis, kan zot pran swin trupo Bondye, bann ansyin esey reflekte bann kalite ki Zeova Limem Li ena. Zot pu donn nu bann konsey pratik ki pu rekonfort nu ek bann instriksyon ki sorti dan Parol Bondye. Se sa zisteman ki petet nu bizin pu ranforsi nu determinasyon pu sirmont nu febles.—Zak 5:14-16.
19. (a) Kuma eski Satan rod servi sa lavi ki pena sans la? (b) Fer Zeova konfyans, ki sa inplike? Ek ki nu bizin byin determine pu fer?
19 Fode zame nu bliye ki Satan kone ki li pa res buku letan. (Revelasyon 12:12) Alor, Li pe servi sa lavi ki pena sans la pu dekuraz nu ek fer nu bes lebra. Me, nu bizin met tu nu konfyans dan bann parol Romin 8:35-39 kot nu lir: “Ki pu kapav separ nu ar lamur Kris? Maler, detres, persekisyon, lamizer, danze, uswa mem lamor? . . . Okontrer, nu sorti vinker dan tu sa bann kitsoz la, grasa sa kikenn ki’nn kontan nu la. Parski mo ena sa lasirans la, ki ni lamor, ni lavi, ni bann anz, ni bann guvernman, ni bann kitsoz ki egziste zordi uswa ki pu egziste dan lavenir, ni bann ki ena puvwar, ni oter, ni profonder, ni okenn lezot kreatir pa pu kapav separ nu ar lamur Bondye ki ena dan Zezi Kris, nu Senyer.” Ala bann parol ki reflet enn konfyans total an Zeova! Me, sa konfyans la li plis ki enn sinp santiman. Plito, se enn konfyans ki inplik usi bann desizyon byin reflesi ki nu pran tulezur dan lavi. Donk, anu byin determine pu met tu nu konfyans an Zeova dan bann peryod difisil.
[Footnotes]
a Dan enn let date le 20 Novam, 1861, ki ti adrese ar l’hôtel des monnaies Américain, Sekreter-Trezor guvernman l’Amérique, Salmon Chase, ti ekrir: “Okenn nasyon pa kapav for si li pena lafors Bondye. Okenn nasyon pa kapav an sekirite si li pena proteksyon Bondye. Konfyans ki nu pep ena an Bondye, li pu bon si nu exprim sa lor nu bann pyes lamone nasyonal.” Donk, se kumsa ki fraz “Nu Fer Bondye Konfyans,” finn paret pu premye fwa lor enn pyes lamone Amerikin an 1864.
b Traka ki dekrir isi, se enn “traka ki melanze avek laper, ek ki anlev tu lazwa ki ena dan lavi.” Kan Zezi ti dir “aret trakase,” li pa ti pe dir aret kumans trakase. Enn liv referans donn sa presizyon la: “Verb Grek ki’nn servi isi se enn verb inperatif. Sa vedir ki se enn lord pu aret fer enn aksyon ki’nn deza fini kumanse.”
c Ala sa wit pwin la: (1) Pa panike; (2) gard enn latitid pozitif; (3) dispoze pu fer lezot travay; (4) viv dapre u bidze, pa rod viv kuma lezot; (5) fer atansyon kan u aste kredi; (6) gard u fami byin ini; (7) pa perdi lestim pu umem; ek (8) fer enn bidze.
d Sa bann magazinn la zot baze lor Labib. Zot pa rekomann okenn tretman medikal, ni zot fer piblisite pu sa. Zot rekonet ki swazir enn tretman, se enn desizyon personel. Me, bann lartik ki koz lor sertin maladi uswa andikap, finn pibliye pu donn dimunn bann ranseynman disponib lor sertin maladi.
Eski U Rapel?
• Kan nu konn bann problem ekonomik, dan ki diferan fason nu kapav montre nu konfyans an Zeova?
• Kuma eski nu kapav montre nu konfyans an Zeova kan nu ena problem lasante?
• Si enn febles pe kontiyn dominn nu, kuma eski nu kapav montre ki vremem nu fer Zeova konfyans?
[L’encadré page 31]
Eski U Rapel Sa Bann Lartik La?
Kan bann problem lasante fatig nu, li enn rekonfor pu lir lor lavi bann dimunn ki’nn reysi fer fas ar zot maladi uswa zot andikap. Ala sertin lartik ki ti’nn pibliye dan Latur Degard ek Réveillez-vous !
“J’ai surmonté mes faiblesses.” Sa lartik la ti montre kuma nu kapav lit kont bann panse negatif ek depresyon.—Latur Degard, 1 Me, 1990.
“Même un poumon d’acier n’a pu l’empêcher de prêcher.”—Réveillez-vous !, 22 Zanvye, 1993.
“Une balle a bouleversé ma vie.” Sa lartik la ti montre kuma nu kapav viv mem si nu paralize.—Réveillez-vous !, 22 Oktob, 1995.
“Vous ne savez pas ce que votre vie sera demain.” Sa lartik la ti montre kuma fer fas ar enn maladi mantal ki apel trouble bipolaire de l’humeur.—Latur Degard, 1 Desam, 2000.
“Loida, ou la victoire sur le silence.” Sa lartik la ti montre kuma fer fas ar enn maladi ki apel troubles psychomoteurs.—Réveillez-vous !, 8 Me, 2000.
“Mon combat contre l’endométriose.”—Réveillez-vous !, 22 Zilyet, 2000.
“Mon combat contre la sclérodermie.”—Réveillez-vous !, 8 Ut, 2001.
“Ma victoire contre la dépression postnatale.”—Réveillez-vous !, 22 Zilyet, 2002.
[Zimage page 29]
Kan nu finn perdi nu plas travay, petet li bon ki nu reegzaminn nu fason viv
[Zimage page 30]
Zistwar Loida montre kuma kan enn kikenn met so konfyans an Zeova, sa ed li pu andire. (Get lankadre, paz 31)
[Zimage page 32]
Fode pa ki nu santi nu zene pu demann led pu sirmont nu bann febles