Faire Jéhovah confiance alors ki la fin pré

“Mette zot confiance en Jéhovah pou touletan.”​—IS. 26:4.

1. Ki difference ena entre bann serviteur Bondié ek bann dimoune dan le monde?

NOU pé vive dan enn le monde kot beaucoup dimoune nepli koné kisannla ou-soit dan ki kitsoz zot pou faire confiance, kitfois parski trop souvent zot finn blessé ou-soit zot finn deçu. Mais bann serviteur Jéhovah zot, zot bien different! Parski zot laisse sagesse Bondié guide zot, zot koné kisannla zot kapav faire confiance, a cause sa, zot pa mette zot confiance dan “bann grand personnage” ki ena dan sa le monde-la. (Ps. 146:3) Au contraire, zot mette zot la vie ek zot l’avenir dan la main Jéhovah, parski zot koné ki Li content zot ek ki Li touletan realise so Parole.​—Rom. 3:4; 8:38, 39.

2. Couma Josué ti confirmé ki nou kapav faire Bondié confiance?

² Josué ki’nn vive dan lepok biblik, ti confirmé ki nou kapav faire Bondié confiance. Vers la fin so la vie, li ti dire bann Israélite: “Zot bien koné avek tou zot leker ek tou zot nâme ki dan tou bann bon parole ki Jéhovah zot Bondié inn dire zot, pena enn sel parole ki pa finn accompli. Tou finn realisé pou zot.”​—Jos. 23:14.

3. Ki nom Bondié faire nou koné lor Li?

³ Jéhovah realise so bann promesse, pa zis parski Li content so bann serviteur, mais surtout a cause so nom. (Ex. 3:14; 1 Sam. 12:22) Concernant nom Bondié, Joseph B. Rotherham dire dan l’introduction so traduction la Bible (The Emphasized Bible) ki ‘sa nom-la vinn enn promesse extraordinaire; capacité ki Bondié ena pou adapté ar n’importe ki situation, n’importe ki difficulté, n’importe ki probleme ki arrivé. Sa nom-la li enn promesse, li faire nou konn Bondié ek aide nou pou rappel Li. Bondié pou reste toujours fidele ar sa nom-la; jamais Li pa pou gagne honté a cause sa nom-la.’

4. (a) Ki Isaïe 26:4 encourage nou pou faire? (b) Ki nou pou examiné dan sa lartik-la?

⁴ Demann ou-mem: ‘Eski mo konn Jéhovah assez pou ena enn confiance total en Li? Eski mo guette l’avenir avek confiance, parski mo koné ki tou dan la main Bondié?’ Isaïe 26:4 dire: “Mette zot confiance en Jéhovah pou touletan, parski en Yah Jéhovah Li-mem sa grand Roche pou touletan-la.” Li vrai ki Bondié pa faire okenn mirak dan la vie bann dimoune zordi pareil couma Li ti faire parfois dan lepok biblik. Selman, parski Bondié Li “sa grand Roche pou touletan-la,” nou kapav faire Li confiance “pou touletan.” Couma eski nou Bondié, ki nou kapav faire confiance, aide so bann adorateur fidele zordi? Anou examine trois fason: Li fortifié nou kan nou rod so l’aide pou faire face ar tentation, Li soutenir nou kan nou bizin faire face ar bann dimoune ki indifferent ar nou message ou-soit ki bien opposé, ek Li donne nou la force kan nou ena beaucoup tracas. A mesure ki nou examine sa bann domaine-la, nou bizin faire sur ki nou prend le temps pou reflechi lor fason ki nou kapav fortifié nou confiance en Jéhovah.

Faire Bondié confiance kan nou tenté pou faire le mal

5. Concernant nou confiance en Bondié, ki kitsoz ki kapav bien difficile?

⁵ Kitfois li pa difficile pou nou ena confiance en Jéhovah en rapport avek so promesse concernant Paradis ek resurrection​—bann kitsoz ki nou pé attann avek impatience. Mais li possible ki li pli difficile pou ena confiance en Li kan nou bizin decidé si nou pou suive so bann principe moral ou-soit non. Li kapav difficile aussi pou ena l’assurance ki li bon nou soumette-nou ar so bann principe ek ki sa pou faire nou gagne enn grand bonheur. Le roi Salomon ti donne sa conseil-la: “Faire Jéhovah confiance avek tou to leker ek pa fié lor to prop l’intelligence. Dan tou seki to faire, prend Li compte, ek Li, Li pou faire to bann chemin vinn droite.” (Prov. 3:5, 6) Remark bann l’expression “dan tou seki to faire” ek “to bann chemin.” Oui, dan tou domaine nou la vie nou bizin montré ki nou ena confiance en Bondié, pa zis kan sa concerne nou l’esperance en tant ki chretien. Couma nou kapav montré sa confiance-la kan nou gagne bann tentation?

6. Couma nou kapav pli determiné encore pou rejette bann mauvais pensée?

⁶ Pou nou detourne-nou ar seki mauvais, d’abord nou bizin examine nou bann pensée. (Lire Romains 8:5; Éphésiens 2:3.) Alors, couma ou kapav pli determiné encore pou rejette bann mauvais pensée? Examine sa cinq fason-la: 1. Rod l’aide Bondié dan la priere. (Mat. 6:9, 13) 2. Medite lor l’exemple bann dimoune dan lepok biblik ki pa finn ecoute Jéhovah ek bann ki finn ecoute Li. Apré sa, guetté ki finn arrive zot.a (1 Cor. 10:8-11) 3. Reflechi lor souffrance moral ek affectif ki peché kapav faire ou ek bann dimoune ki ou content, gagné. 4. Maziné ki Jéhovah ressenti kan enn parmi so bann serviteur faire enn peché grave. (Lire Psaume 78:40, 41.) 5. Mazinn la joie ki Jéhovah ressenti kan Li trouve enn so bann adorateur fidele rejette seki mauvais ek faire seki droite, ki li en publik ou-soit en privé. (Ps. 15:1, 2; Prov. 27:11) Ou aussi ou kapav montré ki ou ena confiance en Jéhovah kan ou faire seki droite.

Faire Bondié confiance kan nou faire face ar bann dimoune indifferent ek ar l’opposition

7. Ki bann l’epreuve Jérémie ti gagné, ek couma parfois li ti senti-li?

⁷ Beaucoup parmi nou bann frere servi dan bann territoire difficile. Prophete Jérémie ti servi dan enn l’environnement coumsa​—kan royaume Juda ti dan enn lepok difficile kot li ti pré pou detruire. Toulé-jour so la foi en Jéhovah ti testé parski li ti obeir Jéhovah ek li ti annonce So bann jugement. Ti arrivé ki mem Barouk, so secretaire ki ti fidele, ti plaigné tellement li ti decouragé. (Jér. 45:2, 3) Eski Jérémie ti baisse lé-bras a cause decouragement? Li vrai ki parfois li ti senti-li deprimé. Li ti dire: “Maudit sa jour ki mo’nn né-la!” ek li ti ajouté: “Kifer mo finn sorti dan ventre pou trouve travail dur ek chagrin, ek pou ki mo bann jour fini dan la honte?”​—Jér. 20:14, 15, 18.

8, 9. En accord avek Jérémie 17:7, 8, ek Psaume 1:1-3, ki nou bizin faire pou contigne rapporte bann bon fruit?

⁸ Pourtant, Jérémie pa ti baisse lé-bras. Li ti contigne ena confiance en Jéhovah. Resultat: sa prophete fidele-la ti trouvé par li-mem couma bann prop parole Jéhovah ki trouve dan Jérémie 17:7, 8, ti realisé: “Enn zom fort ki mette so confiance en Jéhovah ek ki’nn faire Jéhovah vinn so l’assurance, pou gagne benediction. Vrai-mem li pou vinn couma enn pié ki’nn planté pré kot de l’eau, ki envoye so bann racine pré kot sa de l’eau-la passé; li pa pou trouvé kan chaleur pou arrivé, mais li pou ena beaucoup feuillage, bien vert. Dan l’année kot pou ena la secheresse, li pa pou tracassé, ek li pa pou arrete rapporte fruit.”

⁹ Pareil couma enn pié fruit ki bien rapporté, “ki’nn planté pré kot de l’eau,” ou-soit ki dan enn verger ki bien arrosé, jamais Jérémie ti “arrete rapporte fruit.” Li pa ti laisse-li influencé par bann mauvais dimoune autour li, ki ti bouffonne li. Au contraire, li ti reste attaché ar la Source “de l’eau” ki donne la vie, ek li ti prend serieux tou seki Jéhovah ti dire li. (Lire Psaume 1:1-3; Jér. 20:9) Jérémie li vrai-mem enn bon l’exemple pou nou surtout pou bann ki pé servi Bondié dan bann territoire difficile! Si ou dan sa situation-la, contigne compte lor Jéhovah ki pou donne ou l’endurance pendant ki ou pé “faire declaration publik pou so nom.”​—Héb. 13:15.

10. Ki bann benediction nou gagné, ek ki nou bizin demann nou-mem?

¹⁰ Jéhovah finn donne nou beaucoup kitsoz ki pou aide nou faire face ar bann difficulté ki nou gagné dan nou la vie pendant sa lepok dernier jour ki nou pé vive-la. Parmi, sa bann kitsoz-la, Li finn donne nou so Parole en entier, ki pé traduire dan enn fason exact dan pli beaucoup langue encore. Par l’intermediaire l’esclave fidele et avisé, Li permette nou pou gagne nourriture spirituel en abondance dan ler ki bizin. Dan bann l’assemblée ek bann reunion, Li finn donne nou enn quantité frere ek soeur, bann compagnon ki soutenir nou. Eski ou pé profite bien tou sa bann disposition-la? Tou bann ki profite sa, “pou criyé dan la joie parski zot leker pou content.” Mais, bann ki pa ecoute Bondié “pou criyé parski zot leker pou dan la peine, ek zot pou criyé fort, parski zot l’esprit pou troublé.”​—Is. 65:13, 14.

Faire Bondié confiance kan nou gagne bann tracas

11, 12. A cause bann probleme ki ena dan le monde, ki conduite sage nou bizin ena?

¹¹ Pareil couma la Bible ti annoncé, pli allé, pli beaucoup malheur pé affecté bann dimoune. (Mat. 24:6-8; Rév. 12:12) Kan ena enn inondation, reflexe ki nou ena c’est pou galopé ek al dan enn place ki haute ou-soit al la-haut lor toit enn batiment​—n’importe ki place ki dan hauteur. Li pareil aussi kan bann probleme dan le monde augmenté, plusieurs million dimoune rod securité dan bann grand l’organisation financier, politik ou-soit religieux, ki parette bien stable, ek dan la science ek technologie. Mais okenn ladan pa donne enn vrai securité. (Jér. 17:5, 6) Parkont, bann serviteur Jéhovah zot, zot ena enn protection sur​—“sa grand Roche pou touletan-la.” (Is. 26:4) Enn psalmiste ti dire: “[Jéhovah] Li-mem mo grand roche ek mo Sauveur, mo hauteur ki sur.” (Lire Psaume 62:6-9.) Couma nou kapav faire sa grand Roche-la vinn enn refuge pou nou?

¹² Nou reste attaché ar Jéhovah kan nou prend compte so Parole, ki souvent al kont sagesse bann dimoune. (Ps. 73:23, 24) Par exemple, bann dimoune ki laisse sagesse humain influence zot kapav dire: ‘To ena zis enn sel la vie; profite li maximum.’ ‘Faire enn grand carriere.’ ‘Gagne beaucoup kass.’ ‘Acheté sa, acheté lot.’ ‘Voyagé; profite seki ena dan le monde.’ Parkont, sagesse Bondié li en accord avek sa conseil-la: “Laisse bann ki pé profite le monde, vinn couma bann ki pa pé profite tou seki ena ladan, parski scene sa le monde-la pé changé.” (1 Cor. 7:31) Jésus aussi ti conseil nou pou mette Royaume Bondié touletan en premier dan nou la vie ek coumsa nou pou ramasse “bann tresor dan le ciel,” kot zot pou vrai-mem en securité.​—Mat. 6:19, 20.

13. Kan nou reflechi lor 1 Jean 2:15-17, ki nou bizin demann nou-mem?

¹³ Eski ou l’attitude envers “le monde” ek “bann kitsoz ki ena dan le monde” montré ki ou ena enn confiance total en Bondié? (1 Jean 2:15-17) Eski bann benediction ki Jéhovah donne ou ek bann privilege ki ou ena dan so service ena plus valeur ek zot pli important pou ou ki bann kitsoz ki le monde offert? (Phil. 3:8) Eski ou faire tou seki ou kapav pou garde enn ‘lizié simple’? (Mat. 6:22) Bien sur, Bondié pa envie ki ou agir sans reflechi ou-soit ki ou pa prend ou responsabilité, surtout si ou ena enn famille pou occupé. (1 Tim. 5:8) Mais Li attann ki so bann serviteur ena full confiance en Li​—pa dan le monde Satan ki pé al mort.​—Héb. 13:5.

14-16. Ki bienfait certain finn gagné parski zot finn garde enn ‘lizié simple,’ ek zot finn mette Royaume Bondié en premier dan zot la vie?

¹⁴ Anou prend l’exemple Richard ek Ruth, bann parent ki ena trois jeune zenfant. Richard dire: “Mo leker ti pé dire moi ki mo ti kapav faire plus pou Jéhovah. Mo ti ena enn la vie confortable mais mo ti ena l’impression ki coumadir mo ti pé zis donne Bondié seki mo ti ena en plus. Apré ki mo ti prié lor sa sujet-la, ek reflechi lor seki sa ti pou coute nou, Ruth ek moi nou ti d’accord ki mo pou demann mo patron pou travail zis quatre jour par semaine​—mem si nou pays ti au milieu enn crise economik. Mo patron ti accepté, ek dan enn mois mo ti commence travail dapré mo nouveau programme.” Couma Richard senti-li zordi?

¹⁵ Li dire: “Mo gagne 20 pour cent moins kass ki avant, mais asterla mo ena 50 jour en plus par an ki mo kapav passé avek mo famille ek pou forme mo bann zenfant. Mo finn kapav doublé le temps ki mo passé dan predication, faire trois fois plus l’etude biblik, ek faire plus dan congregation. Ek parski mo ena plus le temps pou occupe bann zenfant, Ruth kapav faire pionnier auxiliaire de temps en temps. Mo bien decidé pou garde sa programme travail-la tant ki possible.”

¹⁶ Roy ek Petina, ki encore ena enn tifi ki reste ar zot, finn kapav diminué le temps ki zot ti passé dan zot travail, pou faire service a plein temps. Roy dire: “Mo travail trois jour par semaine, ek Petina travail deux jour. Ek aussi, nou finn demenagé, nou finn quitte enn lakaz pou al reste dan enn ti l’appartement, ki beaucoup pli facile pou occupé. Avant ki nou gagne nou garson ek nou tifi, nou ti pionnier, ek jamais nou finn perdi sa desir-la. Alors, kan nou bann zenfant finn grandi, nou ti retourne dan service a plein temps. Okenn somme l’argent pa vaut benediction ki nou finn gagné.”

Ki “la paix Bondié” protege zot leker

17. Couma la Bible finn reconforte ou alors ki ou pé vive dan enn le monde kot ou pa koné ki kapav arrivé demain?

¹⁷ Personne parmi nou pa koné ki pou arrivé demain, parski nou tou nou passe par “bann moment ek bann situation ki [nou] pa attann.” (Eccl. 9:11) Selman, fodé pa ki, parski nou pa koné ki pou arrivé demain, sa empeche nou pou ena la paix l’esprit zordi. Souvent, c’est seki arrive bann ki pa senti-zot en securité parski zot pena bann bon relation avek Bondié. (Mat. 6:34) L’apotre Paul ti ecrire: “Pa tracassé pou okenn kitsoz, mais dan tou kitsoz, par la priere, supplication avek bann remerciement, demann Bondié seki zot bizin; ek la paix Bondié ki depasse tou pensée, pou protege zot leker ek zot l’esprit, par moyen Christ Jésus.”​—Phil. 4:6, 7.

18, 19. Cite bann fason couma Bondié reconforte nou. Donne enn l’exemple.

¹⁸ Beaucoup frere ek soeur ki dan bann situation difficile finn ressenti enn calme ek la paix ki Jéhovah inn donne zot. Enn soeur dire: “Enn docteur plusieurs fois ti essaye mette pression lor moi pou mo accepté enn transfusion di-sang. Premier kitsoz ki li ti dire moi, sans mem dire moi bonjour, c’est: ‘Ki sa zistoire pa mette di-sang-la sa?’ Dan sa moment-la ek dan lezot moment, mo ti prié Jéhovah en silence, ek mo ti senti so la paix. Mo ti senti-moi fort couma enn roche. Malgré ki mo ti faible parski mo di-sang ti bas, mo ti reussi donne enn explication biblik bien clair lor mo position.”

¹⁹ Parfois Bondié kapav donne nou l’encouragement ki nou bizin par enn frere ou-soit enn soeur, ou-soit par la nourriture spirituel ki vinn dan bon moment. Surement ou finn deja tann enn frere ou-soit enn soeur dire: “Sa-mem ki mo ti bizin. Finn ecrire sa lartik-la zis pou moi!” Oui, dan n’importe ki situation nou été ou-soit n’importe ki kitsoz nou bizin, Jéhovah pou montré so l’amour envers nou si nou ena confiance en Li. Apré tou, nou so bann “brebis” ek Li finn mette so nom lor nou.​—Ps. 100:3; Jean 10:16; Actes 15:14, 17.

20. Kifer bann serviteur Jéhovah pou reste en securité kan le monde Satan pou detruire?

²⁰ Pendant “jour grand colere Jéhovah” ki pé vini vite-vite, tou bann kitsoz ki le monde Satan faire confiance, pou detruire. L’or, l’argent, ek lezot kitsoz ki ena valeur pa pou donne okenn securité. (Tseph. 1:18; Prov. 11:4) Sel refuge ki nou pou ena c’est Jéhovah, “sa grand Roche pou touletan-la.” (Is. 26:4) Alors, anou montré ki nou ena enn confiance total en Jéhovah asterla, kan nou obeir so bann principe ki juste, kan nou preche message lor so Royaume malgré ki nou bizin faire face ar bann dimoune ki indifferent ou-soit ar l’opposition, ek kan nou mette tou nou tracas lor Li. Kan nou pou faire sa bann kitsoz-la, nou pou vrai-mem “reste en securité ek [nou] pou vive trankil sans ki [nou] peur okenn malheur.”​—Prov. 1:33.

[Note]

Eski ou kapav expliké?

Couma nou kapav faire Bondié confiance

• kan nou tenté pou faire le mal?

• kan nou faire face ar bann dimoune indifferent ou-soit ar l’opposition?

• kan nou gagne bann tracas?

[Zimage page 15]

Kan nou reste attaché ar bann principe Bondié, sa faire nou heureux

[Zimage page 17]

“Jéhovah Li-mem sa grand Roche pou touletan-la”