Wi, U Kapav Krwar ki Later Pu Vinn enn Paradi

TUTLONG listwar, buku dimunn finn krwar ki enn zur zot pu kit later ek zot pu al res dan lesyel. Sertin panse ki nu Kreater zame ti ena lintansyon pu fer nu res tuletan lor later. Bann ascètes zot, zot al ankor pli lwin dan zot rezonnman. Buku parmi zot panse ki later ek seki materyel, zot move. Zot panse ki sa bann kitsoz-la, zot enn baryer ki anpes zot ena enn bon spirityalite ek vinn pros ar Bondye.

Bann dimunn ki devlop sa bann lide-la, swa zot pa kone ki Bondye finn dir konsernan Paradi lor later, uswa zot inyor sa volonterman. Avredir, zordi, enn kantite dimunn pa interese pu egzaminn seki Bondye finn fer bann dimunn ekrir lor sa size-la dan so Parol Labib. (2 Timote 3:16, 17) Me, eski li pa saz ki nu fer Parol Bondye konfyans olye ki nu adopte lide bann dimunn? (Romin 3:4) Dayer, li byin inportan ki nu fer Parol Bondye konfyans. Kifer? Parski li averti nu ki enn move kreatir pwisan ek invizib finn avegle bann dimunn lor plan spirityel ek asterla li pe “met [zot] dan lerer.”—Revelasyon 12:9; 2 Korintyin 4:4.

Kifer Eski Ena Sa Konfizyon-La?

Bann lide kontradiktwar lor nam, finn met dimunn dan konfizyon konsernan proze Bondye pu later. Buku krwar ki nu ena enn nam imortel, ki separe ar lekor imin ek ki kontiyn viv apre lamor. Lezot krwar ki nam ti egziste avan kreasyon lekor imin. Enn liv dir ki filozof Grek Platon ti panse ki nam “li anprizone dan lekor imin akoz bann pese ki li’nn fer kan li ti dan lesyel.” Pareyman, Origène, enn teolozyin dan trwazyem syek, ti dir ki “bann nam finn fer pese [dan lesyel] avan ki zot rant dan enn lekor” ek zot “anprizone dan sa lekor-la lor later akoz zot bann pese.” Ek buku lezot dimunn krwar ki later li sinpleman enn landrwa kot dimunn fer enn sezur difisil avan zot al dan lesyel.

Ena usi enn kantite lopinyon lor seki ariv nam kan enn dimunn mor. Dapre liv Histoire de la philosophie occidentale, bann Ezipsyin ti devlop lide ki “bann dimunn mor desann dan lemond suterin.” Me plitar, bann filozof, finn kontredir sa lide-la. Zot dir ki an realite bann mor mont lao dan enn domenn spirityel. Dapre sertin temwaynaz, Socrate, enn filozof Grek, ti krwar ki kan enn dimunn mor “so nam al dan enn landrwa invizib . . . ek li pas leres so legzistans avek bann bondye.”

Ki Labib Dir?

Okenn par dan Parol Bondye Labib, li pa dir ki bann dimunn ena enn nam imortel. Lir Zenez 2:7 pu umem. Li dir: “Bondye Zeova finn kumans form zom avek lapusyer ki sorti dan later, li finn sufle lesuf lavi dan so nene, ek zom-la finn vinn enn nam vivan.” Sa bann parol-la byin kler; pa difisil pu konpran. Kan Bondye ti kre premye zom, Adan, Li pa’nn met nanyin ki resanble enn lespri dan li. Non, parski Labib dir ki Adan “finn vinn enn nam vivan.” Pa ti ena enn nam dan li; Limem li ti enn nam.

Kan Zeova ti kre later ek bann dimunn, zame Li ti ena lintansyon ki dimunn mor. Okontrer, dapre so proze, tu dimunn ti pu viv pu tuletan lor later dan enn Paradi. Si Adan finn mor se parski li ti dezobeir lalwa Bondye. (Zenez 2:8, 15-17; 3:1-6; Izai 45:18) Kan premye zom finn mor, eski li finn al dan kit domenn spirityel? Non! Nam, setadir Adan limem, finn revinn lapusyer ar ki li ti’nn kre.—Zenez 3:17-19.

Nu tu nu finn erit pese ek lamor ar nu anset Adan. (Romin 5:12) Kan nu mor nu aret egziste, parey kuma Adan. (Psom 146:3, 4) Dayer, dan okenn so 66 liv, Labib pa asosye “imortel” uswa “eternel” avek mo “nam.” Okontrer, Labib montre klerman ki nam, setadir dimunn-la, li mortel. Wi, nam mor.—Eklezyast 9:5, 10; Ezekyel 18:4.

Eski Tu Seki Materyel Move?

Eski vremem later ek tu kitsoz materyel, move, kuma sertin pretann? Sa se lopinyon bann disip Manichéisme, enn muvman relizye ki ti fonde an Perse pandan trwazyem syek N.L., par enn dimunn ki apel Mani. The New Encyclopaedia Britannica dir: “Manichéisme finn devlope apartir langwas ki bann imin finn erite.” Mani ti krwar ki lavi enn imin “pa natirel, li insiportab, ek li pa bon ditu.” Alor, selon li, sel mwayin pu sap dan sa ‘langwas-la’ se ki nam-la bizin sorti dan lekor kot li ete, kit later ek reysi al viv dan lemond spirityel.

Me Labib dir tulekontrer. Li dir ki kan Bondye ti kre later ek bann dimunn lor later, Li ti truve ki “tu seki Li ti fer ti byin bon.” (Zenez 1:31) Sa lepok-la pa ti ena okenn baryer ant bann dimunn ek Bondye. Adan ek Ev ti ena enn bon relasyon avek Zeova, parey kuma Zezi Kris, zom parfe ki ti ena enn relasyon byin intim avek so Papa.—Matye 3:17.

Si nu premye paran, Adan ek Ev, pa ti pese, zot ti pu kontiyn ena enn bon relasyon avek Bondye Zeova pu tuletan dan enn paradi lor later. Zot ti kumans zot lavi dan enn Paradi. Se seki Labib dir nu: “Anplis, Bondye Zeova finn plant enn zardin an Edenn, ver les, ek se laba ki Li’nn plas zom ki Li ti forme.” (Zenez 2:8) Se dan sa Paradi-la mem ki Ev usi ti’nn kre. Si Adan ek Ev pa ti pese, zot ek zot desandans parfe ti pu kapav travay ansam dan lazwa ziska ki later antye vinn enn paradi. (Zenez 2:21; 3:23, 24) Se lor sa later transforme an Paradi-la ki limanite ti pu reste pu tuletan.

Kifer Eski Sertin Al dan Lesyel?

Me u kapav dir: ‘Be, eski Labib pa koz lor bann dimunn ki pu al dan lesyel?’ Wi. Apre ki Adan finn pese, Zeova finn pran dispozisyon pu etabli enn Rwayom ki truv dan lesyel. Dan sa Rwayom-la, sertin desandan Adan pu “reyn kuma bann le rwa lor later” ansam avek Zezi Kris. (Revelasyon 5:10; Romin 8:17) Zot pu resisite pu gayn lavi imortel dan lesyel. Antu zot 144,000, ek bann premye manb sa grup dimunn-la ti bann fidel disip Zezi dan premye syek.—Lik 12:32; 1 Korintyin 15:42-44; Revelasyon 14:1-5.

Me okumansman, Bondye zame ti ena lintansyon ki bann dimunn drwat kit later pu al res dan lesyel. Dayer, kan Zezi ti lor later, li ti dir: “Personn pa finn mont dan lesyel apart sa kikenn ki finn desann depi dan lesyel-la, setadir Fils de l’homme.” (Zan 3:13) Atraver “Fils de l’homme,” setadir Zezi Kris, Bondye finn furni enn ranson. Grasa sa ranson-la tu bann dimunn ki ena lafwa dan sakrifis Zezi, kapav gayn lavi pu tuletan. (Romin 5:8) Me kot sa tu sa bann dimunn-la pu viv pu tuletan?

Bondye Realiz Proze Ki Li Ti Ena Okumansman

Li vre ki Bondye finn prevwar pu fer enn grup imin reyni ansam avek Zezi Kris dan so Rwayom. Me sa pa vedir ki tu bon dimunn pu al dan lesyel. Zeova ti kre later pu li vinn enn Paradi kot tu dimunn kapav reste. Tre byinto, Bondye pu realiz so proze ki Li ti ena okumansman.—Matye 6:9, 10.

Kan Zezi Kris ek so bann asosye pu reyne, pu ena lape ek boner lor later antye. (Psom 37:9-11) Bondye pu resisit tu bann ki dan so memwar ek zot pu ena enn la sante parfe. (Akt 24:15) Grasa zot fidelite, bann dimunn obeisan pu gayn seki nu premye paran finn perdi. Zot pu viv pu tuletan kuma bann imin parfe lor enn later ki pu transforme an enn paradi.—Revelasyon 21:3, 4.

Zeova tuletan reysi akonpli seki Li deside. Atraver so profet Izai, Li ti dir: “Parey kuma gro lapli ek lanez desann depi dan lesyel, ek li pa returne san ki li’nn byin muy later ek fer li prodir ek zerme, ek san ki [li] donn planter so la grin ek sa kikenn ki manze-la so dipin, li parey pu parol ki sorti dan mo labus. Li pa pu return ar mwa san rezilta, me li pu vremem realiz sa kitsoz ki mo finn kontan-la, ek vremem li pu reysi dan sa kitsoz ki mo finn avoy li-la.”—Izai 55:10, 11.

Liv Labib Izai donn nu enn avangu kuma lavi pu ete dan Paradi lor later. Personn dan Paradi pa pu dir: “Mo malad.” (Izai 33:24) Bann zanimo pa pu enn danze pu bann dimunn. (Izai 11:6-9) Bann dimunn pu ranz bann zoli lakaz ek zot pu res ladan. Zot pu plante ek zot pu manze leker kontan. (Izai 65:21-25) Anplis, Bondye “pu exterminn lamor pu tuletan ek vremem Suverin Senyer Zeova pu suy tu larm lor tu bann figir.”—Izai 25:8.

Byinto, tu bann dimunn ki obeir, pu viv dan sa bann bon kondisyon-la. Zot “pu libere ar lesklavaz pese ek zot pu konn liberte extraordiner ki zis bann zanfan Bondye kone.” (Romin 8:21) Wi, li pu extraordiner pu viv pu tuletan lor sa later ki pu transforme an Paradi-la! (Lik 23:43) U’si u pu kapav viv dan sa Paradi-la si asterla mem u met an pratik konesans egzak ki truv dan Labib ek si u egzers lafwa an Bondye Zeova ek Zezi Kris. Asterla, u kapav sir ki li lozik pu krwar ki pu ena enn paradi lor later.

[Zimage page 5]

Bondye ti kre Adan ek Ev pu viv pu tuletan dan Paradi lor later

[Zimage page 6]

Dan Paradi lor later . . .

zot pu ranz bann lakaz

zot pu fer bann plantasyon rezin

zot pu gayn benediksyon Zeova

[Zimage page 3]

U.S. Fish & Wildlife Service, Washington, D.C./NASA