Kifer la vie parette pena sens?

KIFER ou bizin croire ki enn jour la vie pou plus ki zis enn “ti periode dan nou l’existence kot” nou passé “couma enn l’ombrage,” pareil couma le roi Salomon ti dire? (Ecclésiaste 6:12, The New English Bible) La Bible, Parole ki Bondié inn inspiré​—enn livre ki donne bann renseignement ki nou kapav faire confiance​—promette ki la vie dan l’avenir pou ena enn vrai sens.​—2 Timothée 3:16, 17.

La Bible faire nou koné ki projet Bondié ti ena pou la terre au commencement. Li explik nou aussi kifer le monde rempli avek l’injustice, bann dimoune ki faire dominere ek la souffrance. Kifer li important ki nou comprend sa bann kitsoz-la? Parski raison principal kifer dimoune croire ki la vie pena okenn sens, c’est a cause zot pa konn​—ou-soit zot prefere ignore​—projet ki Bondié ena pou la terre ek pou bann dimoune ki vive lor la.

Ki projet Bondié ena pou la terre?

Jéhovaha ti faire la terre pou ki li vinn enn paradis parfait, kot bann dimoune ti pou kapav resté​—enn place kot bann zom ek bann femme ti pou ena enn la vie parfait ek rempli ar satisfaction pou touletan. Sa verité bien important-la dementi enn l’idée ki beaucoup dimoune accepté, mais ki pena okenn fondement dan la Bible. Beaucoup dimoune croire ki la terre, c’est enn place kot Bondié testé bann dimoune pou koné si zot merité gagne enn la vie ki ena plus sens dan le monde bann l’esprit.​—Guette l’encadré “Eski nou bizin quitte la terre pou ena enn la vie ki ena enn sens?” lor page 6.

Bondié ti crée bann zom ek bann femme dan so ressemblance. Li ti donne zot capacité pou imite so bann qualité extraordinaire. (Genèse 1:26, 27) Li ti crée zot parfait. Zot ti ena tou seki zot ti bizin pou amenn enn la vie bien rempli ek ki ena enn sens, pou touletan. Sa vedir ki zot ti pou rempli la terre ek controle li. Zot ti pou aussi transforme la terre entier pou faire li vinn enn paradis couma jardin Éden.​—Genèse 1:28-31; 2:8, 9.

Ki finn arrivé?

Li clair ki finn ena enn kitsoz ki’nn mal passé. L’humanité en general pa pé reflete bien bann qualité Bondié. La terre pa enn paradis ditou. Ki finn arrivé? Nou bann premier parent, Adam ek Ève, pa finn servi bien zot liberté pou choisir. Zot ti envie “vinn couma Bondié,” decidé par zot-mem “seki bon ek seki pa bon.” Kan zot ti faire sa, zot ti faire pareil couma Satan le Diable ki ti rebellé li aussi.​—Genèse 3:1-6.

Alors, le mal pa enn mystere, li pa forme partie dan enn plan ki Bondié inn fini decidé a l’avance. Le mal ti commence existé kan Satan​—ek plitar Adam ek Ève​—ti rebellé kont domination Bondié. A cause zot rebellion, nou bann premier parent ti perdi Paradis ek perfection, zot ti amenn peché ek la mort pa zis lor zot tousel, mais aussi lor zot descendant setadir, tou bann dimoune lor la terre. (Genèse 3:17-19; Romains 5:12) C’est a cause sa-mem ki ena bann condition ek bann situation ki faire la vie parette pena sens.

Kifer pa ti arrete le mal desuite?

Certain dimoune demann zot-mem: ’Kifer desuite Bondié pa ti detruire Satan ek bann lezot rebelle ek coumsa arrete le mal ek recommence tou?’ Eski sa ti pou vrai-mem sage? Couma ou ti pou reagir si ou tann dire ki enn gouvernement bien puissant touye desuite tou dimoune ki mette en doute son l’autorité? Eski sa pa ti pou eloigne tou dimoune ki ena l’esprit ouvert? Eski sa gouvernement-la ti pou enn l’exemple en rapport avek seki bon ek seki mauvais?

Bondié ti choisir pou pa detruire sa bann rebelle-la desuite. Avek sagesse, li ti laisse le temps passé pou ki bann question ki ti soulevé en Éden en rapport avek so fason dirigé, kapav reglé enn fois pou tou.

Le mal disparette

Ena enn kitsoz bien important ki nou bizin rappel: Bondié finn permette ki le mal existé zis pou enn le temps limité. Li finn permette sa, parski Li koné ki, apré ki Li pou’nn fini reglé bann question ki ti soulevé en rapport avek so fason dirigé, Li pou kapav repare tou bann mauvais degat ki le mal finn faire.

Bondié pa finn abandonne so projet pou la terre ek pou bann dimoune. Par so prophete Isaïe, Jéhovah donne nou l’assurance ki c’est Li-mem ki finn faire la terre, Li “pa finn crée li pou nanyin, mais [Li] finn forme li pou ki dimoune reste lor la.” (Isaïe 45:18) Dan enn tigit le temps encore, Jéhovah pou commence faire la terre retourne dan enn l’etat parfait, dapré projet ki Li ti ena au commencement. Li pou bien clair ki fason ki Jéhovah dirigé, li juste. Alors, Li pou ena tou droit pou servi so grand pouvoir pou applik so volonté ek detruire net le mal ki existé. (Isaïe 55:10, 11) Dan la priere modele, Jésus Christ ti demann Bondié pou faire sa. Jésus ti montré nou pou faire sa la priere-la: “Ki to volonté faire lor la terre pareil couma dan le ciel.” (Matthieu 6:9, 10) Ki sa impliké?

Volonté Bondié pou la terre

Enn parmi so volonté c’est ki, ’bann ki ena l’humilité herite la terre.’ (Psaume 37:9-11, 29; Proverbes 2:21, 22) Jésus Christ pou “sap sa dimoune misere ki criyé au secours-la ek aussi sa dimoune ki dan grand chagrin-la.” Li pou delivré zot “ar bann ki pé faire dominere ar zot ek li pou tire zot nâme dan violence.” (Psaume 72:12-14) Pou nepli ena la guerre, ni la mort, ni larme, ni douleur, ni souffrance. (Psaume 46:9; Révélation 21:1-4) Sa quantité dimoune ki finn mort pendant le temps ki Bondié finn tolere le mal-la, pou ressuscité ici-mem lor la terre. Zot pou kapav profite sa bann benediction-la ek lezot encore.​—Jean 5:28, 29.

Jéhovah pou repare tou di-tort ki rebellion Satan finn faire. Li pou repare tellement bien sa situation-la ki “nou pou vrai-mem blié tou bann malheur ki nou finn gagné avant [tou kitsoz ki pé faire nou souffert zordi].” (Isaïe 65:16-19) Nou ena garantie ki sa pou arrivé. Bondié pa koz menti. Tou so bann promesse realisé. Nou nepli pou ressenti enn “vide” dan nou la vie ek nou nepli pou “galope derriere di-vent.” (Ecclésiaste 2:17, The New English Bible) Au contraire, la vie pou ena enn vrai sens.

Mais ki nou kapav dire pou asterla? Kan ou konn seki la Bible enseigné ek ou comprend projet Bondié pou la terre, eski sa kapav faire ou la vie ena enn vrai sens zordi? Dernier lartik dan sa serie-la pou reponn sa question-la.

[Note]

[L’encadré page 6]

Eski nou bizin quitte la terre pou ena enn la vie ki ena enn sens?

Pendant plusieurs siecle, bann dimoune ki pena okenn connaissance lor projet ki Bondié ena pou la terre, finn enseigné ki nou bizin quitte la terre avant ki nou kapav profite enn l’existence ki ena vrai-mem enn sens.

Certain dire ki bann nâme ti “ena enn pli bon la vie avant ki zot rente dan lekor bann dimoune.” (New Dictionary of Theology) Lezot dire ki nâme ti “emprisonné dan lekor [enn dimoune] couma enn punition pou bann peché ki li ti faire kan li ti dan le ciel.”​—Cyclopedia of Biblical, Theological, and Ecclesiastical Literature.

Bann philosophe grec, pareil couma Socrate ek Platon, ti enseigne sa l’idée-la: c’est selman kan nâme reussi sorti en dehors limite lekor enn dimoune ki li pou “liberé ar so bann deplacement, so bann folie, so bann la peur, so bann mauvais desir ek tou bann mauvais kitsoz ki affecté bann dimoune” ek li al reste “avek bann bondié pou tou le temps ki pou vini.”​—Plato’s Phaedo, 81, A.

Plitar, bann soi-disant chef religieux chretien ti ajoute dan zot l’enseignement seki bann philosophe grec ti “croire concernant l’immortalité nâme.”​—Histoire universelle du christianisme (en anglais).

Compare sa bann l’idée-la ar trois verité bien important ki ena dan la Bible:

1. Projet ki Bondié ti ena, c’est ki la terre vinn enn place kot tou bann dimoune resté pou touletan, pa enn place temporaire kot Li testé bann dimoune pou guetté si zot merité pou vive avek Li dan le ciel. Si Adam ek Ève ti obeir la loi Bondié, zot ti pou encore vivant dan enn paradis lor la terre.​—Genèse 1:27, 28; Psaume 115:16.

2. Alors ki la plupart religion enseigné ki dimoune ena enn nâme​—enn kitsoz invisible ki reste dan li​—seki la Bible enseigné li pli simple. Enn dimoune li-mem li “enn nâme vivant” ki’nn formé avek “la poussiere la terre.” (Genèse 2:7) La Bible jamais pa decrire sa nâme-la couma enn kitsoz ki pa mort. Li dire ki kapav touye nâme ou-soit detruire li, li kapav arrete existé. (Psaume 146:4; Ecclésiaste 9:5, 10; Ézékiel 18:4, 20) Premier nâme, Adam, ti mort ek li ti retourne dan la poussiere ki Bondié ti servi pou crée li. Li ti retourne dan enn l’etat kot li nepli existé.​—Genèse 2:17; 3:19.

3. L’avenir bann dimoune depann lor promesse Bondié pou ressuscite bann dimoune mort ek faire zot vive dan enn paradis lor la terre. Sa pa depann si nou ena enn nâme immortel ki quitte nou pou al vive dan le monde bann l’esprit.​—Daniel 12:13; Jean 11:24-26; Actes 24:15.