Montre ki Zot Inn Pare pu Zur Jéhovah

“Montre ki zot inn pare, parski se dan enn ler ki zot pa atann, ki Fils de l’homme pe vini.”—MATTHIEU 24:44.

1. Kifer nu bizin pran kont zur Jéhovah?

GRAN zur Jéhovah pu enn zur lager ek koler, freyer ek detres, nwarte ek dezolasyon. Wi, nu sir ki “gran zur Jéhovah” pu vini, pu detrir sa lemond move-la, parey kuma Déluge ti inond lemond move dan lepok Noé! Pena bare, li pu vini! Selman, “tu seki invok non Jéhovah pu reysi sape.” (Yoël 2:30-32; Amos 5:18-20) Bondye pu detrir so bann lennmi ek pu sov so pep. Konsyan ki sa zur-la deryer laport, profet Tsephania dir: “Gran Zur Jéhovah byin pre. Li pre, ek li pe vini vit-vit.” (Tsephania 1:14) Kan donk, eski pu ena sa zizman-la?

2, 3. Kifer eski li inportan ki nu prepar nu pu zur Jéhovah?

² Jésus ti dir: “An seki konsern sa zur-la ek sa ler-la, personn pa kone, ni bann anz dan lesyel, ni le Fils, me zis le Père.” (Matthieu 24:36) Etandone ki nu pa konn ler presi ki sa zur-la pu vini, li inportan ki nu pran aker bann parol dan tex-de-lane 2004. Sa tex-la dir: “Kontiyn veye . . . Montre ki zot inn pare.”—Matthieu 24:42, 44.

³ Pu montre kuma enn sel kut pu rasanble an sekirite bann dimunn ki’nn pare, alor ki pu abandonn lezot, Jésus ti dir: “De zom pu dan karo: pu pran enn ek pu abandonn lot-la; de fam pu kraz la grin dan mulin: pu pran enn ek pu abandonn lot-la.” (Matthieu 24:40, 41) Dan sa moman kritik-la, dan ki sityasyon nu pu ete personelman? Eski nu pu’nn pare, uswa eski kan sa zur-la pu vini, li pu enn sirpriz pu nu? Tu depann lor preparasyon ki nu pe fer asterla. Pu montre ki nu pre pu zur Jéhovah, nu bizin rezet enn sertenn latitid ki byin komin zordi. Nu bizin usi fer atansyon pu pa tom dan enn sertenn kondisyon spirityel byin partikilye, ek nu bizin rezet sertin fason viv.

Pa Vinn Indiferan

4. Ki latitid bann dimunn dan lepok Noé ti ena?

⁴ Anu gete seki ti pase dan lepok Noé? La Bib dir : “Apre ki Bondye ti averti Noé lor bann kitsoz ki pa ti ankor arive, par lafwa, li ti montre la krint pu Bondye ek li ti konstrir enn lars pu sov so fami.” (Hébreux 11:7) Sa lars-la ti pu enn kitsoz drol pu bann dimunn, ek li ti pu vizib pu zot tu. Anplis, Noé ti “enn predikater la zistis.” (2 Pierre 2:5) Me, ni seki Noé ti pe konstrir, ni so predikasyon, pa ti fer dimunn sanz zot lavi. Kifer? Parski zot “ti pe manze-bwar, bann zom ti pe marye, ek ti pe donn bann fam an maryaz.” Bann dimunn avek ki Noé ti pe prese ti telman okipe avek zot zafer personel ek bann plezir, ki “zot pa finn pran kont, ziska ki déluge finn vini ek finn balye zot tu.”—Matthieu 24:38, 39.

5. Kuma bann abitan Sodome ti ete dan lepok Lot?

⁵ Li ti parey dan lepok Lot. La Bib dir nu: “Zot ti pe manze, zot ti pe bwar, zot ti pe aste, zot ti pe vande, zot ti pe plante, zot ti pe konstrir. Me zur ki Lot ti sorti dan Sodome, enn lapli dife ek suf ti sorti dan lesyel, ek sa ti tuy zot tu.” (Luc 17:28, 29) Apre ki bann anz ti’nn averti Lot ki enn destriksyon pe vini, li ti al fer so bann zann kone seki ti pu arive. Me pu zot, Lot ti paret kuma enn “kikenn ki pe badine.”—Genèse 19:14.

6. Ki latitid nu bizin rezete?

⁶ Jésus ti dir ki, parey kuma sityasyon ti ete dan lepok Noé ek Lot, li pu parey pandan “prezans Fils de l’homme.” (Matthieu 24:39; Luc 17:30) Ek vremem, zordi buku dimunn indiferan. Nu bizin fer atansyon ki nu pa les nu inflyanse par enn tel latitid. Pena nanyin de mal pu profit enn bon repa ek bwar avek moderasyon. Li parey usi pu maryaz, se enn laranzman ki Bondye inn etabli. Me selman, si sa bann zafer-la inn vinn enn priorite dan nu lavi, ek ki nu finn kumans negliz bann kitsoz spirityel, eski nu pu kapav dir ki personelman nu pre pu gran zur Jéhovah?

7. Ki kestyon inportan nu bizin poz nu avan ki nu antrepran ninport ki proze, ek kifer?

⁷ Lapot Paul dir ki “res byin tigit letan.” Li ti azute: “Asterla, bann ki ena madam bizin fer kumadir zot pena madam.” (1 Corinthiens 7:29-31) Nu res zis enn tigit letan pu pres la bonn nuvel lor Rwayom Bondye. (Matthieu 24:14) Paul konsey mem bann ki marye pu pa konsakre tu zot letan avek zot konzwin, opwin ki Rwayom Bondye okip dezyem plas dan zot lavi. Li kler alor ki Paul pa ti pe ankuraz enn latitid indiferan. Jésus ti dir: “Donk, avan tu kitsoz, kontiyn rod le rwayom ek la zistis [Bondye].” (Matthieu 6:33) Fas ar ninport ki desizyon, uswa proze ki nu ena, enn kestyon inportan ki nu bizin poz nu se: ‘Eski sa pu permet mwa gard Rwayom Bondye an premye dan mo lavi?’

8. Ki nu bizin fer si bann lokipasyon ki nu fer tulezur finn vinn nu priorite?

⁸ Me asterla, ki nu pu fer si la deza nu telman absorbe par nu bann lokipasyon, ki nu nepli gayn letan pu bann kitsoz spirityel? Demann numem: ‘Eski ena zis enn ti diferans mem ant nu manyer viv ek manyer viv nu bann vwazin, ki pena la konesans egzak ek ki pa pres Rwayom Bondye?’ Si wi, alor nu bizin priye lor la. Jéhovah kapav ed nu pu ena latitid ki bizin. (Romains 15:5; Philippiens 3:15) Li kapav ed nu pu met bann kitsoz spirityel an premye dan nu lavi, pu fer seki bon, ek pu ranpli nu lobligasyon anver Li.—Romains 12:2; 2 Corinthiens 13:7.

Lit Kont Somey Spirityel

9. Dapre Révélation 16:14-16, kifer li inportan ki nu lit kont somey spirityel?

⁹ Profesi ki koz lor Harmaguédôn, “lager gran zur Bondye Tout-Puissant,” ki pe aprose, averti nu ki sertin pa pu res lor zot gard. Jésus dir: “Gete! mo pe vini kuma enn voler. Ere enn kikenn ki res lor so gard ek ki gard so manto san mans, pu ki li pa mars tuni ek dimunn pa get so laont.” (Révélation 16:14-16) Manto san mans ki mansyone isi, se seki idantifye nu kuma bann Kretyin, Temwin de Jéhovah. Sa inplik nu predikasyon ek nu kondwit Kretyin. Si, tigit par tigit, nu kumans asupi lor plan spirityel, nu riske perdi nu idantite Kretyin. Si sa arive, li pu enn laont ek enn danze pu nu. Nu bizin fer tu pu lit kont somey spirityel. Me, kuma nu kapav fer sa?

10. Kifer si nu lir la Bib tulezur, sa pu ed nu res spirityelman lor nu gard?

¹⁰ La Bib suvan montre linportans pu res lor nu gard ek gard nu bon zizman. Par egzanp, nu truv sa bann rapel-la dan bann Évangile: “Kontiyn veye” (Matthieu 24:42; 25:13; Marc 13:35, 37); “montre ki zot inn pare” (Matthieu 24:44); “kontiyn gete, res lor zot gard” (Marc 13:33); “prepar zot” (Luc 12:40). Apre ki lapot Paul ti dir ki zur Jéhovah pu vini dan enn ler ki personn pa atann, li ti ankuraz so bann konpaynon Kretyin par sa bann parol-la: “Fode pa ki nu dormi kuma lezot pe fer, me fode ki nu res lor nu gard ek ki nu gard nu bon zizman.” (1 Thessaloniciens 5:6) Dan dernye liv la Bib, Jésus Christ, apre ki li’nn glorifye, ti montre ki li pu vini, enn kut san ki nu atann. Li ti dir: “Mo pe vinn vit.” (Révélation 3:11; 22:7, 12, 20) Buku profet Hébreux usi ti donn bann deskripsyon ek bann lavertisman lor gran zur Jéhovah. (Isaïe 2:12, 17; Jérémie 30:7; Yoël 2:11; Tsephania 3:8) Si nu lir Parol Bondye, la Bib, tulezur ek nu medit lor seki nu lir, sa pu ed nu buku pu res lor nu gard spirityelman.

11. Kifer letid personel la Bib, li inportan pu nu res spirityelman lor nu gard?

¹¹ Wi, si nu etidye la Bib seryezman avek led bann piblikasyon ki “lesklav fidel ek avize” donn nu, sa pu insit nu pu res spirityelman lor nu gard! (Matthieu 24:45-47) Me, pu ki nu tir profi ar nu letid personel, nu bizin ena enn swivi ek nu bizin avanse dan nu letid. (Hébreux 5:14–6:3) Nu bizin absorb regilyerman enn nuritir spirityel solid. Dan sa lepok ki nu pe viv-la, li kapav byin difisil pu truv letan pu nu letid personel. (Éphésiens 5:15, 16) Me, li pa sifi ki nu lir la Bib ek bann piblikasyon Biblik, zis kan nu gayn letan. Si nu anvi res “for dan lafwa” ek res spirityelman lor nu gard, li inportan ki nu fer nu letid personel regilyerman.—Tite 1:13.

12. Kuma reynion ek lasanble ed nu pu lit kont somey spirityel?

¹² Bann reynion ek bann lasanble usi, ed nu pu lit kont somey spirityel. Kuma? Grasa lanseynman ki nu gayne. Eski pandan sa bann rasanbleman-la, nu pa gayn regilyerman bann rapel ki zur Jéhovah byin pre? Sertennman! Kan nu asiste reynion tulesemenn, nu gayn usi lokazyon pu montre nu ‘lamur ek pu fer bann bon aksyon.’ Se grasa sa bann lankurazman-la ki nu kapav res spirityelman lor nu gard. Se pu sa rezon-la ki nu’nn gayn lord pu rasanble regilyerman, amezir ki nu “truv sa zur-la pe aprose.”—Hébreux 10:24, 25.

13. Kuma eski nu minister ed nu pu res spirityelman lor nu gard?

¹³ Enn lot kitsoz ki ed nu pu res lor nu gard, se kan nu partisip dan minister Kretyin avek tu nu leker. Pena pli bon mwayin pu ed nu pran kont bann siyn ki pe realize dan nu lepok ek zot sinifikasyon, ki kan nu koz sa avek lezot. Ek kan nu truv bann dimunn ki etidye la Bib avek nu, fer progre ek kumans aplik seki zot pe aprann, nu pran ankor plis konsyans ki la fin pre. Lapot Pierre ti dir: “Prepar zot lespri pu azir, gard zot bon zizman enn fason konple.” (1 Pierre 1:13) Kan nu ena “buku pu fer dan travay le Senyer,” se enn bon remed kont lindiferans spirityel.—1 Corinthiens 15:58.

Rezet enn Fason-de-Viv Ki Pu Fer Nu Spirityalite Ditor

14. Dapre Luc 21:34-36, kont ki fason-de-viv, Jésus ti met nu an gard?

¹⁴ Dan gran profesi ki Jésus ti done lor siyn so prezans, li ti donn ankor enn lot lavertisman. Li ti dir: “Fer atansyon ar zotmem, pu ki zot leker pa vinn lur avek enn lekse manze ek bwar ek traka dan lavi; lerla enn kut sa zur-la vinn lor zot kuma enn pyez. Parski li pu vinn lor tu bann ki res lor later. Donk, res lor zot gard, fer tuletan bann siplikasyon pu ki zot reysi sape kan tu sa bann kitsoz-la pu arive, ek ki zot kapav res debut devan Fils de l’homme.” (Luc 21:34-36) Jésus ti dekrir egzakteman fason-de-viv ki bann dimunn pu ena an zeneral: manze-a-lekse, bwar ziska su, ek viv enn fason ki donn zot traka an retur.

15. Kifer nu bizin evite manze ek bwar-a-lekse?

¹⁵ Manze-a-lekse ek bwar ziska su, se bann kitsoz ki nu bizin rezete parski zot pa ar armoni avek bann prinsip Biblik. La Bib dir: “Pa retruv twa parmi bann gran biver divin ek bann gurman lavyann.” (Proverbes 23:20) Me selman, manze ek bwar kapav met an danze spirityalite enn dimunn, avan mem ki li’nn tom dan bann lekse. Kuma? Se kan li les manze ek bwar fer li vinn lur ek pares. Proverbes dir: “Enn dimunn pares anvi buku kitsoz, me li pena nanyin.” (Proverbes 13:4) Enn dimunn kumsa kapav anvi fer volonte Bondye, me li pa reysi akoz so neglizans.

16. Kuma nu kapav anpes bann traka konsernan nu fami, vinn enn fardo lor nu?

¹⁶ Kont ki traka Jésus ti met nu an gard? Sa bann traka-la konsern nu bann preokipasyon personel, donn nu fami seki li bizin pu viv, uswa bann lezot kitsoz kumsa. Li pa pu saz si nu les sa bann kitsoz-la vinn enn fardo lor nu! Jésus ti dir: “Kisannla, kan li trakase, kapav azut enn sel kude ar so lavi?” Li ti donn sa konsey-la bann dimunn ki ti pe ekut li: “Fode ki zame zot trakase ek zot dir: ‘Ki nu pu manze?’ uswa, ‘Ki nu pu bwar?’ uswa, ‘Ki nu pu met lor nu?’ Parski tu sa bann kitsoz-la, se bann nasyon ki kontiyn rod sa sanses. Me, zot Papa ki dan lesyel, kone ki zot bizin tusala.” Kan nu met Rwayom Bondye an premye dan nu lavi, ek kan nu ena konfyans ki Jéhovah pu pran nu swin, sa pu fer nu les nu bann traka dan zot plas. Lerla, sa pu ed nu res lor nu gard spirityelman.—Matthieu 6:25-34.

17. Kuma kan nu galup deryer bann kitsoz materyel, sa kapav fer nu gayn traka?

¹⁷ Enn lot kitsoz ki kapav fer nu gayn traka, se kan nu galup deryer kitsoz materyel. Par egzanp, sertin konplik zot lavi kan zot rod viv enn fason ki zot mwayin pa permet zot. Lezot inn les zot pyeze par bann mwayin pu vinn ris byin vit ek par bann investisman finansye byin riske. Pu lezot, enn pyez se fer bann gran-gran letid avek lobzektif pu vinn ris. Li vre ki, pu nu kapav gayn enn travay, li inportan ki nu ena enn sertenn nivo ledikasyon. Me selman, li vre usi ki sertin inn fer zotmem ditor spirityelman, kan zot inn pas buku letan pu fer bann letid byin avanse. Enn sityasyon kumsa byin danzere, alor ki zur Jéhovah pe aprose! La Bib averti nu: “Me, bann ki deside pu vinn ris, zot tom dan tantasyon, dan enn pyez, ek dan buku dezir ki pena valer ek ki fer ditor, ek ki plonz dimunn dan destriksyon ek dan la rwinn.”—1 Timothée 6:9.

18. Ki kapasite nu bizin devlope, pu nu evite amenn enn lavi materyalis?

¹⁸ Pu nu pa amenn enn lavi materyalis, li indispansab ki nu devlop nu kapasite pu fer diferans ant le byin ek le mal kan nu pran bann desizyon. Nu devlop sa kapasite-la, kan nu absorb regilyerman ‘la nuritir spirityel solid ki rezerve pu bann dimunn ki ena matirite,’ ek kan nu ‘form nu kapasite pu diserne,’ atraver la pratik. (Hébreux 5:13, 14) Kan nu etabli bann priorite dan nu lavi, nu bizin pa bliye pu “verifye bann kitsoz ki pli inportan,” sa usi pu anpes nu pran bann move desizyon.—Philippiens 1:10.

19. Ki nu bizin fer si nu truve ki nu pa gayn ase letan pu bann kitsoz spirityel?

¹⁹ Enn lavi materyalis kapav avegle nu, ek lerla nu pa gayn ase letan pu bann kitsoz spirityel. Kuma eski nu kapav egzaminn numem ek evit tom dan sa pyez-la? Nu bizin reflesi dan lapriyer kuma nu kapav sinplifye nu lavi otan ki posib. Salomon ki ti le rwa an Israël, ti dir: “Enn kikenn ki servi lezot, li dormi byin, ki li’nn byin manze uswa non. Me labondans ki enn ris posede, anpes li dormi.” (Ecclésiaste 5:12) Eski nu depans enn gran parti nu letan ek nu lenerzi pu okip bann kitsoz materyel ki pa neseser? Plis nu ena dibyin, plis nu bizin antretenir zot, pey lasirans ek pran bann mezir sekirite. Si nu sinplifye nu lavi ek debaras sertin dibyin, eski sa pa pu enn lavantaz pu numem?

Wi, Montre ki Zot Inn Pare!

20, 21. (a) Ki lasirans lapot Pierre ti done konsernan zur Jéhovah? (b) Ki bann aksyon nu bizin kontiyn fer amezir ki nu pe prepar nu pu zur Jéhovah?

²⁰ Lemond dan lepok Noé ti’nn finalman disparet, ek zordi usi lemond pu byinto disparet. Lapot Pierre ti donn nu sa lasirans-la: “Zur Jéhovah pu vinn kuma enn voler. Sa zur-la, lesyel pu disparet dan enn sifleman, me bann eleman ki’nn byin sofe, pu fonn, ek later ek bann travay ki ena lor la, pu dekuver.” Ni lesyel sinbolik, setadir bann move guvernman, ni later sinbolik, setadir bann dimunn ki elwayne ar Bondye, pa pu sirviv devan gran koler Jéhovah. Pu montre kuma nu kapav pre pu sa zur-la, Pierre dir: “Parski tu sa bann kitsoz-la bizin disparet, ki kalite dimunn zot bizin ete par bann aksyon ki montre zot kondwit sin, ek zot latasman avek Bondye; kontiyn atann ek gard tuzur dan zot lespri prezans zur Jéhovah!”—2 Pierre 3:10-12.

²¹ Kan nu asiste reynion ek kan nu pres la bonn nuvel regilyerman, sa fer parti dan bann aksyon ki montre nu latasman avek Bondye. Anu akonpli sa bann aksyon-la avek enn latasman sinser pu Bondye pandan ki nu pe atann avek pasyans gran zur Jéhovah. Anu “fer tu [nu] posib pu ki ala fin [Bondye] truv [nu] san tas ek san defo ek anpe.”—2 Pierre 3:14.

Eski U Rapel?

• Kifer nu bizin montre ki nu’nn pare pu zur Jéhovah?

• Ki nu bizin fer si nu bann lokipasyon pe vinn enn priorite dan nu lavi?

• Ki pu ed nu pu lit kont somey spirityel?

• Ki fason-de-viv ki kapav fer nu ditor spirityelman, nu bizin evite, ek kuma nu pu fer sa?

[Zimaz lor paz 17]

Bann dimunn dan lepok Noé, pa ti pran okenn kont zizman ki ti pe vini—eski u, u pe pran kont?