Grander Jéhovah Depas Nu Limazinasyon
“Jéhovah gran ek zame nu pu fini glorifye Li; so grander depas nu limazinasyon.”—PSAUME 145:3.
1, 2. Ki kalite dimunn David ti ete, ek ki lopinyon li ti ena lor limem par rapor avek Bondye?
PSAUME 145 finn ekrir par enn zom byin renome, dezyem le rwa dan ansyin Israël. Alor ki li ti ankor enn garson, li ti defye enn zean ki purtan ti byin arme, ek li ti tuy li. Sa le rwa-la finn ranport buku viktwar lor so bann lennmi. U’nn devine kisannla? Se David. Mem apre so lamor, David finn gard so repitasyon. Dayer, mem zordi, enn kantite dimunn ankor koz li.
2 Malgre tu bann kitsoz li finn akonpli, David ti ena limilite. Get seki li finn sante konsernan Jéhovah: “Kan mo get lesyel ki to’nn kre, travay to bann ledwa, lalinn ek bann zetwal ki to finn prepare, ki ete enn zom mortel pu ki to mazinn li, ek ki ete enn imin pu to pran li swin?” (Psaume 8:3, 4) David zame pa ti pran grander. Okontrer, li ti rekonet ki se Jéhovah ki ti sap li dan lamin tu so bann lennmi: “To pu donn mwa to bukliye ki delivre mwa, ek se to limilite ki elev mwa.” (2 Samuel 22:1, 2, 36) Jéhovah montre limilite kan Li manifeste so mizerikord anver bann peser, ek David ti apresye sa faver imerite-la.
‘Mo Pu Glorifye Twa Mo Bondye, Mo le Rwa’
3. (a) Pu David, kisannla ti le Rwa Israël? (b) A ki pwin David ti anvi glorifye Jéhovah?
3 Mem si David ti le rwa ki Bondye ti etabli lor later, pu li se Jéhovah ki ti vre le Rwa nasyon Israël. Li ti dir: “A Jéhovah, sa rwayom-la pu tomem, tomem ki sef lor tu kitsoz.” (1 Chroniques 29:11) David ti respekte Bondye kuma so Sef! Dan enn psaume, li ti dir: “Mo pu glorifye twa, A mo Bondye, mo le Rwa, ek mo pu beni to non pu enn letan indefini, wi pu tuzur. Tutlong la zurne mo pu beni twa, ek mo pu beni to non pu enn letan indefini, wi pu tuzur.” (Psaume 145:1, 2) David ti anvi glorifye Bondye Jéhovah tutlong la zurne ek pu tut leternite.
4. Ki bann fos akizasyon Psaume 145 devwale?
4 Satan ti pretann ki Bondye Li enn sef egois ki priv so bann kreatir zot liberte. Me, Psaume 145 donn bann prev solid pu kontredir sa. (Genèse 3:1-5) Sa psaume-la devwal mansonz ki Satan ti koze kan li ti dir ki swadizan bann dimunn obeir Bondye par lintere, pa parski zot kontan Li. (Job 1:9-11; 2:4, 5) Parey kuma David, bann vre Kretyin zordi pe kontredir bann fos akizasyon ki Satan finn lanse. Zot apresye lesperans ki zot ena pu viv pu tuletan kan Rwayom Bondye pu dirize, parski zot anvi glorifye Jéhovah pu tuletan. Deza asterla mem, plizir milyon dimunn finn fini kumans fer sa. Zot egzers lafwa dan sakrifis Jésus, ek zot inn angaz zot lavi pu servi Jéhovah avek tu zot leker.—Romains 5:8; 1 Jean 5:3.
5, 6. Ki bann lokazyon nu ena pu glorifye Jéhovah?
5 Nu, bann serviter Jéhovah, nu ena enn kantite lokazyon pu glorifye Bondye. Nu kapav fer sa dan lapriyer, petet apre ki nu’nn lir enn kitsoz dan la Bib ki’nn byin tus nu. Parfwa, kan nu lir kuma Jéhovah ti azir avek so pep, uswa kan nu obzerv la kreasyon, sa tus nu leker. Ebyin, se bann lokazyon pu exprim Bondye nu bann luanz ek remersiman. Enn lot fason kot nu kapav glorifye Jéhovah, se kan nu koz lor seki Li pu fer, avek nu bann frer ek ser dan reynion uswa dan nu bann konversasyon. Avredir, tu “bann bon travay” ki nu fer pu Rwayom Bondye, glorifye Jéhovah.—Matthieu 5:16.
6 Parmi sa bann bon travay-la, ena usi led ki nu aporte pu konstriksyon bann Salle du Royaume pu bann Kretyin ki viv dan bann peyi pov. Enn gran parti sa travay-la pe kapav fer grasa kontribisyon bann frer ek ser dan lezot peyi. Ena ki port zot usi volonter pu al travay dan sa bann konstriksyon-la. Me dan tusala, travay pli inportan se kan nu glorifye Jéhovah atraver la predikasyon de la bonn nuvel. (Matthieu 24:14) Dan bann verse ki vinn apre dan sa Psaume-la, nu truve kuma David ti rekonet lotorite Bondye ek li ti glorifye So rwayote. (Psaume 145:11, 12) Eski u’si, parey kuma David, u apresye fason ki Bondye dirize? Eski u koz regilyerman lor so Rwayom avek lezot dimunn?
Bann Legzanp Ki Demontre Grander Jéhovah
7. Donn enn bon rezon pu glorifye Jéhovah.
7 Psaume 145:3 donn nu enn bon rezon pu glorifye Jéhovah. Nu lir: “Jéhovah gran ek nu bizin donn Li loner pu tuletan, nu pa kapav konn so grander.” Grander Jéhovah pena limit. Nu, bann imin, zame nu pa pu kapav dekuver, konpran uswa, mem mezir grander Jéhovah. Me kan mem sa, nu kapav tir buku profi si nu pu egzaminn detrwa legzanp ki demontre grander Jéhovah.
8. Ki lesyel revel nu lor grander ek pwisans Jéhovah?
8 Esey rapel enn nwit kot pa ti ena kuran ek kot lesyel ti byin eklere. Kan u ti lev latet u ti get tu sa zetwal ki pe briye-la, eski sa pa ti inpresyonn u? Eski sa pa ti donn u anvi pu glorifye Jéhovah pu so grander, Li ki finn kre tusala? Me, seki u finn truve, li enn nanyin ditu konpare ar sa gran kantite zetwal ki ena dan nu galaxi-la. Anplis, finn estime ki ena plis ki san milyar galaxi, ek zis trwa ladan ki vizib san led enn teleskop. Wi, tu sa bann zetwal ek galaxi ki dan liniver-la, zot montre klerman pwisans ek grander ki Jéhovah ena ek ki depas nu limazinasyon.—Isaïe 40:26.
9, 10. (a) Kuma Jéhovah finn manifeste so grander an rapor avek Jésus Christ? (b) Ki lefe, rezireksyon Jésus bizin ena lor nu lafwa?
9 Asterla, anu gete kuma Jéhovah inn manifeste so grander an rapor avek Jésus Christ. Jéhovah ti montre so grander kan Li ti kre so Garson ek servi li kuma so “zuvriye kalifye,” pandan enn long peryod letan indefini. (Proverbes 8:22-31) Jéhovah ti montre grander so lamur kan Li ti donn so Garson an sakrifis kuma enn ranson pu limanite. (Matthieu 20:28; Jean 3:16; 1 Jean 2:1, 2) Ek enn lot kitsoz ki nu, bann imin, zame nu pa pu kapav konpran, se lekor spirityel, imortel ki Jéhovah inn donn Jésus, apre so rezireksyon.—1 Pierre 3:18.
10 Rezireksyon Jésus anseyn nu buku kitsoz lor grander Jéhovah. Kan Bondye ti resisit Jésus, Li ti fer li retruv tu so bann suvenir. Par egzanp, Jésus ti kapav rapel la kreasyon, kuma li ti ed so Papa pu kre lezot kreatir spirityel, liniver, later, ek tu bann kitsoz ki truv lor later. (Colossiens 1:15, 16) Pa fini, Jésus ti rapel usi tu seki ti’nn pase dan lesyel ek lor later, pandan so legzistans dan lesyel. Jéhovah ti fer li rapel usi tu seki li ti fer kan li ti enn zom parfe lor later. Wi, rezireksyon Jésus aprann nu buku kitsoz lor grander Jéhovah. Anplis, sa li enn garanti ki la rezireksyon li enn kitsoz ki posib. Ek sa fortifye nu lafwa kan nu kone ki Bondye ena enn memwar parfe ek Li ena kapasite pu resisit bann dimunn ki’nn mor.—Jean 5:28, 29; Actes 17:31.
Lezot Gran Travay Extraordiner Ki Jéhovah Inn Fer
11. Ki gran travay Jéhovah finn kumans fer apartir la Pentecôte lane 33 N.L.?
11 Depi rezireksyon Jésus, Jéhovah finn fer buku lezot travay extraordiner. (Psaume 40:5) La Pentecôte lane 33 N.L., Jéhovah finn kre enn nuvo nasyon, “Israël Bondye,” setadir bann disip Christ ki pu al viv dan lesyel avek li. (Galates 6:16) Par pwisans Jéhovah, sa nuvo nasyon spirityel-la finn disperse partu atraver lemond ki ti egziste sa lepok-la. Malgre ki lapostazi finn devlope apre lamor bann zapot Jésus ek finn form la Kretyinte, Jéhovah finn kontiyn fer bann travay extraordiner pu realiz so proze.
12. Pwiski mazorite dimunn lor later zordi kapav lir la Bib dan zot lang, ki sa pruve?
12 Par egzanp, Jéhovah finn prezerv la Bib an antye, ek Li’nn veye ki mazorite dimunn lor later zordi kapav lir la Bib dan zot lang. Bann tradikter la Bib finn bizin suvan afront bann kondisyon difisil; bann azan Satan ti mem menas pu tuy zot. Zame pa ti pu kapav tradir la Bib dan plis ki 2,000 lang, si sa pa ti volonte nu gran Bondye, Jéhovah.
13. Depi 1914, kuma eski Jéhovah finn manifeste so grander an rapor avek so Rwayom?
13 Jéhovah finn usi manifeste so grander an rapor avek so Rwayom. Par egzanp an 1914, Li ti etabli so Garson Jésus Christ kuma le Rwa dan lesyel. Enn tipe apre, Jésus finn tir Satan ek so bann demon dan lesyel ek li finn zet zot dan vwazinaz later. Ek byinto, Jésus pu lans zot dan l’abime. (Révélation 12:9-12; 20:1-3) Depi ki Satan ek so bann demon dan vwazinaz later, bann Kretyin oints finn konn deplizanpli persekisyon. Me, Jéhovah finn kontiyn sutenir zot ziska zordi, pandan prezans invizib Christ.—Matthieu 24:3; Révélation 12:17.
14. Ki travay extraordiner Jéhovah finn fer an 1919, ek ki finn kapav akonpli grasa sa?
14 An 1919, Jéhovah finn fer enn lot travay extraordiner ki montre so grander. Laktivite spirityel bann Kretyin oints, ki ti preske arete net, ti repran. (Révélation 11:3-11) Depi sa, bann Kretyin oints finn kontiyn pres la bonn nuvel lor Rwayom Bondye avek enn gran zel. An mem tan, zot finn usi rasanble leres manb 144,000. (Révélation 14:1-3) Ek Jéhovah finn servi sa bann Kretyin oints-la pu etabli “enn nuvo later,” setadir enn nuvo sosyete dimunn ki drwat. (Révélation 21:1) Me, pwiski bann fidel Kretyin oints pu al dan lesyel, kuma eski ‘sa nuvo later-la’ pu res pu tuletan?
15. Ki travay bann Kretyin oints pe dirize zordi, ek ki rezilta zot finn gayne?
15 Bann lartik letid ki ti paret dan Latur Degard 1er Août ek 15 Août 1935, ti koz lor “la grand ful” mansyone dan Révélation sapit 7. Ebyin, apre sa, bann Kretyin oints finn kumans rasanble avek zel bann manb sa ‘grand ful-la,’ ki sorti dan tu nasyon, tribi, pep, ek lang. Se bann dimunn ki pu sirviv “la grand tribilasyon” ki byin pros asterla, ek zot ena lespwar pu viv pu tuletan dan Paradi. Donk, se zot ki reprezant “nuvo later.” (Révélation 7:9-14) Grasa laktivite predikasyon ek lanseynman ki bann Kretyin oints finn lanse, zordi plis ki sis milyon dimunn ena lespwar pu viv pu tuletan lor later ki pu vinn enn paradi. Kisannla ki merit la glwar pu sa gran lakrwasman ki finn ena-la, malgre lopozisyon Satan ek so lemond koronpi? (Isaïe 60:22; 1 Jean 5:19) Selman Jéhovah ki kapav fer tusala grasa so lespri sin.—Zekaria 4:6.
La Glwar ek Dinite Jéhovah
16. Kifer eski bann imin pa kapav truv ‘la glwar ek dinite Jéhovah’?
16 Zame nu pu kapav bliye bann “travay extraordiner” ki Jéhovah finn fer. Se seki David ti ekrir: “Zenerasyon apre zenerasyon pu glorifye to bann travay; zot pu rakont seki to’nn akonpli avek pwisans. Mo pu pran kont to la glwar ek grander to dinite ek tu seki konsern to bann travay extraordiner. Zot pu rakont bann kitsoz inpresyonan ki to finn fer; ek mo pu proklam to grander.” (Psaume 145:4-6) Pwiski “Bondye Li enn lespri,” nu pa kapav truv Li, alor kuma David li, li ti kapav konn sa kantite kitsoz-la lor la glwar Jéhovah?—Jean 1:18; 4:24.
17, 18. Kuma eski David ti kapav ogmant so apresyasyon pu ‘la glwar ek dinite Jéhovah’?
17 Mem si David pa ti kapav truv Bondye, ti ena plizir fason kot li ti kapav ogmant so apresyasyon pu dinite Jéhovah. Li ti kapav lir bann resi Biblik ki dekrir bann kitsoz ki Bondye ti realize avek pwisans, kuma par egzanp kan Li ti amenn Deliz. Sirman David ti aprann usi kuma Bondye ti abes bann fos bondye Égyptiens kan Li ti delivre bann Israélites an Égypte. Tu sa bann levennman-la montre klerman dinite ek grander Jéhovah.
18 Byinsir, enn sinp lektir sa bann resi-la pa ti sifi pu fer David plis apresye dinite Bondye. Li ti bizin medit lor seki li ti lir. Par egzanp, li finn sirman medit lor seki ti arive kan Jéhovah ti donn Israël Lalwa, pre kot Montayn Sinaï. Enn kitsoz extraordiner ti arive sa zur-la: ti ena loraz, zekler, enn gro nyaz, ek enn gran tapaz kumadir enn kikenn ti pe sonn kor. Montayn Sinaï ti tranble, ek li ti pe rann la fime. Rasanble anba sa montayn la, bann Israélites ti mem tann Jéhovah, atraver enn anz, pronons sa ‘Dix Paroles-la,’ omilye dife ek nyaz. (Deutéronome 4:32-36; 5:22-24; 10:4; Exode 19:16-20; Actes 7:38, 53) Jéhovah ti manifeste so grander dan enn fason vremem extraordiner, pa vre? Bann ki kontan Parol Bondye ek ki medit lor bann resi Biblik kumsa, otomatikman zot santi zot leker tuse par ‘la glwar ek dinite Jéhovah.’ Zordi, nu ena la Bib an antye. Nu kapav lir plizir lezot vizyon inpresyonan ki bann serviter Jéhovah inn gayne lor grander Bondye.—Ezékiel 1:26-28; Daniel 7:9, 10; Révélation, sapit 4.
19. Ki kitsoz pu ogmant nu apresyasyon pu dinite Jéhovah?
19 Enn lot fason kot David ti kapav apresye dinite Bondye, se kan li ti etidye bann lalwa ki Bondye ti donn bann Israélites. (Deutéronome 17:18-20; Psaume 19:7-11) Kan bann Israélites ti obeir bann lalwa Jéhovah, sa ti elev zot atan ki nasyon ek zot ti vinn enn pep apar. (Deutéronome 4:6-8) Donk, parey kuma David, si nu lir ek etidye la Bib regilyerman, ek nu medit lor la an profonder, nu pu plis apresye dinite Jéhovah.
Bondye Manifeste So Grander Atraver Bann Kalite Li Ena
20, 21. (a) An rapor avek ki bann kalite, Psaume 145:7-9 glorifye grander Jéhovah? (b) Ki lefe bann kalite Bondye ki mansyone isi, ena lor bann ki kontan Li?
20 Kuma nu finn remarke, sis premye verse Psaume 145 donn nu bann bon rezon pu glorifye Jéhovah pu bann fason ki Li manifeste so grander. Psaume 145 Verse 7-9 montre nu kuma Bondye manifeste so grander atraver bann kalite ki Li ena. David ti exprim sa kumsa: “Kan zot mansyonn labondans to bonte, zot tu pu deborde, ek akoz to la zistis, zot pu kriye dan lazwa. Jéhovah ena konpasyon ek mizerikord, Li pa ankoler vit ek so lamur fidel byin gran. Jéhovah bon anver tu, ek so mizerikord li lor tu so bann travay.”
21 Isi, David met laksan dabor lor la bonte ek la zistis Jéhovah. Nu rapel ki se sa bann kalite-la ki Satan ti met an dut. Ki lefe sa bann kalite-la ena lor tu bann ki kontan Bondye ek ki sumet ar so direksyon? Wi, kan Jéhovah azir avek bonte ek li egzers so dominasyon avek la zistis, sa rann so bann adorater telman ere ki zot pa kapav aret glorifye Li. Anplis, Jéhovah manifeste so bonte “lor tu” dimunn. Nu espere ki sa pu ed buku dimunn ankor pu repanti ek pu vinn ador vre Bondye avan ki li tro tar.—Actes 14:15-17.
22. Kuma eski Jéhovah azir anver so bann serviter?
22 David ti apresye usi bann kalite ki Bondye Limem ti fer resorti kan Li “ti pas devan figir [Moïse] ek Li ti pe dir: ‘Jéhovah, Jéhovah, enn Bondye ki ena mizerikord ek konpasyon, ki pa ankoler vit, ek ki ena enn labondans lamur fidel ek la verite.’ ” (Exode 34:6) Se sa ki’nn pus David pu deklare: “Jéhovah ena konpasyon ek mizerikord, Li pa ankoler vit ek so lamur fidel byin gran.” Mem si grander Jéhovah depas nu limazinasyon, Li elev so bann serviter. Kuma? Li azir avek konpasyon ek mizerikord anver zot, Li pre pu pardonn bann peser ki repanti pu gayn pardon atraver sakrifis Jésus. Jéhovah pa ankoler vit parski Li donn so bann serviter lokazyon pu sirmont zot bann febles ki kapav anpes zot rant dan lemond nuvo.—2 Pierre 3:9, 13, 14.
23. Ki kalite byin inportan ki nu pu egzamine dan prosin lartik?
23 David glorifye usi lamur fidel Bondye. Dayer, lezot verse Psaume 145 montre kuma Jéhovah manifeste sa kalite-la ek kuma so bann fidel serviter reazir kan Li manifeste sa kalite-la anver zot. Nu pu egzaminn sa bann kitsoz-la dan prosin-lartik.
Kuma Eski U Pu Reponn?
• Ki bann lokazyon nu ena pu glorifye Jéhovah “tutlong la zurne”?
• Ki bann legzanp ki montre ki grander Jéhovah depas nu limazinasyon?
• Kuma eski nu kapav ogmant nu apresyasyon pu la glwar ek dinite Jéhovah?
[Zimaz lor paz 1]
Bann galaxi dan liniver montre klerman grander Jéhovah
[Orizinn]
Courtesy of Anglo-Australian Observatory, photograph by David Malin
[Zimaz lor paz 3]
Kuma eski Jéhovah finn manifeste so grander an rapor avek Jésus Christ?
[Zimaz lor paz 6]
Kan bann Israélites ti gayn Lalwa lor Montayn Sinaï, zot ti truv la glwar ek dinite Jéhovah