Anou Développe l’Attitude Christ lor la Grandeur

“Celui qui envie vinn grand parmi zot, li bizin vinn zot serviteur.”​—MATTHIEU 20:26.

1. Ki l’attitude le monde éna lor la grandeur?

PRÈS ar ancien la ville Égyptien Thèbes (zordi Karnak), environ 500 km dans sud Caïre, éna enn statue 18 m hauteur. C’est statue Pharaon Amenhotep III. Enn bel zimage coumsa bien-sûr faire enn dimoune senti li-mem bien tipti. Finn monte sa monument-la sûrement pou inspire la crainte ek respect pou sa Pharaon-la. En tout cas, sa statue-la montré l’attitude le monde lor la grandeur—faire enn dimoune parette grand ek important, ek faire lézot senti zot tipti devant li.

2. Ki l’exemple Jésus finn laissé pou so bann disciples, ek ki question nous bizin pose nou-mem?

² Parkont, guetté ki l’attitude Jésus Christ li, li ti enseigné lor la grandeur. Mem si pou so bann disciples, Jésus ti “Seigneur ek Enseignant,” li ti enseigne zot ki séki donne enn dimoune grandeur, c’est so désir pou servi so prochain. Pou faire zot comprend sa pli bien, Jésus ti faire enn kitsoz la veille so la-mort: li ti lave lipié so bann apôtres. Enn grand l’humilité de sa part, pa vrai? (Jean 13:4, 5, 14) Ki ou préféré? servi lézot? ou-soit lézot servi ou? Eski l’exemple Jésus pousse ou pou éna l’humilité, pareil couma li? Si oui, anou examine l’attitude Jésus lor la grandeur, contrairement ar l’attitude ki bien courant dans le monde.

Rejette l’Attitude le Monde lor la Grandeur

3. Ki l’exemples Biblique montré triste conséquence ki certains finn koné parski zot inn rode glorifié zot-mem?

³ Dans la Bible, éna beaucoup l’exemples ki montré couma enn dimoune kapav gagne malheur kan li adopté l’attitude le monde lor la grandeur. Hamân, par exemple, ti enn zom bien important ek puissant dans la cour royal Perse, à l’époque Esther ek Mordekaï. Mais parski li ti soif grandeur, li finn konn l’humiliation ek la mort. (Esther 3:5; 6:10-12; 7:9, 10) Alors ki Neboukadnetsar ti dirigeant le plus puissant de la terre, Bondié ti faire li perdi la raison à cause so l’orgueil. Noté couma li ti exprime l’idée déformé ki li ti éna lor la grandeur, li ti dire: “Eski c’est pa Babylone la Grande, ki moi mo’nn construire pou la maison royal, avec la force mo puissance ek pou dignité mo majesté?” (Daniel 4:30) Enn l’autre l’exemple, c’est Hérode Agrippa I. Au lieu donne Bondié la gloire, li ti accepté la gloire ki li pa ti mérité. Eh bien, “lé-vers ti dévore li, li ti mort.” (Actes 12:21-23) Parski zot pa finn comprend l’attitude Jéhovah lor la grandeur, sa bann zom-la ti’nn humilié ek zot ti perdi zot pouvoir.

4. Kisannla ki encourage bann dimoune pou éna l’orgueil?

⁴ Nous tou content servi nou la-vie dans enn façon ki faire lézot respecté nous ek honore nous. Mais le Diable exploite sa désir naturel-la pou faire nous développe l’orgueil, ki enn parmi so bann traits caractère. (Matthieu 4:8, 9) Fodé jamais nous blié ki li-mem “bondié sa système-la,” et li pé faire tou pou encourage so manière pensé lor la terre. (2 Corinthiens 4:4; Éphésiens 2:2; Révélation 12:9) Bann Chrétiens rejette l’attitude le monde lor la grandeur, parski zot konn bien kisannla ki pé encourage sa manière pensé-la.

5. Eski le succès, la célébrité, ek la richesse garanti enn satisfaction durable? Expliqué.

⁵ Le Diable rode faire bann dimoune croire ki kan zot vinn enn grand dimoune dans le monde, kan zot gagne éloges lézot, ek kan zot poches bien rempli, zot pou konn automatiquement le bonheur. Eski li vrai sa? Eski vrémem le succès, la célébrité, ek la richesse zot garanti le bonheur dans la vie? La Bible montré ki nous pé trompe nou-mem si nous pense coumsa. Dans so sagesse, le Roi Salomon ti écrire: “Et moi, mo’nn trouvé ki bann dimoune donne beaucoup de peine dans zot travail, simplement pou zot pli arrivé ki zot prochain. Sa aussi li vanité ek li péna sens.” (Ecclésiaste 4:4) Beaucoup dimoune ki finn faire la tête-lipié pou arrivé dans sa lé-monde-la, kapav confirme la vérité ki éna dans sa conseil Biblique-la. Enn monsieur, par exemple, ti gagne l’occasion participe dans préparation, construction ek bann essais, fusée ki ti transporte bann dimoune lor la lune. Li raconté: “Mo ti travaille dur ek mo ti vinn bien compétent dans séki mo ti pé faire. Pourtant, c’est pa sa ki’nn faire moi konn enn bonheur durable ek la paix de l’esprit.”a Oui, l’attitude le monde lor la grandeur, ki li dans domaine sport, dans business ou-soit dans divertissement, pa garanti enn satisfaction durable.

Véritable Grandeur, C’est Servi Lézot Avec Amour

6. Ki montré ki Jacques ek Jean ti éna enn mauvais l’attitude lor la grandeur?

⁶ Enn événement dans la vie Jésus montré ki été véritable grandeur. Jésus ek so bann disciples ti pé al Jérusalem pou célébré la Pâque en l’an 33 N.L. Lor chemin, Jacques ek Jean, deux cousins Jésus, finn montré ki zot ti éna enn mauvais l’attitude lor la grandeur. À travers zot mama, zot ti demann Jésus: ‘Donne l’ordre pou ki nous assize, enn à to droite ek l’autre à to gauche, dans to royaume.’ (Matthieu 20:21) Pou bann Juifs, sa ti enn grand l’honneur pou assize à droite ou à gauche enn l’autre dimoune. (1 Rois 2:19) Jacques ek Jean ti éna bel l’ambition; zot ti rode gagne pli grand places. Zot ti envie occupe enn position ki donne zot l’autorité. Jésus ti koné séki ti éna dans zot l’esprit, ek li’nn profite l’occasion pou corrige zot mauvais l’opinion lor la grandeur.

7. D’après Jésus, couma enn Chrétien kapav développe véritable grandeur?

⁷ Jésus ti koné ki pou sa lé-monde arrogant-la, enn dimoune ki grand c’est enn dimoune ki éna l’autorité lor lézot, ki donne zot l’ordre, ek ki avec enn simple geste avec so lé-doigt oblige lézot pou satisfaire tou so bann caprices. Mais pou bann disciples Jésus Christ, c’est servi lézot avec humilité, ki donne enn dimoune véritable grandeur. Jésus ti dire: “Celui ki envie vinn grand parmi zot, bizin vinn zot serviteur, ek celui ki envie vinn premier parmi zot, li bizin vinn zot esclave.”—Matthieu 20:26, 27.

8. Expliqué ki veut dire enn serviteur, ek ki questions nous bizin pose nou-mem?

⁸ Mot Grec ki’nn traduire par “serviteur” dans la Bible, veut dire enn dimoune ki casse li en quatre pou rann lézot service. Jésus ti pé enseigne so bann disciples enn leçon important: Donne l’ordre lézot, c’est pa sa ki donne enn dimoune grandeur, mais plutôt servi lézot avec amour. Demann ou-mem: ‘Couma mo ti pou réagir si mo ti dans place Jacques ou-soit Jean? Eski mo ti pou comprend ki servi lézot avec amour, c’est sa véritable grandeur?’—1 Corinthiens 13:3.

9. Ki l’exemple Jésus finn laissé dans façon ki li ti agir avec lézot?

⁹ Jésus ti montré so bann disciples ki so l’attitude lor la grandeur bien différent ar l’attitude le monde. Jamais li pa ti estime li-mem pli supérieur ki bann dimoune ki li ti servi, ni li ti faire bannla senti zot inférieur. Tou dimoune ti à l’aise avec li—zom, femme, zenfant, riche, pauvre, dimoune ki éna l’autorité, ek mem bann pécheurs. (Marc 10:13-16; Luc 7:37-50) Dimoune souvent perdi patience avec bann ki éna certaines faiblesses. Jésus li, li ti différent. Malgré ki parfois so bann disciples ti agir sans réfléchi ek zot ti disputé entre zot, Jésus ti contigne enseigne zot avec patience. Li ti montré zot ki li ti vraiment humble ek douce.—Zekaria 9:9; Matthieu 11:29; Luc 22:24-27.

10. Couma toute longue so la-vie lor la terre, Jésus finn toujours casse li en quatre pou lézot?

¹⁰ Jésus pa ti égoïste; so l’exemple finn montré ki été véritable grandeur. Li finn vinn lor la terre, pa pou ki lézot servi li, mais pou ki li, li servi lézot, pou li guéri “toute sorte qualité maladies,” ek pou li chasse bann démons. Mem si parfois li ti fatigué ek li ti bizin reposé, li ti touletan mette l’intérêt lézot avant; li ti al réconforte zot. (Marc 1:32-34; 6:30-34; Jean 11:11, 17, 33) So l’amour ti pousse li pou aide bann dimoune lor plan spirituel. Li ti marche plusieurs centaine kilomètres dans la poussière lor chemin, pou prêche la bonne nouvelle du Royaume. (Marc 1:38, 39) Oui li clair, Jésus ti faire li enn devoir pou servi lézot.

Anou Montré Nous Humble Couma Christ

11. Ki qualités bann surveillants dans la congrégation bizin éna?

¹¹ Kan ti bizin choisir bann frères pou service itinérant pou fortifié le peuple Bondié, vers la fin les années 1800, ti faire bien ressorti bon l’attitude ki bann surveillants Chrétiens bizin éna. D’après La Tour de Garde de Sion (angl.) 1^er Septembre, 1894, ti bizin bann zom “humble—pou ki zot pa prend grandeur . . . , pou ki zot pa rode prêche zot propre parole, mais parole Christ—pou ki zot pa flatte zot propre connaissance, mais plutôt Parole Christ dans so simplicité ek so puissance.” Oui, fodé ki jamais bann Chrétiens pa rode gagne bann responsabilités par ambition, pou mette zot-mem en avant, ou-soit pou domine lor lézot. Enn surveillant ki humble, conscient ki kan li accompli so bann responsabilités, li pé accompli “enn bon travail.” (1 Timothée 3:1, 2) Sa pa donne li okenn position élevé ki glorifié li. Tou bann anciens ek assistants ministériel bizin faire zeffort pou servi lézot avec humilité ek prend la tête dans service sacré pou Bondié. Coumsa, zot pou donne lézot enn bon l’exemple.—1 Corinthiens 9:19; Galates 5:13; 2 Timothée 4:5.

12. Si enn frère pé faire zeffort pou gagne bann privilèges dans la congrégation, ki questions li bizin pose li-mem?

¹² Si enn frère pé faire zeffort pou gagne bann privilèges, li bizin demann li-mem: “Eski mo rode bann l’occasions pou servi lézot, ou-bien mo atann ki lézot servi moi? Eski mo disposé pou faire bann travail ki personne pa remarqué?’ Par exemple, enn jeune frère kitfois content faire discours dans la congrégation, mais li hésité pou aide bann personnes âgé. Peut-être li content fréquente bann frères responsable dans la congrégation, mais so lipié lourd pou al prêché. Alors, li bon ki li demann li-mem: “Dans mo service pou Bondié, eski mo pli content faire bann kitsoz ki lézot pou remarqué ek ki pou faire moi gagne bann éloges? Eski mo pé faire tou pou attire l’attention lor mo-mem? Si nous rode glorifié nou-mem, nous pa pé cultive l’attitude Christ.—Jean 5:41.

13. (a) Ki l’effet l’humilité enn surveillant kapav éna lor lézot? (b) Kifer nous kapav dire ki pou enn Chrétien, manifesté l’humilité, li pa enn choix?

¹³ Kan nous faire zeffort pou reste humble couma Christ, sa pousse nous pou servi lézot. Guette l’exemple sa surveillant de zone ki ti pé inspecté travail ki ti pé faire dans enn filiale bann Témoins de Jéhovah. Malgré so lé-temps bien chargé ek tou so bann responsabilités, sa surveillant-la finn arrêté pou aide enn jeune frère ki ti pé gagne difficulté pou réglé enn machine ki coude bann pages. Jeune frère-la raconté: “Incroyable! Li’nn dire moi ki li aussi li ti travaille lor enn machine coumsa dans Béthel kan li ti encore jeune. Et li rappelle ki sa machine-la ti vrémem difficile pou réglé. Surveillant-la finn travaille enn tipé avec moi, malgré ki li ti éna beaucoup kitsoz important pou faire. Sa finn vrémem impressionne moi!” Zordi sa frère-la li enn surveillant de travail dans enn bann filiale Témoins de Jéhovah. Li encore toujours rappelle façon ki sa surveillant-la ti manifesté so l’humilité. Fodé jamais nous pensé ki nous trop supérieur ou-soit trop important pou faire enn simple ti travail. Nous bizin plutôt laisse l’humilité domine nou personnalité. Et sa, li pa enn choix sa, mais nous obligé cultive sa qualité-la parski li faire parti dans “nouveau personnalité” ki enn Chrétien bizin mette lor li.—Philippiens 2:3; Colossiens 3:10, 12; Romains 12:16.

Couma Nous Kapav Éna Mem l’Attitude ki Christ lor la Grandeur

14. Kan nous médite lor nou relation avec Bondié ek avec nou prochain, couma sa aide nous pou cultive enn bon l’attitude lor la grandeur?

¹⁴ Couma nous kapav développe enn bon l’attitude lor la grandeur? Enn façon c’est kan nous médite lor nou relation avec Jéhovah. Li difficile pou nous, bann simple humains, pou comprend grandeur, pouvoir ek sagesse ki Jéhovah éna. (Isaïe 40:22) Si nous médite lor nou relation avec nou prochain, sa aussi pou aide nous pou cultive l’humilité. Nous kapav, par exemple, faire pli bien ki lézot dans certains domaines. Mais kitfois zot éna plus mérite ki nous dans lézot domaines pli important dans la vie. Ou-soit, zot éna certaines qualités ki nous, nous péna. À vrai dire, bann dimoune ki éna valeur devant Bondié, pa rode attire l’attention lor zot-mem, parski zot humble.—Proverbes 3:34; Jacques 4:6.

15. Couma l’intégrité bann serviteurs Bondié montré ki personne péna okenn raison pou li senti li pli supérieur ki lézot?

¹⁵ Nous comprend sa pli bien kan nous considère l’expérience bann Témoins de Jéhovah ki’nn konn bann l’épreuves à cause zot la-foi. Bien souvent, c’est bann dimoune ki ordinaire dans lizié le monde, ki’nn garde zot l’intégrité dans bann pli pire l’épreuves. Kan nous médite lor zot l’exemple, sa kapav aide nous pou reste humble, ek sa enseigne nous pou ‘pa pense plus ki bizin lor nou-mem.’—Romains 12:3.b

16. Couma eski tou dimoune dans la congrégation kapav cultive la grandeur pareil couma Jésus?

¹⁶ Tou Chrétiens, jeune ek âgé, bizin cultive l’attitude Christ lor la grandeur. Dans congrégation, éna beaucoup ti tâches ki bizin faire. Fodé jamais nous en colère kan demann nous faire enn simple ti travail. (1 Samuel 25:41; 2 Rois 3:11) Parents, eski ou enseigne ou bann zenfants, ki zot tipti ou-soit adolescents, pou accepté avec joie n’importe ki ti travail zot gagné pou faire dans la Salle du Royaume, pendant enn l’assemblée, ou-soit lor enn site l’assemblée? Eski zot trouve ou faire sa? Enn frère ki zordi servi dans Béthel Brooklyn, rappelle l’exemple so bann parents. Li dire: “Façon ki zot ti considère nettoyage la Salle du Royaume ek la Salle l’Assemblées, montré ki sa ti important pou zot. Zot ti disposé pou faire n’importe ki ti travail pou rann service la congrégation ek tou zot bann frères. Zot l’attitude finn aide moi pou accepté n’importe ki travail mo gagné pou faire dans Béthel.”

17. Dans ki façons bann femmes ki humble zot enn bénédiction pou la congrégation?

¹⁷ Nous éna l’exemple enn femme ki ti mette l’intérêt lézot en premier. C’est Esther, ki ti vinn la reine dans l’Empire Perse dans cinquième siècle A.N.L. Malgré ki li ti vive dans enn palais, li ti prêt pou risqué so la-vie en faveur le peuple Bondié, ek agir en harmonie avec So volonté. (Esther 1:5, 6; 4:14-16) Zordi aussi, beaucoup femmes Chrétienne imite l’attitude Esther. Quelque soit zot situation économique, zot disposé pou encourage bann ki déprimé, pou visite bann malades, pou prêche la bonne nouvelle, ek pou coopère avec bann anciens. Sa bann soeurs humble-la, zot vrémem enn bénédiction pou la congrégation!

Bann Bienfaits Ki Nous Gagné kan Nous Éna l’Attitude Christ lor la Grandeur

18. Ki bienfaits ou gagné kan ou garde mem l’attitude ki Christ lor la grandeur?

¹⁸ Ou pou gagne beaucoup bienfaits kan ou garde mem l’attitude ki Christ lor la grandeur. Kan ou servi lézot sans okenn l’intérêt personnel, sa donne ou-mem ek lézot la joie. (Actes 20:35) Kan ou casse ou en quatre pou ou bann frères, ou gagne zot l’affection. (Actes 20:37) Et pli important encore, Jéhovah considère dibien ki ou faire pou ou bann frères, couma enn sacrifice de louange pou Li.—Philippiens 2:17.

19. Ki nous bizin déterminé pou faire, en rapport avec l’attitude Christ lor la grandeur?

¹⁹ Nous tou nous bizin examine nou léker, ek lerla demann nou-mem: ‘Eski mo pou cultive l’attitude Christ lor la grandeur, zis en parole, ou-soit eski mo pou faire zeffort pou applique sa dans mo la-vie?’ Nous koné couma Jéhovah considère bann dimoune vantard. (Proverbes 16:5; 1 Pierre 5:5) Anou montré par nous actions ki nous envie cultive l’attitude Christ lor la grandeur, ki li dans la congrégation, dans nou la-vie famille, ou-soit dans nou relation avec lézot toulé-jours. Et anou faire tou pou glorifié ek loué Jéhovah.—1 Corinthiens 10:31.

[Note]

Eski Ou Kapav Expliqué?

• Kifer nous bizin rejette l’attitude le monde lor la grandeur?

• D’après Jésus, ki kitsoz donne enn dimoune grandeur?

• Couma bann surveillants kapav montré zot humble pareil couma Christ?

• Ki kapav aide nous pou cultive l’attitude Christ lor la grandeur?

[Box on page 27]

Kisannla Ki Éna Mem l’Attitude ki Christ lor la Grandeur?

Celui ki envie lézot servi li, ou-soit celui ki disposé pou servi lézot?

Celui ki content attire l’attention lor li-mem, ou-soit ki accepté bann travail humble?

Celui ki mette li-mem en avant, ou-soit celui ki mette lézot en avant?

[Zimage, page 24]

Statue immense Pharaon Amenhotep III

[Zimage, page 25]

Eski ou koné ki finn faire Hamân konn l’humiliation?

[Zimage, page 26]

Eski ou rode bann l’occasion pou servi lézot?