Anu Fortifye Sakenn Parmi Nu

“Zot finn vinn enn led ki fortifye mwa.”​—COLOSSIENS 4:​11.

1, 2. Malgre bann danze, kifer bann konpaynon Paul ti vinn get li dan prizon?

U KAPAV truv u dan enn sityasyon danzere si zame u ena enn kamarad dan prizon​—mem si li inosan. Kan u al rann li vizit, bann gard prizon riske get u gro-gro lizye, ek sirvey tu kitsoz ki u fer, atansyon u fer enn kitsoz ilegal. Donk, bizin vremem buku kuraz pu gard kontak avek u kamarad ek pu al vizit li dan prizon.

² Zisteman se sa ki sertin konpaynon lapot Paul ti fer 1,900 ans desela. Zot pa ti ezite pu vizit Paul dan prizon pu rekonfort li, ankuraz li ek fortifye li spirityelman. Kisannla sa bann konpaynon-la? Ek ki nu kapav aprann ar fason ki zot finn montre zot kuraz, fidelite, ek lamitye?​—Proverbes 17:17.

“Enn Led Ki Fortifye”

3, 4. (a) Kuma sa sink konpaynon Paul-la ti apele, ek kuma Paul ti konsider zot? (b) Ki vedir “enn led ki fortifye”?

³ Anu return ver lane 60 N.L. Lapot Paul ti anprizone a Rome. Finn met enn fos sarz lor li ki swadizan li pe mont enn konplo kont guvernman. (Actes 24:5; 25:11, 12) Paul mansyonn partikilyerman sink Kretyin ki’nn sutenir li: Tychique, so mesaze personel ki sorti l’Asie ek ki ti “esklav ansam avek li dan le Senyer”; Onésime, enn ‘frer fidel ek byineme’ ki sorti Colosses; Aristarque, enn Macédonien ki sorti Thessalonique ek ki pandan enn tan, ti dan prizon ansam avek Paul; Marc, kuzin Barnabas ki ti konpaynon misyoner Paul ek ekrivin l’Évangile ki port so non; ek Justus, enn parmi bann konpaynon Paul ki ti travay ansam avek li an faver “rwayom Bondye.” Paul dir: “Zot finn vinn enn led ki fortifye mwa.”​—Colossiens 4:​7-​11.

⁴ Paul finn servi enn expresyon ki ena buku pwa pu kalifye led ki so bann konpaynon fidel ti donn li. Li’nn servi enn mo Grec (parêgoria) ki’nn tradir par “led ki fortifye.” Sa mo Grec-la aparet enn sel fwa dan la Bib, zis dan sa verse-la. Se enn mo ki ena plizir sinifikasyon, ek ki servi sirtu dan domenn medikal.a Li kapav vedir konsolasyon, sulazman, uswa rekonfor. Paul ti bizin enn led kumsa pu fortifye li, ek se egzakteman sa ki sa sink kamarad-la finn donn li.

Kifer Paul Ti Bizin “enn Led Ki Fortifye” Li

5. Mem si li ti enn apot, ki Paul ti bizin, ek ki nu tu nu bizin detanzantan?

⁵ Petet sa etonn u ki enn kikenn kuma Paul, enn apot, ti bizin ki lezot fortifye li. Eh wi! Lapot Paul ti bizin sa led-la. Li vre ki so lafwa ti solid, ek li ti reysi tini ferm dan bann persekisyon fizik, dan “bann ku a lekse,” “suvan byin pre avek lamor,” ek dan bann lezot sufrans ankor. (2 Corinthiens 11:23-​27) Me, li ti enn imin apre tu! Ek nu tu, imin, ena enn moman dan nu lavi kot nu bizin ki lezot rekonfort nu ek fortifye nu lafwa. Mem Jésus ti resanti sa bezwin-la. La nwit avan li mor, enn anz ti aparet ar li dan zardin Gethsémané ek “ti fortifye li.”​—Luc 22:43.

6, 7. (a) A Rome, ki bann ti desevwar Paul, ek ki bann ti ankuraz li? (b) Ki bann konpaynon Kretyin Paul ti fer pu li pu montre ki zot vremem “enn led ki fortifye”?

⁶ Paul usi ti bizin ki lezot fortifye li. Kan li ti vinn Rome kuma enn prizonye, bann dimunn so prop ras pa ti byin akeyir li. Mazorite Juifs pa ti aksepte mesaz lor Royaume Bondye. Apre ki sertin Juifs, bann zom inportan, ti vizit Paul an prizon, liv Actes rakonte: “Sertin ti kumans krwar bann kitsoz ki [li] ti dir; me lezot ti refiz krwar. Donk, parski zot pa ti dakor ant zot, sakenn finn al dan so kote.” (Actes 28:17, 24, 25) Wi, zot pa ti apresye faver imerite ki Jéhovah ti pe manifeste anver zot. Sa ti fer Paul vremem buku lapenn! Gete kuma li ti exprim so santiman dan enn let ki li ti ekrir kongregasyon Rome, detrwa lane avan: “Dan mo leker, mo ena enn gran tristes ek enn duler ki pa’le fini. Parski mo ti pu swete ki mo separe ar Christ kuma enn kikenn modi, pu mo bann frer [bann Juifs], [setadir] mo prop ras.” (Romains 9:​2, 3) Me li ti reysi kanmem truv bann vre konpaynon fidel dan Rome; zot kuraz ek zot lafeksyon ti sulaz so leker. Zot ti so bann veritab frer spirityel.

⁷ Kuma sa sink frer-la ti vremem enn led ki ti fortifye Paul? Pa parski Paul ti anprizone, ki zot ti elwayn zot ar li. Okontrer, avek amur zot ti byin dispoze pu rann li servis. Zot ti fer bann kitsoz ki Paul pa ti kapav fer akoz li ti dan prizon. Par egzanp, zot ti azir kuma mesaze pu Paul; zot ti transmet bann kongregasyon so bann let ek bann instriksyon ki li ti dir zot. Zot ti amenn bann nuvel ankurazan pu Paul, konsernan bann frer a Rome ek dan lezot landrwa. Aparaman, zot ti fer Paul gayn bann linz liver, bann rulo ek bann kitsoz neseser pu li ekrir. (Éphésiens 6:​21, 22; 2 Timothée 4:​11-​13) Tu seki zot inn fer pu Paul, finn ankuraz li ek fortifye li pu ki li, an retur, li kapav vinn “enn led ki fortifye” lezot, ek usi bann kongregasyon.​—Romains 1:​11, 12.

Kuma U Kapav Vinn “enn Led Ki Fortifye”

8. Ki leson Paul anseyn nu lefet ki li finn aksepte avek limilite ki li bizin “enn led ki fortifye” li?

⁸ Ki nu kapav aprann dan sa resi lor Paul ek so bann konpaynon-la? Premyerman nu aprann ki sa demann kuraz ek enn lespri de sakrifis pu ed lezot dan zot problem. Dezyeman, nu bizin ena limilite pu rekonet ki nu bizin led kan nu pas par bann peryod difisil dan nu lavi. Paul pa ti zis rekonet ki li ti bizin led, me li ti byin apresye sa ek li ti usi felisit bann ki ti aport li sa led-la. Pu Paul, aksepte led li pa enn febles ni enn laont. Nu’si nu bizin pans parey. Si nu dir ki zame nu pa bizin ki lezot fortifye nu, nu pe konsider numem kuma superman! Anplis, legzanp Jésus montre nu ki mem enn dimunn parfe, parfwa bizin demann led.​—Hébreux 5:7.

9, 10. Ki bon rezilta sa kapav ena kan enn dimunn rekonet ki li bizin led, ek ki lefe sa kapav ena lor lezot manb dan lafami ek dan kongregasyon?

⁹ Kan bann frer responsab rekonet ki zot ena bann limit ek ki zot bizin led lezot, sa kapav ena enn bon lefe dan la kongregasyon. (Jacques 3:2) Sa konsolid relasyon ki ena ant bann ki ena lotorite dan la kongregasyon ek bann ki sumet ar sa lotorite-la. Sa favoriz enn bon lantant ek enn kominikasyon fran ant zot. Kan enn kikenn dispoze pu aksepte led, so limilite pus lezot ki dan mem sityasyon, pu fer parey. Ek sa montre ki mem si bann dimunn ena lotorite, zot inparfe ek nu kapav apros zot fasilman.⁠—Ecclésiaste 7:​20.

¹⁰ Par egzanp, si bann zanfan kone ki zot paran ti konn mem problem ek tantasyon kan zot ti zenn, sa pu fer zot aksepte pli fasilman konsey ki bannla donn zot. (Colossiens 3:​21) Kumsa, pu ena enn bon kominikasyon ant paran ek zanfan. Bann paran pu pli kapav ofer bann konsey Biblik ek bann zanfan pu pli dispoze pu aksepte sa bann konsey-la. (Éphésiens 6:4) Pareyman, kan bann manb kongregasyon konsyan ki bann ansyin usi fer fas ar bann problem, bann krint, laper ek traka, zot pu pli dispoze pu aksepte led ki bann ansyin donn zot. (Romains 12:3; 1 Pierre 5:3) La usi, pu ena enn bon kominikasyon, bann ansyin kapav donn bann konsey ki sorti dan la Bib, ek sa fortifye zot bann frer ek ser. Fode pa nu bliye ki nu bann frer ek ser byin bizin, plis ki zame avan, enn led ki fortifye zot.​—2 Timothée 3:1.

11. Kifer buku dimunn zordi bizin “enn led ki fortifye” zot?

¹¹ Ninport kot nu reste, kisannla nu ete, ubyin ki laz nu ena, nu tu defwa nu fer fas ar bann difikilte dan lavi. Sa fer parti dan sa lemond kot nu pe viv-la. (Révélation 12:12) Kan nu bulverse lor plan fizik ek afektif, sa teste valer nu lafwa. Nu kapav gayn bann leprev dan travay, dan lekol, dan lafami uswa dan la kongregasyon. Enn maladi grav uswa enn kitsoz ki’nn tromatiz nu dan lepase, sa usi kapav minn nu. Asterla si nu konzwin, enn ansyin, uswa enn bon kamarad dir ek fer kitsoz pu ankuraz nu, sa vremem apez nu. Wi, sa ena mem lefe ki kan nu pas enn lapomad lor enn parti nu lapo ki irite! Donk, si u remarke ki enn u bann frer dan la kongregasyon, li dekuraze, donn li enn led ki pu fortifye li. Uswa si u, u ena enn problem ki pe stres u, demann led avek bann ki kalifye lor plan spirityel.​—Jacques 5:​14, 15.

Ki Led la Kongregasyon Kapav Done

12. Ki sak manb kongregasyon kapav fer pu fortifye lezot?

¹² Tu dimunn dan la kongregasyon, mem bann zenn, kapav fer kitsoz pu fortifye lezot. Par egzanp, u regilarite dan reynion ek predikasyon kontribye buku pu fortifye lafwa lezot. (Hébreux 10:24, 25) U devuman dan u servis sakre ki u donn Bondye, montre u fidelite anver Jéhovah ek sa montre ki u pe res spirityelman lor u gard malgre bann difikilte. (Éphésiens 6:​18) U devuman kapav fortifye lezot.​—Jacques 2:​18.

13. Kifer sertin vinn inaktif ek ki nu kapav fer pu ed zot?

¹³ Parfwa, bann presyon dan lavi ek lezot difikilte kapav ralanti sertin ek fer zot vinn inaktif dan predikasyon. (Marc 4:​18, 19) Kitfwa nu pa truv bann inaktif dan reynion. Me, sirman zot ankor ena lamur pu Bondye dan zot leker. Ki kapav fer pu fortifye zot lafwa? Bann ansyin kapav ofer zot led par bann vizit. (Actes 20:35) Petet, bann ansyin kapav demann lezot manb kongregasyon ofer zot led zot usi. Bann vizit kumsa, ki ranpli ar lamur, kitfwa sa-mem medsinn ki bizin pu fortifye lafwa bann ki feb.

14, 15. Ki konsey Paul inn done an seki konsern fortifye lezot? Explike kuma enn kongregasyon ti met sa konsey-la an pratik.

¹⁴ La Bib ankuraz nu pu “konsol bann ki deprime, [ek] ed bann ki feb.” (1 Thessaloniciens 5:​14) Petet bann ki deprime truve ki pli ale, zot pe perdi kuraz ek ki zot pa pu kapav sirmont bann obstak san led enn kikenn. Eski u, u kapav propoz u led? Expresyon “ed bann ki feb” vedir usi “trap for” uswa “res atase ar” bann ki feb. Jéhovah byin kontan so bann brebi; zot ena buku valer pu Li. Li pa anvi perdi enn parmi zot. Eski u kapav ed la kongregasyon pu “trap for” bann ki feb lor plan spirityel ziska ki zot repran lafors?​—Hébreux 2:1.

¹⁵ Enn ansyin ti vizit enn kup ki ti inaktif pandan sizan. Ansyin-la ekrir: “Lamur ek bonte ki tut la kongregasyon finn montre anver zot, finn telman tus zot ki sa finn pus zot pu return dan trupo Bondye.” Nu ser, ki ti inaktif avan, koz lor bann vizit ki bann manb kongregasyon ti fer li: “Seki finn ed nu pu re-vinn aktif, se ki bann frer ek ser ki ti rann nu vizit zame pa ti kondann nu, ni zot ti kritik nu. Me plito, zot ti konpran nu ek zot ti donn nu lankurazman ki sorti dan la Bib.”

16. Kisannla ki tuletan dispoze pu ed bann ki bizin kuraz?

¹⁶ Wi, enn Kretyin ki sinser pran plezir pu fortifye lezot. Ek amezir ki bann sityasyon sanze dan nu lavi, kitfwa numem nu bizin ki nu bann frer fortifye nu. Me nu bizin konpran ki nu bann frer pa pu tuletan la kan nu bizin zot. Me selman, ena enn Kikenn ki pu tuletan la pu donn nu kuraz ek led ki nu bizin​—Jéhovah, nu Bondye.​—Psaume 27:10.

Jéhovah—Nu Prinsipal Surs Kuraz

17, 18. Ki mwayin Jéhovah ti servi pu fortifye so Garson, Jésus Christ?

¹⁷ Kan li ti lor poto, Jésus ti kriye so Papa: “Papa, mo les mo lespri dan to lamin.” (Luc 23:46) Apre sa, li ti mor. Enn tipe avan, so bann lennmi ti’nn aret li ek so bann kamarad pros ti abandonn li, zot ti sove parski zot ti per. (Matthieu 26:56) Jésus ti retruv li tusel; so sel Surs kuraz ti so Papa. Me, so konfyans an Jéhovah pa ti dan vid. Jéhovah ti sutenir li personelman an rekonpans pu so fidelite.​—Psaume 18:25; Hébreux 7:​26.

¹⁸ Kan Jésus ti lor later, Jéhovah ti donn so Garson lafors neseser pu gard so lintegrite ziska lamor. Par egzanp, zis apre so batem, kot Jésus ti pe kumans so minister, li ti tann lavwa so Papa. Jéhovah ti’nn rasir li ki li ena So laprobasyon ek ki Li kontan li. Kan Jésus ti bizin led, Jéhovah ti anvoy so bann anz pu fortifye li. Kan li ti fer fas ar pli gran leprev so lavi lor later, zis avan li mor, Jéhovah ti pran kont so bann siplikasyon ek so bann reket. San dut, tusala ti enn led ki ti fortifye Jésus.​—Marc 1:​11, 13; Luc 22:43.

19, 20. Ki garanti nu ena ki Jéhovah pu fortifye nu kan nu bizin led?

¹⁹ Jéhovah anvi vinn nu prinsipal Surs kuraz. (2 Chroniques 16:9) Limem la Surs pli gran lenerzi ek kuraz; donk, Li kapav vinn enn led ki fortifye nu kan bizin. (Isaïe 40:26) Lager, povrete, maladi, la mor ek nu prop linperfeksyon kapav met buku presyon lor nu. Kan nu bann problem dominn nu kuma enn “lennmi byin for,” Jéhovah kapav vinn nu kuraz. (Psaume 18:17; Exode 15:2) Li ena enn mwayin byin pwisan pu ed nu​—so lespri sin. Atraver so lespri sin, Jéhovah kapav “donn lafors selwi ki byin fatige,” pu ki li kapav ‘re-bat so lezel kuma enn leg.’​—Isaïe 40:29, 31.

²⁰ Lespri Bondye, samem pli gran lafors ki egziste dan liniver. Paul ti dir: “Pu tu kitsoz mo ena kuraz grasa Selwi ki donn mwa lafors.” Wi, nu Papa ki dan lesyel kapav donn nu “pwisans ki siperyer a la pwisans normal,” pu ki nu kapav fer fas ar nu bann problem, anatandan ki Li fer “tu kitsoz nuvo” dan Paradi ki Li pu etabli byinto.​—Philippiens 4:​13; 2 Corinthiens 4:7; Révélation 21:​4, 5.

[Note]

Eski U Rapel?

• Kuma bann frer dan Rome ti vinn “enn led ki fortifye” Paul?

• Dan ki fason nu kapav vinn “enn led ki fortifye” dan la kongregasyon?

• Kuma eski Jéhovah Li nu prinsipal Surs la fors?

[Zimage lor page 28, 29]

Bann frer ti “enn led ki fortifye” Paul, kan zot ti sutenir li fidelman, ankuraz li, ek rann li servis dan plizir fason

[Zimage lor page 31]

Bann ansyin zot premye pu fortifye trupo Bondye