Bann Dimoune Âgé Éna Valeur Dans la Congrégation
“Bann ki’nn planté dans lakaz Jéhovah . . . pou fleuri. Zot pou contigne prospéré mem kan zot cheveux inn vinn blanc.”—PSAUME 92:13, 14.
1. Couma beaucoup considère bann dimoune âgé?
JÉHOVAH content tou so bann serviteurs fidèle, bann ki âgé aussi. Pourtant, d’après enn rapport ki finn faire en Amérique, chaque l’année, apépré 500,000 dimoune âgé souffer à cause négligence, ou-soit parski zot passe misère dans différent façons. Plusieurs rapports montré ki sa problème-la existé partout dans le monde. D’après enn l’organisation, si éna sa problème-la, c’est parski “beaucoup dimoune pensé ki . . . bann dimoune âgé népli éna okenn utilité, zot pa productif ek zot dépann trop lor lézot.”
2. (a) Couma Jéhovah considère so bann serviteurs fidèle ki âgé? (b) Ki l’assurance éna dans Psaume 92:12-15?
2 Jéhovah éna beaucoup l’estime pou so bann serviteurs fidèle ki âgé. Li prend compte séki “nou été dans nou léker”—nou condition spirituel—au lieu ki Li arrête Li lor nou bann limites. (2 Corinthiens 4:16) Dans la Bible nou trouve sa l’assurance-la: “Enn dimoune droite pou fleuri couma enn palmier; li pou vinn grand couma enn cèdre Liban. Bann ki’nn planté dans lakaz Jéhovah, dans la cour nou Bondié, pou fleuri. Zot pou contigne prospéré mem kan zot cheveux inn vinn blanc, zot pou contigne reste gras ek frais, pou zot kapav annoncé ki Jéhovah, Li droite.” (Psaume 92:12-15) Enn l’examen sa bann versets-la, pou montré ou, ki âgé, dans ki domaine ou kapav apporte bann bienfaits dans la congrégation.
“Zot Pou Contigne Prospéré Mem kan Zot Cheveux Inn Vinn Blanc”
3. (a) Kifer bann dimoune droite, zot comparé ar bann palmiers? (b) Dans ki façon bann dimoune âgé kapav “contigne prospéré mem kan zot cheveux inn vinn blanc”?
3 Dans sa Psaume-la, bann dimoune droite comparé ar bann palmiers ki’nn ‘planté dans la cour nou Bondié.’ Zot “contigne prospéré mem kan zot cheveux inn vinn blanc.” Enn l’autre traduction dire: “Dans zot vieux jours, zot contigne rapporte fruits.” (Bible en français courant) Eski ou pa d’accord ki c’est enn pensé bien encourageant? Dans l’époque Biblique, dans bann pays de l’Est, li ti bien commun pou trouve dans bann la cour, bann joli palmiers bien droite ki ti produire bann dattes. Zot pa ti seulement joli, mais zot ti éna aussi beaucoup valeur parski zot ti rapporte fruits en abondance. Certain pié ti contigne rapporte fruits pendant plus ki cent ans.a Ou’si pareil, si ou reste bien enraciné dans la vérité, ou kapav contigne “rapporte bann bon fruits dans tou bon travail.”—Colossiens 1:10.
4, 5. (a) Ki fruits important bann Chrétiens bizin produire? (b) Donne bann l’exemples Biblique lor bann dimoune âgé ki’nn produire ‘le fruits des lèvres.’
4 Jéhovah atann ki bann Chrétiens produire ‘le fruits des lèvres,’ c’est-à-dire bann paroles ki glorifié Li ek so bann projets. (Hébreux 13:15) Eski sa versets-la concerne ou, ki âgé? Oui, certainement!
5 Dans la Bible, éna l’exemple bann dimoune âgé ki, sans crainte, inn rann témoignage lor Jéhovah ek lor so bann projets. Moïse ti éna plus ki “soixante-dix ans” kan Jéhovah ti faire li vinn so prophète ek so représentant. (Psaume 90:10; Exode 4:10-17) Mem si prophète Daniel ti âgé, sa pa ti empêche li rann témoignage avec courage, lor souveraineté Jéhovah. Kitfois Daniel ti éna plus ki 90 ans kan Belshatsar ti convoque li pou interprète enn drôle l’écriture lor muraillle. (Daniel, chapitre 5) Ki nou kapav dire lor l’apôtre Jean ki ti âgé li aussi? Vers la fin so la-vie ki li’nn passé fidèlement dans service Jéhovah, li ti emprisonné lor l’île Patmos ‘parski li ti koz lor Bondié ek li ti donne témoignage lor Jésus.’ (Révélation 1:9) Sûrement, ou kapav rappelle beaucoup personnages Biblique ki’nn produire ‘le fruits des lèvres’ malgré ki zot ti âgé.—1 Samuel 8:1, 10; 12:2; 1 Rois 14:4, 5; Luc 1:7, 67-79; 2:22-32.
6. Couma Jéhovah inn servi bann “vieillards” pou prophétisé dans derniers jours?
6 L’apôtre Pierre ti cite bann paroles prophète Yoël, enn prophète Hébreu, ek li ti dire: “ ‘Dans derniers jours,’ Bondié dire, ‘Mo pou verse enn parti mo l’esprit lor toute sorte qualité dimoune [bann “vieillards” aussi], . . . ek zot pou prophétisé.’ ” (Actes 2:17, 18; Yoël 2:28) Justement, dans derniers jours ki nou pé vive aster-la, Jéhovah inn servi bann membres âgé parmi bann Chrétiens oints ek parmi “lézot brebis,” pou proclame séki Li pou faire dans l’avenir. (Jean 10:16) Certain parmi zot finn produire bann fruits en rapport avec Royaume Bondié, fidèlement, pendant plusieurs l’années.
7. Cite enn l’exemple pou montré couma bann Chrétiens âgé pé contigne produire bann fruits en rapport avec le Royaume, malgré enn mauvais la-santé.
7 Nou prend l’exemple Sonia, ki’nn commence prêche la bonne nouvelle à plein temps en 1941. Li ti conduire régulièrement bann l’étude la Bible kot li, malgré enn maladie chronique ki li’nn supporté pendant longtemps. Sonia dire: “Prêche la bonne nouvelle, sa faire parti dans mo la-vie. En réalité, c’est mo la-vie. Mo pa’lé arrêté.” Pa trop longtemps, Sonia ek so soeur Olive, ti partage la bonne nouvelle avec Janet, enn madame ki zot ti joinde le temps zot ti pé atann dans l’hôpital. Janet ti malade ek li pa ti éna beaucoup le temps pou vive. Mama Janet ti enn Catholique bien pratiquant. Li ti tellement touché par l’intérêt sincère ki bannla inn manifesté envers so tifi, ki li ti accepté pou étudié la Bible. Zordi li pé faire bann bon progrès. Eski ou’si ou kapav saisi bann l’occasions coumsa pou produire bann fruits en rapport avec le Royaume?
8. Couma Caleb ti montré ki li éna confiance en Jéhovah dans so vieux jours, ek dans ki façon bann Chrétiens âgé kapav imite so l’exemple?
8 Malgré zot limite, bann Chrétiens âgé pé persévéré avec courage pou prêche le Royaume. Zot pé imite l’exemple Caleb, enn Israélite fidèle, ki ti accompagne Moïse dans désert pendant quarante ans. Caleb ti éna 79 ans kan li ti traverse la Rivière Jourdain pou rentre dans la Terre Promise. Pendant six ans, li ti combatte dans l’armée Israël, ek zot finn gagne beaucoup victoires. Kitfois li ti kapav pensé ki li’nn assez faire, ek li kapav repose inpé asterla. Mais non, avec courage li ti demann pou al combatte kont “bann grand la ville entouré ar muraille” ki ti dans bann montagnes Juda. En plus, sa bann l’endroits-la ti habité par bann Anaqim, bann géants. Mais avec l’aide Jéhovah, Caleb ti réussi “tire zot dans zot pays, pareil couma Jéhovah ti promette.” (Josué 14:9-14; 15:13, 14) Ou’si ou kapav sûr ki Jéhovah pou avec ou, pareil couma Li ti avec Caleb. Li pou soutenir ou pendant ki ou pé contigne produire bann fruits en rapport avec le Royaume, mem si ou âgé. Si ou reste fidèle, Li pou donne ou enn place dans le monde nouveau ki Li’nn promette.—Isaïe 40:29-31; 2 Pierre 3:13.
“Zot Pou Contigne Reste Gras ek Frais”
9, 10. Couma bann Chrétiens âgé kapav garde zot la-foi solide ek reste fort lor plan spirituel? (Guette l’encadré page 11.)
9 Enn écrivain Psaume ti montré ki bann serviteurs Jéhovah ki âgé, pou rapporte beaucoup fruits. Li ti chanté: “Enn dimoune droite pou fleuri couma enn palmier; li pou vinn grand couma enn cèdre Liban. Zot pou contigne prospéré mem kan zot cheveux inn vinn blanc, zot pou contigne reste gras ek frais.”—Psaume 92:12, 14.
10 Couma ou kapav reste fort lor plan spirituel malgré ou l’âge? Eski ou koné ki, si enn palmier reste toujours joli, c’est parski li gagne de l’eau continuellement. Ou’si pareil, grâce à l’eau de la vérité ki ou pou gagné kan ou étudié la Bible, ek kan ou fréquente l’organisation Jéhovah, sa pou faire ou reste fort spirituellement. (Psaume 1:1-3; Jérémie 17:7, 8) Ou pou éna enn grand valeur pou lézot grâce à ou la-force spirituel. Anou guetté couma l’exemple grand prêtre Yehoïada, ki ti âgé, confirme sa.
11, 12. (a) Ki rôle important Yehoïada finn joué dans l’histoire Royaume Juda? (b) Couma Yehoïada ti servi so l’influence pou soutenir vrai l’adoration?
11 Kitfois Yehoïada ti éna plus ki 100 ans kan la Reine Athalie, ki ti éna beaucoup l’ambition, ti touye so bann propre ti zenfants pou li kapav prend pouvoir dans pays Juda. Yehoïada ti âgé, ki li ti pou kapav faire? Pendant six ans, li ek so madame ti cachiette Yehoash, seul héritier trône Juda, dans temple. Ensuite, enn jour, sans ki personne atann, kan Yehoash ti éna sept ans, Yehoïada ti proclame li le roi ek li ti faire touye Athalie.—2 Chroniques 22:10-12; 23:1-3, 15, 21.
12 Yehoïada ti responsable l’éducation le roi Yehoash ek li ti servi so l’influence pou soutenir vrai l’adoration. Li ti “faire enn l’alliance entre li, tou lé peuple ek le roi, ki zot pou contigne servi Jéhovah.” Lor l’ordre Yehoïada, le peuple ti détruire place kot ti adore fausse bondié Baal, ek zot ti tire so bann l’autels, so bann zimages ek so bann prêtres. C’est aussi grâce à l’influence Yehoïada, ki Yehoash ti remette en place service ki ti faire dans temple, ek plusieurs réparations nécessaire ki ti bizin faire. “Yehoash ti contigne faire séki droite devant Jéhovah , touletan ki prêtre Yehoïada ti enseigne li.” (2 Chroniques 23:11, 16-19; 24:11-14; 2 Rois 12:2) Kan Yehoïada ti mort à l’âge 130 ans, le peuple ti honore li dans enn façon exceptionnel. Zot ti enterre li kot enterre bann les rois, parski “li ti faire le bien en Israël, ek envers vrai Bondié ek envers So lakaz.”—2 Chroniques 24:15, 16.
13. Couma bann Chrétiens âgé kapav ‘faire le bien envers vrai Bondié ek envers so lakaz’?
13 Kitfois ou pa kapav faire beaucoup dans service Jéhovah parski ou péna enn bon la-santé ou-soit à cause lézot situations encore. Mais kan-mem sa, ou encore kapav faire kitsoz pou ‘faire le bien envers vrai Bondié ek envers so lakaz.’ Dans ki façon? Ou kapav montré ou zèle pou lakaz spirituel Jéhovah kan ou assisté réunions ek kan ou participé, ek aussi kan ou sorti en prédication autant ki possible. Si ou accepté volontairement bann conseils Biblique, ek si ou soutenir “l’esclave fidèle et avisé” ek la congrégation, sa pou fortifié ou bann frères ek soeurs. (Matthieu 24:45-47) Ou kapav aussi incite zot pou éna “l’amour ek pou faire bann bon actions.” (Hébreux 10:24, 25; Philémon 8, 9) Ou pou vinn enn bénédiction pou zot si ou suive conseil l’apôtre Paul, ki ti dire: “Bann zom âgé bizin équilibré dans zot l’habitudes, zot bizin sérieux, ek zot bizin garde zot capacité pou raisonné. Zot bizin aussi fort dans la-foi, dans l’amour ek dans l’endurance. Pareillement, bann femmes âgé bizin éna enn conduite ki montré respect pou Bondié, fodé pa zot calomnié lézot, fodé pa aussi ki zot esclave beaucoup divin, mais zot bizin enseigne séki bon.”—Tite 2:2-4.
14. Ki bann Chrétiens ki ancien depuis longtemps, kapav faire pou soutenir vrai l’adoration?
14 Eski sa faire longtemps ki ou enn ancien dans congrégation? Si oui, suive conseil enn frère ki ancien depuis longtemps, li dire: “pa garde la sagesse ki ou finn gagné pendant plusieurs l’années pou ou tousel, servi li pou aide lézot. Délègue bann responsabilités ek partage ou l’expérience avec bann ki envie aprann . . . Trouve capacité ki zot éna ek aide zot pou développe sa bann capacité-la. Faire bann préparations pou l’avenir.” (Deutéronome 3:27, 28) Ou bann zefforts sincère pou prêche Royaume Bondié pou apporte beaucoup bienfaits dans la congrégation.
“Annoncé Ki Jéhovah, Li droite”
15. Dans ki façon bann Chrétiens âgé “annoncé ki Jéhovah, Li droite”?
15 C’est avec plaisir ki bann Chrétiens âgé assume zot responsabilité pou “annoncé ki Jéhovah, Li droite.” Si ou enn Chrétien âgé, ou kapav montré lézot par ou paroles ek ou actions ki ‘Jéhovah, Li couma enn Rocher pou ou, péna l’injustice en Li.’ (Psaume 92:15) Bann palmiers donne enn témoignage silencieux lor bann qualités extraordinaire nou Créateur. Mais, Jéhovah inn donne ou privilège pou rann témoignage lor Li, ar bann dimoune ki pé commence adore Li dans nou l’époque. (Deutéronome 32:7; Psaume 71:17, 18; Yoël 1:2, 3) Kifer li important ki ou faire sa?
16. Ki l’exemple Biblique montré l’importance pou “annoncé ki Jéhovah, Li droite”?
16 Josué ti dirige nation Israël pendant enn certain temps. Kan li ti ‘vinn vieux,’ li ti “appelle tou bann Israélites, bann anciens, bann chefs, bann juges ek bann officiers,” pou rappelle zot bann actions droite ki Jéhovah ti’nn faire. Li ti dire zot: “Péna enn seul parole parmi tou bann paroles ki Jéhovah zot Bondié finn dire zot, ki pa finn réalisé. Tou finn réalisé pou zot.” (Josué 23:1, 2, 14) Pendant enn temps, sa bann paroles-la finn encourage le peuple pou reste fidèle. Mais seulement, après la mort Josué, “enn l’autre génération finn levé . . . ki pa’nn konn Jéhovah, ni tou séki Li ti faire pou Israël. Ek bann Israélites finn commence faire séki mauvais devant Jéhovah ek zot finn commence servi bann Baals.”—Juges 2:8-11.
17. Couma Jéhovah inn agir envers so peuple dans nou l’époque?
17 Li vrai ki la congrégation Chrétienne pa dépann lor témoignage bann Chrétiens âgé pou li reste fidèle zordi. Mais seulement, nou la-foi en Jéhovah ek dans so bann promesses vinn pli fort kan nou tann zot témoignage personnel lor “grand travail” ki Jéhovah inn accompli pou so peuple pendant derniers jours. (Juges 2:7; 2 Pierre 1:16-19) Si sa faire plusieurs l’années ki ou dans l’organisation Jéhovah, ou kapav rappelle l’époque kot pa ti éna beaucoup proclamateurs dans ou l’endroit ou-soit dans ou pays. Kitfois mem, ti éna l’opposition. Avec le temps, ou finn remarqué couma Jéhovah finn enlève certain obstacles ek finn ‘accélère’ l’activité prédication. (Isaïe 54:17; 60:22) Ou finn aussi trouvé couma Jéhovah finn donne enn meilleur compréhension lor bann vérités Biblique. Ek ou finn témoin bann améliorations ki finn éna dans so l’organisation visible. (Proverbes 4:18; Isaïe 60:17) Eski ou rod encourage lézot ek partage avec zot ou l’experience concernant bann actions droite ki Jéhovah finn faire? Sa kapav éna enn l’effet positif lor ou bann compagnons, ek faire zot vinn fort dans la vérité!
18. (a) Donne enn l’exemple pou montré ki bienfaits durable sa amené kan ou ‘dire lézot ki Jéhovah, Li droite.’ (b) Couma eski personnellement, ou finn faire l’experience ki Jéhovah Li droite?
18 Ki ou kapav dire lor bann moments kan ou finn senti l’amour ek direction Jéhovah dans ou la-vie personnelle? (Psaume 37:25; Matthieu 6:33; 1 Pierre 5:7) Enn soeur âgé ki appelle Martha, habitué encourage lézot par sa bann paroles-la: “N’importe ki arrivé, jamais pa quitte Jéhovah. Li pou soutenir ou.” Sa conseil-la finn éna enn grand l’effet lor Tolmina, enn l’étude Martha ki finn baptisé vers 1960. Tolmina raconté: “Mo ti bien découragé kan mo mari ti mort, mais sa conseil-la finn aide moi pou mo pa manque okenn réunions. Ek Jéhovah finn vrémem fortifié moi pou contigne servi Li.” Pendant plusieurs l’années, Tolmina finn donne sa mem conseil-la beaucoup dimoune ki’nn étudié la Bible avec li. Oui, kan ou encourage ou bann compagnons, ek kan ou koz lor bann actions droite ki Jéhovah finn faire, sa kapav fortifié zot la-foi.
Jéhovah Éna Beaucoup L’estime pou So Bann Serviteurs Fidèle Ki Âgé
19, 20. (a) Couma Jéhovah considère séki so bann serviteurs âgé pé faire? (b) Ki nou pou examiné dans prochain l’article?
19 Bann dimoune dans nou l’époque népli éna reconnaissance pou bann dimoune âgé ek zot péna le temps pou prend zot compte. (2 Timothée 3:1, 2) Kan koz bann dimoune âgé, c’est souvent à cause séki zot finn faire dans le passé—séki zot ti été ek non séki zot été asterla. Par contre, la Bible dire: “Bondié pa injuste pou blié zot travail ek l’amour ki zot finn montré pou so nom, kan zot finn servi bann saints, ek ki zot pé contigne servi [bannla].” (Hébreux 6:10) Bien-sûr, Jéhovah rappelle bann bon actions ki ou finn faire dans le passé. Mais, Li aussi estime ou pou séki ou pé contigne faire dans so service. Oui, Jéhovah considère bann Chrétiens âgé ki fidèle, couma bann dimoune ki productif, ki fort spirituellement, ki donne enn témoignage vivant lor so pouvoir.—Philippiens 4:13.
20 Eski ou considère bann membres âgé dans la congrégation couma Jéhovah considère zot? Si oui, sa pou incite ou pou manifesté l’amour envers zot. (1 Jean 3:18) Dans prochain l’article nou pou guetté couma nou kapav montré nou l’amour ek prend soin bann dimoune âgé, dans bann façons pratique.
[Note]
a Dans chaque grappe dattes ki enn palmier ti rapporté, ti kapav éna apépré mille dattes ek li ti pèse 8 kilos ou-soit plus. Enn écrivain dire ki “pendant so l’existence, enn palmier ti kapav rapporte environ deux ou trois tonnes dattes, en récompense pou so propriétaire.”
Ki Ou Pou Réponn?
• Dans ki façon bann Chrétiens âgé “rapporte bann fruits”?
• Kifer bann Chrétiens âgé ki fort spirituellement, zot éna enn grand valeur?
• Couma bann Chrétiens âgé kapav “annoncé ki Jéhovah, Li droite”?
• Kifer Jéhovah éna enn grand l’estime pou bann Chrétiens ki’nn servi Li depuis longtemps?
[L’encadré lor page11]
Couma Zot Inn Garde enn la-Foi Solide
Ki finn aide bann Chrétiens ki longtemps dans la vérité pou garde zot la-foi solide ek pou garde enn bon spiritualité? Guette séki certain finn dire:
“Li bien important ki nou lire bann passages la Bible ki concerne nou relations avec Jéhovah. Plusieurs nuits, mo récite Psaume 23 ek 91.”—Olive, baptisé en 1930.
“Mo faire moi enn devoir pou assisté chaque discours baptême ek pou écoute zot bien, coumadir c’est mo-mem ki pé prend baptême. Enn kitsoz ki aide moi pou reste fidèle séki mo toujours rappelle ki mo finn voué moi ar Jéhovah.”—Harry, baptisé en 1946.
“Faire la prière toulé jours, c’est enn kitsoz bien important ek touletan nou bizin demann Jéhovah so l’aide, so protection, so bénédiction, ek ‘prend Li compte dans tou séki nou faire.’ ” (Proverbes 3:5, 6)—Antônio, baptisé en 1951.
“Kan mo écoute l’expérience bann dimoune ki encore pé servi Jéhovah fidèlement après plusieurs l’année, sa donne moi encore plus motivation pou contigne reste fidèle.”—Joan, baptisé en 1954.
“Fodé pa ki nou ena enn trop grand l’opinion lor nou-mem. Tou séki nou éna, c’est grâce à faveur Bondié, nou pa mérite nanyin. Si nou pense coumsa, sa pou aide nou pou contigne tourne vers l’organisation Jéhovah pou gagne la nourriture spirituel ki nou bizin pou enduré ziska la fin.”—Arlène, baptisé en 1954.
[Zimage lor page 9]
Bann Chrétiens âgé rapporte bann fruits du Royaume ki éna valeur
[Zimage lor page 12]
Bann Chrétiens âgé ki fort spirituellement éna enn grand valeur pou lézot