Eski Ou Prend Plaisir Dans “la Loi Jéhovah”?
“Heureux sa dimoune . . . [ki] prend plaisir dans la loi Jéhovah.”—PSAUME 1:1, 2.
1. Kifer nous, bann serviteurs Jéhovah, nous heureux?
JÉHOVAH soutenir so bann fidèle serviteurs et Li béni zot. Li vrai ki nous konn beaucoup l’épreuves. Mais nous pé konn aussi enn vrai bonheur. Et sa li tout-à-fait normal parski nous pé servi enn “Bondié ki heureux,” et so l’esprit saint faire nous développe la joie dans nou léker. (1 Timothée 1:11; Galates 5:22) La joie c’est enn sentiment de bonheur ki nous ressenti kan nous pé atann enn kitsoz ki bon, ou kan nou’nn fini recevoir li. Eh bien certainement, nou Père céleste donne nous bann kitsoz ki bon. (Jacques 1:17) Donc, c’est pou sa ki nous heureux.
2. Ki psaumes nous pou al examiné?
2 Livre Psaumes koz beaucoup lor bonheur. Nous trouve sa par exemple, dans Psaumes 1er ek 2eme. Nous pa koné exactement kisannla ki finn compose Psaume 1er. Par contre, d’après bann premiers disciples Jésus Christ, c’est David, le roi Israël, ki finn compose 2ème Psaume. (Actes 4:25, 26) Psaume 1er commence par sa bann paroles inspiré-la: “Heureux sa dimoune ki pa finn marche dans conseils bann méchants.” (Psaume 1:1) Dans sa l’article-la ek dans l’article ki vini après, nous pou guetté ki bann raisons Psaumes 1er ek 2eme donne nous, pou montré kifer nous heureux.
Le Bonheur—Ki So Secret?
3. D’après Psaume 1:1, kifer enn dimoune ki obéir Bondié, li enn dimoune heureux?
3 Psaume 1er montré nous kifer enn dimoune ki obéir Bondié, li enn dimoune heureux. Note bann raisons pou sa, ki nous kapav lire dans sa psaume-la: “Heureux sa dimoune ki pa finn marche dans conseils bann méchants, ki pa finn deboute lor chemin bann pécheurs, ek ki pa finn assize avec bann moqueurs.”—Psaume 1:1.
4. Ki bon l’exemple Zekaria ek Élizabeth ti donné?
4 Pou konn vrai bonheur, nous bizin respecté bann principes juste Jéhovah dans nou la-vie. Zekaria ek Élisabeth ti gagne le grand privilège pou vinn bann parents Jean le Baptiste. La Bible dire ki zot “ti bann dimoune juste devant Bondié parski zot ti marche fidèlement en accord avec tou bann commandements ek la-lois Jéhovah.” (Luc 1:5, 6) Nous aussi nous pou heureux, si nous marche pareil couma zot ek si nous pa “marche dans conseils bann méchants,” c’est-à-dire suive zot bann mauvais conseils.
5. Ki pou aide nous évite “chemin bann pécheurs”?
5 Si nous rejette manière pensé bann méchants, nous pa pou ‘deboute lor chemin bann pécheurs.’ Littéralement, sa veut dire ki nous pa pou fréquente bann l’endroits immoral ki péna enn bon réputation, kot normalement sa bann dimoune-la zot allé. Mais ki nous bizin faire, si nous tenté pou participe avec bann pécheurs dans zot péché? Nous bizin demann l’aide Bondié dans la prière, pou ki nous agir en harmonie avec sa bann paroles Paul-la: “Pa forme enn l’attachement ki pa assorti, avec bann incroyants. Parski, ki rapport éna entre la justice ek l’injustice? Ou-soit ki rapport éna entre la lumière ek noirté?” (2 Corinthiens 6:14) Si nous faire Bondié confiance ek si nou “léker [li] pur,” nous pou rejette l’attitude ek manière vive bann pécheurs. Nou mobiles ek nou bann désirs pou pur, et nou ‘la-foi pa pou hypocrite.’—Matthieu 5:8; 1 Timothée 1:5.
6. Kifer eski nous bizin faire bien attention avec bann moqueurs?
6 Pou faire Jéhovah plaisir, fodé pa nous “assize avec bann moqueurs.” Pou certains, l’attachement avec Bondié, c’est enn kitsoz ki faire zot rié. Mais dans sa bann ‘dernier jours-la,’ si éna enn groupe dimoune ki souvent bien méprisant dans zot moqueries, c’est bann ki finn vinn apostats. Note l’avertissement ki l’apôtre Pierre ti donne so bann compagnons Chrétiens: “Bien-aimés, . . . zot konn sa avant tou: ki dans dernier jours, pou éna bann moqueurs avec zot moqueries, ki pou agir selon zot désirs. Et zot pou dire: ‘Li pa ti promette ki li pou vini. Kot li été? Depuis la mort nou bann ancêtres, tou kitsoz encore toujours pareil couma zot ti été depuis commencement la création.’ ” (2 Pierre 3:1-4) Si nous pa ‘assize jamais avec bann moqueurs,’ nous pou évite malheur inévitable ki pé vinn lor zot.—Proverbes 1:22-27.
7. Kifer nous bizin prend à coeur bann paroles Psaume 1:1?
7 Li bon ki nous prend à coeur sa bann premier paroles Psaume 1er-la. Sinon, nous risqué perdi spiritualité ki nous finn développé à travers nou l’étude la Bible. En fait, doucement-doucement nou situation kapav vraiment gâté. Nous pou commence prend la pente si nous suive conseil bann méchants. Lerla kitfois, nous pou commence fréquente zot régulièrement. Avec le temps, nous kapav mem vinn bann apostats moqueur, ki péna la foi. Oui, si nous fréquente sa bann dimoune-la de près, zot mauvais l’attitude pou déteint lor nous, et sa risqué ruine nou relation avec Jéhovah. (1 Corinthiens 15:33; Jacques 4:4) Fodé jamais nous laisse enn kitsoz coumsa arrive nous!
8. Ki pou aide nous garde nou l’esprit fixé lor bann kitsoz spirituel?
8 La prière pou aide nous garde nou l’esprit fixé lor bann kitsoz spirituel, ek li pou empêche nous fréquente bann méchants. L’apôtre Paul finn écrire: “Pa prend tracas, mais touletan par la prière, par supplication avec remerciements, demann Bondié séki zot bizin. Et lerla, la paix Bondié ki pli supérieur ki tou pensée, pou veille lor zot léker ek lor zot l’esprit par moyen Christ Jésus.” Pli loin, l’apôtre Paul encourage nous pou prend bien compte bann kitsoz ki vrai, ki sérieux, ki juste, ki propre, ki vaut la peine content, ki dimoune koz en bien, ki moralement bon ek ki mérite louange. (Philippiens 4:6-8) Anou agir en harmonie avec sa conseil Paul-la, ek pa rabaisse nous au mem niveau ki bann méchants.
9. Mem si nous pa participe dans zot mauvais pratiques, ki nous faire pou aide toute sorte qualité dimoune?
9 Mem si nous pa participe dans zot mauvais pratiques, kan-mem nous contigné donne zot enn témoignage avec tact. C’est séki l’apôtre Paul ti faire kan li ti devant Gouverneur Romain Félix. Paul ti koz “lor la justice, lor maîtrise de soi, ek lor jugement ki pé vini.” (Actes 24:24, 25; Colossiens 4:6) Pareillement donc, nous prêche la bonne nouvelle du Royaume avec toute sorte qualité dimoune, et nous montré nous bon envers zot. Nous éna confiance ki bann “ki bien disposé pou la vie éternelle,” zot pou vinn croyant ek zot pou prend plaisir dans la loi Bondié.—Actes 13:48.
Li Prend Plaisir Dans la Loi Jéhovah
10. Kan ou faire ou l’étude personnel, couma bann pensées important kapav reste gravé dans ou l’esprit ek dans ou léker?
10 Pli loin dans Psaume 1er, nous lire concernant sa dimoune ki heureux-la: “So plaisir li dans la loi Jéhovah, et li lire li à voix basse la-nuit li-jour.” (Psaume 1:2) En tant ki serviteurs Bondié, nous ‘prend plaisir dans la loi Jéhovah.’ Kan nous étudié ek nous médité personnellement, parfois si c’est possible, nous lire “à voix basse,” c’est-à-dire nous lire pou nou-mem. Kan nous lire la Bible coumsa, bann pensées important pou reste gravé dans nou l’esprit ek dans nou léker.
11. Kifer nous bizin lire la Bible “la nuit li-jour”?
11 “L’esclave fidèle ek avisé” encourage nous pou lire la Bible chaque jour. (Matthieu 24:45) Parski nous envie bien comprend message ki Jéhovah éna pou l’humanité, li bon ki nous lire la Bible “la-nuit li-jour”—oui, mem kan nous pa pé gagne sommeil a-soir. Pierre finn donne nous sa conseil-la: “Couma bann tibaba ki’nn fek né, cultive enn grand désir pou du lait pur parole [Bondié], pou ki grâce à sa, zot kapav grandi ek gagne la vie.” (1 Pierre 2:1, 2) Eski ou prend plaisir pou lire Parole Bondié toulé-jours ek a-soir pou médite lor là? Compositeur sa psaume-la li, li ti faire sa.—Psaume 63:6.
12. Si nous prend plaisir dans la loi Jéhovah, ki sa pou pousse nous pou faire?
12 Nous bizin prend plaisir dans la loi Bondié; nou bonheur éternel dépann lor là. La loi Bondié li parfait ek juste. Kan nous applique li dans nou la-vie, nous gagne enn grand récompense en retour. (Psaume 19:7-11) Disciple Jacques ti écrire: “Celui ki examine en profondeur la loi parfait, [la loi] de la liberté, ek ki persévéré ladan, sa dimoune-la, parski li pa blié séki li’nn tendé, mais li mette sa en pratique, li pou heureux kan li faire [sa].” (Jacques 1:25) Si vrémem nous prend plaisir dans la loi Jéhovah, nous pa pou laisse enn jour passé sans ki nous examine bann kitsoz spirituel. Au contraire, nous pou motivé pou ‘examine bann kitsoz profond concernant Bondié’ ek nous pou mette le Royaume en premier dans nou la-vie.—1 Corinthiens 2:10-13; Matthieu 6:33.
Li Pou Vinn Pareil Couma enn Pié
13-15. Ki manière nous kapav ressemblé enn pié ki pousse dans bord de l’eau?
13 Psaume 1er contigne description sa dimoune juste-la, li dire: “Vraiment, li pou vinn pareil couma enn pié ki’nn planté dans bord bann la-rivière, et ki rapporte fruits dans so saison. So feuillage jamais pa sec, et tou séki li faire, réussi.” (Psaume 1:3) Pareil couma tou dimoune ki imparfait, bann serviteurs Jéhovah aussi konn bann situations difficile dans zot la-vie. (Job 14:1) Peut-être nous pé faire face avec la persécution ek lézot l’épreuves à cause nou la-foi. (Matthieu 5:10-12) Mais, pareil couma enn pié solide ki en bonne santé, résisté bann di-vent fort, nous aussi, nous réussi supporte bann l’épreuves grâce à l’aide Jéhovah.
14 Enn pié ki pousse dans enn l’endroit kot touletan éna de l’eau, jamais li pa sec, mem si faire bien chaud ou-soit éna la sécheresse. Nous aussi, si nous éna la crainte pou Bondié, nous pou touletan gagne la force avec Jéhovah, parski so puissance jamais fini. Paul ti tourne vers Bondié pou gagne l’aide, et donc li ti kapav dire: “Pou tou kitsoz, mo éna la force grâce à celui [Jéhovah] ki donne moi la puissance.” (Philippiens 4:13) Kan l’esprit saint Jéhovah guide nous ek li soutenir nous, nous pa séti, mais nous reste bien ‘vert’ lor plan spirituel. Nous produire bann fruits dans nou service pou Bondié ek nous manifesté aussi le fruit de l’esprit.—Jérémie 17:7, 8; Galates 5:22, 23.
15 Dans Psaume 1:3, écrivain-la servi enn mot Hébreu ki’nn traduire par “pareil couma.” Ici, li pé compare deux kitsoz ki différent, mais ki pourtant éna enn qualité en commun. Oui, dimoune ek pié zot différent. Enn pié ki pousse dans bord de l’eau, li touletan vert, en bonne santé. Eh bien, c’est sa ki sûrement finn faire compositeur sa psaume-la pense prospérité spirituel bann dimoune ki ‘prend plaisir dans la loi Jéhovah.’ Si nous prend plaisir dans la loi Bondié, nous kapav vive longtemps, couma enn pié; à vrai dire, nous kapav vive éternellement.—Jean 17:3.
16. Kifer ek dans ki façon ‘tou séki nous faire, réussi’?
16 Kan nous garde enn conduite droite, Jéhovah aide nous pou faire face avec bann l’épreuves ek difficultés. Sa faire nous reste joyeux ek faire nous produire bann fruits dans nou service pou Bondié. (Matthieu 13:23; Luc 8:15) ‘Tou séki nous faire, réussi’ parski nou principal l’objectif c’est faire volonté Jéhovah. Étant donné ki Bondié touletan réussi séki Li’nn décidé pou faire ek ki nous, nous content so bann commandements, sa faire nous prospéré lor plan spirituel. (Genèse 39:23; Josué 1:7, 8; Isaïe 55:11) Et tou sa, mem kan nous bizin affronte bann difficultés.—Psaume 112:1-3; 3 Jean 2.
Bann Méchants Parette Dans Bien
17, 18. (a) Ar ki kitsoz le psalmiste compare bann méchants? (b) Mem si bann méchants pé prospéré matériellement, kifer zot péna enn sécurité durable?
17 Situation bann méchants li vraiment différent avec situation bann dimoune juste, pa vrai? Bann méchants parette dans bien lor plan matériel, du moins pou enn certaine temps. Mais zot pa prospéré lor plan spirituel. C’est séki nous kapav lire pli loin dans Psaume 1er: “Bann méchants pa coumsa. Zot, zot couma la bale ki envolé par du vent. Ala kifer, devant jugement, pa pou accepté bann méchants, ek bann pécheurs pa pou dans l’assemblée bann justes.” (Psaume 1:4, 5) Noté ki sa psaume-la dire ki “bann méchants pa coumsa.” Sa veut dire ki zot pa couma bann dimoune ki faire plaisir Bondié, ek ki comparé ar bann pié ki rapporté ek ki vive longtemps.
18 Mem si bann méchants pé prospéré lor plan matériel, zot péna enn sécurité durable. (Psaume 37:16; 73:3, 12) Zot ressemblé sa zom riche ki pa raisonnable, ki Jésus ti cité dans enn illustration. Au fait, Jésus ti cite sa illustration-la, zis après ki enn dimoune ti demann li réglé enn problème l’héritage entre li ek so frère. Guette séki Jésus ti dire: “Ouver zot lizié, et pa envié séki lézot éna. Parski, mem si enn dimoune li dans l’abondance, so la-vie pa dépann lor bann kitsoz ki li éna.” Lerla, li raconte zistoire enn zom riche ki finn faire enn joli récolte. Alors, li décide craze so bann store, pou construire séki pli grand pou ki li kapav ramasse tou so bann dibien. Ensuite, monsieur-la décide pou mangé, boire, ek profite la vie. Mais Bondié dire li: “Toi, zom ki pa raisonnable, sa la-nuit la-mem bannla pé réclame to la-vie. Kisannla donc pou hérite tou séki to’nn ramassé?” Pou accentué sa pensée bien important-la, Jésus ajouté: “Ala séki pou arrive enn dimoune ki ramasse bann trésors pou li-mem, mais ki pa riche envers Bondié.”—Luc 12:13-21.
19, 20. (a) Expliqué couma la grain ti batté ek vanné dans le passé. (b) Kifer bann méchants zot couma la bale?
19 Bann méchants pa “riche envers Bondié.” Zot péna ni sécurité ni stabilité. Zot coumadire la bale, sa fine couche ki recouver bann la-grains céréales. Dans le passé, après récolte, ti bizin batte la grain dans enn l’endroit plate, dans hauteur. C’est enn l’appareil ki éna bann lé-dents bien fité en-bas ek ki tiré par bann zanimaux, ki ti craze bann tiges ek la paille pou sépare la grain avec la bale. Après sa, avec l’aide enn la-pelle ou-soit enn fourchette ti bizin vanne la grain, c’est-à-dire envoye li dans l’air kont du vent. (Isaïe 30:24) Tandis ki la brise ti jette la paille de côté ek la bale li envolé dans l’air, la-grain li, li ti retombe en place. (Ruth 3:2) Finalement, ti tamize la-grain-la pou enlève bann ti roches ek lézot saleté, et après sa, la grain ti prêt pou stocké ou-soit pou crazé. (Luc 22:31) Mais, la bale li, li ti’nn disparaite.
20 Pareil couma ti ramasse la-grain ki tombé kan pé vanné, bann dimoune justes pou reste lor la terre pou toujours. Parkont, bann méchants zot, zot pou enlevé pareil couma du vent ti envole la bale. Certainement, nous content ki très bientôt, bann méchants pou disparaite pou toujours. Kan zot pou népli là, bann dimoune ki prend plaisir dans la loi Jéhovah, pou gagne beaucoup bénédictions. Oui, bann ki obéir Bondié pou finalement gagne la vie éternelle, don ki Bondié Li faire à bann humains.—Matthieu 25:34-46; Romains 6:23.
“Chemin Bann Justes” Li enn Chemin Béni
21. Dans ki façon Jéhovah “intéresse Li ar chemin bann justes”?
21 Psaume 1er termine avec sa bann paroles-la: “Jéhovah intéresse Li ar chemin bann justes, mais chemin bann méchants pou détruire.” (Psaume 1:6) Couma eski Jéhovah “intéresse Li ar chemin bann justes”? Si nous pé amène enn la-vie droite, nous kapav sûr ki nou Père céleste, Li remarque sa ek Li donne nous so l’approbation. En retour, nous kapav—à vrai dire, nous bizin—jette tou nou tracas lor Li, ek nous sûr ki vrémem Li pou prend nous soin.—Ézékiel 34:11; 1 Pierre 5:6, 7.
22, 23. Ki pou arrive bann méchants ek bann justes?
22 “Chemin bann justes” pou toujours existé, mais bann méchants ki pa’lé changé, pou détruire parski zot pou konn jugement défavorable Jéhovah. Zot “chemin,” ou-soit zot manière vive, pou disparaite avec zot. Nous kapav sûr ki sa bann paroles David-la pou réalisé: “Enn tigit le temps encore, et le méchant pou népli dans so place; oui, to pou rode li dans so place, mais li pa pou là. Mais bann dimoune humble pou possède la terre, ek zot pou konn enn grand la-joie parski pou éna paix en abondance. Bann justes pou possède la terre, ek zot pou reste pou toujours lor là.”—Psaume 37:10, 11, 29.
23 Pensé couma sa pou enn grand bonheur pou nous, si nous gagne privilège pou vive dans paradis lor la terre kan bann méchants pou népli existé! Lerla, bann dimoune justes ek humble pou konn enn vrai la-paix parski zot pou toujours prend plaisir dans “la loi Jéhovah.” Mais avant sa, ‘l’ordre ki Jéhovah inn tiré’ pou bizin appliqué. (Psaume 2:7a) Prochain l’article pou explique nous ki sa l’ordre ki Jéhovah inn tiré-la, ek ki so signification pou nous ek pou tou dimoune lor la terre.
Ki Ou Pou Réponn?
• Kifer enn dimoune ki faire Bondié plaisir, li heureux?
• Ki montré ki nous prend plaisir dans la loi Jéhovah?
• Couma enn dimoune kapav ressemblé enn pié ki bien gagne de l’eau?
• Ki différence éna entre chemin bann justes ek chemin bann méchants?
[Zimage page 9]
La prière pou aide nous pou pa fréquente bann méchants