“Pran Gran Plezir an Zeova”

“Pran gran plezir an Zeova, ek Li pu donn twa tu seki to leker demande.”—PSOM 37:4.

1, 2. Kisannla Lasurs vre boner, ek kuma eski le Rwa David finn atir nu latansyon lor-la?

“ERE bann ki konsyan zot bezwin spirityel, . . . ere bann ki ena mizerikord, . . . ere bann ki fer lape.” Ala trwa parmi sa nef deskripsyon ki Zezi ti fer lor bann dimunn ki ere, kan li ti kumans so seleb Sermon lor Montayn. (Matye 5:3-11) Bann parol Zezi donn nu lasirans ki li posib pu truv vre boner.

² Le Rwa David, ki ti enn lerwa dan Izrael, ti ekrir enn psom ki atir nu latansyon lor Lasurs vre boner, setadir Zeova. David ti dir: “Pran gran plezir an Zeova, ek Li pu donn twa tu seki to leker demande.” (Psom 37:4) Me kuma kan nu konn Zeova ek bann faset so personalite, sa kapav vinn enn “gran plezir” pu nu? Kuma eski kan nu egzaminn tu seki Li finn fer ek seki Li pu fer pu realiz so proze, nu gayn ‘tu seki nu leker demande’? Nu pu gayn repons sa bann kestyon-la kan nu egzaminn an profonder Psom 37 verse 1 ziska 11.

“Pa Anvye”

3, 4. Ki konsey David done dan Psom 37:1, ek kifer eski li bon ki nu pran byin kont sa konsey-la zordi?

³ Nu pe viv “bann letan kritik ek difisil pu siporte,” kot ena buku mesanste. Nu pe truv realizasyon bann parol lapot Pol: “Bann dimunn move ek bann foser pu vinn pli pir, zot pe anbet lezot ek zot pe anbet zotmem.” (2 Timote 3:1, 13) Wi, li telman fasil pu les nu afekte par sanblan sikse ek prosperite ki bann move dimunn pe kone! Tusala kapav distrer nu, ek fer nu vizyon spirityel vinn flu. Remarke kuma bann premye parol Psom 37 averti nu kont sa danze-la. Nu lir: “Pa sofe akoz bann move dimunn. Pa anvye bann ki pe komet linzistis.”

⁴ Televizyon, radyo ek bann magazinn dan sa lemond-la, bonbard nu avek enn kantite ka linzistis ki arive tulezur. Bann biznesmenn ki mele dan bann zafer frod, tuletan reysi tir zot kanet dan zwe. Bann eskro explwat bann dimunn feb. Bann asasin zot, zame pa reysi trap zot, uswa zot pa gayn okenn pinisyon. Tu sa bann legzanp linzistis-la kapav fer nu ankoler ek truble nu. Nu kapav mem kumans anvye sa sanblan sikse ki bann move dimunn pe kone-la. Me, eski nu koler pu amelyor sa sityasyon-la? Kan nu anvye zot, eski sa pu sanz sor ki pe atann zot? Non, zame! Wi, an verite pena okenn rezon pu nu “sofe.” Kifer?

5. Kifer eski Labib konpar bann move dimunn ar lerb?

⁵ David reponn: “Parski parey kuma lerb, zot pu sek vit, ek parey kuma lerb ver ki ankor tann, zot pu mor.” (Psom 37:2) Lerb ver ki ankor tann, kapav paret zoli, me byin vit li kumans sek ek li mor. Li parey pu bann move dimunn. Zot sanblan prosperite pa pu dir pu tuletan. Kan zot mor, tu zot bann rises malonet pa pu servi zot nanyin. Finalman, se la zistis ki pu trionfe; sakenn pu pey so pese. Se seki Lapot Pol ti ekrir: “Lapey pese se lamor.” (Romin 6:23) Bann move dimunn ek bann inzis, alafin pu gayn zot “lapey” ek pa plis ki sa. Anfennkont, zot finn amenn enn lavi ki pa’nn raport zot nanyin!—Psom 37:35, 36; 49:16, 17.

6. Ki leson nu kapav tire dan Psom 37:1, 2?

⁶ Donk, eski nu bizin les prosperite tanporer bann move dimunn truble nu? Antuka, leson ki nu bizin tire dan de premye verse Psom 37 se: Pa les zot sikse elwayn nu ar semin ki nu finn swazir, setadir servi Zeova. Okontrer, anu gard nu lespri fixe lor bann benediksyon ek bann lobzektif spirityel.—Proverb 23:17.

“Met To Konfyans an Zeova ek Fer Seki Bon”

7. Kifer eski nu bizin met nu konfyans an Zeova?

⁷ David donn nu sa lankurazman-la: “Met to konfyans an Zeova ek fer seki bon.” (Psom 37:3a) Kan bann traka uswa mem, bann dut pe fatig nu, nu bizin met tu nu konfyans an Zeova. Li tusel kapav donn nu ful sekirite spirityel. Moiz ti ekrir: “Enn dimunn ki res dan landrwa sekre le Trés-Haut, pu truv enn plas dan lonbraz le Tout-Puissant.” (Psom 91:1) Kan nu bulverse parski ena deplizanpli linzistis dan lemond, nu bizin kont ankor plis lor Zeova. Par egzanp, kan nu’nn ful nu sevi, nu byin kontan kan nu kapav apiy lor zepol enn kamarad, pa vre? Pareyman, nu bizin sutyin Zeova amezir nu fer zefor pu res fidel ek nu mars dan la verite.—Izai 50:10.

8. Kuma eski kan nu partisip dan predikasyon, sa anpes prosperite bann move dimunn fatig nu?

⁸ Ena enn solisyon pu anpes prosperite bann move dimunn truble nu. Nu bizin res byin okipe pu rod bann dimunn sinser ek ed zot pu gayn enn konesans egzak lor proze Zeova. Mem si la mesanste pe ogmante, nu bizin res deplizanpli okipe pu ed lezot. Lapot Pol ti dir: “Pa bliye fer dibyin ek partaz avek lezot, parski se kan [zot] fer bann sakrifis kumsa ki Bondye pran plezir.” Meyer “dibyin” ki nu kapav fer, se partaz la bonn nuvel lor Rwayom Bondye avek bann dimunn. Wi, nu predikasyon li vremem “enn sacrifice de louange.”—Ebre 13:15, 16; Galat 6:10.

9. Explike ki David ti rod dir par lexpresyon “res lor later.”

⁹ David kontiyne: “Res lor later ek azir fidelman.” (Psom 37:3b) Dan lepok David, lexpresyon “later” ti reprezant teritwar ki Zeova ti donn Izrael, setadir la Terre Promise. Pandan reyn Salomon, frontyer sa peyi-la ti pran apartir Dann, dan le nor, ziska Bir-Seba dan le sid. Sa se landrwa kot bann Izraelit ti reste. (1 Rwa 4:25) Zordi, ninport kot sa nu reste lor later, nu pe atann avek inpasyans, lepok kot later antye pu vinn enn paradi, dan nuvo lemond kot pu ena la zistis. Me, antretan, nu profit enn sekirite spirityel.—Izai 65:13, 14.

10. Ki rezilta nu gayne kan nu “azir fidelman”?

¹⁰ Ki nu pu gayne an retur, si nu “azir fidelman”? Enn proverb dan Labib, rapel nu: “Enn zom ki montre so fidelite, pu gayn buku benediksyon.” (Proverb 28:20) Si nu kontiyn pres la bonn nuvel fidelman, ninport ki kote nu reste ek avek ninport kisannla, nu kapav sir ki Zeova pu rekonpans nu. Anu pran enn legzanp. Frank ek so madam ki apel Rose, ti pran servis pyonye 40 an desela dan enn lavil dan le nor l’Ecosse, kot ti deza ena enn grup dimunn interese. Me, bann dimunn-la ti’nn abandonn la verite avan ki Frank ek Rose al laba. Sa kup pyonye-la pa finn dekuraze. Zot finn kumans prese ek fer bann disip. Zordi ena enn kongregasyon ki pe prospere dan sa lavil-la. Zeova finn vremem beni sa kup-la pu zot fidelite. Avek buku imilite, Frank explike: “Pli gran benediksyon ki nu’nn gayne se ki nu ankor dan la verite ek nu ankor itil pu Zeova.” Wi, kan nu “azir fidelman,” nu gayn buku benediksyon ek nu apresye sa bann benediksyon-la.

“Pran Gran Plezir an Zeova”

11, 12. (a) Kuma eski nu kapav “pran gran plezir an Zeova”? (b) Ki lobzektif nu kapav fixe an seki konsern nu letid personel, ek ki rezilta nu pu gayne?

¹¹ Pu ranforsi nu relasyon avek Zeova ek kontiyn met nu konfyans an Li, nu bizin “pran gran plezir an Zeova.” (Psom 37:4a) Kuma eski nu fer sa? Se kan nu konsantre nu lor Zeova, olye ki nu fatig nu latet ar nu prop sityasyon, mem ki kantite li difisil. Enn fason pu fer sa, se kan nu pran letan pu lir so Parol. (Psom 1:1, 2) Eski u pran plezir dan u lektir Labib? Se seki u pu resanti si u fer li avek lobzektif pu aprann plis lor Zeova. Apre ki u’nn lir enn porsyon Labib, kifer eski u pa arete ek u demann umem: ‘Ki sa pasaz-la aprann mwa lor Zeova?’ Kitfwa u pu truve ki li bon si u ena enn ti karne not kan u lir Labib. Sak fwa ki u arete pu reflesi lor seki u finn lir, ekrir enn fraz ki rapel u enn parmi bann kalite atiran ki Bondye ena. Dan enn lot psom, David ti sante: “Les bann parol ki sorti dan mo labus ek meditasyon mo leker, fer twa plezir. A Zeova, twa mo Rocher, ek mo Rédempteur.” (Psom 19:14) Kan nu konsantre lor Parol Bondye dan sa fason-la, sa pu fer Zeova “plezir,” ek nu’si nu pu gayn enn gran plezir.

¹² Kuma eski nu truv lazwa kan nu etidye ek medite? Nu kapav fixe lobzektif pu aprann otan ki nu kapav lor Zeova ek lor so bann fason azir. Nu ena bann piblikasyon kuma liv Le plus grand homme de tous les temps, ek Approchez-vous de Jéhovah.a Dan sa bann liv-la nu truv enn kantite kitsoz lor ki nu kapav medite avek enn leker rekonesan. An retur, David asir bann dimunn drwat, ki Zeova ‘pu donn zot seki zot leker demande.’ (Psom 37:4b) Se sa kalite lasirans-la ki sirman finn pus lapot Zan pu ekrir sa bann parol-la: “Ala lasirans ki nu ena anver Li, ki ninport ki kitsoz nu demande an akor avek so volonte, Li tann nu. Anplis, si nu kone ki Li tann tu seki nu pe demann Li, nu kone ki nu pu gayn seki nu finn demande, parski nu finn demann Li sa bann kitsoz-la.”—1 Zan 5:14, 15.

13. Dan bann lane ki finn fek pase, ki lakrwasman la predikasyon finn kone dan buku peyi?

¹³ Antan ki bann fidel serviter Zeova, nu pli gran plezir se truv Suverennte Zeova, zistifye. (Proverb 27:11) Wi, nu byin kontan kan nu tann gran travay predikasyon ki nu bann frer pe fer dan bann peyi, ki avan ti dirize par bann guvernman totaliter uswa par enn diktater. Nu anvi truve ki kantite liberte ankor nu bann frer pu gayne avan la fin sa lemond-la. Buku serviter Zeova ki pe viv dan bann peyi kot kapav prese san okenn problem, pe partisip dan predikasyon avek buku zel. Zot pres avek bann etidyan, bann refizye ek bann lezot dimunn ki pe res tanporerman dan sa bann peyi kot ena liberte relizye-la. Nu swete ki, kan sa bann dimunn-la return kot zot, zot pu kontiyn fer lalimyer la verite briye, mem dan bann peyi kot laktivite bann Temwin Zeova tuzur interdi.—Matye 5:14-16.

“Met Tu dan Lamin Zeova”

14. Ki prev ena ki nu kapav kont lor Zeova?

¹⁴ Wi, se enn gran sulazman kan nu kone ki nu bann traka ki kuma bann pwa ki pe pez lor nu, kapav anleve! Kuma? David dir: “Met tu dan lamin Zeova, ek kont lor Li, ek Limem ki pu azir.” (Psom 37:5) Dan nu kongregasyon, ena buku kitsoz ki konvink nu ki nu kapav kont lor sutyin Zeova. (Psom 55:22) Bann ki dan servis aplintan, bann pyonye, sirveyan sirkonskripsyon, misyoner, uswa bann volonter ki travay dan Betel, zot tu kapav temwayne ki kantite Zeova pran zot swin. Alor, kifer eski u pa koz avek enn parmi zot ek demann zot kuma Zeova finn ed zot? U pu sirman tann buku lexperyans ki montre ki mem dan bann sityasyon difisil, lamin Zeova pa tro kurt. Li tuletan donn so bann serviter seki zot bizin pu viv.—Psom 37:25; Matye 6:25-34.

15. Kuma eski la zistis lepep Bondye pe briye?

¹⁵ Kan nu fer Zeova konfyans ek nu kont antyerman lor Li, nu kapav fer lexperyans sa bann parol David-la: “Wi, li pu fer to la zistis paret kuma lalimyer, kuma an plin midi.” (Psom 37:6) Dimunn suvan dir bann foste lor bann Temwin Zeova. Me Zeova uver lizye bann dimunn sinser. Li fer zot realize ki nu predikasyon li motive par lamur pu Li ek pu nu prosin. An mem tan, zot tu kapav truv nu bon kondwit, mem si buku met sa an dut. Zeova sutenir nu dan tu sort kalite lopozisyon ek persekisyon. Rezilta: La zistis lepep Bondye pe briye parey kuma soley an plin midi.—1 Pyer 2:12.

“Res Trankil . . . Atann Li Avek enn Gran Dezir”

16, 17. An armoni avek Psom 37:7, asterla se enn ler pu fer ki kitsoz, ek kifer?

¹⁶ Sa ekrivin psom-la dir apre sa: “Res trankil devan Zeova ek atann Li avek enn gran dezir. Pa sofe kont dimunn ki pe reysi so lavi, ni kont seki pe realiz so bann lide.” (Psom 37:7) Isi David montre nu linportans pu atann avek pasyans ki Zeova azir. Mem si la fin sa lemond-la pankor vini, nu pena okenn rezon pu nu pleyne. Eski nu pa finn truve ki mizerikord ek pasyans Zeova li buku pli gran ki seki nu ti panse okumansman? Asterla, eski nu kapav montre ki nu’si nu pe atann avek pasyans kan nu res okipe pu pres la bonn nuvel avan ki la fin vini? (Mark 13:10) Se pa ler pu azir san reflesi, sinon nu riske perdi nu lazwa ek nu sekirite spirityel. Okontrer, se enn ler pu reziste avek ankor plis lafors, kont move linflyans lemond Satan. Ek se asterla mem ki nu bizin res prop lor plan moral ek zame pa met an danze nu bon pozisyon devan Zeova. Anu kontiyn rezet bann panse imoral ek evit bann aksyon ki pa apropriye anver bann dimunn lot sex, uswa mem anver bann dimunn mem sex ki nu.—Kolosyin 3:5.

¹⁷ David donn nu sa konsey-la: “Les la koler, ek abandonn laraz. Pa sofe pu apre fer seki pa bon. Parski bann move pu mor, me bann ki met zot lespwar an Zeova, zot pu posed later.” (Psom 37:8, 9) Wi, avek konfyans, nu kapav atann lepok, ki byin pre, kot Zeova pu tir tu koripsyon lor later ek tu seki responsab pu sa.

“Zis enn Tigit Letan Ankor”

18, 19. Ki lankurazman nu tire dan Psom 37:10?

¹⁸ “Zis enn tigit letan ankor, bann move pu nepli la; ek to pu rod zot dan zot plas, me zot pu nepli la.” (Psom 37:10) Se bann parol byin ankurazan amezir ki nu pe apros la fin sa lemond-la, kot limanite pu pey so pli pir konsekans parski li’nn viv indepandan ar Zeova! Okenn form guvernman ek lotorite ki bann zom finn met an plas, pa’nn reysi. Ek asterla nu pe apros lepok kot Bondye pu repran so reyn, so vre teokrasi, Rwayom Zeova ki dirize par Zezi Kris. Li pu pran ful kontrol lor seki pe arive dan lemond ek li pu tir tu bann opozan Rwayom Bondye.—Danyel 2:44.

¹⁹ Dan nuvo lemond kot Rwayom Bondye pu dirize, mem ki kantite rode u pu rode, u pa pu kapav truv enn move dimunn! Avredir, Zeova pu detrir san tarde ninport kisannla ki rebel kont Li. Pa pu ena plas pu seki atak Suverennte Bondye, uswa pu seki refiz sumet ar lotorite Bondye. Tu u bann vwazin pu ena mem dezir pu fer Zeova plezir. Sey imazine ki kalite sekirite pu ena! Pa pu bizin kadna, uswa baro! Nanyin pa pu detrir konfyans total ki pu reyne ant bann dimunn ek nanyin pa pu anpes zot viv ere!—Izai 65:20; Mika 4:4; 2 Pyer 3:13.

20, 21. (a) Dan Psom 37:11, kisannla bann “ki sumet”, ek kot sa zot pu gayn “lape an abondans”? (b) Ki bann benediksyon nu pu gayne si nu imit Gran David?

²⁰ Lerla, “bann ki sumet pu posed later.” (Psom 37:11a) Me ki sa bann dimunn-la sa? “Sumet” sorti dan rasinn enn mo ki vedir “akable, abese, imilye.” Wi, “bann ki sumet”, se bann dimunn ki, avek imilite, pe atann ki Zeova repar tu bann linzistis ki zot finn kone. “Vremem zot pu gayn buku plezir kan pu ena lape an abondans.” (Psom 37:11b) Deza, asterla mem nu gayn lape an abondans dan paradi spirityel ki la kongregasyon Kretyenn pe kone.

²¹ Mem, si nu pankor sulaze ar bann traka ek difikilte, nu sutenir nu kamarad ek nu rekonfort bann ki deprime. An retur, lepep Zeova resanti enn vre lazwa ek satisfaksyon dan zot leker. Bann frer ki’nn nome kuma bann berze dan kongregasyon, ed nu lor plan spirityel, ek defwa mem lor plan materyel. Grasa zot led, nu kapav andir bann maler, pu la zistis. (1 Tesalonisyin 2:7, 11; 1 Pyer 5:2, 3) Sa lape ki nu pe kone-la, se enn trezor presye ki nu ena! Nu ena usi lespwar byinto pu viv pu tuletan dan enn Paradi kot pu ena lape. Donk, anu imit Gran David, Kris Zezi, ki ti motive pu res fidel ziska la fin grasa zel ki li ti ena pu Zeova. (1 Pyer 2:21) Kan nu fer sa, nu pu kontiyne viv ere, ek nu pu onor Bondye Zeova, an ki nu pran enn gran plezir.

[Notes]

Eski U Kapav Reponn?

• Ki bann leson u finn aprann dan Psom 37:1, 2?

• Kuma eski u kapav “pran gran plezir an Zeova”?

• Ki prev ena ki nu kapav kont lor

[Zimage page 23]

“Met to konfyans an Zeova ek fer seki bon”

[Zimage page 25]

“Bann ki sumet pu posed later”