Sapit Enn
Ador Bondye dan Linite Zordi—Ki Sa Vedir?
1, 2. (a) Ki rasanbleman inpresyonan pe fer dan nu lepok? (b) Ki lesperans extraordiner bann dimunn byin dispoze ena?
PARTU atraver lemond, enn gran kantite dimunn pe rasanble pu ador Bondye dan linite. Plizir milyon dimunn ki sorti dan tu nasyon, tribi, ek lang pe zwenn ansam. Tulelane, ena buku plis ankor ki pe rasanble. Labib idantifye sa bann milyon dimunn la kuma bann “temwin” Zeova, ek li apel zot “enn gran laful.” Zot pe rann Bondye enn “servis sakre lanwit lizur.” (Izai 43:10-12; Revelasyon 7:9-15) Kifer eski zot pe fer sa? Parski zot finn konn Zeova kuma sel vre Bondye. Sa pus zot pu amenn enn lavi ki an akor avek so bann prisip drwat. Zot finn aprann usi ki nu pe viv “bann dernye zur” sa move sistem ki egziste la. Dan ankor enn tigit letan, Bondye pu detrir li, ek pu ranplas li par enn lemond nuvo kot pu ena enn paradi.—2 Timote 3:1-5, 13; 2 Pyer 3:10-13.
2 Parol Bondye fer sa promes la: “Dan zis enn tigit letan ankor, sa kikenn ki move la pu nepli la . . . Me bann ki sumet pu gayn later, ek vremem zot pu truv buku plezir dan labondans lape.” (Psom 37:10, 11) “Bann dimunn drwat pu gayn later, ek zot pu res pu tuletan lor la.” (Psom 37:29) “[Bondye] pu suy tu larm dan zot lizye, ek pa pu ena lamor; pu nepli ena dey, kriye ek duler. Bann kitsoz ansyin finn disparet.”—Revelasyon 21:4.
3. Kuma eski bann dimunn pe reysi ador Bondye dan enn vre linite?
3 Bann ki pe ador vre Bondye zordi dan linite, zot mem ki pu bann premye dimunn ki pu res dan sa lemond nuvo la. Zot finn aprann volonte Bondye ek zot pe fer tu zot posib pu fer li. Zezi ti montre ki kantite sa li inportan kan li ti dir: “Sa mem seki vedir lavi pu tuletan, ki zot aprann konn twa, sel vre Bondye ek Zezi Kris, sa kikenn ki to finn anvwaye la.” (Zan 17:3) Lapot Zan finn ekrir: “Lemond pe al fini ek so dezir usi, me seki fer volonte Bondye pu res pu tuzur.”—1 Zan 2:17.
Ki Sa Vedir Vremem?
4. (a) Pwiski buku pe rasanble zordi pu ador Bondye dan linite, ki sa vedir vremem? (b) Kuma eski Labib dekrir sa rasanbleman la?
4 Pwiski buku pe rasanble zordi pu ador Bondye dan linite, ki sa vedir vremem? Sa montre klerman ki lafin sa move lemond la finn byin koste ek ki nuvo lemond Bondye pu kumanse zis apre sa. Nu pe truv avek nu lizye kuma bann profesi Labib ki ti anons sa gran rasanbleman la, pe realize. Enn parmi sa bann profesi la dir: “Pu bizin arive, dan parti final bann zur [sa bann dernye zur la], ki montayn lakaz Zeova [so vre ladorasyon ki siperyer], pu etabli solidman lor but bann montayn [lezot form ladorasyon], . . . ek bann pep pu bizin kontiyn vinn ver li. Ek buku nasyon pu ale ek pu dir: ‘Vini, anu al mont montayn Zeova ek lakaz Bondye Zakob; ek Li pu anseyn nu so bann semin, ek nu pu mars lor so bann santye.’”—Mika 4:1, 2; Psom 37:34.
5, 6. (a) Kuma eski nu kapav dir ki bann nasyon pe turn ver Zeova? (b) Ki bann kestyon nu bizin poz numem?
5 Mem si bann nasyon antye pa pe al dan lakaz spirityel Zeova pu ador Li, plizir milyon dimunn ki sorti dan diferan nasyon pe fer li. Amezir ki zot pe aprann konn proze Bondye Zeova ek so personalite atiran, sa tus zot leker. Avek limilite, zot rod kone seki Bondye pe demann zot. Zot priye parey kuma sa ekrivin psom la ti priye: “Anseyn mwa pu fer to volonte, parski to mem mo Bondye.”—Psom 143:10.
6 Eski u truv u parmi sa gran laful bann dimunn ki Zeova pe rasanble pu ador Li dan linite la? Eski fason ki u reazir fas ar linstriksyon ki u finn gayne dan Parol Bondye montre ki vremem u rekonet ki Zeova Li Lasurs sa Parol la? Ziska ki pwin u pu “mars lor so bann semin”?
Kuma U Pu Arive Ador Bondye dan Linite
7. (a) Ziska ki pwin bann dimunn pu arive ador Bondye dan linite? (b) Kifer eski bizin pa tarde pu vinn enn adorater Zeova asterla mem, ek kuma eski u kapav ed lezot pu fer sa?
7 Zeova ule ki tu so bann kreatir ki ena lintelizans ador Li dan linite. Wi, nu pe atann avek inpasyans zur kot tu dimunn pu ador sel vre Bondye! (Psom 103:19-22) Me avan ki sa arive, Zeova pu bizin detrir tu bann ki refiz fer so volonte ki drwat. Dan so mizerikord, Li pe averti bann dimunn partu lor seki Li pu fer, pu ki zot kapav sanz zot kondwit. (Izai 55:6, 7) Wi, zordizur enn linvitasyon byin prese pe fer ar “tu nasyon, tribi, lang ek pep”: “Gayn lakrint pu Bondye, ek donn Li laglwar, parski ler so zizman finn arive, alor ador sa Kikenn ki finn fer lesyel, later, lamer ek bann lasurs delo la.” (Revelasyon 14:6, 7) Eski u finn aksepte sa linvitasyon la? Si wi, u ena enn privilez pu invit lezot pu konn vre Bondye ek pu ador Li.
8. Apre ki nu finn aprann bann lanseynman debaz ki ena dan Labib, ki progre ankor nu tu nu bizin fer?
8 Zeova pale gayn ladorasyon bann dimunn ki dir ki zot krwar an Li, me ki an mem tan pe kontiyn rod zot bann lintere personel. Bondye anvi ki bann dimunn gayn enn “konesans egzak so volonte” ek ki zot montre sa dan zot lavi. (Kolosyin 1:9, 10) Bann dimunn ki ena rekonesans ek ki pe aprann bann lanseynman debaz ki ena dan Labib anvi progrese pu vinn bann Kretyin adilt. Zot anvi konn Zeova enn fason pli intim. Zot ule konpran so parol pli byin ek an profonder ek aplik li plis dan zot lavi. Zot fer zefor pu reflekte bann kalite nu Papa ki dan lesyel, ek pu truv bann kitsoz kuma Li, Li truve. Sa pus zot pu rod bann mwayin pu partisip dan travay ki Zeova finn organize pu so bann adorater lor later, enn travay ki donn lavi. Eski u’si, u ena sa dezir la?—Mark 13:10; Ebre 5:12–6:3.
9. Dan ki bann fason eski vre linite li posib zordi?
9 Labib montre ki bann ki servi Zeova bizin servi Li dan linite. (Efezyin 4:1-3) Sa linite la bizin egziste zordi, mem si nu viv dan enn lemond divize ek nu pe bizin tuzur lit kont nu bann prop febles. Zezi ti priye avek tu so leker pu ki tu so bann disip vinn enn sel, pu ki zot konn enn vre linite. Ki sa ti pu vedir? Dabor, zot ti pu ena enn bon relasyon avek Zeova ek so Garson. Apre, zot ti pu byin ini ant zot. (Zan 17:20, 21) Pu arive fer sa, Zeova servi so kongregasyon Kretyin pu Li anseyn so pep.
Ki Bann Kitsoz Ki Favoriz Linite?
10. (a) Ki nu pu devlope si nu servi Labib personelman pu reponn bann kestyon ki konsern nu? (b) Egzaminn bann kitsoz ki favoriz linite Kretyin letan u reponn bann kestyon ki ena dan sa paragraf la.
10 Set kitsoz inportan ki site apre sa paragraf la, permet nu ador Bondye dan linite. Pandan ki u pu reponn bann kestyon ki asosye ar sa bann pwin la, reflesi lor lefe ki sak pwin ena lor u relasyon avek Zeova ek avek u bann frer ek ser Kretyin. Si u rezonn lor sa bann pwin la ek u rod bann verse ki finn zis site dan braket, sa pu ed u pu devlop sazes Bondye, kapasite pu reflesi, ek disernman, setadir kapasite pu byin ziz enn sityasyon—bann kalite ki nu tu nu bizin. (Proverb 5:1, 2; Filipyin 1:9-11) Egzaminn sa 7 kitsoz la enn par enn.
(1) Nu rekonet ki Zeova ena drwa pu etabli bann prinsip lor seki bon ek seki pabon. “Fer Zeova konfyans avek tu to leker ek pa kont lor to prop lintelizans. Dan tu bann kitsoz ki to fer pran Li kont, ek Li, Li pu fer to bann semin vinn drwat.”—Proverb 3:5, 6.
Kifer eski nu bizin rod konsey ek direksyon Zeova kan nu pran bann desizyon? (Psom 146:3-5; Izai 48:17)
(2) Nu ena Parol Bondye pu gid nu. “Kan zot finn gayn parol Bondye ki zot finn tande ar nu, zot finn aksepte li, pa kuma parol bann zom, me kuma li ete vremem, setadir kuma parol Bondye ki pe azir dan zot, zot ki bann krwayan.”—1 Tesalonisyin 2:13.
Ki danze pe get nu si nu zis fer seki nu, nu “panse” bon? (Proverb 14:12; Zeremi 10:23, 24; 17:9)
Si nu pa kone ki konsey Labib done lor enn size, ki nu bizin fer? (Proverb 2:3-5; 2 Timote 3:16, 17)
(3) Nu tu profit mem program nuritir spirityel. “Tu to bann garson pu anseyne par Zeova.” (Izai 54:13) “Anu reflesi ki manyer pu pus nu kamarad pu ena lamur ek pu fer bann bon travay, pa abandonn nu rasanbleman, parey kuma sertin ena labitid fer, me ankuraz nu kamarad, ek ankor plis parski pli ale zot truv zur la pe pli koste.”—Ebre 10:24, 25.
Ki byinfe bann ki profit byin bann dispozisyon ki Zeova pran pu nuri nu lor plan spirityel, zot gayne? (Izai 65:13, 14)
(4) Zezi Kris ki nu Gid, pa enn dimunn. “Pa les lezot apel zot Rabi, parski zot ena enn sel anseynan, tandiki zot tu zot bann frer. Pa apel usi personn Papa lor later, parski zot ena enn sel Papa, Seki dan lesyel la. Pa les usi lezot apel zot ‘gid,’ parski zot ena enn sel Gid, Kris.”—Matye 23:8-10.
Eski enn parmi nu bizin panse ki li pli siperyer ki lezot? (Romin 3:23, 24; 12:3)
(5) Nu kont lor Rwayom Bondye kuma sel lespwar pu limanite. “Alor, ala kuma zot bizin priye: ‘Nu Papa dan lesyel, ki to non vinn sin. Ki to rwayom vini. Ki to volonte fer lor later parey kuma dan lesyel.’ Alor, kontiyn rod rwayom ek so lazistis avan tu.”—Matye 6:9, 10, 33.
Kuma eski kan nu “rod rwayom avan tu,” sa ed nu pu gard nu linite? (Mika 4:3; 1 Zan 3:10-12)
(6) Lespri sin devlop dan bann adorater Zeova bann kalite ki neseser pu linite Kretyin. “Par kont, frwi lespri li lamur, lazwa, lape, pasyans, bonte, fer dibyin, lafwa, duser, kontrol numem.”—Galat 5:22, 23.
Ki nu bizin fer pu ki lespri Bondye devlop so bann frwi dan nu? (Akt 5:32)
Kan nu ena lespri Bondye, ki lefe sa ena lor nu relasyon avek nu bann frer ek ser Kretyin? (Zan 13:35; 1 Zan 4:8, 20, 21)
(7) Tu bann vre adorater Bondye partisip dan predikasyon labonn nuvel lor Rwayom Bondye. “Sa bonn nuvel lor rwayom la pu prese partu kot dimunn reste lor later kuma enn temwaynaz pu bann nasyon; ek lerla lafin pu vini.”—Matye 24:14.
Ki kitsoz bizin pus nu pu ena dezir pu partisip plin-plin dan travay predikasyon? (Matye 22:37-39; Romin 10:10)
11. Kan nu aplik laverite ki ena dan Labib dan nu lavi, ki lefe sa ena lor nu?
11 Kan nu servi Zeova dan linite, sa fer nu vinn pli pros ar Li ek nu gayn rekonfor kan nu frekant nu bann frer ek ser. Psom 133:1 dir: “Gete! Kuma li bon ek li enn plezir pu bann frer res ansam dan linite!” Nu vremem sulaze kan nu reysi res lwin ar sa lemond ranpli ar so latitid ek kondwit egois, so move kondwit moral, ek so vyolans ek kan nu rasanble nu avek bann ki vremem kontan Zeova ek ki obeir so bann lalwa.
Res Lwin ar Bann Linflyans Ki Fer Divizyon
12. Kifer eski nu bizin res lwin ar lespri lindepandans?
12 Pu nu pa gat sa linite gran valer ki nu ena dan lemond antye la, nu bizin res lwin ar bann linflyans ki fer divizyon. Enn parmi sa bann linflyans la li lespri lindepandans vizavi Bondye ek so bann lalwa. Pu ed nu rezet sa lespri la, Zeova fer nu dekuver kisannla ki deryer sa, Satan limem. (2 Korintyin 4:4; Revelasyon 12:9) Satan mem ki ti pus Adan ek Ev pu rezet seki Bondye ti dir ek pu pran bann desizyon ki kont volonte Bondye. An retur, sa finn amenn maler lor zot ek lor nu’si. (Zenez 3:1-6, 17-19) Lemond ranpli ar lespri lindepandans vizavi Bondye ek vizavi so bann lalwa. Alor, nu bizin anpes sa lespri la inflyans nu.
13. Ki pu montre si vremem nu pe prepar nu sinserman pu viv dan nuvo lemond lazistis Bondye?
13 Par egzanp, get promes extraordiner Zeova: Li pu ranplas sa move lemond la par bann nuvo lesyel ek enn nuvo later kot “lazistis pu reste.” (2 Pyer 3:13) Eski sa pa bizin pus nu pu kumans prepar nu pu viv sa lepok kot pu ena lazistis la? Pu sa, nu bizin swiv sa konsey kler ki Labib done la: “Pa kontan lemond, ni bann kitsoz ki dan lemond. Si enn kikenn kontan lemond, lamur nu Papa pa dan Li.” (1 Zan 2:15) Alor, anu rezet net lespri sa lemond la—so latitid indepandan ek egois, so move kondwit moral ek so vyolans. Nu bizin pran labitid pu ekut Zeova ek pu obeir Li avek tu nu leker, malgre bann move tandans ki nu lekor inparfe ena. Nu lavi antye bizin montre ki nu finn diriz nu bann panse ek nu bann lintansyon pu fer volonte Bondye.—Psom 40:8.
14. (a) Kifer eski li inportan ki nu sezi lokazyon asterla mem pu aprann bann semin Zeova ek pu mars lor la tutlong nu lavi? (b) Ki sa bann verse ki site dan sa paragraf la vedir pu u personelman?
14 Kan ler fixe arive pu Zeova detrir sa move sistem ki egziste zordi la ek tu bann dimunn ki pe rant dan so mul, Zeova pa pu tini-tini pu azir. Li pa pu ranvway sa ler la, ni Li pu sanz so bann prinsip pu fer plezir bann ki rod apandan ar lemond, ek an mem tan aprann fer volonte Bondye avek enn leker partaze. Asterla, finn ariv ler pu azir! (Lik 13:23, 24; 17:32; 21:34-36) Alor, sa fer nu leker kontan pu truve ki enn gran laful bann adorater Bondye pe sezi lokazyon pu rod linstriksyon ki Zeova done par mwayin so Parol ek so lorganizasyon ek ansam dan linite, zot pe mars lor so bann semin ver lemond nuvo. Plis nu aprann lor Zeova, plis nu kontan Li ek nu anvi servi Li.
Kestyon Revizyon
• Ki proze Zeova an rapor avek ladorasyon?
• Apre ki nu finn aprann bann lanseynman debaz ki ena dan Labib, ki progre nu bizin fer ankor?
• Ki nu kapav fer personelman pu viv dan linite avek bann lezot adorater Zeova?
[Zimaz paz 4]
‘Me bann ki sumet pu gayn later, ek vremem zot pu truv buku plezir dan labondans lape’