Kuma Kapav Ena Vre Linite Parmi Bann Kretyin?
1 Ki kapav ini plis ki sis milyon dimunn ki sorti dan 234 peyi ek ki koz apepre 380 lang? Selman ladorasyon Bondye Zeova. (Mika 2:12; 4:1-3) Bann Temwin Zeova kone ki linite parmi bann Kretyin, li enn realite zordi, parski zot pe viv sa linite-la. Nu determine pu reziste lespri sa lemond ki divize-la, kuma enn “sel trupo” anba direksyon nu “sel berze.”—Zan 10:16; Efe. 2:2.
2 Bondye ena enn proze ki nu sir pu akonpli. Sa proze-la, se ki tu dimunn ini ansam dan vre ladorasyon. (Rev. 5:13) Zezi ti priye sinserman pu ki so bann disip ena linite parmi zot, parski li ti konn linportans linite. (Zan 17:20, 21) Kuma sakenn parmi nu kapav kontribye pu ki ena linite dan la kongregasyon?
3 Kuma pu Reysi Ena Linite: Pa kapav ena linite parmi bann Kretyin san led Parol Bondye ek so lespri. Kan nu aplik seki nu lir dan Labib, nu les lespri Bondye lib pu azir dan nu lavi. Sa permet nu res “ini dan enn mem lespri ek dan lape.” (Efe. 4:3) Sa pus nu pu siport nu kamarad dan lamur. (Kol. 3: 13, 14; 1 Pyer 4:8) Pu u favoriz linite, u bizin medit lor Parol Bondye tulezur. Eski u fer sa?
4 Nu misyon pu prese ek fer bann disip usi fer ki nu ini. Kan nu travay avek lezot dan minister Kretyin ek “lite kotakot kuma enn sel pu lafwa la bonn nuvel,” nu vinn “bann konpaynon travay dan la verite.” (Fil. 1:27; 3 Zan 8) Amezir nu fer sa, bann lyin lamur ki ini nu dan la kongregasyon vinn pli for. Kifer eski u pa invit enn kikenn avek ki u pa’nn prese resaman, pu akonpayn u dan predikasyon sa semenn-la?
5 Li vremem enn gran privilez pu nu form parti dan sa sel vre fami internasyonal ki egziste lor later zordi-la! (1 Pyer 5:9) Resaman enn gran kantite dimunn ti viv sa linite-la pandan bann Lasanble Internasyonal “Donn Bondye la Glwar.” Nu tu, anu kontribye pu gard sa linite ki ena enn gran valer-la! Nu pu reysi fer sa si nu lir Parol Bondye tulezur, rezud bann dezakor avek lamur, ek pres la bonn nuvel ‘nu tu ansam.’—Rom. 15:6.