Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w10 1/9 p. 15-19
  • L’unité permette nou reconette vrai l’adoration

Pena video ki disponib pou seki ou finn swazir.

Sori, enn erer inn anpes sa video-la zwe.

  • L’unité permette nou reconette vrai l’adoration
  • La Tour de Garde pé annonce Royaume Jéhovah—2010
  • Soutit
  • Lor Mem Size
  • Couma vrai l’adoration uni bann dimoune?
  • Nou gagne l’enseignement spirituel par enn sel moyen
  • Rejette l’orgueil ek jalousie
  • Ena division dan la chretienté
  • Vrai l’adoration pli elevé ki nationalisme
  • L’unité ki ena parmi bann chretien, glorifié Bondié
    La Tour de Garde pé annonce Royaume Jéhovah—2010
  • Kuma Kapav Ena Vre Linite Parmi Bann Kretyin?
    Ministere du Royaume—2003
  • Ador Bondye dan Linite Zordi—Ki Sa Vedir?
    Ador Sel Vre Bondye
La Tour de Garde pé annonce Royaume Jéhovah—2010
w10 1/9 p. 15-19

L’unité permette nou reconette vrai l’adoration

“Mo pou rassemblé zot dan l’unité couma enn troupeau dan l’enclos.”—MIKA 2:12.

1. Couma creation montré sagesse Bondié?

ENN psalmiste ti dire: “To’nn faire beaucoup kitsoz, o Jéhovah! To’nn faire zot tou avek sagesse. La terre rempli ar seki to’nn faire.” (Ps. 104:24) Sagesse Bondié bien visible kan nou examiné couma plusieurs million varieté plante, insecte, zanimo ek bacterie ki ena lor la terre, depann sakenn lor zot camarade dan enn systeme bien compliké. Ek aussi, dan ou lekor ena plusieurs millier different fonction, depuis bann gros organe ziska bann bien tipti partie ou cellule, zot tou travail ensam pou faire ou enn dimoune complet ek en bonne santé.

2. Couma nou trouvé dan page 16, kifer l’unité ki ti ena parmi bann chretien ti parette enn mirak?

2 Jéhovah ti crée bann dimoune pou ki zot depann sakenn lor zot camarade. Dan race humain ena enn grand varieté: chaque dimoune ena so prop l’apparence, so personnalité, ek so talent. En plus, Bondié ti donne bann premier dimoune ki Li ti crée, bann qualité pareil couma Li, Li ena ek ki ti pou permette zot cooperé ek depann sakenn lor so camarade. (Gen. 1:27; 2:18) Selman, asterla l’humanité en general eloigné ar Bondié, ek jamais l’humanité en entier pa finn reussi travail ensam dan l’unité. (1 Jean 5:19) A cause sa, kan nou guette congregation premier siecle, ti ena different qualité dimoune couma par exemple bann esclave ki ti bann ephésien, bann femme grec ki ti sorti dan bann grand famille, bann zom juif bien eduqué, ek bann ki ti pé adore bann zidole avant, zot l’unité ti parette enn mirak.—Actes 13:1; 17:4; 1 Thess. 1:9; 1 Tim. 6:1.

3. Couma la Bible decrire l’unité ki ena entre bann chretien, ek ki nou pou examiné dan sa l’etude-la?

3 Vrai l’adoration permette bann dimoune pou coopere ensam pareil couma bann membre enn lekor. (Lire 1 Corinthiens 12:12, 13.) Dan sa lartik-la, nou pou examine sa bann question-la: Couma vrai l’adoration uni bann dimoune? Kifer c’est zis Jéhovah tousel ki kapav uni plusieurs million dimoune ki sorti dan tou nation? Ki bann kitsoz ki empeche nou garde nou l’unité, Jéhovah aide nou pou surmonté? Ek concernant l’unité, couma vrai religion chretien different ar la chretienté?

Couma vrai l’adoration uni bann dimoune?

4. Couma vrai l’adoration uni bann dimoune?

4 Bann dimoune ki pratik vrai l’adoration comprend ek accepté ki, parski Jéhovah finn crée tou kitsoz, Li ena droit legal pou dirige l’univers. (Rév. 4:11) Alors, mem si bann vrai chretien vive dan different pays, ek ena different culture, zot tou zot obeir bann mem la loi ki Bondié inn donné ek zot vive en accord avek bann mem principe biblik. Tou bann vrai adorateur kapav appel Jéhovah “Papa.” (Is. 64:8; Mat. 6:9) A cause sa, zot tou zot bann frere spirituel ek zot kapav profite sa joli l’unité ki enn psalmiste ti decrire-la: “Guetté! Li vrai-mem bon ek li enn plaisir pou bann frere reste ensam dan l’unité!”—Ps. 133:1.

5. Ki qualité ki favorise l’unité parmi bann vrai adorateur?

5 Mem si bann vrai chretien imparfait, zot adore ensam dan l’unité parski zot finn aprann pou content zot camarade. Jéhovah enseigne zot pou manifesté l’amour dan enn fason ki personne pa kapav enseigne zot. (Lire 1 Jean 4:7, 8.) So Parole dire: “Habille zot ar enn grand compassion, bonté, l’humilité, douceur, ek patience. Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker. Pareil couma Jéhovah inn pardonne zot avek tou so leker, faire pareil zot aussi. Mais, en plus, habille zot ar l’amour, parski li enn kitsoz parfait ki soude nou tou ensam.” (Col. 3:12-14) Sa lien parfait ki soude nou tou ensam-la—l’amour—c’est enn qualité ki permette pou reconette bann vrai chretien. Dapré ou l’experience personnel, eski ou pa’nn trouvé ki sa l’unité-la c’est enn kitsoz special ki permette pou reconette vrai l’adoration?—Jean 13:35.

6. Couma nou l’espoir dan Royaume Bondié, aide nou pou konn l’unité?

6 Bann vrai adorateur zot aussi ena l’unité entre zot parski zot considere Royaume Bondié couma sel l’espoir pou l’humanité. Zot koné ki Royaume Bondié bientot pou remplace bann gouvernement humain ek pou beni bann dimoune obeissant kan li pou amenn enn vrai la paix ki pou duré pou touletan. (Is. 11:4-9; Dan. 2:44) C’est a cause sa ki bann chretien suive seki Jésus ti dire concernant so bann disciple: “Zot pa faire partie dan le monde, pareil couma moi mo pa faire partie dan le monde.” (Jean 17:16) Bann vrai chretien pa prend part dan okenn la guerre ki ena dan le monde; a cause sa zot kapav reste uni entre zot, mem si bann dimoune autour zot pé faire la guerre.

Nou gagne l’enseignement spirituel par enn sel moyen

7, 8. Dan ki fason bann instruction biblik favorise nou l’unité?

7 Bann chretien premier siecle ti ena l’unité entre zot parski zot tou zot ti gagne bann instruction par enn sel moyen. Zot ti reconette ki Jésus ti pé enseigne ek ti pé dirige congregation par moyen enn college central ki ti dirigé par bann zapotre ek bann ancien dan Jérusalem. Sa bann zom bien devoué-la ti base zot decision lor Parole Bondié. Zot ti faire bann surveillant ki ti voyagé transmette zot bann instruction bann congregation dan beaucoup pays. Concernant sa bann surveillant-la, la Bible dire: “A mesure ki zot ti passe par bann la ville, zot ti faire bann ki ti la konn bann decision ki bann zapotre ek bann ancien dan Jérusalem ti’nn prend, pou ki lerla bannla mette sa en pratik.”—Actes 15:6, 19-22; 16:4.

8 Li pareil aussi zordi, ena enn College central, enn groupe chretien oint, ki favorise l’unité parmi la congregation mondial. College central publié bann publication dan beaucoup langue ki bien encourageant lor plan spirituel. Sa nourriture spirituel-la basé lor Parole Bondié. Sa vedir ki, seki zot enseigné pa sorti kot bann dimoune, mais kot Jéhovah.—Is. 54:13.

9. Couma travail ki Bondié inn donne nou pou faire, aide nou pou reste uni?

9 Zordi, bann ancien aussi favorise l’unité kan zot prend la tête dan predication. Bann bon relation ki uni seki travail ensam dan service Bondié, li beaucoup pli fort ki bann relation ki ena entre bann dimoune dan le monde ki zis passe le temps ensam. Congregation chretien ti etabli, pa pou fonctionne couma enn club kot dimoune kapav passe le temps ensam, mais pou honore Jéhovah ek pou faire enn travail—preche la bonne nouvelle, faire bann disciple ek fortifié congregation. (Rom. 1:11, 12; 1 Thess. 5:11; Héb. 10:24, 25) Alors, l’apotre Paul ti pou content tann dire ki bann chretien “pé tini ferme dan enn mem l’esprit, ar enn sel nâme zot pé lutté ensam pou la foi concernant la bonne nouvelle.”—Phil. 1:27.

10. Cite certain fason couma nou uni en tant ki peuple Bondié.

10 Alors en tant ki peuple Jéhovah, nou uni parski nou reconette souveraineté Jéhovah, nou content nou bann frere, nou mette nou l’espoir dan Royaume Bondié, ek nou respecté bann ki Bondié inn choisir pou prend la tête parmi nou. Jéhovah aide nou pou surmonte certain l’attitude ki nou ena a cause nou l’imperfection ek ki kapav menace nou l’unité.—Rom. 12:2.

Rejette l’orgueil ek jalousie

11. Kifer l’orgueil separe bann dimoune, ek couma Jéhovah aide nou pou vaink sa?

11 L’orgueil separe bann dimoune. Enn dimoune ki ena l’orgueil content considere li-mem couma pli superieur ki lezot, ek souvent li prend plaisir pou faire vantard. Mais en general, c’est enn l’obstacle pou l’unité; bann ki tann li pé faire so vantard, kapav jaloux. Disciple Jacques ti dire bien franc: “Tou fierté coumsa, li mauvais.” (Jacq. 4:16) Nou pa montré l’amour si nou traite lezot coumadir zot inferieur ar nou. Li extraordinaire ki Jéhovah donne nou enn l’exemple l’humilité: Li interesse-Li avek bann dimoune imparfait couma nou. David ti ecrire ki ‘c’est l’humilité Bondié ki eleve li.’ (2 Sam. 22:36) Parole Bondié aide nou pou vaink l’orgueil kan li enseigne nou pou raisonne dan enn bon fason. Paul ti inspiré pou pose sa question-la: “Kisannla ki rann toi different ar enn lot? Oui, ki to ena ki to pa’nn gagné? Si asterla, vrai-mem to’nn gagne sa, kifer to faire vantard coumadir to pa finn gagne sa?”—1 Cor. 4:7.

12, 13. (a) Kifer li facile pou jaloux? (b) Ki resultat nou pou gagné si nou considere lezot pareil couma Jéhovah considere zot?

12 Jalousie li enn lot obstacle bien commun ki empeche l’unité. A cause nou l’imperfection, nou tou nou ena “enn tendance pou envié lezot.” Mem bann chretien ki longtemps dan la verité kapav de temps en temps jaloux situation, di-bien, privilege ou-soit capacité lezot. (Jacq. 4:5) Par exemple, enn frere ki ena enn famille kapav jaloux privilege ki enn serviteur a plein temps ena, sans realisé ki sa serviteur a plein temps-la li aussi kitfois li kapav enn tipé jaloux sa frere ki ena bann zenfant-la. Couma nou kapav empeche enn jalousie coumsa detruire nou l’unité?

13 Pou aide nou pou evité jaloux, rappel ki la Bible compare bann chretien oint ki forme partie dan congregation, ar bann membre enn lekor humain. (Lire 1 Corinthiens 12:14-18.) Par exemple, mem si ou lizié pli visible ki ou leker, eski toulé-deux pa important pou ou? Li pareil aussi avek Jéhovah, tou bann membre congregation ena valeur pou Li, mem si certain, pendant enn temps, zot plus en vue ki lezot. Alors, anou considere nou bann frere dan mem fason ki Jéhovah. Au lieu ki nou jaloux zot, nou kapav interesse nou personnellement ar zot. Kan nou faire sa, nou pou montré difference ki ena entre bann vrai chretien ek bann membre religion la chretienté.

Ena division dan la chretienté

14, 15. Couma la chretienté apostat finn divisé?

14 L’unité ki ena entre bann vrai chretien bien different ar desaccord ki existé parmi bann religion la chretienté. Vers quatrieme siecle, ti ena tellement bann chretien apostat partout, ki mem enn l’empereur Romain, ki ti enn païen, ti croire ladan ek li ti prend controle zot religion ek sa ti favorise developpement la chretienté. Apré sa, ti ena bann division enn derriere lot, beaucoup royaume ti separé ar Rome ek ti forme zot prop religion dan zot pays.

15 Beaucoup parmi sa bann royaume-la ti laguerre sakenn kont so camarade pendant plusieurs siecle. Pendant 17eme ek 18eme siecle, bann dimoune en Amérique, en Angleterre, ek en France ti encourage lezot pou ena enn grand fidelité envers zot nation, ek c’est coumsa ki nationalisme ti vinn coumadir enn religion. Pendant 19eme ek 20eme siecle, nationalisme ti commence domine pensée la plupart dimoune. Finalement, bann religion la chretienté ti divisé pou forme plusieurs secte, la plupart parmi zot tolere nationalisme. Bann pratiquant finn mem al faire la guerre ar bann dimoune dan enn lot pays ki dan mem religion ki zot. Zordi, la chretienté divisé parski chaque secte dan enn pays ena so prop croyance ek sakenn defann so prop pays.

16. Ki qualité probleme divise bann membre la chretienté?

16 Dan 20eme siecle, certain parmi bann centaine secte ki ti ena dan la chretienté ti crée enn mouvement, mouvement œcuménique. So l’objectif c’est pou uni tou bann religion ki dire zot chretien. Mais apré tou bann zeffort ki zot inn faire pendant plusieurs dizaine l’année, zis enn tigit religion ki finn vinn ensam, ek bann croyant encore divisé lor bann question couma l’evolution, l’avortement, l’homosexualité, ek nomination bann madame pou vinn pretre. Certain chef religieux essaye amenn bann dimoune different secte ensam kan zot diminué l’importance bann doctrine ki avant ti divise zot. Selman, diminué l’importance bann doctrine faire bann dimoune ena enn la foi faible, ek sa pa vrai-mem uni la chretienté ki divisé.

Vrai l’adoration pli elevé ki nationalisme

17. Dapré prophetie Mika, couma eski vrai l’adoration pou uni bann dimoune “dan periode final bann jour”?

17 Mem si zordi l’humanité li pli divisé ki avant, l’unité ki ena parmi bann vrai adorateur contigne faire zot different. Mika, prophete Bondié ti annoncé: “Mo pou rassemblé zot dan l’unité couma enn troupeau dan l’enclos.” (Mika 2:12) Mika ti annoncé ki vrai l’adoration pou vinn pli elevé ki tou bann lezot forme l’adoration, ki li bann fausse bondié ou-soit enn pays ki certain considere couma bondié. Li ti ecrire: “Pou bizin arrivé ki dan periode final bann jour, montagne l’adoration Jéhovah pou bien etabli la-haut lor bann montagne, oui li pou vinn pli haute ki bann colline; ek bann peuple pou bizin al vers li. Parski tou bann peuple zot, zot pou marche sakenn au nom zot bondié, mais nou, nou pou marche au nom Jéhovah nou Bondié.”—Mika 4:1, 5.

18. Ki bann changement vrai l’adoration finn aide nou pou faire?

18 Mika ti aussi decrire couma vrai l’adoration ti pou uni bann dimoune ki ti bann l’ennemi avant. “Oui, [bann dimoune dan] beaucoup nation pou allé ek pou dire: ‘Vini, anou monte lor montagne Jéhovah ek anou al dan lakaz Bondié Jacob; ek Li pou montré nou ki chemin nou bizin suive, ek nou pou marche lor so bann sentier.’ . . . Ek zot pou bizin forge zot bann l’epée ek faire sa vinn bann zouti pou travail la terre, ek zot pou faire zot bann lance vinn bann cisaille. Enn nation pa pou leve l’epée kont enn lot nation, ek zot nepli pou aprann laguerre.” (Mika 4:2, 3) Bann ki quitte l’adoration bann bondié ki dimoune finn faire, ou-soit l’adoration zot nation, ek vinn adore Jéhovah, konn enn l’unité mondial. Bondié enseigne zot pou ena l’amour.

19. L’unité ki ena parmi plusieurs million dimoune dan vrai l’adoration, prouve ki kitsoz?

19 Okenn part pena l’unité ki ena parmi bann vrai chretien dan le monde entier. Sa l’unité-la c’est enn preuve ki Jéhovah pé contigne guide so peuple par so l’esprit saint. Bann dimoune dan tou nation pé uni couma jamais nou finn trouvé avant dan l’Histoire. Sa pé realise dan enn fason extraordinaire bann parole Révélation 7:9, 14, ek sa realisation-la montré ki bann ange Bondié bientot pou largue bann “di-vent” ki pou detruire sa mauvais le monde zordi-la. (Lire Révélation 7:1-4, 9, 10, 14.) Eski li pa enn privilege ki nou uni avek nou bann frere ek soeur dan le monde entier? Couma sakenn parmi nou kapav favorise sa l’unité-la? C’est seki nou pou examiné dan prochain lartik.

Couma ou pou reponn?

• Couma vrai l’adoration uni bann dimoune?

• Couma nou kapav empeche jalousie detruire nou l’unité?

• Mem si beaucoup pays divisé, kifer bann vrai chretien reste uni?

[Zimage page 16]

Bann chretien dan premier siecle ti ena different l’origine ek culture

[Zimage page 18]

Couma, kan ou aidé dan projet construction bann la Salle du Royaume, sa favorise l’unité?

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze