“ Gard Linite ki Lespri Sin Prodir”
LAPOT Pol ti ankouraz bann Kretien lasanble Efez pou kontign “siport sakenn zot kamarad dan lamour” ek pou “fer bann gran zefor pou gard linite ki lespri sin prodir gras-a lape ki tini zot ansam.”—Efe. 4:2, 3.
Se gras-a “lespri sin,” setadir lafors aktif Bondie, ki nou ena “linite” azordi. Selman, parey kouma Pol inn explike, bizin fer bann zefor pou ki ena sa linite-la. Kisann-la bizin fer sa bann zefor-la? Avredir, sak Kretien bizin fer so par pou “gard linite ki lespri sin prodir.”
Anou pran enn lexanp pou explik sa. Fer koumadir enn kikenn inn donn twa enn loto nef. Kisann-la ki pou bizin okip loto-la? Repons-la kler, pa vre! Si to pa okip loto-la ek ki li tom an-pann, to pa pou kapav dir ki se sa dimounn ki’nn donn twa loto-la ki an-tor!
Dan mem fason, mem si nou linite se enn kado ki Bondie inn donn nou, sak Kretien ena responsabilite pou gard sa linite-la. Alor, si nou ena enn ti bizbiz avek enn frer ouswa enn ser, li bon ki nou demann nou-mem, ‘Eski mo pe fer mo par “pou gard linite ki lespri sin prodir,” setadir eski mo pe fer zefor pou rezoud sa sitiasion-la?’
“FER BANN GRAN ZEFOR POU GARD LINITE”
Parey kouma Pol inn explike, parfwa nou bizin “fer bann gran zefor pou gard linite,” sirtou si enn frer ouswa enn ser inn fer nou ditor. Me kan enn kikenn fer nou ditor, eski nou touletan bizin al koz ar li pou regle problem-la? Pa forseman. To kapav demann tomem, ‘Si mo al koz ar li, eski problem-la pou rezoud ouswa eski li pou anpire?’ Parfwa, li pli bon ki nou zis pardonn dimounn-la ek ki nou pas lor la.—Prov. 19:11; Mark 11:25.
Demann tomem, ‘Si mo al koz ar li, eski problem-la pou rezoud ouswa eski li pou anpire?’
Lapot Pol dir ki nou bizin kontign “siport sakenn [nou] kamarad dan lamour.” (Efe. 4:2) Enn liv explike ki sa lexpresion-la vedir ki nou bizin “aksepte lezot kouma zot ete.” Sa vedir ki nou bizin aksepte ki nou bann frer ek ser zot inparfe ek zot fer pese, parey kouma nou. Biensir, nou tou nou fer zefor pou met “nouvo personalite” lor nou. (Efe. 4:23, 24) Selman, personn pa kapav fer sa dan enn fason parfe. (Rom. 3:23) Alor, si nou konpran sa, li pou pli fasil pou nou pardonn nou kamarad ek pou nou “gard linite ki lespri sin prodir.”
Dan lasanble, nou pou ena “lape ki tini [nou] ansam” si nou pardonn ek nou bliye bann kitsoz ki lezot fer kont nou. Mo Grek ki lapot Pol servi dan Efezien 4:3 pou tradir “tini zot ansam,” sa mo-la vedir “ligaman” dan Kolosien 2:19. Bann ligaman zot koumadir bann lakord bien solid ki tini de lezo ansam. Dan mem fason, se lape ek lamour ki nou ena pou nou bann frer ek ser, ki pou permet nou pou kontign ena enn bon lamitie avek zot, mem si parfwa zot fer bann kitsoz ki nou pa kontan.
Alor, kan enn kikenn ofans twa, agas twa, ouswa desevwar twa, fer zefor pou konpran sa dimounn-la olie ki to kritik li. (Kol. 3:12) Nou tou nou inparfe, ek parfwa li kapav arive ki nou bles lezot. Kan to rapel sa, to pou fer to par pou “gard linite ki lespri sin prodir.”