Rasanble Ansam Kuma enn Sel
1 Komye fwa eski u’nn etone devan manyer extraordiner ki u lekor ete? (Psom 139:14) Sak manb nu lekor travay ansam avek lezot manb. Parol Bondye konpar kongregasyon Kretyin ar enn lekor byin asanble pu fer enn sertin travay. Anba lotorite Kris, ki Sef, tu bann manb kongregasyon pe rasanble ansam kuma enn sel ek pe korpere dan linite. (Efe. 4:16a) Donk, Zeova kapav servi so pep ki dan linite, pu akonpli bann kitsoz extraordiner.
2 Bann manb kongregasyon premye-syek ti viv “kuma enn sel” kan zot ti vey lor kondisyon spirityel ek materyel sakenn. (Akt 2:44-47) Avek sutyin Zeova, zot ti fer fas ek zot ti sirmont lopozisyon vyolan dan linite. (Akt 4:24-31) Zot ti anons mesaz lor Rwayom Bondye ninport ki plas kot zot ti ale. Sa ti permet zot pres labonn nuvel partu kot ti ena dimunn sa lepok la. (Kol. 1:23) Dan lepok modern, kongregasyon Kretyin finn fer sa bann mem kitsoz la dan linite. Ki kitsoz ki’nn kontribye pu ena sa linite la?
3 Lanseynman Bondye Fer Nu Vinn Enn Sel: Atraver lemond, nu ena linite par nu ladorasyon. Kuma eski sa posib? Nu rekonet mwayin vizib ki Zeova servi pu donn ‘manze spirityel dan ler ki bizin.’ (Mat. 24:45) Nu byin apresye usi bann zom kalifye ki Li finn done kuma bann anseynan dan kongregasyon. Kan, nu aksepte bann dispozisyon ki Zeova pran pu donn nu manze spirityel avek enn leker sinser, nu plis konpran Parol Bondye. Sa pu pus nu tu pu ena mem dezir pu imit Zezi antan ki so bann disip. Nu bizin kontiyn etidye Parol Bondye, fer zefor pu “vinn enn sel dan lafwa.” (Efe. 4:8, 11-13) Eski u pe ankuraz nu linite spirityel grasa u lektir Labib sak zur?
4 Nu Frekantasyon Kretyin Fer Nu Ena Linite: Lamur fer nu viv dan linite avek nu bann konpaynon dan bann reynion Kretyin. La “nu montre nu konsiderasyon pu sakenn.” (Ebre 10:24, 25) Sa vedir get plis ki laparans ek aprann konn vremem nu bann frer, truv zot parey kuma Zeova truv zot, setadir kuma bann dimunn ki ena valer. (Agai 2:7, not anba paz.) Amezir nu ekut zot exprim zot lafwa, nu lamur pu zot vinn pli profon ek sa fer nu linite vinn pli solid. Eski lezot konn u kuma enn kikenn ki asiste regilyerman bann reynion?
5 Bann Konpaynon Travay dan Predikasyon: Predikasyon labonn nuvel avek bann proklamater fer nu gard nu linite pu fer volonte Bondye. Lapot Pol ti apresye so “bann konpaynon travay pu guvernman Bondye.” (Kol. 4:11) Dan minister kan nu partaz bann lexperyans ek kan nu sutenir nu kamarad sa ed nu pu akonpli nu lobligasyon Kretyin ek pu fer nu linite vinn pli solid.—Kol. 3:14.
6 Linflyans Lespri Sin Fer Nu Viv dan Linite: Kan nu fer zefor pu fer so volonte, Zeova beni nu ek Li donn nu so lespri. Sa ed nu pu diminye bann dezakor ek pu res ansam dan linite. (Psom 133:1) Li pus nu pu “obzerv linite lespri dan lape.” (Efe. 4:3) Nu tu nu kapav ankuraz larmoni ki egziste parmi pep Bondye kan nu manifeste frwi lespri sin dan manyer nu tret nu kamarad.—Gal. 5:22, 23.
7 Servi ansam dan linite anba lotorite Kris “fer kongregasyon la grandi ek vinn for dan lamur.” (Efe. 4:16b) Anplis, li glorifye Zeova, “Bondye ki donn lape.”—Rom. 16:20.