Gouvernement Bondié—Enn Réalité Zordi

“Couma eski tou bann pays dans le monde, kapav tombe d’accord, alors ki sakenn éna so propre culture ek zot finn arrive différent stages dans zot développement? Certains finn dire ki c’est seulement enn l’attaque extra-terrestre ki pou unir l’humanité.”—The Age, enn journal Australien.

ENN l’attaque extra-terrestre? Nous pa koné si sa pou vrémem unir tous bann pays lor la terre. Mais bann prophéties la Bible koz lor enn situation critique ki pré pou arrivé ek ki pou unir le monde entier. Ek c’est bann la forces extra-terrestre mem ki pou crée sa situation-la.

Dans enn façon prophétique, le roi David, ki ti règne en Israël dans le passé, ti koz lor sa situation mondiale-la. Inspiré par Bondié, li ti écrire: “Bann lé-rois lor la terre finn prend zot position, ek bann grand personnages finn rassemblé ensemble, dans l’unité, contre Jéhovah ek contre so oint. Zot dire: ‘Anou coupe zot liens ek jette zot la corde loin ar nous!’ ” (Psaume 2:2, 3; Actes 4:25, 26) Remarqué ki bann dirigeants lor la terre pou rassemblé dans l’unité, contre le Créateur, Jéhovah et contre Jésus Christ, lé-Roi ki Li’nn choisiré. Couma eski sa pou arrivé?

D’après la chronologie Biblique, ek bann prophéties ki’nn fini réalisé, c’est en 1914 ki Royaume Bondié inn prend pouvoir dans le ciel, avec Jésus Christ couma lé-Roi.a Sa l’époque-la, tou bann nations lor la terre ti éna enn pensée en commun. Au lieu ki zot ti soumette ar souveraineté sa nouveau Royaume-la, zot ti pé la-guerre entre zot pou gagne pouvoir, pendant la Première Guerre Mondiale.

Ki Jéhovah pensé lor réaction sa bann dirigeants-la? La Bible dire: “Celui ki pé assizé dans lé-ciel pou rié; Jéhovah Limem pou moque zot. Lerla, dans so colère, Li pou koz ar zot, oui dans so grand colère, Li pou troublé zot.” Dans sa moment-la, Jéhovah pou dire so Garçon, lé-Roi ki li’nn choisir: “Demann moi ek mo pou donne toi bann nations en héritage, ek la terre entier couma to propriété. To pou casse zot avec enn sceptre en fer, ek to pou craze zot couma enn récipient la terre.”—Psaume 2:4, 5, 8, 9.

Sa destruction finale-la pou arrivé à Har–​Maguédôn. Dernier livre la Bible, la Révélation, décrire sa l’événement final-la couma “la guerre grand jour Bondié, le Tout-Puissant,” kot tou “lé-rois lor la terre entier” pé rassemblé. (Révélation 16:14, 16) Par l’influence bann démons, bann nations lor la terre pou finalement unir zot avec enn seul objectif—pou la-guerre contre Bondié, le Tout-Puissant.

Jour kot bann humains pou rassemblé ensemble pou faire la-guerre contre souveraineté Bondié, pé kosté bien vite. Mais seulement, zot “l’unité” pa pou apporte zot okenn bienfaits personnel. Au contraire, zis après ki zot pou faire sa guerre-la, pou éna la paix lor la terre, enn la paix ki beaucoup dimoune pé atann depuis longtemps. Couma? Pendant sa la-guerre finale-la, Royaume Bondié ‘pou craze tout sa bann royaume [ki éna dans lé-monde-la], ek pou détruire zot complètement ek limem pou reste pou enn létan indéfini.’ (Daniel 2:44) Péna okenn l’organisation humain, ni okenn gouvernement, apart Royaume Bondié ki pou kapav réalise désir l’humanité pou éna la paix lor la terre.

Chef Dans Royaume Bondié

C’est pou sa Royaume-la ki beaucoup dimoune sincère habitué prié, kan zot dire: “Ki to Royaume vini. Ki to volonté faire lor la terre pareil couma dans le ciel.” (Matthieu 6:10) Sa Royaume-la, pa représente condition léker bann dimoune, mais c’est enn gouvernement bien réel ki finn accompli bann kitsoz remarquable depuis ki li’nn établi dans le ciel en 1914. Anou examine certains facteurs important ki montré ki Royaume Bondié li bien réel ek ki li bien actif zordi.

Premier facteur, li éna enn pouvoir exécutif [pouvoir pou applique bann la lois], ki bien puissant ek efficace, ek ki dirigé par lé-Roi Jésus Christ. En l’an 33 N.L., Jéhovah ti établi Jésus Christ Chef lor congrégation Chrétienne. (Éphésiens 1:22) Depuis sa, Jésus inn exerce so l’autorité, ek li’nn montré so capacité pou dirigé. Par exemple, dans premier siècle, kan ti éna enn grand famine en Judée, dé-suite congrégation Chrétienne ti prend bann dispositions pou aide so bann membres. La congrégation ti organise bann secours, ek Barnabas ek Saul ti quitte Antioche avec l’aide nécessaire pou bann frères.—Actes 11:27-30.

Dans nou l’époque, Royaume Bondié pé fonctionné, alors nous kapav atann encore plus de la part de Jésus Christ. N’importe kan éna bann catastrophes, couma tremblements de terre, la famine, inondation, tempête, ou-soit éruption enn volcan, congrégations bann Témoins de Jéhovah aide rapidement zot bann membres ek lézot dimoune ki vive dans bann l’endroits affecté. Par exemple, en Janvier ek Février 2001, kan ti éna bann grand tremblements de terre en Salvador, zot ti organise bann secours partout dans pays. Bann Témoins Jéhovah ti sorti Canada, Guatemala ek États-Unis pou vinn aidé. Zot ti re-construire rapidement trois la-salle kot zot faire réunions, ek aussi plus ki 500 lakaz.

Bann Ki Soumette ar Royaume Bondié

Depuis ki li’nn établi dans le ciel en 1914, Royaume Bondié inn rassemblé bann dimoune ki soumette ar so direction ek finn organise zot. Sa bann dimoune-la sorti partout lor la terre. Sa réalise enn prophétie ki’nn écrire dans livre Isaïe: “Pou bizin arrivé ki dans période finale, la montagne de la maison de Jéhovah [so l’adoration bien élevé] pou établi solidement lor sommet bann montagnes, . . . ek tou nations pou bizin monte vers li.” D’après sa prophétie-la, “beaucoup dimoune” pou monte lor sa montagne-la ek pou accepté bann instructions ek bann la loi Jéhovah.—Isaïe 2:2, 3.

Sa l’activité-la inn permet enn rassemblement extraordinaire, ki jamais pa finn éna avant—enn rassemblement plus ki 6,000,000 Chrétiens dans plus ki 230 pays lor la terre. Pendant bann l’assemblées internationales, souvent bann observateurs impressioné par l’amour, la paix, ek l’unité ki zot trouvé parmi tou sa la foule-la. Mem si zot éna différent nationalités, cultures ek langues, péna okenn barrières entre zot. (Actes 10:34, 35) Eski ou pa d’accord ki, pou enn gouvernement réussi faire plusieurs centaines dimounes différent races, vivre en paix ek en harmonie, fodé ki li bien efficace, stable ek réel?

Royaume Bondié ek So Programme l’Education

Tous gouvernements atann ki zot citoyens obéir zot bann la-lois, et si kikenn envie laisse li dirigé par enn gouvernement, li bizin obéir so bann la lois. Pareillement, Royaume Bondié éna bann la lois ki tou dimoune ki envie vinn so bann sujets, bizin obéir. Seulement, c’est enn grand travail pou réussi faire sa quantité dimoune ki éna différent culture-la, accepté ek suivre mem la-lois. Donc, sa enn l’autre facteur ki prouvé ki Royaume Bondié, li bien réel, c’est so programme l’éducation. C’est enn programme bien efficace, ki pa’nn touche zis l’esprit bann dimoune, mais aussi zot léker, ek inn pousse zot pou transforme zot la-vie.

Couma eski Royaume Bondié faire sa grand travail-la? Par prédication “de maison-en-maison,” ek par l’étude la Bible kot bann dimoune, pareil couma bann zapôtres ti faire. (Actes 5:42; 20:20) Eski sa méthode enseignement-la, li vrémem efficace? Guetté ki Jacques Johnson, enn prêtre catholique, ti écrire dans enn journal Canadien ki parette chaque semaine. Li ti koz lor bann zefforts ki li ti faire pou décourage enn madame étudié la Bible avec bann Témoins de Jéhovah. Li ti écrire: “Mo ti inpé déconcerté ek mo ti rann moi compte ki mo ti’nn engagé dans enn la guerre ki’nn perdi d’avance. Mo’nn commence réalisé ki pendant plusieurs mois, sa bann Témoins de Jéhovah-la, finn crée bann bon relations avec sa jeune mama-la, alors ki pa ti kapav sorti kot li. Zot finn réussi faire sa graçe à zot l’aide ek zot l’amitié. Sa jeune madame-la pa’nn tardé pou vinn enn membre actif parmi bann Témoins de Jéhovah, ek mo pa ti kapav faire nanyin pou empêche sa.” Oui, léker sa madame ki ti enn Catholique-la, inn touché par message la Bible ki bann Témoins ti enseigne li ek par zot bonne conduite. Pareillement, léker plusieurs millions dimoune lor la terre entier, pé touché par l’enseignement bann Témoins de Jéhovah.

Royaume Bondié pé donne bann dimoune enn l’éducation basé lor la Bible ek ki encourage zot pou respecté bann principes moral ki éna dans sa livre-la. Li enseigne bann dimoune pou content ek pou estime zot prochain, n’importe ki race zot été. (Jean 13:34, 35) Li aide aussi bann dimoune pou suive sa conseil-la: “Arrête faire pareil couma sa lé-monde-la. Mais transforme zot, ek renouvelé zot l’esprit, pou ki zot kapav vérifié par zot-mem ki volonté Bondié, li bon, li agréable ek li parfait.” (Romains 12:2) Plusieurs millions dimoune inn change zot la-vie ek c’est avec plaisir ki zot pé suive bann la-lois ek bann principes gouvernement Bondié. Zot inn trouve la paix ek le bonheur asterla, ek zot éna enn grand l’espoir pou l’avenir.—Colossiens 3:9-11.

La Tour de Garde, c’est enn moyen remarquable ki’nn permette éna sa l’unité mondiale-la. Graçe à bann méthode traduction bien organisé, ek bann l’équipment ki permette imprime bann publications en plusieurs langues, li possible pou imprime en mem temps, bann l’articles principal La Tour de Garde dans 135 langues. Sa permet plis ki 95 % so bann lecteurs à travers le monde, pou étudié en mem temps, zot La Tour de Garde dans zot propre langue.

Enn écrivain Mormon ti faire enn la-liste lor bann pli grand réussite ki bann missionaires inn gagné, en dehors so propre l’église. Li ti classe La Tour de Garde ek Réveillez-Vous !, ki publié par bann Témoins de Jéhovah, couma bann meilleur magazines ki apporte la bonne nouvelle. Li ti dire: “Personne pa kapav dire ki La Tour de Garde ek Réveillez-Vous ! pé donne dimoune l’impression ki tout pé marche bien. Au contraire, zot encourage dimoune pou reste lor zot garde. C’est enn kitsoz ki mo pa’nn presque trouvé dans bann lezot publications religieux. La Tour de Garde ek Réveillez-Vous !, zot bien réconfortant parski zot basé lor bann faits réels, zot bien documentés, ek zot éna enn rapport avec bann l’événements mondial.”

Donc, éna beaucoup preuves ki Royaume Bondié c’est enn gouvernement bien réel, ki bien actif zordi. Bann Témoins de Jéhovah pé annonce tout dimoune “la bonne nouvelle lor royaume” Bondié avec joie ek avec zèle. Zot pé invite bann dimoune pou soumette zot ar sa Royaume-la. (Matthieu 24:14) Eski ou ti pou content partage sa privilège-la ou aussi? Ou kapav gagne bann grand bénédictions, si ou associé ensemble avec bann dimoune ki pé laisse sa Royaume-la enseigne zot ek ki pé faire zefforts pou vive en accord avec so bann principes. En plus, ou pou éna possibilité pou vive dans enn monde nouveau, “kot pou éna la justice” ek ki pou dirigé par Royaume Bondié.—2 Pierre 3:13.

[Note]

[Zimage page 4, 5]

En 1914, bann nations ti engagé dans enn la-guerre mondiale

[Zimage page 6]

Bann Chrétiens prouve zot l’amour kan zot aidé volontairement pendant bann catastrophes

[Zimage, page 7]

Bann Témoins de Jéhovah partout lor la terre, bénéficié mem programme l’enseignement