Jéhovah, Nou ‘Forteresse Dans Bann Moments Difficile’
‘Jéhovah sauve bann dimoune droite; Li zot forteresse dans bann moments difficile.’—PSAUME 37:39.
1, 2. (a) Ki Jésus ti demandé dans so la-prière pou so bann disciples? (b) Ki volonté Jéhovah concernant so bann serviteurs?
JÉHOVAH, Li Tout-Puissant. Li éna pouvoir pou protège so bann serviteurs fidèle par n’importe ki moyen. Li kapav même tire so peuple dans le monde, ek mette zot dans enn place kot zot pou en sécurité ek en paix. Pourtant, kan Jésus ti prié pou so bann disciples, li ti dire so Papa: “Mo pa pé demann toi pou tire zot dans le monde, mais pou veille lor zot à cause sa kikenn ki mauvais-la.”—Jean 17:15.
2 Jéhovah inn décidé pou pa ‘tire nous dans le monde.’ Au contraire, c’est so volonté ki nous vive avec bann dimoune dans le monde, pou ki nous prêche enn message d’espoir ek consolation. (Romains 10:13-15) Mais, couma Jésus inn faire nous comprend dans so la-prière, le fait ki nous vive dans le monde, nous exposé ar ‘enn kikenn ki mauvais.’ Bann dimoune désobéissant ek bann démons faire nous souffert ek gagne problèmes. Malheureusement, bann Chrétiens pa kapav évite bann moments bien difficile.—1 Pierre 5:9.
3. Ki situation bann serviteurs Jéhovah bizin affronté zot aussi, mais ki consolation éna dans la Bible?
3 Kan nous gagne problèmes, li normal ki nous découragé. (Proverbes 24:10) La Bible raconte la vie plusieurs fidèle serviteurs Jéhovah ki’nn passe par bann moments difficile. Enn Psaume dire: “Malheurs pa manqué pou enn dimoune juste, mais dans tousala, Jéhovah délivré li.” (Psaume 34:19) Oui, même “enn dimoune juste” gagne problèmes. Pareil couma David ti dire dans enn Psaume, parfois nous aussi nous kapav senti nous coumadire “paralysé ek démoralisé ziska dernier degré.” (Psaume 38:8) Mais, nous réconforté kan nous koné ki “Jéhovah près ar bann dimoune ki éna enn grand chagrin dans zot léker; ek Li sauve bann ki démoralisé.”—Psaume 34:18; 94:19.
4, 5. (a) En accord avec Proverbes 18:10, ki nous bizin faire pou gagne protection Bondié? (b) Ki kitsoz nous kapav faire pou gagne l’aide Bondié?
4 Jéhovah vrai-même veille lor nous, pareil couma Jésus ti demandé dans so la-prière. Li ‘enn forteresse pou nous dans bann moments bien difficile.’ (Psaume 37:39) Nous trouve même pensée dans livre Proverbes, kot inn écrire: “Le nom Jéhovah, li enn tour fort. Le juste li sauvé li al ladan ek li trouve li protégé.” (Proverbes 18:10) Sa verset-la montré enn kitsoz fondamental lor l’intérêt plein d’amour ki Jéhovah éna pou so bann serviteurs. Bondié protège surtout bann dimoune juste ki faire zefforts pou rode Li, coumadire nous sauvé pou al dans enn tour pou rode refuge.
5 Kan nous gagne bann grand difficultés, couma eski nous kapav rode protection Jéhovah? Anou examine trois points important ki kapav aide nous pou gagne l’aide Jéhovah. Premièrement, nous bizin prié Jéhovah. Deuxièmement, nous bizin agir en harmonie avec so l’esprit-saint. Ek troisièmement, nous bizin soumette ar disposition ki Li’nn prend c’est-à-dire fréquente nou bann frères ek soeurs ki kapav aide nous dans bann moments difficile.
Pouvoir la-Prière
6. Couma eski bann vrai Chrétiens considère la-prière?
6 Certain docteurs conseille bann dimoune ki gagne dépression ek stress faire la-prière pou soigne zot. C’est vrai ki enn moment tranquillité, pareil couma kan nous pé prié, sa kapav soulage nou stress. Mais certains sons ki éna dans la nature, ou enn massage lor nous lédo aussi kapav soulage nous pareil. Bann vrai Chrétiens pa considère la-prière couma enn kitsoz banal, zis couma enn traitement ki pou soulage zot. Nous considère la prière couma enn moyen pou koz ar nou Créateur avec enn profond respect. Kan nous prié Bondié, nous montré nou profond l’attachement ek nou confiance en Li. Oui, la-prière faire partie nou l’adoration.
7. Ki veut dire prié Bondié avec confiance, ek couma sa qualité la-prière-la aide nous affronte bann moments difficile?
7 Kan nous prié Jéhovah, nous bizin éna confiance en Li. L’apôtre Jean ti écrire: “Voilà l’assurance ki nous éna envers Li, n’importe ki kitsoz nous demandé en accord avec so volonté, Li tann nous.” (1 Jean 5:14) Jéhovah, pli grand Personnage dans l’univers, seul vrai Bondié, le Tout-Puissant, porte enn l’attention spécial ar la-prière sincère so bann serviteurs. Le simple fait ki nous koné ki Jéhovah écoute nous kan nous confié Li nou problèmes ek nou tracas, sa même assez pou réconforte nous.—Philippiens 4:6.
8. Kifer fodé pa ki bann Chrétiens fidèle senti zot timide, ou-soit indigne pou prié Jéhovah?
8 Fodé pa ki bann Chrétiens fidèle, senti zot timide, indigne ou-soit zot manque confiance en zot-même kan zot prié Jéhovah. C’est vrai, kitfois nous pa pou envie prié Jéhovah si nous honté parski nous finn faire enn kitsoz ki pa bizin, ou-soit si nous éna beaucoup problèmes. Mais dans sa bann moments-la, fodé pa nous bliyé ki Jéhovah, “éna pitié pou bann dimoune ki dans la détresse,” ek Li “réconforte bann dimoune ki découragé.” (Isaïe 49:13; 2 Corinthiens 7:6) C’est surtout dans bann moments bien difficile kan nous bouleversé, ki nous bizin rappelle ki Jéhovah Li nou forteresse, ek prié Li avec confiance.
9. Kifer li important ki nous éna la foi kan nous prié Jéhovah?
9 Pou nous kapav profite privilège pou prié Jéhovah, nous bizin éna enn vrai la-foi. La Bible dire ki “celui ki vinn proche ar Bondié, bizin croire ki Li existé, ek ki Li vinn celui ki récompense tou bann ki rode Li.” (Hébreux 11:6) La foi, c’est pa zis croire ki Bondié “existé.” La foi véritable c’est kan nous sûr ki Bondié éna désir ek capacité pou récompense nous kan nous obéir Li. La Bible dire: “Lizié Jéhovah lor bann dimoune droite, ek so zoreille écoute zot supplications.” (1 Pierre 3:12) Si touletan nous conscient ki Jéhovah prend nous compte, sa pou donne enn sens spécial à nou la-prière.
10. Couma nou la-prière bizin été si nous envie ki Jéhovah soutenir nous?
10 Jéhovah pou écoute nous si nous prié Li avec enn léker complet. Nous lire dans enn Psaume: “Mo finn crié avec tou mo léker. Réponn moi, Oh Jéhovah.” (Psaume 119:145) Dans beaucoup religion, zot répète toujours même paroles kan zot faire la prière. Mais nous, fodé pa ki nou la-prière li vinn enn routine, ou-soit nous pa prend compte séki nous pé dire. Kan nous prié Jéhovah avec “tou nou léker,” nous bann paroles éna enn sens ek enn but. Lerla, kan nous pou fini faire bann la-prières sincère coumsa, nous pou senti nous soulagé parski nous finn jette tou nou “fardeau lor Jéhovah.” Ek pareil couma la Bible promette, “Li pou soutenir” nous.—Psaume 55:22; 1 Pierre 5:6, 7.
L’Esprit-Saint Bondié, enn Aide pou Nous
11. Cite enn façon couma Jéhovah réponn nous kan nous ‘contigne demann’ so l’aide.
11 Jéhovah pa zis écoute nou la-prière, Li réponn nous aussi. (Psaume 65:2) David ti écrire: “Dans mo détresse, mo pou appelle toi, parski to pou réponn moi.” (Psaume 86:7) C’est pou sa ki Jésus ti encourage so bann disciples pou ‘contigne demann’ l’aide Jéhovah, parski “nou Papa ki dans le ciel” pou donne “l’esprit-saint bann ki demann Li.” (Luc 11:9-13) Oui la force Bondié agir couma enn l’aide ki réconforte so bann serviteurs.—Jean 14:16.
12. Couma l’esprit-saint kapav aide nous kan nous bouleversé par bann grand problèmes?
12 Même kan nous gagne problèmes, l’esprit-saint kapav donne nous “la puissance ki supérieur à la normale.” (2 Corinthiens 4:7) L’apôtre Paul, ki ti bizin endure beaucoup situations difficile, ti dire avec confiance: “Pou tou kitsoz mo éna courage grâce à celui ki donne moi la force.” (Philippiens 4:13) Zordi aussi, beaucoup Chrétiens inn ré-gagne la force lor plan spirituel ek affectif, après ki zot inn supplie Jéhovah dans la-prière. Souvent, kan Jéhovah aide nous par so l’esprit-saint, bann grand problèmes ki ti pé bouleverse nous, pa parette aussi grave. Grâce à la force ki Bondié donne nous, nous kapav dire pareil couma l’apôtre Paul: “Nous pé gagne problèmes partout, mais nous pa dans enn position kot nous pa kapav bougé; nous tracassé, mais nous pa coincé; nous pé gagne persécution, mais [Jéhovah] pa pé abandonne nous; pé jette nous en-bas, mais pa pé détruire nous.”—2 Corinthiens 4:8, 9.
13, 14. (a) Couma eski Jéhovah inn montré ki Li nou forteresse à travers so Parole, la Bible? (b) Kan ou finn applique bann principes la Bible, couma sa finn aide ou personnellement?
13 En plus, l’esprit-saint finn inspire bann dimoune pou écrire la Bible ek finn aussi protège sa livre-la pou nou profit. Couma Jéhovah finn aide nous à travers la Bible, dans bann moments difficile? Enn façon, c’est kan Li finn donne nous la sagesse ek capacité pou réfléchi. (Proverbes 3:21-24) La Bible forme nou capacité mental ek améliore nou capacité pou raisonner. (Romains 12:1) Kan nous étudié la Bible régulièrement, ek nous mette en pratique séki nous aprann, nous ‘développe nou capacité mental pou nous kapav faire différence entre le bien ek le mal.’ (Hébreux 5:14) Sûrement, ou finn trouvé personnellement couma bann principes la Bible finn aide ou pou prend bann bon décisions dans bann moments difficile. La Bible donne nous la sagesse pou trouve bann solutions pratique kan nous gagne bann problèmes grave.—Proverbes 1:4.
14 Parole Bondié aide nous aussi dans enn l’autre façon—li donne nous l’espoir ki pou éna enn délivrance. (Romains 15:4) La Bible dire nous ki bann mauvais conditions pa pou duré touletan. N’importe ki problème nous pé gagné, li zis pou enn temps. (2 Corinthiens 4:16-18) Nous éna “l’espoir pou gagne la vie éternelle, ki Bondié ki pa kapav koz menti, inn promette bien-bien longtemps.” (Tite 1:2) Si nous joyeux grâce à sa l’espoir-la, ek si touletan nous mazinn sa l’avenir ki Bondié inn promette-la, nous pou kapav enduré kan nous gagne problèmes ki tracasse nous.—Romains 12:12; 1 Thessaloniciens 1:3.
La Congrégation —Enn Preuve ki Bondié Content Nous
15. Couma bann Chrétiens kapav vinn enn l’aide pou lézot?
15 Enn l’autre moyen ki Jéhovah servi pou aide nous dans bann moments difficile, c’est compagnie nou bann frères ek soeurs. La Bible dire: “Enn vrai camarade montré so l’amour touletan; li couma enn frère dans bann moments difficile.” (Proverbes 17:17) Parole Bondié encourage nous tou dans la congrégation pou honore ek content sakenn so camarade. (Romains 12:10) L’apôtre Paul ti écrire: “Sakenn bizin contigne rode, non pa so propre l’avantage, mais l’avantage so camarade.” (1 Corinthiens 10:24) Kan nous éna enn l’attitude coumsa, sa kapav aide nous pou concentré plus lor besoins lézot, ki lor nou propre problèmes. Kan nous prend létan pou aide lézot, non seulement sa pou aide zot, mais aussi, sa rann nous heureux ek satisfait. Lerla, nous plus kapav affronte nou problèmes.—Actes 20:35.
16. Couma chaque Chrétien kapav vinn enn l’encouragement pou lézot?
16 Bann Chrétiens mûr spirituellement kapav faire beaucoup pou encourage lézot. Pou zot kapav faire sa, zot montré zot abordable ek disponible. (2 Corinthiens 6:11-13) C’est enn grand bénédiction pou la congrégation kan tou dimoune prend létan pou félicite bann jeunes, encourage bann nouveaux, ek bann ki déprimé. (Romains 15:7) L’amour pou nou bann frères ek soeurs aide nous pou pa doute zot mobiles. Kan enn kikenn gagne problèmes, fodé pa ki dé-suite nous dire ki c’est parski li faible spirituellement. Paul ti encourage bann Chrétiens pou “console bann ki déprimé.” (1 Thessaloniciens 5:14) La Bible montré ki même bann Chrétiens fidèle passe par bann moments difficile.—Actes 14:15.
17. Cite certains l’occasion kot nous kapav crée enn l’amitié solide avec nou bann frères ek soeurs.
17 Bann réunions donne nous l’occasion pou encourage nous camarade. (Hébreux 10:24, 25) Mais à part bann réunions, éna lézot moments kot nous kapav montré nou l’amour. Bann serviteurs Bondié content aussi joinde dans bann moments détente. Kan nous gagne problèmes, le fait ki déjà éna enn l’amitié solide entre nous, sakenn pou prêt pou aide so camarade. L’apôtre Paul ti écrire: ‘Pou ki péna okenn division dans lé-corps-la, mais . . . so bann membres [bizin] prend soin sakenn so camarade pareil. Et si enn membre souffert, tou lézot membres souffert avec li; ou-soit si enn membre gagne la gloire, tou lézot membres partage so la-joie.’—1 Corinthiens 12:25, 26.
18. Ki tendance nous bizin évité kan nous découragé?
18 Parfois, li arrivé ki nous tellement découragé ki nous envie reste tousel kot nous. Nous bizin combatte sa sentiment-la, parski sinon, nous pa pou gagne l’aide ek l’encouragement nou bann frères ek soeurs. La Bible donne nous sa l’avertissement-la: “Enn kikenn ki reste dans so coin tousel, pou rode so propre désir égoïste; li pou résisté contre la sagesse pratique.” (Proverbes 18:1) Enn façon ki Jéhovah prend nous soin c’est à travers nou bann frères ek soeurs. Si nous reconnaite sa disposition-la, sa pou aide nous dans bann moments difficile.
Garde enn l’Attitude Positif
19, 20. Couma la Bible aide nous pou rejette bann pensées négatif?
19 Kan nous senti nous découragé ek triste, li facile pou éna bann pensées negatif. Par exemple, kan zot gagne problèmes, certains Chrétiens kapav mette en cause zot spiritualité. Zot kapav pensé ki zot péna faveur Bondié. Mais rappelle bien ki jamais Jéhovah pa tente personne avec bann “mauvais kitsoz.” (Jacques 1:13) La Bible dire: “C’est pa de so propre léker ki [Bondié] faire bann dimoune souffert ou-soit faire zot réellement la peine.” (Lamentations 3:33) Au contraire, Jéhovah bien chagrin kan so bann serviteurs souffert.—Isaïe 63:8, 9; Zekaria 2:8.
20 Jéhovah, Li “le Père des tendres miséricordes ek enn Bondié ki la source tou consolation.” (2 Corinthiens 1:3) Li prend nous soin ek Li pou honore nous dans bon moment. (1 Pierre 5:6, 7) Si touletan nous maziné ki Li content nous, sa pou aide nous garde enn l’attitude positif, ek nous pou même joyeux. Jacques ti écrire: “Considère sa couma enn la-joie mo bann frères, kan zot konn toute sortes qualités l’épreuves.” (Jacques 1:2) Kifer? Li réponn: “Parski, kan li pou vinn enn kikenn ki approuvé, li pou gagne couronne de vie, ki Jéhovah inn promette pou bann ki contigne content Li.”—Jacques 1:12.
21. Ki garantie Jéhovah donne so bann serviteurs fidèle, malgré n’importe ki problème zot gagné?
21 Jésus ti averti nous ki dans le monde nous pou gagne beaucoup problèmes. (Jean 16:33) Mais la Bible promette ki okenn “malheur, ou détresse, ou persécution, ou misère, ou danger” pa pou kapav sépare nous ar l’amour Jéhovah ek l’amour so Garçon. (Romains 8:35, 39) C’est enn grand l’encouragement kan nous koné ki n’importe ki problème nous gagné, li temporaire! Entre-temps, alors ki nous pé atann la fin bann souffrance, nou bon Papa Jéhovah pé veille lor nous. Si nous rode so l’aide, Li pou protège nous, parski Li “enn protection pou bann ki maltraité, oui enn protection pou bann ki dans détresse.”—Psaume 9:9.
Ki Nous Finn Aprann?
• Parski nous pé vive dans enn mauvais lé-monde, ki situation bann Chrétiens bizin affronté?
• Couma eski la prière sincère kapav donne nous la force dans bann moments difficile?
• Couma l’esprit-saint kapav aide nous?
• Ki nous kapav faire pou aide sakenn nou camarade?
[Zimage, page 15]
Nous bizin rode Jéhovah, pareil coumadire nous pé sauvé pou al dans enn tour
[Zimage, page 16]
Bann Chrétiens mûr rode tou l’occasion pou félicite ek pou encourage lézot