Fatigué, Mais Nous Pa Laisse Nous Gagné par la Fatigue
“Jéhovah, Créateur la terre entier, . . . donne la force séki bien fatigué ek enn kikenn ki péna l’énergie ditou, Li donne li courage en abondance.”—ISAÏE 40:28, 29.
1, 2. (a) Ki l’invitation Jésus finn faire ar dimoune ki envie adore Jéhovah? (b) Ki kapav vinn enn danger pou nou spiritualité?
NOUS bann disciples Jésus, nous konn bien l’invitation ki li ti faire: “Vinn vers moi zot tou ki pé rinté ek ki éna poids lor zot, ek moi mo pou soulage zot. . . . Parski mo joug, li doux ek mo charge, li léger.” (Matthieu 11:28-30) Bann Chrétiens éna possibilité pou gagne aussi séki la Bible appelle bann ‘époques de rafraîchissement . . . de la part de Jéhovah.’ (Actes 3:19) Sûrement, ou finn remarqué personnellement couma l’étude la Bible ek l’application bann principes Biblique, finn apporte bann grand bienfaits dans ou la-vie. Ek aussi, kan ou finn aprann ki pou éna enn l’avenir heureux, sa finn réconforte ou beaucoup.
2 Pourtant, li arrivé ki certains serviteurs Jéhovah senti zot découragé. Dans certains cas, sa période découragement-la passe vite, mais parfois, sa kapav duré pendant longtemps. Avec le temps, certains kapav éna l’impression ki zot responsabilités en tant ki Chrétiens inn vinn enn fardeau, au lieu ki sa soulage zot couma Jésus ti promette. Si enn Chrétien éna sa sentiment négatif-la, sa kapav mette en danger so relation avec Jéhovah.
3. Pou ki raison Jésus ti donne conseil ki nous trouve en Jean 14:1?
3 Enn tipé avant ki so bann l’ennemis ti arrête li ek ti mette li à mort, Jésus ti dire so bann disciples: “Pa laisse zot léker troublé, exerce la foi en Bondié ek exerce la foi en moi.” (Jean 14:1) Si Jésus ti dire sa, c’est parski so bann zapôtres pa ti pou tardé pou konn bann moments bien difficile. Après sa, zot ti pou gagne bann grand persécutions. Jésus ti koné ki so bann zapôtres ti pou kapav tombé spirituellement à cause découragement. (Jean 16:1) Lerla, zot ti pou bizin faire bien attention, sinon zot tristesse ti pou kapav affaibli zot spirituellement ek faire zot perdi zot confiance en Jéhovah. Même situation kapav arrive bann Chrétien zordi. Enn longue période découragement kapav faire nous beaucoup di-tort, ek lerla nous kapav démoralisé. (Jérémie 8:18) Nou la-force moral kapav affaibli. Dans sa cas-la, li possible même ki coumadire nous vinn paralysé lor plan spirituel ek affectif, ziska ki nous népli envie servi Jéhovah.
4. Ki kapav aide nous pou protège nou léker symbolique contre la fatigue spirituel?
4 Donc, li bien approprié ki la Bible donne sa l’avertissement-la: “Plus ki tou kitsoz ki to bizin veillé, préserve to léker, parski ladan-même éna bann sources la-vie.” (Proverbes 4:23) La Bible donne nous bann conseils pratique ki aide nous pou protège nou léker symbolique contre découragement ek contre fatigue spirituel. Mais d’abord, li bon ki nous identifié bann kitsoz ki kapav faire nous découragé.
Suivre Christ, Li Pa enn Fardeau
5. Ki contradiction nous kapav pensé éna dans bann paroles Jésus?
5 Sa demann beaucoup zefforts pou vive couma enn vrai Chrétien. (Luc 13:24) Jésus ti même dire: “Celui ki pa saryé so poteau de supplice ek ki pa suive moi, pa pou kapav vinn mo disciple.” (Luc 14:27) Nous kapav pensé ki éna enn contradiction entre sa bann paroles-la ek seki Jésus ti dire avant, c’est-à-dire ki so joug léger ek kan nous servi li, sa faire nous du bien. Mais en réalité, péna okenn contradiction.
6, 7. Kifer nous kapav dire ki li pa enn fardeau pou servi Jéhovah?
6 Même si enn travail li dur ek demann beaucoup zefforts, sa kapav faire nous du bien ek donne nous beaucoup satisfaction si nous pé faire sa pou enn bon raison. (Ecclésiaste 3:13, 22) Zordi, péna pli bon kitsoz ki nous kapav faire, ki partage la bonne nouvelle avec nou prochain. Même si nous bizin lutté pou vive en accord avec bann principes Biblique, sa vaut la peine, surtout kan nous considère bann bienfaits ki nous gagné en retour. (Proverbes 2:10-20) Kan nous gagne persécution, nous considère sa couma enn l’honneur pou souffert pou Royaume Bondié.—1 Pierre 4:14.
7 Oui, saryé charge Jésus faire nous du bien, surtout kan nous compare sa avec condition bann dimoune ki dans ténèbres spirituel, ki encore dans la fausse religion. Bondié content nous, ek jamais Li pa pou demann nous pou faire séki nous pa kapav. Bann “commandements Jéhovah pa lourd pou obéir.” (1 Jean 5:3) Li pa enn fardeau pou vive en accord avec vrai religion Chrétienne ki défini dans la Bible. Oui, li clair ki nou l’adoration pa fatigue nous, ni faire nous découragé.
“Débarasse Tou Poids”
8. Souvent, pou ki raisons nous fatigué spirituellement?
8 Souvent, si nous senti nous fatigué spirituellement c’est à cause bann poids en plus ki le monde mette lor nous. Étant donné ki “le monde entier li dans pouvoir le méchant,” nous entouré par bann tendances négatif ki kapav affaibli nous ek faire nous perdi nou l’équilibre spirituel. (1 Jean 5:19) Bann activités ki pa nécessaire kapav complique nou la-vie ek détourne nous ar nou bann l’activités Chrétien. Sa bann poids en plus-la kapav affaibli nous ek même accablé nous. C’est pou sa raison-la ki la Bible encourage nous pou “débarasse tou poids.”—Hébreux 12:1-3.
9. Si nous galope derrière bann kitsoz matériel, couma sa kapav fatigue nous?
9 Par exemple, zordi bann dimoune dans le monde zot obsédé par désir pou gagne l’importance, l’argent, l’amusement, voyagé pou plaisir, ek par lézot kitsoz matériel encore. Sa l’attitude-la kapav influence nous aussi. (1 Jean 2:15-17) Certains Chrétiens du premier siècle ki ti galope derrière l’argent ti complique zot la-vie. L’apôtre Paul ti expliqué: “Bann ki bien décidé pou vinn riche, tombe dans tentation, dans enn piège ek dans beaucoup désirs ki péna sens ek ki faire di-tort, ki plonge bann dimoune dans destruction ek dans la ruine. Parski l’amour pou l’argent li enn racine tou sortes qualités mauvais kitsoz ek à cause sa l’amour-la, certains finn perdi la foi ek zot finn faire zot-même beaucoup di-tort.”—1 Timothée 6:9, 10.
10. D’après illustration Jésus concernant le semeur, ki nous kapav aprann lor la richesse?
10 Kan nous senti nous fatigué ek découragé dans nou service pou Jéhovah, eski li possible ki c’est parski nous pé galope derrière bann kitsoz matériel. Si oui, sa kapav touffe nou spiritualité? D’après illustration Jésus concernant le semeur, sa kapav arrivé. Jésus ti compare “bann tracas sa lé-monde-la ek pouvoir trompeur ki la richess éna ek bann désirs pou bann lézot kitsoz,” couma bann pikan ‘ki touffe’ parole Bondié dans nou léker. (Marc 4:18, 19) C’est pou sa ki la Bible donne nous sa conseil-la: “Pa laisse l’amour pou l’argent dominn zot la-vie. Mais plito, contente zot ar séki zot éna, parski li finn dire: ‘Jamais mo pa pou quitte toi, ni mo pou abandonne toi.’ ”—Hébreux 13:5.
11. Couma eski nous kapav élimine bann kitsoz ki kapav fatigue nous?
11 Parfois c’est pa kan nous rode plus kitsoz matériel ki nous complique nou la-vie, mais plûtot séki nous faire avec bann kitsoz ki nous déjà éna. Certains kapav senti zot déprimé à cause enn mauvais la-santé, ou-soit parski enn kikenn ki zot bien content inn mort, ou-soit aussi parski zot pé konn bann difficultés bien grave. Zot inn trouvé ki, de temps en temps, li nécessaire faire bann changements dans zot la-vie. Par exemple, enn couple ti décidé pou élimine certains passe-temps ek bann lézot projets personnel ki pa ti important. Zot ti examine tou zot bann zaffaires ek zot ti ramasse tou kitsoz ki ti éna enn rapport avec sa bann projets-la ek ti mette sa dans enn coin. Nous aussi pareil, de temps en temps, li bon ki nous examine séki nous habitué faire ek séki nous éna. Lerla, nous kapav débarasse tou poids ki en plus, ki kapav fatigue nous, ek faire nous découragé.
Li Important ki Nous Raisonnable ek ki Nous Reconnaite Nou Limites
12. Ki nous bizin reconnaite concernant nou bann erreurs?
12 Bann erreurs ki nous faire, même dans bann ti kitsoz, sa kapav complique nou la-vie tigit par tigit. David ti éna raison pou dire: “Mo bann fautes zot la-haut mo la-tête; pareil couma enn charge ki bien lourd, zot trop lourd pou moi.” (Psaume 38:4) Souvent, si nous faire deux-trois changements dans nou la-vie, sa kapav soulage nous beaucoup.
13. Kan nous raisonnable, couma sa kapav aide nous pou reste équilibré dans nou ministère?
13 La Bible encourage nous pou développe “la sagesse pratique ek capacité pou réfléchi.” (Proverbes 3:21, 22) La Bible dire ki “la sagesse d’en haut, . . . li raisonnable.” (Jacques 3:17) Certains finn mette pression lor zot-même parski zot inn essaye faire même quantité ki lézot dans le ministère. Pourtant la Bible dire nous: “Mais sakenn bizin testé valeur so propre travail, ek pa compare li avec enn l’autre. Lerla li pou éna enn raison pou li glorifié li-même. Parski sakenn bizin saryé so propre charge.” (Galates 6:4, 5) Li vrai ki bon l’exemple nou bann compagnons Chrétiens kapav encourage nous pou servi Jéhovah avec tou nou léker. Mais si nous éna la sagesse ek nous montré nous raisonnable, nous pou fixé bann l’objectifs réaliste ki adapté ar nou situation.
14, 15. Couma nous kapav manifesté la sagesse kan nous prend soin nou la-santé physique ek affectif?
14 Nous pou kapav évite certains cause fatigue, si nous montré nous raisonnable même dans bann domaines ki pa parette important. Par exemple, eski nous éna enn la-vie équilibré ki pou favorise enn bon la-santé? Considère l’exemple enn couple ki travail volontairement dans enn filial bann Témoins de Jéhovah. Zot inn trouvé ki la sagesse li important pou évite la fatigue. La femme dire: “N’importe ki quantité travail nous éna, nous essaye al dormi presque même l’heure toulé-soirs. Nous faire aussi l’exercice régulièrement. Sa finn vrai-même aide nous. Nous finn aprann konn nou limites ek pou adapté nous ar zot. Nous pa essaye compare nous avec bann ki parette éna plein l’énergie.” Eski nous prend régulièrement bann repas équilibré, ek repose nous assez? Si, en général, nous faire attention enn façon raisonnable ar nou la-santé, sa kapav diminué la fatigue spirituel ek affectif.
15 Certains d’entre nous éna bann besoins particulier. Par exemple, éna enn soeur ki’nn servi dans plusieurs différent formes service à plein temps. Li finn gagne bann problèmes la-santé bien grave, li finn même gagne cancer. Ki aide li pou faire face ar bann situations stressant? Li dire: “Li bien important ki mo trouve le temps pou reste tousel ek tranquille. Plus mo senti moi stressé ek fatigué, plus li vinn important ki mo prend le temps pou reste tousel kot mo kapav lire ek reposé.” La sagesse pratique ek la capacité pou réfléchi, aide nous pou reconnaite nou bann besoins ek pou comblé zot. C’est coumsa ki nous évite la fatigue spirituel.
Jéhovah Donne Nous l’Energie
16, 17. (a) Kifer li bien important ki nous prend soin nou la-santé spirituel? (b) Ki nous bizin prend l’habitude pou faire toulé-jours?
16 Oui, li important ki nous prend soin nou la-santé spirituel. Kan nous éna enn bon relation avec Jéhovah, li kapav arrivé ki nous pou senti nous fatigué physiquement, mais jamais nous pa pou fatigué pou servi Li. Jéhovah “donne la force séki bien fatigué ek enn kikenn ki péna l’énergie ditou, Li donne li la vigueur en abondance.” (Isaïe 40:28, 29) L’apôtre Paul ki finn faire l’experience sa bann paroles-la, ti écrire: “Nous pa baisse lé-bras, mais même si séki nous été en dehors pé dépéri, séki nous été endan, pé renouvelé chaque jour.” —2 Corinthiens 4:16.
17 Remarqué ki Paul dire “chaque jour.” Sa veut dire ki chaque jour nous bizin profite bann dispositions ki Jéhovah prend pou soulage nous. Enn soeur ki’nn faire service missionaire pendant 43 ans, ti bizin affronte bann situations décourageant, ek li ti fatigué physiquement. Mais li pa ti baisse lé-bras. Li dire: “Mo finn prend l’habitude pou lève bonne-heure pou mo kapav prié Jéhovah ek lire so Parole, avant même ki mo commence faire n’importe ki l’ouvrage. C’est enn l’habitude ki mo finn prend toulé-jours, ek sa finn aide moi pou enduré ziska asterla.” Nous kapav compte lor la force ki Jéhovah donne nous, si régulièrement, oui si “chaque jour,” nous prié Li ek nous médite lor so bann qualités extraordinaire ek lor so bann promesses.
18. Ki réconfort la Bible donne bann serviteurs fidèle ki âgé ou ki malade?
18 La prière ek la méditation pou aide surtout bann ki découragé parski zot inn vinn vieux ek zot péna enn bon la-santé. Kitfois sa bann Chrétiens-la, zot démoralisé, pa parski zot compare zot ar lézot, mais parski zot trouvé ki zot-même, zot népli kapav faire pareil couma avant. Mais li encourageant pou koné ki bann dimoune âgé éna valeur pou Jéhovah! La Bible dire “Bann cheveux gris, zot couma enn couronne de beauté kan zot dans chemin la justice.” (Proverbes 16:31) Jéhovah konn nou limites ek Li accorde beaucoup valeur ar tou séki nous faire dans so service, malgré nou limites. Tou bann bon travail ki nous finn faire, finn enregistré pou toujours dans mémoire Jéhovah. La Bible donne nous sa l’assurance-la: “Bondié pa injuste pou blié zot travail ek l’amour ki zot finn montré pou so nom, kan zot finn servi bann saints, ek ki zot pé contigne servi [bannla].” (Hébreux 6:10) Oui, nous bien content pou éna parmi nous bann ki’nn reste fidèle envers Jéhovah pendant plusieurs l’années!
Pa Renoncé pou Faire Séki Bien
19. Ki bienfait nous pou gagné si nous contigne faire le bien?
19 Beaucoup dimoune koné ki si zot faire l’exercice régulièrement, sa kapav soulage zot fatigue. Pareillement, si nous senti nous fatigué lor plan spirituel ou affectif, bann l’activités spirituel régulier kapav soulage nous. La Bible dire: “Fodé pa nous renoncé pou faire séki bien, parski kan arrive so l’heure, nous pou récolté si nous pa laisse nous gagné par la fatigue. Donc, tant ki nous éna enn lé-temps favorable pou sa, anou pratique séki bon envers tou dimoune, mais surtout envers nou bann frères dans la foi.” (Galates 6:9, 10) Remarque bann l’expressions: “faire séki bien,” “ek pratique séki bon.” Sa implique bann actions de nou part. Oui, kan nous faire du bien envers lézot, sa pou empêche nous baisse lé-bras dans nou service pou Jéhovah.
20. Pou lutte contre découragement, ki fréquentation nous bizin évité?
20 Par contre, séki kapav vinn enn fardeau pou nous, c’est kan nous fréquente bann dimoune ki pa prend compte bann principes Bondié. La Bible donne nous sa l’avertissement-la: “Poids enn roche ek enn la-charge du sable—mais l’irritation ki enn dimoune stupide provoqué, sa li pli lourd ki toulé-deux.” (Proverbes 27:3) Pou lutte contre découragement ek la fatigue sprirituel, nous bizin évite fréquente bann dimoune ki toujours négatif, ki touletan pé trouve défauts ar lézot, ek ki content critiqué.
21. Couma nous kapav vinn enn l’encouragement pou lézot dans réunions?
21 Bann réunions c’est enn disposition ki Jéhovah inn prend pou rempli nous avec la force spirituel. Là-bas, nous gagne l’occasion pou encourage sakenn nou camarade par bann pensées spirituel encourageant ek par nou présence. (Hébreux 10:25) Nous tou dans congrégation bizin faire zefforts pou encourage lézot kan nous faire bann commentaires dans réunions ou-soit kan nous éna enn participation lor l’estrade. Mais c’est surtout bann frères ki prend la tête dans l’enseignement ki bizin encourageant pou lézot. (Isaïe 32:1, 2) Même si zot bizin reprend enn kikenn, la façon ki zot kozé kan zot donne enn conseil, bizin encourageant. (Galates 6:1, 2) Oui, nou l’amour pou lézot pou aide nous pou servi Jéhovah sans ki nous laisse nous gagné par la fatigue.—Psaume 133:1; Jean 13:35.
22. Malgré nou l’imperfection, kifer nous kapav prend courage?
22 Nous bizin faire zefforts pou nous servi Jéhovah pendant l’époque la fin. Ek parfois bann Chrétiens aussi, zot la-tête fatigué, zot fatigué lor plan affectif, ek zot stressé. En tant ki bann dimoune imparfait, nous fragile couma l’argile. Seulement, la Bible dire: “Nous éna sa trésor-la dans bann récipients la terre, pou ki sa puissance ki supérieur à la normal-la, li sorti ar Bondié, pa ar nous.” (2 Corinthiens 4:7) Oui, nous pou fatigué, mais jamais nous pa pou laisse nous gagné par la fatigue ek renoncé pou servi Jéhovah. Au contraire, anou “dire avec confiance: ‘C’est Jéhovah ki aide moi.’”—Hébreux 13:6.
Résumé
• Ki poids nous kapav débarassé?
• Couma nous kapav “faire le bien” envers nou bann frères ek soeurs?
• Couma Jéhovah soutenir nous kan nous fatigué ou-soit découragé?
[Zimage, page 19]
Jésus ti koné ki so bann zapôtres ti pou accablé si zot découragé pendant enn longue période
[Zimage, page 20]
Certains Chrétiens finn élimine bann passe-temps ou-soit bann projets ki pa important
[Zimage, page 22]
Malgré nou limites, kan nous servi Jéhovah avec tou nou léker, sa éna beaucoup valeur pou Li