“Contigne Acquérir la Puissance Dans le Seigneur”
“Contigne acquérir la puissance dans le Seigneur, ek dans puissance so la-force.”—ÉPHÉSIENS 6:10.
1. (a) Environ 3,000 ans de cela, ki combat extraordinaire ti éna? (b) Kifer David ti remporte la victoire?
SA TI passé environ 3,000 ans de cela. Deux combattants dans deux camps opposé ti pé affronte zot camarade lor enn champ de bataille. Pli jeune combattant-la ti enn garçon, enn berger. Li ti appelle David. Devant li, ti éna Goliath, enn zom impressionant, extraordinairement fort ek haute. So gilet (cotte de mailles) ti pèse environ 57 kilos, et li ti éna dans so la-main enn bel lance bien lourd ek enn grand l’épée. David li, li pa ti éna okenn bel équipement avec li, à part simplement enn fronde. Kan Goliath trouvé ki c’est enn jeune garçon ki pé défié li, li’nn prend sa pou enn affront. (1 Samuel 17:42-44) Pou bann ki ti pé assisté sa combat-la dans les deux camps, Goliath ti’nn fini gagné d’avance. Mais pa séki fort ki touletan remporte la bataille. (Ecclésiaste 9:11) David ti vaincre Goliath parski li ti laguerre avec la force Jéhovah. Li ti dire: “La bataille appartenir à Jéhovah.” La Bible dire ki “avec enn fronde ek enn caillou, David ti pli fort ki sa Philistin-la.”—1 Samuel 17:47, 50.
2. Ki combat bann Chrétiens pé amené?
2 Bann Chrétiens pa prend part dans okenn la-guerre. Mais même si zot en paix avec tou dimoune, zot pé amène enn combat spirituel kont bann adversaires ki bien puissant. (Romains 12:18) Dans dernier chapitre so lettre ki Paul ti écrire bann Éphésiens, li ti décrire enn combat ki chaque Chrétien pé amené. Li ti écrire: “Nous pé bizin lutte, non pa kont du sang et la chair, mais kont bann gouvernements, kont bann l’autorités, kont bann dirigeants le monde ki dans sa noirté-la, kont bann mauvais l’esprit ki trouve dans le ciel.”—Éphésiens 6:12.
3. D’après Éphésiens 6:10, ki nous bizin pou nous kapav remporte la victoire?
3 Sa “bann mauvais l’esprit”-la, c’est Satan ek so bann démons. Zot envie détruire nou relation avec Jéhovah. Étant donné ki zot pli fort ki nous, nous trouve nous dans même situation ki David. Nous pou kapav remporte la victoire à condition ki nous compte lor Jéhovah pou gagne la force. Ala kifer donc, Paul conseille nous pou “contigne acquérir la puissance dans le Seigneur, ek dans puissance so la-force.” (Éphésiens 6:10) Après ki li’nn donne sa conseil-la, l’apôtre Paul décrire bann dispositions spirituel ek bann qualités Chrétienne ki kapav aide nous pou remporte la victoire.—Éphésiens 6:11-17.
4. Cite deux points principal ki nous pou examiné dans sa l’article-la?
4 Asterla, anou al examine séki la Bible aprann nous lor bann points fort nou l’ennemi ek lor so bann tactiques. Ensuite, nous pou guetté ki moyen de défense nous bizin servi pou protège nous. Si nous suive bann instructions Jéhovah, nous kapav sûr ki nou bann l’ennemis pa pou réussi vaincre nous.
Enn Combat Kont Bann Mauvais l’Esprit
5. Couma eski le verbe “lutté” mentionné dans Éphésiens 6:12, faire nous trouve tactique ki Satan employé?
5 Paul expliqué ki nous “pé bizin lutte . . . kont bann mauvais l’esprit ki trouve dans le ciel.” Bien-sûr, principal mauvais l’esprit c’est Satan le Diable, “chef bann démons.” (Matthieu 12:24-26) La Bible décrire combat ki nous pé amené, couma enn ‘la-lutte’ ou-soit enn wrestling entre deux dimoune. Dans bann match wrestling dans la Grèce antique, enn combattant ti essaye déséquilibré so adversaire pou jette li en bas. Pareillement, le Diable envie faire nous perdi nou l’équilibre spirituel. Couma eski li faire sa?
6. Montré avec l’aide la Bible couma le Diable servi différent tactiques pou affaibli nou la-foi.
6 Le Diable kapav agir couma enn serpent, enn lion ki pé crié, ou-soit même couma enn ange de lumière. (2 Corinthiens 11:3, 14; 1 Pierre 5:8) Li kapav servi bann agents humains lor la terre pou persécute nous ou-soit pou décourage nous. (Révélation 2:10) Étant donné ki le monde li dans so pouvoir, Satan kapav exploite bann désirs ek tentations ki éna dans le monde pou piége nous. (2 Timothée 2:26; 1 Jean 2:16; 5:19) Li kapav servi bann façons pensées sa lé-monde-la, ou-bien bann raisonnements apostat pou trompe nous, pareil couma li ti trompe Ève.—1 Timothée 2:14.
7. Ki limites bann démons éna, ek ki l’avantages nous éna?
7 Même si Satan ek so bann démons éna enn pouvoir impressionant ek zot éna bann zarmes dangereux, zot éna bann limites. Sa bann mauvais l’esprit-la pa kapav force nous pou faire bann kitsoz mauvais ki déplaire Bondié. Bondié finn crée nous avec capacité pou choisir entre séki bon ek séki mauvais. Donc, nous éna enn contrôle lor nou pensées ek lor nou actions. En plus, nous pa tousel dans sa combat-la. Pareil couma dans l’époque Élisha, nous kapav dire: “Bann ki avec nous pli beaucoup ki bann ki avec zot.” (2 Rois 6:16) La Bible assure nous ki si nous soumette-nous ar Bondié ek nous résisté kont le Diable, li pou sauvé li pou al loin ar nous.—Jacques 4:7.
Nous Konn Bien Bann l’Intentions Satan
8, 9. Ki l’épreuves Satan ti envoye lor Job pou casse so l’intégrité, et ki dangers spirituel pé guette nous zordi?
8 Nous pa ignore bann l’intentions Satan, parski la Bible faire nous konn so bann principal tactiques. (2 Corinthiens 2:11) Kont le fidèle Job, Satan ti servi bann problèmes économique, la mort bann proches, l’opposition familial, souffrance physique, ek bann accusations de la part bann fausse camarades. Sa ti tellement déprime Job ki li ti pensé ki Bondié ti’nn abandonne li. (Job 10:1, 2) Même si zordi Satan kitfois pa responsable directement sa bann problèmes-la, bann Chrétiens affecté par sa bann l’épreuves-la, et le Diable li, li exploite sa.
9 Dans sa l’époque la fin-la, éna de plus en plus dangers spirituels ki pé guette nous. Nous pé vive dans enn lé-monde kot bann l’objectifs matériel pé passe avant bann l’objectifs spirituel. Médias pa fini présente l’immoralité sexuel couma enn source de bonheur au lieu couma enn cause de douleur. La plupart dimoune finn vinn “amis des plaisirs plutôt ki amis de Dieu.” (2 Timothée 3:1-5) Sa façon pensé-la kapav faire nous perdi nou l’équilibre spirituel, à moins ki nous ‘combatte fermement pou nou la-foi.’—Jude 3.
10-12. (a) Ki avertissement Jésus ti donné dans so illustration du semeur? (b) Donne enn l’exemple pou expliqué couma nou spiritualité kapav touffé.
10 Enn parmi bann tactiques efficace ki Satan servi, c’est faire nous absorbé par le monde ek par so bann objectifs matérialiste. Dans so illustration du semeur, Jésus ti averti nous ki dans certains cas, “tracas sa système-la ek pouvoir trompeur la richesse kapav touffe la parole [du Royaume].” (Matthieu 13:18, 22) Mot Grec ki’nn traduire ici par ‘touffé’ veut dire “étranglé complètement.”
11 Dans bann forêts tropical, éna enn zarbre ki appelle figuier étrangleur. Kan sa pié-la poussé, li pousse lentement ek li envahir tronc enn l’autre zarbre. Tigit par tigit, li commence couver l’autre zarbre-la avec so bann racines ki vinn de plus en plus fort. Et avec le temps, so bann racines absorbe tou nourriture ek de l’eau ki éna dans la terre, et so bann branches prive lot zarbre-la la lumière. Finalement, l’autre zarbre-la li mort.
12 Pareillement, bann tracas sa système-la ek désir pou vinn riche ek pou vive dans bien, kapav tigit par tigit prend tou nou lé-temps ek tou nou l’énergie. Lerla, nou l’esprit kapav tellement occupé avec bann kitsoz dans le monde ki nous risqué néglige facilement nou l’étude personnel ek prend l’habitude pou rate bann réunions. Donc, nous népli nourri-nous lor plan spirituel. Bann l’objectifs matérialiste asterla finn remplace bann l’objectifs spirituel, et finalement nous vinn enn proie facile pou Satan.
Nous Bizin Tini Ferme
13, 14. Ki position nous bizin prend kan Satan attaque nous?
13 Paul ti encourage so bann compagnons pou “tini ferme kont séki le Diable manigancé.” (Éphésiens 6:11) Bien-sûr, nous péna capacité pou vaincre le Diable ek so bann démons. C’est Jésus ki’nn gagne sa mission-la avec Bondié. (Révélation 20:1, 2) Mais en attendant ki Satan détruire, nous pou bizin “tini ferme” pou ki nous pa cédé face ar so bann l’attaques.
14 L’apôtre Pierre aussi ti montré ki li important ki nous tini ferme kont Satan. Li ti écrire: “Garde zot bon jugement, ek reste lor zot garde. Zot adversaire, le Diable, pe circulé couma enn lion ki pé crié; li pé rode kikenn pou li dévoré. Mais résisté kont li, solide dans la foi. Pensé ki partout dans le monde zot bann frères pé passe par même souffrances.” (1 Pierre 5:8, 9) En fait, soutien nou bann frères ek soeurs spirituel li indispensable pou nous kapav tini ferme kan le Diable attaqué couma enn lion ki pé crié.
15, 16. Cite enn l’exemple Biblique pou montré couma soutien nou bann compagnons Chrétien kapav aide nous pou tini ferme.
15 Dans la savanne Africaine, kan enn lion pé crié dans les parages, bann antilopes tayé à toute vitesse ziska ki zot hors de danger. Par contre, bann éléphants laisse enn bon l’exemple; zot soutenir zot camarade entre zot-même. Enn livre, Elephants—Gentle Giants of Africa and Asia, expliqué: “Pou défann zot kont enn danger, souvent bann troupeaux l’éléphants faire la ronde. Bann tipti rentre dans cercle-la, ek bann adultes lerla donne lédo zot tipti pou faire face ar danger-la, tandis ki bann tipti zot protégé à l’intérieur.” Face à enn tel force ek soutien de la part bann l’éléphants, c’est très rare ki bann lions réussi attaque bann jeune l’éléphants.
16 Kan Satan ek so bann démons menace nous, nous aussi nous bizin reste, la main dans la main, ensemble avec nous bann frères ki solide dans la foi. Paul ti montré ki certains so bann compagnons ti vinn “enn aide ki [ti] fortifié” li kan li ti emprisonné à Rome. (Colossiens 4:10, 11) Mot Grec ki’nn traduire par “enn aide ki fortifié” apparette enn seul fois dans les Écritures Grecques Chrétiennes. Selon Vine’s Expository Dictionary of New Testament Words, “enn verbe ki formé avec sa mot-la signifie bann médecines ki soulage enn irritation.” Pareil couma enn médecine ki soulage nous, soutien nou bann frères ek soeurs ki mûr, kapav apaise enn souffrance affectif ou-soit physique.
17. Ki pou aide nous reste fidèle ar Bondié?
17 L’encouragement nou bann compagnons Chrétiens zordi, kapav renforci nou détermination pou servi Jéhovah fidèlement. Bann anciens surtout bien envie donne enn l’aide spirituel. (Jacques 5:13-15) Parmi bann kitsoz ki pou aide nous reste fidèle, éna la lecture régulière de la Bible ek l’assistance réunions ek bann l’assemblées. Nou relation avec Bondié kapav en li-même aide nous reste fidèle ar Li. Oui, ki li en rapport avec mangé, boire, ou-soit n’importe ki lézot kitsoz nous faire, nous pou envie faire tou pou la gloire Bondié. (1 Corinthiens 10:31) Et naturellement, li bien important ki nous compte lor Jéhovah dans la prière pou nous kapav contigne faire Li plaisir.—Psaume 37:5.
18. Kifer fodé pa nous renoncé même si bann situations difficile diminué nou la-force?
18 Parfois, Satan attaque nous kan nous pa senti nous fort lor plan spirituel. Normalement, enn lion saute lor enn zanimo ki’nn affaibli. Problèmes familial, difficultés économique, ou-soit enn maladie kapav diminué nou la-force spirituel. Mais fodé pa nous renoncé pou faire Bondié plaisir, parski Paul ti dire: “Kan mo faible, c’est lerla-même ki mo puissant.” (2 Corinthiens 12:10; Galates 6:9; 2 Thessaloniciens 3:13) Ki li ti pé rode dire? Puissance Bondié kapav compense nou bann faiblesses, à conditions ki nous tourne vers Jéhovah pou gagne courage. Victoire ki David ti remporté lor Goliath, montré ki Bondié kapav fortifié so peuple et c’est séki Li faire. Zordi, bann Témoins de Jéhovah kapav confirmé couma dans bann moments bien difficile, zot finn senti la main Jéhovah fortifié zot.—Daniel 10:19.
19. Cite enn l’exemple pou montré couma Jéhovah fortifié so bann serviteurs.
19 Enn couple marié ti raconté couma Bondié ti soutenir zot. Zot dire: “Pendant plusieurs l’années, nous finn servi Jéhovah ensemble, ek nous finn gagne beaucoup bénédictions. Nous finn côtoye bann dimoune formidable. Nous finn laisse Jéhovah forme nous ek fortifié nous pou nous kapav surmonte nou bann l’épreuves. Pareil couma Job, parfois nous pa ti trop comprend kifer tel-et-tel chose ti pé arrivé, mais nous kapav dire ki Jéhovah finn touletan soutenir nous.”
20. Ki preuve Biblique montré ki Jéhovah touletan soutenir so peuple?
20 La main Jéhovah pa trop courte pou soutenir so bann fidèle serviteurs ek pou fortifié zot. (Isaïe 59:1) Dans enn so bann psaumes, David ti chanté: “Jéhovah soutenir tou bann ki tombé, Li relève tou bann ki’nn courbé.” (Psaume 145:14) Oui, nou Père céleste “chaque jour porte la charge pou nous” et Li donne nous séki nous vrai-même bizin.—Psaume 68:19.
Nous Bizin “l’Équipement Complet ki Bondié Donné”
21. Couma eski Paul ti montré ki nous bizin prend l’équipement spirituel ki Bondié donne nous?
21 Nous finn examine certains méthodes ki Satan servi ek nous finn trouvé ki li important nous tini ferme face ar so bann l’attaques. Asterla, nous bizin examine enn l’autre moyen bien important ki nous éna pou résisté kont Satan. Deux fois dans so lettre adressé à bann Éphésiens, l’apôtre Paul mentionne enn facteur déterminant pou tini ferme kont bann manigances Satan ek pou réussi dans nou combat kont bann mauvais l’esprit. Paul finn écrire: “Mette lor zot, l’équipement complet ki Bondié donné pou ki zot kapav tini ferme kont séki le Diable manigancé . . . Prend l’équipement complet ki Bondié donné, pou ki kan jour mauvais arrivé, zot kapav résisté, ek tini ferme après ki zot inn faire tou kitsoz couma bizin.”—Éphésiens 6:11, 13.
22, 23. (a) Ki nous l’équipement spirituel impliqué? (b) Ki nous pou examiné dans prochain l’article?
22 Oui, nous bizin mette “l’équipement complet ki Bondié donné.” Kan Paul ti écrire so lettre à bann Éphésiens, li ti sous surveillance enn soldat Romain, ki défois ti porte l’équipement complet enn soldat. Mais seulement, c’est l’inspiration Bondié ki’nn pousse Paul pou koz lor l’équipement spirituel ki chaque serviteur Jéhovah bizin mette lor li.
23 Sa l’équipement spirituel-la implique bann qualités ki enn Chrétien bizin éna, aussi bien ki bann dispositions ki Jéhovah prend. Dans prochain l’article, nous pou examine chaque pièce sa l’équipement spirituel-la. En même temps, nous pou guetté couma l’exemple remarquable ki Jésus Christ inn laissé aide nous pou résisté kont Satan le Diable.
Ki Ou Pou Réponn?
• Ki combat tou Chrétiens pé amené?
• Décrire certains tactiques ki Satan employé.
• Couma soutien nou bann compagnons Chrétien kapav fortifié nous?
• Lor la force kisannla nous bizin dépann, et kifer?
[Zimage, page 13]
Bann Chrétiens ‘pé bizin lutte kont bann mauvais l’esprit’
[Zimage, page 15]
Enn Chrétien kapav vinn “enn aide ki fortifié” pou so compagnon
[Zimage, page 16]
Eski ou prié Bondié pou gagne la force?