Kisannla Pé Donne Bondié la Gloire Zordi?

“To digne Jéhovah, oui nou Bondié, pou gagne la gloire, l’honneur ek puissance.”—RÉVÉLATION 4:11.

1, 2. (a) Ki l’exemples montré nous séki biomimétique été? (b) Ki question nous kapav pose nous, ek ki réponse nous gagné?

ENN jour, dans les années 1940, Georges de Mestral, enn ingénieur Suisse ti al faire enn promenade avec so li-chien. Kan li’nn retourne lakaz, li’nn remarqué ki so linge ek bann poils so li-chien ti couvert avec bann ti piquants. Li ti envie koné ki été sa. Li’nn examine sa bann ti piquants-la ar enn microscope ek li’nn étonné pou trouvé ki zot ti éna bann ti crochets ki ti accroche ar tou kitsoz ki éna enn boucle. Par la suite, li ti invente Velcro: enn produit synthétique ki ressemblé séki li ti observé. De Mestral pa ti tousel pou copié lor la nature. En Amérique, bann frères Wright ti faire modèle enn avion après ki zot ti étudié couma bann grand zoiseaux envolé. Alexandre-Gustave Eiffel, enn ingénieur Français, ti servi même principes ki permette fémur enn dimoune tini poids so lé-corps, pou invente la Tour-Eiffel ki trouve à Paris.

² Séki sa bann dimoune-la inn faire appelle sa biomimétique, enn domaine dans la science ki imite séki trouve dans la nature.a Mais enn question logique ki nous kapav posé c’est: Ki quantité fois eski bann inventeurs loué Celui ki finn invente bann ti piquants, ou-soit bann grand zoiseaux, ou fémur ki faire partie dans le corps enn dimoune ek tou bann création extraordinaire lor ki zot base zot pou faire zot l’invention? Malheureusement, li bien triste pou dire ki zordi li bien rare ki Bondié gagne l’honneur ek la gloire ki Li mérité.

3, 4. Ki signification mot Hébreu ki’nn traduire par “la gloire,” ek ki signification li bizin éna kan li applique ar Jéhovah?

³ Certains kapav demandé: ‘Mais kifer eski bizin donne Bondié la gloire? Eski Li pa déjà éna la gloire?’ C’est vrai, Jéhovah, Li-même Personnage ki éna plus la gloire dans l’univers. Mais seulement pa tou dimoune ki pense sa. Dans la Bible, sens fondamental mot Hébreu ki’nn traduire par “la gloire” c’est “lourd.” Sa applique ar tou séki faire enn dimoune parette impressionant ou-soit important. Kan sa concerne Bondié, li éna enn rapport ar tou séki faire Bondié parette impressionant devant lizié bann dimoune.

⁴ Péna beaucoup dimoune zordi ki prend compte grandeur Bondié. (Psaume 10:4; 14:1) En réalité, bann dimoune important dans la société, si zot encore croire ki Bondié existé, souvent zot finn influence lézot pou péna respect pou le grand Créateur de l’univers. Couma zot finn faire sa?

‘Zot Péna Okenn Excuse’

5. Couma beaucoup scientifiques explique l’existence bann kitsoz extraordinaire ki éna dans la création?

⁵ Beaucoup scientifiques persisté pou dire ki Bondié pa existé. Mais alors, couma eski zot explique tou bann kitsoz extraordinaire ki trouve dans la création ek l’existence bann dimoune? Zot dire ki tousala inn apparaite par l’évolution, enn puissance aveugle ki’nn provoque la création par accident. Par exemple, enn évolutionniste ki appelle Stephen Jay Gould ti écrire: “Si nous existé c’est parski ti éna enn groupe poissons bizarre ki ti possède bann nageoires bien drôle ki finn transformé en la patte bann zanimaux terrestre . . . Li possible ki nous rode enn ‘pli bon’ réponse ki sa, mais péna.” Pareillement, Richard E. Leakey ek Roger Lewin ti écrire: “Peut-être ki l’espèce humain c’est zis enn grand accident ki finn arrivé dans la nature.” Même bann scientifiques ki admire la beauté, l’ordre, ek la façon ki l’univers inn faire, pa donne Bondié l’honneur.

6. Kifer beaucoup dimoune découragé pou donne Bondié la gloire ki Li mérité couma enn Créateur?

⁶ Kan bann dimoune intellectuel soutenir ki l’évolution finn arrivé vrai-même, zot rode dire par là ki c’est zis bann ignorants ki refuse croire sa doctrine-la. Couma sa finn influence beaucoup dimoune? Dé-trois l’années de cela, enn misié ki éna enn grand connaissance lor l’évolution, ti interviewé bann dimoune ki ti accepté sa théorie-la. Guetté ki li ti dire: “Mo finn trouvé ki la plupart dimoune croire dans l’évolution parski finn dire zot ki tou dimoune intelligent croire ladan.” Oui, kan bann dimoune intellectuel dire ki zot pa croire dans Bondié, sa décourage lézot dimoune pou donne Bondié la gloire ki Li mérité couma enn Créateur.—Proverbes 14:15, 18.

7. D’après Romains 1:20, ki nous kapav trouvé clairement à travers la création, ek kifer?

⁷ Eski bann scientifiques finn tire zot conclusions parski éna bann preuves ki l’évolution li vrai? Non! Au contraire, nous entouré par bann preuves ki éna enn Créateur. Guette ki l’apôtre Paul ti écrire concernant Bondié: “Depuis création le monde, nous trouve clairement so bann qualités invisible, parski nous kapav discerne zot à travers bann kitsoz ki Li’nn faire, oui même so puissance éternel ek so nature en tant ki Bondié, alors, bannla [bann ki pa croire Bondié] péna okenn excuse.” (Romains 1:20) Kan nous guette la création, nous trouve clairement ki Bondié existé. Donc, Paul ti pé dire ki depuis ki dimoune existé, li ti possible pou ‘discerne’ bann preuves lor l’existence Bondié à travers la création. Ki sa bann preuves-la sa?

8. (a) Couma le ciel rann témoignage lor pouvoir ek lor sagesse Bondié? (b) Couma nous koné ki finn bizin éna enn Cause ki’nn provoque l’existence l’univers?

⁸ Kan nous guette lé-ciel rempli ar zétoiles, nous trouve la preuve ki Bondié existé. Psaume 19:1 dire: “Le ciel pé annonce la gloire Bondié.” Oui, “le ciel,” c’est-à-dire soleil, la lune ek bann zétoiles, donne témoignage lor pouvoir ek lor sagesse Bondié. Nous bien impressionné kan nous guette sa quantité zétoiles ki éna dans lé-ciel-la. Tou séki éna dans le ciel zot bougé dans l’espace d’après bann la loi bien précis, pa par hasard.b (Isaïe 40:26) Eski li raisonnable pou dire ki c’est grâce à enn puissance aveugle ki éna sa l’ordre-la? Bann scientifiques dire aussi ki l’univers finn commence existé enn seul coup. Pou explique sa, enn professeur ti écrire: “Enn athée ou-soit enn kikenn ki éna doute lor l’existence Bondié accepté pli facilement ki l’univers finn existé depuis touletan. Mais si l’univers finn éna enn commencement, finn bizin éna enn cause ki’nn provoque so l’existence, parski kisannla kapav accepté ki finn éna enn l’effet sans enn cause?”

9. Couma nous trouve la sagesse Jéhovah dans façon ki Li’nn faire bann zanimaux?

⁹ Tou séki nous trouvé lor la terre prouvé ki Bondié existé. Enn Psaume dire: “Bann kitsoz ki to’nn faire zot en grande quantité, ô Jéhovah! To finn faire zot tou avec sagesse. La terre rempli avec tou séki to’nn faire.” (Psaume 104:24) ‘Tou séki Jéhovah finn faire,’ bann zanimaux aussi, montré la sagesse Bondié. Couma nous ti trouvé dans premier paragraphe, la façon ki bann kitsoz vivant finn crée, zot tellement extraordinaire, ki bann scientifiques souvent essaye imite zot. Anou guette dé-trois l’exemple. Bann savants pé étudié corne bann cerfs pou zot kapav faire bann helmet pli solide. Zot pé examine enn certaine l’espèce mouche ki tann bien, pou améliore bann l’appareil auditif. Ek zot pé étudié les-ailes bann hibou pou améliore bann avions ki bann radars pa kapav detecté. Mais bann zom kapav essayé couma zot envie, jamais zot pou kapav faire exactement pareil couma bann kitsoz parfait ki éna dans la nature. Livre Biomimicry—Innovation Inspired by Nature dire: “Tou séki nous, bann humains envie faire, bann créatures vivant finn faire sa, sans ki zot inn brûle trop carburant naturel ki pollué la planète, ek sans ki zot mette en danger zot descendants.” Sa c’est la sagesse, pa vrai?

10. Kifer li pa logique ki nous refuse admette l’existence enn Grand Créateur? Donne enn l’exemple.

¹⁰ Ki ou guette dans le ciel la haut, ou-soit lor la terre, en-bas, li claire ki ena enn Créateur. (Jérémie 10:12) Nous bizin d’accord avec bann anges ki pé crié: “To digne Jéhovah, oui nou Bondié pou gagne la gloire, l’honneur ek pouvoir, parski to finn crée tou kitsoz.” (Révélation 4:11) Pourtant, même si beaucoup scientifiques admire façon ki bann kitsoz finn faire avec zot lizié literal, mais zot pa’lé admette l’existence enn Créateur avec ‘lizié zot léker.’ (Éphésiens 1:18) Nous kapav compare sa situation-la coumsa: Enn dimoune ki admire la beauté ek la façon ki l’univers finn crée sans ki li admette l’existence enn Créateur, li pareil coumadire li pé admire enn joli dessein, mais en même temps li pa’lé admette l’existence sa artiste ki finn faire sa-la. Li pa logique. Donc, li pa étonnant ki la Bible dire ki “péna okenn excuse” pou bann dimoune ki refuse croire en enn Créateur!

“Bann Guides Aveugle” Trompe Beaucoup Dimoune

11, 12. Lor ki supposition doctrine prédestination basé, ek kifer sa doctrine-la pa glorifié Bondié?

¹¹ Beaucoup dimoune bien religieux croire sincèrement ki zot religion donne Bondié la gloire. (Romains 10:2, 3) Pourtant, bann religions en général, répresente enn l’autre partie dans la société ki’nn empêche plusieurs millions dimoune pou glorifié Bondié. Couma? Anou guette deux façons.

¹² Premièrement, bann religions finn déshonore Bondié à travers zot bann fausse l’enseignements. Par exemple zot enseigne la prédestination. D’après sa doctrine-la, étant donné ki Bondié éna pouvoir pou konn l’avenir, Li bizin aussi koné ki pou arrive tou kitsoz. Donc, d’après prédestination, depuis bien longtemps Bondié inn fini décide l’avenir chaque dimoune, ki so l’avenir bon ou-soit mauvais. Sa croyance-la faire croire ki c’est Bondié ki responsable tou souffrances ek méchancetés ki éna lor la terre zordi. Sa pa glorifié Bondié, parski en réalité, c’est Satan, so adversaire ki responsable tou bann malheurs. D’ailleurs la Bible appelle Satan “chef le monde.”—Jean 14:30; 1 Jean 5:19.

13. Kifer li pa raisonnable pou croire ki Bondié pa kapav contrôle so pouvoir pou konn l’avenir? Donne enn l’exemple.

¹³ Doctrine prédestination pa basé lor la Bible ek li faire Bondié passe pou mauvais. Sa croyance-la pa faire différence entre séki Bondié kapav faire ek séki Li faire vrai-même. La Bible montré clairement ki Bondié éna pouvoir pou konn en avance bann l’événements. (Isaïe 46:9, 10) Seulement, li pa logique pou pensé ki Li pa kapav contrôle so pouvoir pou konn l’avenir ou-soit ki Li responsable tou séki arrivé. Nous prend enn l’exemple: Si ou ti éna enn grand la-force, eski sa veut dire ki ou ti pou lève tou kitsoz lourd ki ou trouvé? Bien-sûr que non! Pareillement, c’est pa parski Bondié éna pouvoir pou konn l’avenir ki Li obligé koné ki pou arrivé en avance ou-soit ki Li’nn fini fixé tou kitsoz. Li kapav contrôle so pouvoir pou konn l’avenir.c Oui, li clair ki enn l’enseignement couma prédestination, ek tou lézot fausse l’enseignements, pa glorifié Bondié.

14. Dans ki façon bann grand religions finn déshonore Bondié?

¹⁴ Enn deuxième façon couma bann grand religions déshonore Bondié c’est par conduite so bann membres. Normalement, bann Chrétiens bizin suive bann l’enseignements Jésus Christ. Parmi bann kitsoz ki Jésus ti enseigné, li ti enseigne so bann disciples pou “content zot prochain” ek pou “pa faire partie dans le monde.” (Jean 15:12; 17:14-16) Mais ki nous kapav dire concernant bann prêtres la Chrétienté? Eski zot finn vrai-même suive sa bann l’enseignements-la?

15. (a) Couma bann prêtres la Chrétienté finn impliqué dans bann la-guerres? (b) Ki l’effet conduite sa bann prêtres-la finn éna lor plusieurs millions dimoune?

¹⁵ Anou considère séki bann prêtres la Chrétienté inn faire pendant la guerre. Zot inn soutenir ek tolère beaucoup la-guerres, zot finn même prend part dans sa bann la-guerres-la. Zot finn béni bann l’armées ek ferme lizié lor bann massacres. Nous pa kapav empêche nous pose sa question-la: ‘Sa bann prêtres-la, eski zot pa ti rann zot compte ki dans l’autre camp, bann lézot prêtres aussi ti pé faire pareil?’ (Guette l’encadré “Ki Part Bondié Pé Prend?”) Bann chefs la Chrétienté pa pé glorifié Bondié, kan zot prétann ki Li soutenir zot dans bann la-guerres cruel. Zot pa pé glorifié Li non-plus kan zot dire ki bann principes la Bible inn démodé ek kan zot ferme lizié lor l’immoralité sexuel. Zot vrai-même faire nous rappelle séki Jésus ti dire lor bann chefs religieux dans so l’époque; ki zot “pratique séki illégal,” ek ki zot bann “guides aveugles”! (Matthieu 7:15-23; 15:14) À cause conduite bann prêtres la Chrétienté, plusieurs millions dimoune finn perdi zot l’amour pou Bondié.—Matthieu 24:12.

Kisannla Pé Vrai-même Donne Bondié la Gloire?

16. Kifer nous bizin guette séki la Bible dire pou koné kisannla pé glorifié Bondié zordi?

¹⁶ Si bann dimoune ki bien en vue ek ki influent dans le monde pa’nn donne Bondié la gloire, alors kisannla ki pé faire sa? Pou réponn sa question-la, nous bizin guetté ki la Bible dire. Après tou, Bondié éna droit pou dire couma bizin glorifié Li, ek Li’nn faire nous konn sa à travers la Bible. (Isaïe 42:8) Anou guette trois façons pou glorifié Bondié, ek à chaque fois nous pou guetté kisannla ki pé vrai-même faire sa zordi.

17. Couma Jéhovah inn montré ki c’est enn l’aspect bien important dans so volonté ki so nom glorifié? Kisannla pé loué nom Bondié zordi partout lor la terre?

¹⁷ Premièrement, nous kapav glorifié Bondié kan nous loué so nom. D’après séki Jéhovah ti dire Jésus, nous rann nous compte ki c’est enn aspect important dans So volonté. Dé-trois jours avant li mort, Jésus ti dire dans so la-prière: “Papa, glorifié to nom.” Alors enn la-voix ti réponn depuis le ciel: “Mo finn glorifié li, ek mo pou glorifié li encore.” (Jean 12:28) C’est Jéhovah Li-même ki ti réponn. Par so réponse, li clair ki Jéhovah attache beaucoup l’importance ki so nom glorifié. Kisannla zordi pé glorifié Jéhovah kan zot faire konn so nom ek loué li partout lor la terre? C’est bann Témoins de Jéhovah, ek zot pé faire sa dans 235 pays!—Psaume 86:11, 12.

18. Couma eski nous kapav koné kisannla pé adore Bondié avec “la vérité,” ek ki groupe ki finn enseigne la vérité Biblique pendant plus ki enn siècle?

¹⁸ Deuxièmement, nous kapav glorifié Bondié kan nous enseigne la vérité lor Li. Jésus ti dire ki bann vrai adorateurs pou “adore [Bondié] avec . . . la vérité.” (Jean 4:24) Couma nous kapav koné kisannla pé adore Bondié avec la “vérité”? C’est par bann dimoune ki rejette bann l’enseignements ki pa basé lor la Bible ek bann doctrines ki pé mal représente Bondié ek so volonté. Mais aussi, zot bizin enseigne la vérité ki trouve dans la Bible, couma par exemple: Jéhovah, Li-même Bondié Très Haut, ek Li tousel mérite sa la-gloire-la (Psaume 83:18); Jésus, li Garçon Bondié ek c’est li ki Jéhovah inn choisir pou dirige le Royaume (1 Corinthiens 15:27, 28); Royaume Bondié pou sanctifié nom Jéhovah ek pou accompli volonté Bondié en rapport avec la terre ek bann dimoune (Matthieu 6:9, 10); la bonne nouvelle lor sa Royaume-la bizin prêché partout lor la terre. (Matthieu 24:14) Pendant plus ki enn siècle, éna enn seul groupe ki finn enseigne fidèlement sa bann vérités-la—bann Témoins de Jéhovah!

19, 20. (a) Kifer bon conduite enn Chrétien kapav glorifié Bondié? (b) Ki questions kapav aide nous pou koné kisannla pé glorifié Bondié zordi par zot conduite?

¹⁹ Troisièmement, nous kapav glorifié Bondié kan nous vive en harmonie avec so bann principes. L’apôtre Pierre ti écrire: “Garde enn bon conduite devant tou dimoune. Coumsa, même si bannla koz en mal lor zot ek dire ki zot bann mauvais dimoune, bannla kapav donne Bondié la gloire kan Li pou faire so l’inspection, à cause zot bann bon actions.” (1 Pierre 2:12) Conduite enn Chrétien démontré so la-foi. Kan bann observateurs remarque sa, c’est-à-dire kan zot remarqué ki c’est à cause so la-foi ki enn Chrétien éna enn bon conduite, sa donne Bondié la gloire.

²⁰ Kisannla zordi pé glorifié Bondié par zot bon conduite? Eh bien, ki groupe religieux, beaucoup gouvernements finn donne l’honneur parski so bann membres favorise la paix, obéir la-lois ek paye zot taxe? (Romains 13:1, 3, 6, 7) Ki groupe ki bien connu dans le monde entier parski éna l’unité entre so bann membres—enn l’unité ki pa guette race, nation, ni culture? (Psaume 133:1; Actes 10:34, 35) Ki groupe ki bien réputé partout pou so l’enseignement Biblique ki encourage dimoune pou respecté la-loi, pou accorde valeur à la famille, ek pou respecté bann principes moral ki basé lor la Bible? Éna zis enn seul groupe ki éna enn bon conduite dans sa bann domaines-la ek dans lézot encore—bann Témoins de Jéhovah!

Eski Ou Pé Donne Bondié la Gloire?

21. Kifer li bon ki nous examiné si personnellement nous pé donne Jéhovah la gloire?

²¹ Sakenn parmi nous bizin demandé: ‘Eski personnellement mo pé donne Bondié la-gloire?’ D’après Psaume 148, la plupart création Bondié pé donne Li la gloire. Bann anges, le ciel, la terre, ek bann zanimaux—zot tou pé loué Jéhovah. (Versets 1-10) Mais li bien triste ki la majorité dimoune pa pé faire sa! Si ou vive enn façon ki donne Bondié la gloire, ou pou vive en harmonie avec le reste la création ki pé loué Jéhovah. (Versets 11-13) Péna pli bon façon pou servi ou la-vie.

22. Couma ou gagne bann bénédictions kan ou donne Jéhovah la gloire ek ki détermination ou bizin éna?

²² Kan ou donne Jéhovah la gloire, Li béni ou dans plusieurs façons. Le fait ki ou exerce la foi dans sacrifice Jésus, ou réconcilié avec Bondié ek ou kapav éna enn bon relation avec Li. (Romains 5:10) À mesure ki ou rode bann raisons pou glorifié Bondié, ou vinn plus positif ek plus reconnaissant. (Jérémie 31:12) Lerla, ou pou plus kapav aide lézot pou trouve le bonheur, ek amène enn la vie ki éna enn sens, ek sa pou faire ou encore plus heureux. (Actes 20:35) Nous souhaité ki ou parmi bann dimoune ki bien déterminé pou donne Bondié la gloire, asterla ek pou touletan!

[Note]

Eski Ou Rappelle?

• Kifer nous kapav dire ki bann scientifiques pa’nn aide bann dimoune pou glorifié Bondié?

• Cite deux façons couma bann grand religions finn empêche bann dimoune pou glorifié Bondié.

• Couma nous kapav glorifié Bondié?

• Kifer ou bizin examiné si personnellement ou pé donne la gloire Bondié?

[Encadré on page 26]

“Ki Part Bondié Pé Prend?”

Enn misié ki ti dans l’armée de l’air Allemand, pendant la Deuxième Guerre Mondiale, ek ki après inn vinn enn Témoin de Jéhovah, raconté:

“Séki ti troublé moi pendant la-guerre . . . c’est trouve bann prêtres dans presque tou religions—Catholique, Luthérien, Episcopalien ek les autres, pé béni bann pilotes avion avant zot décolé pou al largue bann bombes. Souvent mo ti demann moi, ‘Ki part Bondié pé prend?’ ”

“Bann soldats Allemand ti mette enn ceinture ek lor-la ti écrire Gott mit uns, (Bondié avec nous). Mais mo ti demann moi: ‘Kifer Bondié pa pou avec bann soldats dans l’autre camp alors ki zot dans même religion ek zot pé prié même Bondié?’”