Preserve l’Identité Ki Nou Ena en Tant ki Chrétien
“‘Zot mo bann temoin,’ c’est seki Jéhovah dire.”—ISAÏE 43:10.
1. Ki qualité dimoune Jéhovah attire vers Li?
KAN ou assisté enn reunion dan la-salle du Royaume, guette bien autour ou. Kisannla ou trouvé? Surement ou pou trouve bann jeune ki sincere ek ki pé bien ecouté pou zot gagne la sagesse ki sorti dan la Bible. (Psaume 148:12, 13) Ou pou trouve aussi bann papa, ki pé faire zeffort pou faire Bondié plaisir mem ki zot pé vive dan enn lé-monde kot la vie famille pé deterioré. Kitfois ou pou remark bann dimoune pli agé, ki pé faire zeffort pou reste fidel envers Jéhovah malgré zot l’age ek enn mauvais la-santé. (Proverbes 16:31) Zot tou bien content Jéhovah, ki finn attire zot vers Li avek plaisir pou ki zot ena enn relation avek Li. Garson Bondié ti dire: “Personne pa kapav vinn vers moi, si mo Papa, ki finn envoye moi, pa attire li.”—Jean 6:37, 44, 65.
2, 3. Kifer li kapav difficile pou garde l’identité ki nou ena en tant ki Chrétien?
2 Eski ou pa content pou forme partie dan enn peuple ki gagne faveur ek benediction Jéhovah? Pourtant li pa facile pou garde l’identité ki nou ena en tant ki Chrétien parski nou pé vive dan “bann period critik ki difficile pou supporté.”? (2 Timothée 3:1) Sa li surtout vrai pou bann jeune ki pé grandi dan enn famille Chrétien. Enn jeune dire: “Mem si mo ti pé al reunion, mo pa ti ena bann l’objectif spirituel precis, ek franchement, mo pa ti ena enn desir personel pou servi Jéhovah.”
3 Certain envie servi Jéhovah sincerement, mais parfois zot tellement laisse-zot influencé par bann camarade, par le monde ek par bann tendance imparfait, ki sa detourne-zot ar zot service. Kan ena bann grand pression lor nou, kitfois tigit par tigit, sa faire nou perdi l’identité ki nou ena en tant ki Chrétien. Par exemple, beaucoup dimoune dan le monde dire ki bann principe la-Bible lor la moralité zot demodé, ou-soit li pa raisonnable pou suive sa bann principe-la dan le monde modern. (1 Pierre 4:4) Certain pensé ki li pa necessaire pou adore Bondié dan fason ki Li demandé. (Jean 4:24) Dan lettre ki li ti ecrire bann Éphésiens, Paul ti dire ki lé-monde ena enn “l’esprit,” setadir enn l’attitude ki influence beaucoup dimoune. (Éphésiens 2:2) Sa l’esprit-la pousse bann dimoune pou ki zot pense pareil couma bann ki pa konn Jéhovah.
4. Couma Jésus ti montré l’importance pou nou garde nou l’identité en tant ki Chrétien?
4 Seulement, nou conscient ki en tant ki serviteur Jéhovah, li pou bien triste ki n’importe kisannla parmi nou—jeune ou vieux—perdi so l’identité en tant ki Chrétien. Pou nou ena enn bon point de vue lor nou l’identité en tant ki Chrétien, nou bizin base nou zis lor bann principe Jéhovah ek seki Li demann nou faire. Apré tou, nou finn crée dan so ressemblance. (Genèse 1:26; Mika 6:8) La Bible compare l’identité ki nou ena en tant ki Chrétien couma enn linge ki lor nou ek ki tou dimoune bizin trouvé. Concernant nou lepok, Jésus ti donne sa l’avertissement-la: “Guetté! Mo pé vinn couma enn voleur. Heureux enn kikenn ki reste lor so garde ek ki garde so linge, pou ki li pa marche touni, ek pou ki dimoune pa guette so la-honte.”a (Révélation 16:15) Nou pa envie perdi nou bann qualité Chrétien, ni perdi enn bon conduite, ek donne le monde Satan l’occasion pou influence nou l’esprit. Si sa arrivé, nou pou perdi nou “linge,” setadir seki identifié nou couma bann Chrétien. Enn situation coumsa pou bien triste ek li pou enn la-honte pou nou.
5, 6. Kifer li important ki enn kikenn reste stable lor plan spirituel?
5 Si nou conscient l’identité ki nou ena en tant ki Chrétien, sa pou influence direction ki nou donne nou la-vie. Kifer? Parski si enn serviteur Jéhovah nepli conscient so l’identité en tant ki Chrétien, sa kapav finalement faire li perdi so l’equilibre, ek li pa pou ena bann l’objectif bien precis. Plusieurs fois, la Bible mette nou en garde pou nou pa ressemblé bann dimoune ki pa kapav prend decision. Disciple Jacques ti donne sa conseil-la: “Enn kikenn ki douté, li pareil couma enn vague la mer, ki di-vent pousse dan tou direction. Avrédir, fodé pa ki sa kikenn-la pensé ki li pou gagne kitsoz ar Jéhovah; parski li pa kapav prend decision ek li pa stable dan tou seki li faire.”—Jacques 1:6-8; Éphésiens 4:14; Hébreux 13:9.
6 Couma nou kapav preserve l’identité ki nou ena en tant ki Chrétien? Ki kapav aide nou pou prend plus conscience ki li enn grand privilege pou adore le Très Haut? Anou examine certaine fason couma nou kapav faire sa.
Fortifié Ou l’Identité en Tant ki Chrétien
7. Kifer li important ki nou supplie Jéhovah pou examine nou?
7 Fortifié touletan ou relation avek Jéhovah. Seki ena plus valeur pou enn Chrétien c’est relation personnel ki li ena avek Jéhovah. (Psaume 25:14; Proverbes 3:32) Si nou commence ena bann doute lor nou l’identité en tant ki Chrétien, sa vedir inn arrive l’heure pou nou examiné ki qualité relation nou ena avek Jéhovah, ek ki quantité sa relation-la li profond. Enn ecrivain Psaume ti faire sa supplication-la: “Examine moi, ô Jéhovah, ek testé moi, nettoye mo lé-rein ek mo leker.” (Psaume 26:2) Kifer li important ki nou examine nou coumsa? Parski nou pa kapav compte lor nou-mem pou juge nou bann mobile ek bann tendance ki nou ena dan fond nou leker. Zis Jéhovah ki kapav comprend seki nou été endan—nou bann mobile, nou bann pensée ek nou bann sentiment.—Jérémie 17:9, 10.
8. (a) Ki bienfait nou gagné kan Jéhovah testé nou? (b) En tant ki Chrétien, ki l’aide ou finn gagné pou progressé?
8 Kan nou demann Jéhovah examine nou, en realité nou pé demann Li pou testé nou. Li kapav laisse enn situation developpé ki montré nou bann veritable mobile, ek condition nou leker. (Hébreux 4:12, 13; Jacques 1:22-25) Nou bizin content ki Jéhovah testé nou, parski sa donne nou l’occasion pou montré ki quantité nou fidel envers Li. Sa kapav montré si nou ‘complet ek sans defaut dan tou, sans ki nanyin manké.” (Jacques 1:2-4) Lerla, sa pou permette nou progressé lor plan spirituel.—Éphésiens 4:22-24.
9. Kifer li important ki par nou-mem nou trouve bann preuve ki seki la Bible enseigné c’est la verité? Expliké.
9 Verifié par ou-mem ki la Bible vrai. Si nou pena enn bon connaissance la-Bible, nou conviction lor seki nou été, kapav affaibli. (Philippiens 1:9, 10) Chaque Chrétien, ki li jeune ou vieux, bizin verifié ki bann l’enseignement ki li croire, zot bien la verité ki trouve dan la Bible. Paul ti donne sa l’encouragement-la so bann compagnon Chrétien: “Verifié tou kitsoz, tini ferme ar seki bon.” (1 Thessaloniciens 5:21) Bann jeune ki pé grandi dan bann famille Chrétien, bizin realisé ki zot pa pou kapav depann lor la foi zot parent pou vinn bann vrai Chrétien. David ti donne sa conseil-la, so garson Salomon: “Konn Bondié to papa ek servi Li avek enn leker complet.” (1 Chroniques 28:9) Li pa ti pou assez ki Salomon zis guetté couma so papa ti ena la foi en Jéhovah. Li ti pou bizin aprann pou konn Jéhovah par li-mem, ek c’est seki li ti faire. Li ti supplie Bondié: “Asterla, donne moi la sagesse ek connaissance, pou ki mo kapav sorti devant sa peuple-la ek pou ki mo kapav rentré.”—2 Chroniques 1:10.
10. Kifer pena nanyin de mal ki nou pose bann question sincere si nou ena bann bon mobile?
10 Enn la-foi solide, li basé lor la connaissance. L’apotre Paul ti dire ki “la foi né a partir sa kitsoz ki nou finn tendé-la.” (Romains 10:17) Ki li ti pé rod dire par-la? Li ti pé rod dire ki kan nou nourri-nou avek Parole Bondié, nou fortifié nou la-foi ek nou confiance en Jéhovah, nou ena plus confiance aussi dan so bann promesse ek dan so l’organisation. Si nou pose bann question sincere lor la Bible, nou pou kapav gagne bann reponse ki pou rassure nou. En plus, dan Romains 12:2, nou trouve sa conseil Paul-la: “Verifié par zot-mem ki volonté Bondié, li bon, li agréable ek li parfait.” Couma nou kapav faire sa? Kan nou gagne enn “connaissance exact lor la verité.” (Tite 1:1) Jéhovah kapav aide nou par so l’esprit pou comprend bann kitsoz difficile. (1 Corinthiens 2:11, 12) Nou bizin prié Li pou aide nou kan nou gagne difficulté pou comprend kitsoz. (Psaume 119:10, 11, 27) Jéhovah envie ki nou comprend so Parole, ki nou croire dan seki nou lire ek ki nou obeir li. Li content ki nou pose bann question sincere pourvu ki nou ena bann bon mobile.
Determiné pou Faire Bondié Plaisir
11. (a) Ki desir normal kapav vinn enn piege pou nou? (b) Couma nou kapav gagne courage pou resisté kont l’influence nou bann camarade?
11 Rod faire Bondié plaisir, pa dimoune. Li normal ki nou rod gagne enn certaine l’identité, kan nou faire partie dan enn group. Nou tou nou bizin ena camarade, ek nou content kan lezot accepté nou. Pendant period l’adolescence, ek aussi plitar dan la vie, kitfois l’influence bann camarade tellement fort, ki sa faire nou envie imite zot ou-soit faire zot plaisir. Mais pa touletan ki nou bann camarade rod nou l’interet. Parfois, zot zis rod enn complice pou faire seki pa bon, ensam avek zot. (Proverbes 1:11-19) Kan enn Chrétien laisse-li trop influencé par so bann camarade pou faire seki pa bon, souvent li rod cachiette seki li été. (Psaume 26:4) L’apotre Paul ti donne sa l’avertissement-la: “Arrete faire pareil couma le monde ki autour zot.” (Romains 12:2, Bible de Jérusalem) Jéhovah donne nou la force ki nou bizin pou nou kapav combatte n’importe ki l’influence ki faire pression lor nou pou nou faire couma le monde.—Hébreux 13:6.
12. Ki principe ek ki l’exemple kapav aide nou pou reste ferme kan sa concerne nou confiance en Bondié?
12 Bann pression ki ena dan le monde kapav vinn enn danger pou nou l’identité Chrétien. Kan sa arrivé, li bon ki nou rappel ki nou fidelité envers Bondié beaucoup pli important ki l’opinion bann dimoune dan le monde, ou-soit seki la majorité ena tendance pou faire. Principe ki trouve dan Exode 23:2, kapav protege nou, li dire: “Fodé pa to suive la foule pou faire seki mauvais.” Kan la majorité bann Israélite pa ti ena confiance ki Jéhovah pou kapav realise So bann promesse, Caleb ti tini ferme ek li ti refuse pou suive la majorité. Li ti sur ki kapav faire confiance bann promesse Jéhovah, ek li ti gagne bann grand benediction a cause sa. (Nombres 13:30; Josué 14:6-11) Eski ou aussi, ou pré pou resisté l’influence ki l’opinion la majorité kapav ena lor ou, ek garde enn bon relation avek Jéhovah?
13. Kifer li sage ki nou faire lezot koné ki position nou finn prend en tant ki Chrétien?
13 Faire lezot koné ki ou été. Ena enn kozé ki dire ki pli bon defense c’est l’attak. Sa kozé-la li vrai kan nou pé defann nou l’identité en tant ki Chrétien. Dan lepok Ezra, kan bann Israélite fidel ti bizin faire face ar l’opposition pou zot kapav servi Jéhovah, zot ti dire: “Nou bann serviteur Bondié, [Createur] le ciel ek la terre.” (Ezra 5:11) Si nou affecté par reaction bann dimoune ki kont nou, ou-soit par zot critik, sa kapav faire nou tellement peur ki nou nepli kapav faire nanyin. Si touletan nou pé rod faire plaisir tou dimoune, sa pou affaibli nou ek nou pou nepli efficace. Alors, pa laisse nou intimidé. Li toujours bon ki nou faire lezot koné ki nou enn Témoin de Jéhovah. Avek respé mais avek fermeté, ou kapav explik lezot ou bann principe, ou bann croyance, ek ou position en tant ki Chrétien. Faire lezot koné ki ou finn bien decidé pou obeir bann principe bien elevé ki Jéhovah finn fixé lor la moralité. Faire zot bien comprend ki nanyin pa pou empeche-ou pou reste fidel. Montré ki ou fiere pou ena sa bann principe-la. (Psaume 64:10) Si ou montré tou dimoune ki ou enn Chrétien ki pa pou change so bann principe, sa pou faire ou vinn pli fort, ek sa pou protege ou. Kitfois sa kapav mem pousse certain pou rod konn plus lor Jéhovah ek lor so bann serviteur.
14. Eski nou bizin decouragé si dimoune bouffonne nou ou-soit pa d’accord avek nou? Expliké.
14 Li vrai ki certain kapav bouffonne ou, ou-soit pa d’accord avek ou. (Jude 18) Mais pa decouragé si certain pa interessé kan ou explik zot ou bann principe. (Ézékiel 3:7, 8) Faire seki ou envie, jamais ou pa pou kapav convaink bann dimoune ki pa envie laisse zot convaink. Rappel Pharaon. Okenn plaie, ni okenn miracle—pa mem la mort so premier garson—pa finn kapav convaink li ki Moïse ti porte-parole Jéhovah. Alors, pa laisse la peur bann dimoune arrete ou. Nou confiance ek nou la-foi en Bondié, kapav aide nou pou vaink la peur.—Proverbes 3:5, 6; 29:25.
Tire Leson ar le Passé, Preparé pou l’Avenir
15, 16. (a) Ki l’heritage spirituel nou ena? (b) Ki profit nou kapav tiré kan nou medite lor nou l’heritage spirituel avek l’aide la Bible?
15 Accorde enn grand valeur ar ou l’heritage spirituel. Bann Chrétien pou gagne bann grand bienfait si avek l’aide la Bible, zot medite lor zot l’heritage spirituel. Parmi bann kitsoz ki faire partie dan sa l’heritage-la, ena la verité ki dan Parole Jéhovah, l’esperance la vie eternel, ek privilege pou represente Bondié en tant ki bann proclamateur la bonne nouvelle. Eski ou trouve ou place parmi so bann Témoins, ki ena privilege pou preche so Royaume, enn travail ki kapav sauve la vie bann dimoune? Rappel bien ki c’est Jéhovah Li-mem ki dire: “Zot mo bann temoin.”—Isaïe 43:10.
16 Ou kapav pose ou-mem bann question couma: ‘Ki valeur sa l’heritage spirituel-la ena pou moi? Eski li tellement important pou moi ki mo faire volonté Bondié vinn pli grand priorité dan mo la-vie? Eski mo vrai-mem apprecié sa l’heritage-la ki sa pousse moi pou resisté kont n’importe ki tentation ki kapav faire moi perdi li?’ Nou l’heritage spirituel kapav aussi donne nou enn grand sentiment ki nou en securité lor plan spirituel, enn kitsoz ki nou kapav ressenti zis dan l’organisation Jéhovah. (Psaume 91:1, 2) Kan nou rappel tou bann l’evenement extraordinaire ki finn arrivé dan l’organisation Jéhovah dan lepok modern, sa faire nou ena l’assurance ki personne ek nanyin pa pou kapav elimine peuple Jéhovah lor la terre.—Isaïe 54:17; Jérémie 1:19.
17. Au lieu ki nou compte zis lor nou l’heritage spirituel, ki kitsoz ki necessaire encore?
17 Bien-sur, nou pa kapav compte zis lor nou l’heritage spirituel. Sakenn parmi nou bizin developpe enn bon relation avek Jéhovah. Apré ki Paul ti travail dur pou fortifié la foi bann Chrétien dan la ville Philippes, li ti ecrire zot: “Alors mo bann bien-aimé, pareil couma zot finn toujours obeir, pa zis pendant mo presence, mais encore plus pendant mo l’absence, contigne travail pou zot delivrance avek crainte ek tremblement.” (Philippiens 2:12) Nou pa kapav compte lor enn lot dimoune pou nou delivrance.
18. Couma bann l’activité spirituel kapav donne plus valeur nou l’identité en tant ki Chrétien?
18 Reste toujours bien occupé avek bann l’activité Chrétien. Certain dimoune finn dire ki “travail ena enn grand l’influence lor nou l’identité personnel.” Zordi, bann Chrétien finn gagne mission pou faire enn travail ki kapav sauve la vie bann dimoune, setadir, preche la bonne nouvelle lor Royaume Bondié. Paul ti dire: “Parski en realité, mo enn zapotre ki preche avek bann nation, mo glorifié mo ministere.” (Romains 11:13) Nou travail predication faire nou different avek le monde, ek kan nou participe dan sa travail-la, sa donne plus valeur nou l’identité en tant ki Chrétien. Kan nou bien occupé avek lezot l’activité spirituel, couma bann reunion, construction bann la-salle kot nou al adore Jéhovah, bann zeffort pou aide seki dan le besoin, etc., sa kapav donne plus valeur nou l’identité en tant ki Chrétien.—Galates 6:9, 10; Hébreux 10:23, 24.
Nou l’Identité en Tant ki Chrétien Faire Nou Gagne Bann Vrai Benediction
19, 20. (a) Ki benediction ou finn gagné ou-mem en tant ki Chrétien? (b) Couma nou kapav jugé ki nou été vrai-mem?
19 Prend le temps pou reflechi lor tou bann benediction ki nou gagné parski nou bann vrai Chrétien. Nou ena privilege ki Jéhovah konn nou personnellement. Prophete Malaki ti dire: “Bann ki ena la crainte pou Jéhovah ti pé koz sakenn entre zot, sakenn ar so camarade, ek Jéhovah ti pé prend compte, ek ti pé ecouté. Ek finn commence ecrire enn livre de souvenir devant Li, pou bann ki ena la crainte pou Jéhovah ek pou bann ki mazinn so nom.” (Malaki 3:16) Bondié kapav considere nou couma so bann camarade. (Jacques 2:23) Nou la-vie ena plus valeur parski li ena enn but precis, enn sens, ek nou ena bann bon l’objectif devant nou. Ek nou finn gagne l’espoir la vie eternel.—Psaume 37:9.
20 Li bon nou rappel ki c’est Bondié ki decidé seki ou été vrai-mem, ek valeur ki ou ena, pa seki lezot dimoune pensé lor ou. Certain kapav juge nou dapré bann critere humain ki souvent pa en accord avek bann principe Bondié. Mais l’amour ek l’interet ki Bondié ena pou nou, sa-mem ki montré ki valeur nou ena pou Li—Li finn accepté nou en tant ki so bann serviteur. (Matthieu 10:29-31) Lerla, nou prop l’amour pou Bondié kapav faire nou apprecié nou l’identité en tant ki Chrétien encore plus, ek sa pou donne nou enn pli bon direction dan nou la-vie. “Si enn dimoune content Bondié, Li konn sa dimoune-la.”—1 Corinthiens 8:3.
[Note]
a Kitfois Jésus ti pé faire reference ar travail ki enn officier ti faire dan temple a Jérusalem. Pendant la nuit, kan bann Lévite ti faire garde, officier-la ti al partout dan temple pou guetté si zot ti pé veillé ou-soit si zot ti pé dormi. Si li ti trouve enn garde pé dormi, li ti batte li avek enn baton, ek li ti kapav faire brule so linge pou puni li ek faire li gagne honté.
Eski Ou Rappel?
• Kifer li important ki bann Chrétien preserve zot l’identité spirituel?
• Couma eski nou kapav fortifié nou l’identité en tant ki Chrétien?
• Kan nou bizin decidé kisannla nou pou faire plaisir, ki kitsoz kapav aide nou pou prend enn bon decision?
• Si nou ena enn bon point de vue lor nou l’identité, couma sa kapav ena enn l’effet lor nou l’avenir en tant ki Chrétien?
[Zimage, page 21]
Si nou occupé avek bann activité Chrétien, sa kapav donne plus valeur nou l’identité en tant ki Chrétien