Eski ou pé lutte kont bann sentiment negatif?

PENDANT enn bon partie so la-vie, Lena finn lutte kont bann sentiment negatif ki li ti ena lor li-mem. Li ti dire: “Kan mo ti zenfant, pendant longtemps mo finn victime bann abus sexuel, ek sa finn detruire enn grand partie l’estime ki mo ti ena pou mo-mem. Mo ti senti-moi completement inutile.” Simone aussi reflechi lor so jeunesse ek li dire: “Dan fond mo-mem ti ena enn vide ek conviction ki mo pa ti vaut nanyin.” Resultat sa bann qualité sentiment-la, c’est enn grand la-tristesse, ek li parette ki sa affecté beaucoup dimoune zordi. Enn service ki donne conseil bann adolescent par telephone, dire ki preské la moitié bann jeune ki appel zot, dire ki zot “touletan ena sentiment ki zot pa vaut nanyin.”

Dapré certain expert, si ena dimoune ki pensé ki zot pa vaut nanyin, c’est parski lezot donne zot sa sentiment-la, kan touletan crié ar zot, critik zot ek faire zot bann remark pou abaisse zot, ou-soit kan abuse lor zot trop beaucoup. N’importe ki so raison, sa bann action-la kapav faire enn dimoune perdi tou so courage ek mem detruire li. Dapré enn l’etude medical ki’nn faire recemment, bann dimoune ki ena bann sentiment negatif lor zot-mem, ena tendance pou montré-zot mefiant envers lezot ek envers zot-mem, ek lerla, sans ki zot envie, sa mine bann relation ek l’amitié ki zot ena avek bann ki proche avek zot. Rapport lor sa l’etude-la dire: “Dan enn sens, zot-mem zot crée sa bann situation ki zot plus peur-la.”

Bann dimoune ki ena sa bann sentiment-la, zot souvent victime seki la Bible appel zot prop ‘pensée ki tracasse-zot.’ (Psaume 94:19) Zot pensé ki jamais zot faire assez bien. Couma enn kitsoz tourne mal, zot l’instinct pousse zot pou blame zot-mem. Mem si lezot felicite zot pou seki zot inn reussi faire, dan fond zot-mem, zot senti-zot couma enn kikenn ki pé embete lezot, ek ki tot ou tard dimoune pou koné couma zot été vrai-mem. Parski zot pensé ki zot pa merité pou vive heureux, beaucoup tombe dan enn comportement kot zot detruire zot-mem, ek zot senti ki zot pa kapav faire nanyin pou change sa situation-la. Lena ki nou ti mentionné dan commencement sa lartik-la, ti commence gagne enn problem grave ki ti affecté so bann l’habitude mangé, parski li ti’nn perdi l’estime ki li ti ena pou li-mem, ek li reconette, “Mo pa ti senti ki mo ti kapav change kitsoz.”

Eski sa vedir ki bann ki ena sa qualité ‘pensée ki tracasse-zot-la’ pou bizin vive avek sa bann sentiment-la pou le reste zot la-vie? Eski kapav faire kitsoz pou lutte kont sa bann sentiment-la? Dan la Bible ena bann principe ek bann conseil pratik ki finn aide beaucoup dimoune pou remporte sa la-lutte-la. Ki certain sa bann principe-la, ek couma eski zot finn aide bann ki ti pé souffert pou trouve la joie dan zot la-vie? Prochain lartik pou explik nou sa.