Sa vaut la peine reste fidel

DAN certain pays, bann zenfant content colle bann l’herbe pikan, lor tricot la laine enn camarade pou taquine li. Sa bann l’herbe pikan-la maille dan la laine, ek n’importe ki camarade-la faire—marché, galopé, sauté, ou-soit sakouye-li—bann pikan-la reste collé. Sel fason pou kapav tire zot, c’est kan riss zot enn par enn. Bann zenfant trouve sa bien comik.

Bien-sur, pa tou dimoune ki content gagne l’herbe pikan lor so linge, mais tou dimoune etonné par capacité ki zot ena pou reste collé. Li pareil pou enn dimoune ki fidel. Li garde enn relation proche avek enn kikenn pendant longtemps. Li contigne faire tou seki bizin pou garde sa relation-la, mem dan bann situation difficile. Enn dimoune ki fidel pou toujours dire la verité, li pou toujours reste attaché ek li pou toujours devoué. Mais, mem si ou content kan lezot reste fidel envers ou, eski ou ena determination pou reste fidel envers lezot? Si oui, envers ki ou bizin fidel?

Fidelité dan mariage—Enn necessité

La fidelité bien important dan mariage mais malheureusement, c’est souvent là ki li pa existé. Kan enn mari ek enn femme garde zot bann promesse mariage, setadir kan zot reste ensam ek sakenn travail pou bien-etre zot camarade, sa li enn kitsoz important ki aide zot pou trouve bonheur ek securité. Kifer? Parski bann dimoune finn crée avek besoin pou reste fidel envers lezot ek pou attann ki lezot reste fidel envers zot. Kan Bondié ti marié Adam ek Ève dan jardin Éden, Li ti dire: “Enn zom pou quitte so papa ek so mama ek li pou bizin reste attaché avek so madame.” Sa applik aussi pou enn madame; li bizin reste attaché ar so missié. Bondié attann ki mari ek femme reste fidel ek coopere avek zot camarade.—Genèse 2:24; Matthieu 19:3-9.

Bien-sur sa faire bann millier l’année depuis ki sa ti passé. Eski sa vedir ki la fidelité dan mariage inn demodé? La plupart dimoune pou reponn non. Bann recherche ki’nn faire en Allemagne inn montré ki 80 dimoune lor 100 pensé ki la fidelité dan mariage bien important. Ti faire enn deuxieme sondage pou koné ki bann qualité, dimoune pli apprecié dan bann missié ek madame toulé-deux. Ti demann enn group missié pou faire la liste cinq qualité ki zot pli apprecié dan enn madame, ek ti demann enn group madame pou faire la liste cinq qualité ki zot pli apprecié dan enn missié. La fidelité ti tombe premier dan tou bann qualité ki missié ek madame toulé-deux pli apprecié.

Oui, la fidelité li forme partie enn base solid ki necessaire pou ki enn mariage reussi. Pourtant, couma nou finn trouvé dan lartik avant, bann dimoune souvent apprecié la fidelité plus ki zot pratik li. Par exemple, quantité divorce ki ena dan beaucoup pays montré ki beaucoup dimoune nepli fidel. Couma eski bann conjoint kapav resisté kont sa l’attitude-la ek reste fidel ar zot camarade?

La fidelité rann enn mariage solid

Bann conjoint montré ki zot fidel kan zot rod bann l’occasion pou montré ki quantité zot attaché enn a lot. Par exemple, normalement li pli bon pou dire “nou” plutot ki “mo”—“nou bann camarade,” “nou bann zenfant,” “nou lakaz,” “nou l’experience,” etc. Kan missié ek madame faire plan ek prend bann decision, ki sa concerne lakaz, travail, elevé zenfant, divertissement, vacance, ou-soit bann activité religieux, zot bizin prend en consideration bann sentiment ek l’opinion zot conjoint.—Proverbes 11:14; 15:22.

Enn kikenn montré ki li fidel kan li faire so conjoint senti ki li bizin li. Enn mari ou-soit enn femme pa pou senti-li en securité si so conjoint montré trop l’attention envers enn dimoune lot sexe. La Bible conseil enn missié pou reste ar ‘madame so jeunesse.’ Fodé pa enn mari developpe desir pou gagne l’attention enn lot madame a part so prop madame. Fodé pa li gagne relation sexuel avek enn lot madame. La Bible donne sa l’avertissement-la: “Enn kikenn ki commette l’adultere avek enn femme, li mank leker; enn kikenn ki faire sa, pé detruire so prop la-vie.” Enn madame aussi bizin ena sa niveau fidelité-la.—Proverbes 5:18; 6:32.

Eski sa vaut la peine reste fidel dan mariage? Bien-sur. Sa faire enn mariage vinn pli stable ek al pli longtemps, ek chaque conjoint gagne bann l’avantage personnel. Par exemple, kan enn missié bien devoué pou bien-etre so madame, sentiment securité ki madame-la gagné, pousse li pou montré so bann pli bon qualité. Sa li aussi vrai pou enn missié. So determination pou reste fidel ar so madame aide li pou respecté bann principe droite dan lezot domaine so la-vie.

Si enn couple passe par enn period difficile, la fidelité pou aide zot toulé-deux pou senti-zot en securité. Lot coté, si pena fidelité dan enn mariage, kan gagne problem, solution li souvent separation ou-soit divorce. Mais, au lieu ki sa amenn enn solution pou bann problem, au contraire souvent sa amenn lezot problem encore. Dan bann l’année 1980, enn conseiller renommé dan domaine la mode, ti quitte so madame ek so bann zenfant. Eski li’nn trouve bonheur dan so la-vie celibataire? Vingt an apré, li reconette ki sa separation-la finn laisse li tousel ek tourmenté, ek li pa ti gagne sommeil parski li pa ti pé kapav dire bonne nuit so bann zenfant.

La fidelité entre parent ek zenfant

Kan bann parent reste fidel enn envers lot, ena enn grand possibilité ki sa qualité-la deteint lor zot bann zenfant. Bann zenfant ki’nn grandi dan enn famille kot finn ena la fidelité ek l’amour, pou trouve sa pli facile plitar dan la vie, pou agir dan enn fason responsable envers zot conjoint, ek aussi envers zot bann parent ki pé rente dan zot vié jour.—1 Timothée 5:4, 8.

Bien-sur, li kapav arrivé ki bann zenfant vinn handicapé avant zot parent. Parfois l’etat enn zenfant demann beaucoup soin. Herbert ek Gertrud, Témoins de Jéhovah toulé-deux, finn konn sa situation-la pendant 40 an. Dietmar, zot garson, ti gagne dystrophie musculaire (enn maladie kot bann muscle arrete fonctionné). Li ti souffert tout longue so la-vie. Li ti mort en novembre 2002, ek pendant sept an avant sa li ti bizin bann soin ek l’attention la nuit-li jour. So bann parent finn occupe li avek l’amour. Zot finn mem installe bann l’equipement medical kot zot, ek zot finn suive bann cours medical. Enn joli l’exemple fidelité dan la famille, pa vrai?

La fidelité, li important dan enn l’amitié

Birgit ti dire: “Enn dimoune kapav heureux sans enn conjoint, mais li difficile pou heureux sans enn camarade.” Kitfois ou d’accord avek sa. Ki ou marié ou-soit non, ‘kan ou ena enn bon camarade ki fidel, sa faire ou leker content ek faire ou la-vie vinn pli bon. Bien-sur, si ou marié, ou camarade pli proche bizin ou conjoint.

Enn camarade, li pa zis enn connaissance. Nou kapav ena enn quantité connaissance—voisin, collegue ek dimoune ki parfois nou joinde. Pou nou ena enn vrai l’amitié, sa prend le temps ek l’energie, ek nou bizin engage nou bann sentiment. Li enn l’honneur pou vinn camarade enn kikenn. L’amitié ena so bann l’avantage, mais li aussi implik bann responsabilité.

Li necessaire ena enn bon communication avek nou bann camarade. Parfois c’est bann circonstance ki demann sa. Birgit dire: “Si soit moi, soit mo camarade ena enn problem, nou telephoné enn ou-soit deux fois par semaine. Sa faire di-bien pou koné ki li là ek ki li paré pou ecoute moi.” Distance pa enn problem pou l’amitié. Ena plusieurs millier kilometre ki separe Gerda ek Helga, mais zot inn reste camarade pendant plus ki 35 an. Gerda dire: “Nou ecrire souvent, ek nou raconte nou bann l’experience ek seki nou ressenti dan fond nou-mem, ki li bann sentiment joyeux ou-soit triste. Kan mo gagne bann lettre Helga, mo extra content. Nou toulé-deux nou pense pareil.”

La fidelité, li important dan l’amitié. Si nou trahi l’amitié enn dimoune, sa kapav gate enn l’amitié ki existé depuis longtemps. Souvent bann camarade donne conseil enn a lot lor bann kitsoz ki bien personnel. Bann camarade ouvert zot leker sans okenn la-peur ki lot-la pou abaisse zot ou-soit trahi zot secret. La Bible dire: “Enn vrai camarade montré so l’amour touletan; li couma enn frere ki’nn né pou bann moment difficile.”—Proverbes 17:17.

Parski nou bann camarade influence nou fason pensé ek agir, ek nou bann sentiment aussi, li important ki nou faire camarade avek bann dimoune ki amenn mem qualité la-vie ki nou. Par exemple, li important ki ou faire camarade avek bann dimoune ki ena bann croyance, fason pensé lor la moralité, ek bann principe concernant seki bon ek seki mauvais, pareil couma ou. Sa bann qualité camarade-la pou aide ou realise ou bann l’objectif. De tout fason, kifer ou pou envie proche avek enn dimoune ki pena mem principe ek moralité ki ou? La Bible montré ki li important pou choisir bann bon camarade kan li dire: “Enn kikenn ki marche avek bann dimoune ki ena la sagesse pou gagne la sagesse, mais enn kikenn ki gagne zaffaire avek bann dimoune bête, sa pou fini mal pou li.”—Proverbes 13:20.

Nou kapav aprann couma pou reste fidel

Kan enn zenfant inn aprann colle l’herbe pikan lor linge enn dimoune, surement li pou rod faire sa joué-la touletan. Nou kapav dire mem zaffaire pou enn dimoune ki fidel. Kifer? Parski pli nou reste fidel, pli sa vinn facile pou nou. Si bonne heure dan la vie, enn dimoune aprann reste fidel dan so famille, plitar li pou pli facile pou li developpe bann l’amitié ki basé lor la fidelité. Sa bann l’amitié solid-la pou prepare li, kan moment arrivé, pou reste fidel dan so mariage. Sa pou aussi aide li pou reste fidel dan l’amitié ki pli important ki tou lezot.

Jésus ti dire ki pli grand commandement, c’est content Jéhovah avek tou nou leker, nou nâme, nou l’esprit, ek nou la-force. (Marc 12:30) Sa vedir ki nou bizin montré enn fidelité total envers Bondié. Kan nou fidel envers Jéhovah, sa faire nou gagne bann grand benediction. Jamais Li pa pou laisse nou tombé, parski li dire concernant li-mem: “Mo fidel.” (Jérémie 3:12) Oui, la fidelité envers Bondié faire nou konn bann benediction eternel.—1 Jean 2:17.

[L’encadré page 6]

La fidelité enn bon camarade pou faire ou leker content

[Zimage, page 5]

Bann membre enn famille ki fidel prend compte besoin zot camarade