Apprecié Ki Jéhovah Li Fidele ek Li Pardonné

1, 2. (a) Kifer nou content pou ena bann camarade ki fidele ek ki pardonné? (b) Ki bann question nou pou examiné?

COUMA ou pou decrire enn vrai camarade? Enn soeur ki appel Ashley dire: “Pou moi enn vrai camarade c’est enn kikenn ki touletan la pou ou ek ki pardonne ou kan ou faire erreur.” Nou tou nou content pou ena bann camarade ki fidele ek ki pardonné. Zot faire nou senti-nou en securité ek nou ressenti ki zot ena lamour pou nou.​—Prov. 17:17.

² Pena okenn Camarade ki pli fidele ek ki pardonné couma Jéhovah. Enn psalmiste ti dire: “Toi, O Jéhovah, to bon ek to disposé pou pardonné; to lamour fidele li en abondance envers tou bann ki invok to nom.” (Ps. 86:5) Ki sa vedir enn dimoune ki fidele ek ki pardonné? Couma Jéhovah manifesté sa bann joli qualité-la? Ek couma nou kapav imite so l’exemple? Reponse sa bann question-la pou aide nou pou ena enn pli grand lamour pou Jéhovah, nou pli bon Camarade. Sa pou aide nou aussi pou fortifié nou l’amitié avek nou bann frere ek soeur.​—1 Jean 4:7, 8.

JÉHOVAH, ENN BONDIÉ KI FIDELE

3. Couma enn dimoune fidele été?

³ Enn dimoune fidele, li bien devoué ek li reste bien attaché ar enn kikenn ki li content. Enn dimoune fidele li pa changé. Au contraire, mem dan bann moment difisil, li contigne reste attaché ar sa kikenn (ou-soit sa kitsoz) ki li content-la. Oui, la Bible dire ki Jéhovah Li “Fidele.” Pena personne ki pli fidele ki Li.​—Rév. 16:5.

4, 5. (a) Couma Jéhovah montré ki Li fidele? (b) Couma sa kapav encourage nou kan nou reflechi lor fason ki Jéhovah agir avek fidelité?

⁴ Couma Jéhovah montré ki Li fidele? Jamais Li pa abandonne so bann fidele adorateur. Le Roi David, enn parmi sa bann adorateur-la, ti confirmé ki Jéhovah Li fidele. (Lire 2 Samuel 22:26.) Pendant bann l’epreuve ki David ti gagné, avek fidelité Jéhovah ti guide li, ti protege li ek ti delivré li. (2 Sam. 22:1) David ti koné ki Jéhovah pa ti montré so fidelité zis par bann parole, mais Li ti aide so bann serviteur. Kifer Jéhovah ti agir avek fidelité envers David? Parski David li-mem li ti “enn kikenn ki fidele.” Jéhovah content kan so bann adorateur montré-zot fidele, ek Li fidele envers bann ki fidele envers Li.​—Prov. 2:6-8.

⁵ Nou senti-nou pli fort kan nou reflechi lor fason ki Jéhovah agir avek fidelité envers so bann serviteur. Enn frere fidele ki appel Reed dire: “Sa aide moi beaucoup kan mo lire couma Jéhovah inn agir avek David dan bann situation difisil. Mem kan David ti pé sauvé, kan li ti pé vive dan bann caverne, Jéhovah ti touletan soutenir li. Mo trouve sa bien encourageant! Sa rappel moi ki n’importe ki situation mo été, n’importe ki quantité mo situation parette desesperé, Jéhovah pou avek moi tant ki mo reste fidele ar Li.” Surement ou aussi ou ena mem sentiment, pa vrai?​—Rom. 8:38, 39.

6. Dan ki lezot fason Jéhovah montré ki Li fidele, ek couma sa faire so bann adorateur gagne bann bienfait?

⁶ Dan ki lezot fason Jéhovah montré ki Li fidele? Li reste touletan attaché ar so bann principe. Li donne nou sa l’assurance-la: “Mem kan zot inn vinn vié, moi, mo reste toujours pareil.” (Is. 46:4) Tou bann decision ki Jéhovah prend basé lor so bann principe concernant le bien ek le mal, bann principe ki jamais pa changé. (Mal. 3:6) En plis, Jéhovah montré so fidelité kan Li reste fidele ar so bann promesse. (Is. 55:11) Alors, tou bann adorateur Jéhovah kapav gagne bann bienfait ar so fidelité. Couma? Kan nou faire tou seki nou kapav pou obeir bann principe Jéhovah, nou kapav sur ki Li pou garde so promesse pou beni nou.​—Is. 48:17, 18.

IMITE FIDELITÉ JÉHOVAH

7. Cite enn fason couma nou kapav imite fidelité Jéhovah.

⁷ Couma nou kapav imite fidelité Jéhovah? Enn fason c’est kan nou aide bann dimoune ki dan difficulté. (Prov. 3:27) Par exemple, eski ou konn enn frere ou-soit enn soeur ki decouragé, kitfois parski li malade, li gagne l’opposition ar so famille, ou-soit parski li pé lutte kont so bann faiblesse? Kifer ou pa prend l’initiative pou dire sa dimoune-la “bann bon parole, bann parole ki [pou] reconforte li”? (Zek. 1:13)a Kan ou faire sa, ou pou montré ki ou enn camarade fidele, enn vrai camarade, kikenn ki “bien pli proche ki enn frere.”​—Prov. 18:24.

8. Couma nou kapav imite fidelité Jéhovah, par exemple, envers nou conjoint?

⁸ Nou kapav aussi imite fidelité Jéhovah kan nou reste fidele ar bann dimoune ki nou content. Par exemple, si nou marié, nou koné ki nou bizin reste fidele ar nou conjoint. (Prov. 5:15-18) Alors, nou pa pou zis evite commette l’adultere, mais nou pa pou faire nanyé ki pou kapav amenn nou pou commette sa peché-la. (Mat. 5:28) En plis, nou montré nou fidelité envers nou bann compagnon kan nou pa faire palab lor zot, ou-soit nou koz menti pou gate zot reputation, ek kan nou refuse ecouté kan lezot faire sa.​—Prov. 12:18.

9, 10. (a) Ar kisannla surtout nou envie reste fidele? (b) Kifer li pa pou toujours fasil pou obeir bann commandement Jéhovah?

⁹ Nou envie surtout reste fidele ar Jéhovah. Couma nou kapav faire sa? Kan nou faire tou pou ena mem fason pensé ki Jéhovah​—content seki Li content ek ena la haine pou bann kitsoz ki Li detesté​—ek apré, ena enn conduite ki en accord avek sa. (Lire Psaume 97:10.) Plis nou faire nou bann pensée ek nou bann sentiment ressemblé bann pensée ek bann sentiment Jéhovah, plis li pou fasil pou nou obeir so bann commandement.​—Ps. 119:104.

¹⁰ Bien sur, li pa pou toujours fasil pou obeir bann commandement Jéhovah. Kitfois nou pou bizin lutté pou reste fidele. Par exemple, certain Chretien celibataire ti pou content marié, mais zot pankor trouve enn kikenn parmi bann serviteur Jéhovah. (1 Cor. 7:39) Li possible ki enn soeur celibataire ena bann camarade travail ki pa servi Jéhovah, ki pé touletan essaye rod presente li ar enn kikenn pou li marié. Kitfois soeur-la pé lutté parski li senti-li tousel. Mais kan-mem, li faire bann grand zeffort pou garde so l’integrité envers Jéhovah. Eski nou pa apprecié bann bon l’exemple fidelité coumsa? Pena doute ki Jéhovah pou recompense tou bann ki reste fidele ar Li malgré bann difficulté.​—Héb. 11:6.

JÉHOVAH, ENN BONDIÉ KI PARDONNÉ

11. Ki sa vedir pardonné?

¹¹ Jéhovah disposé pou pardonné: c’est enn parmi bann qualité ki pli attirant ki Li ena. Ki sa vedir pardonné? En general, sa implik pardonne enn kikenn ki’nn offense nou kan nou ena enn bon raison pou faire sa. Sa pa vedir ki nou pou approuve seki li’nn faire ou-soit faire coumadir pa’nn arrive nanyé. Mais nou decidé pou pa garde rancune. La Bible enseigne nou ki Jéhovah ‘disposé pou pardonne’ bann ki vrai-mem repenti.​—Ps. 86:5.

12. (a) Couma Jéhovah pardonné? (b) Dan ki sens peché enn dimoune kapav “effacé”?

¹² Couma Jéhovah montré ki Li pardonné? Kan Jéhovah pardonné, so pardon “bien grand”; Li pardonne dan enn fason complet ek pou touletan. (Is. 55:7) Couma nou koné ki Jéhovah pardonne dan enn fason complet? Anou guette l’assurance ki trouve dan Actes 3:19. (Lire.) L’apotre Pierre ti encourage bann ki ti ecoute li pou “repenti ek retourné.” Kan enn dimoune ki’nn faire peché vrai-mem repenti, li regrette beaucoup so mauvais conduite. Li bien decidé aussi pou pa ré-faire mem peché. (2 Cor. 7:10, 11) En plis, si li vrai-mem repenti sa pou pousse li pou “retourné,” setadir abandonne so mauvais conduite ek faire seki Jéhovah content. Si bann dimoune ki ti ecoute Pierre ti vrai-mem repenti, ki ti pou arrivé? Pierre ti dire ki zot peché ti pou kapav “effacé.” Sa mot-la sorti dan enn mot Grec ki vedir “frotté pou tiré, effacé.” Alors, kan Jéhovah pardonné, coumadir Li efface nou bann peché. Li pardonne completement.​—Héb. 10:22; 1 Jean 1:7.

13. Ki l’assurance nou ena par sa bann parole-la: “Mo pou nepli rappel zot peché”?

¹³ Couma nou koné ki, kan Jéhovah pardonné c’est pou touletan? Anou examine prophetie Jérémie concernant nouveau l’alliance ki Jéhovah ti faire avek bann Chretien oint. Sa l’alliance-la ti pou permette Jéhovah pardonne vrai-mem bann ki ena la foi dan la ranson. (Lire Jérémie 31:34.) Jéhovah dire: “Mo pou pardonne zot erreur ek mo pou nepli rappel zot peché.” Alors, Jéhovah donne nou l’assurance ki, kan Li pardonné, jamais dan lavenir Li pou agir kont nou a cause sa bann peché-la. Li pa retourne chaque fois lor nou peché pou Li accuse nou ou-soit pou puni nou. Au contraire, Jéhovah pardonne sa bann peché-la ek mette zot derriere Li​—pou touletan.​—Rom. 4:7, 8.

14. Couma nou kapav encouragé kan nou medite lor pardon Jéhovah? Donne enn l’exemple.

¹⁴ Nou kapav gagne enn grand l’encouragement kan nou medite lor pardon Jéhovah. Anou prend l’exemple enn soeur ki nou pou appel Elaine. Ena plusieurs l’année, Elaine ti exclu. Plitar, li ti reintegré. Elaine ti reconette: “Mem si mo ti dire ar mo-mem ek ar lezot ki mo croire Jéhovah inn pardonne moi, mo ti toujours pensé ki ena enn distance entre Li ek moi, ou-soit ki lezot ti pli proche ar Li ek Li ti pli réel pou zot.” Selman, Elaine ti encouragé kan li ti lire ek kan li ti medite lor certain comparaison ki la Bible servi pou decrire pardon Jéhovah. Elaine ajouté: “Mo ti ressenti lamour ek tendresse ki Jéhovah manifesté envers moi dan enn fason ki jamais mo ti ressenti avant.” Elaine ti surtout touché par sa pensée-la: “Kan Jéhovah pardonne nou peché, fodé pa nou pensé ki sa bann peché-la pou reste couma enn tache lor nou pendant tou nou lavi.”b Elaine ajouté: “Mo ti realisé ki mo pa ti croire ki Jéhovah kapav pardonne net mo bann peché, ek mo ti pensé ki mo ti pou bizin sarié sa fardeau-la toute longue mo lavi. Mo koné ki sa pou prend le temps, mais mo senti ki mo kapav vrai-mem vinn pli proche ar Jéhovah, ek mo ena l’impression ki enn poids inn sorti lor moi.” Nou pé servi enn Bondié ki vrai-mem content nou ek pardonne nou, pa vrai?​—Ps. 103:9.

IMITE JÉHOVAH, ENN BONDIÉ KI PARDONNÉ

15. Couma nou kapav imite fason ki Jéhovah pardonné?

¹⁵ Nou kapav imite fason ki Jéhovah pardonné ek pardonne sakenn nou camarade kan nou ena enn bon raison pou faire sa. (Lire Luc 17:3, 4.) Rappel ki, kan Jéhovah pardonné, Li blié nou bann peché setadir ki Li pa servi sa bann peché-la kont nou plitar. Kan nou pardonne lezot, nou aussi nou kapav blié seki zot inn faire, mette sa derriere nou ek pa ré-vinn lor la ankor dan lavenir.

16. (a) Eski pardonne lezot vedir approuve seki zot inn faire ou-soit laisse zot traite nou dan enn fason injuste? Expliké. (b) Ki nou bizin faire pou Bondié pardonne nou?

¹⁶ Pardonne peché lezot pa vedir ki nou approuve seki zot inn faire ou-soit laisse zot traite nou dan enn fason injuste. Non, sa vedir plutot ki nou decidé pou pa garde rancune. Alors, li bon nou rappel ki si nou envie ki Jéhovah pardonne nou, nou aussi nou bizin pardonne lezot. (Mat. 6:14, 15) Apré tou, Jéhovah comprend nou ek Li rappel ki “nou finn faire ar la poussiere.” (Ps. 103:14) Alors, eski nou aussi nou pa bizin comprend lezot, passe lor zot defaut ek pardonne zot avek tou nou leker?​—Éph. 4:32; Col. 3:13.

17. Ki kapav aide nou pou pardonné si enn kikenn inn offense nou?

¹⁷ Bien sur, li pa toujours fasil pou pardonné. Mem bann Chretien oint dan premier siecle ti trouve sa difisil pou reglé bann probleme ki ti ena entre zot. (Phil. 4:2) Si enn Chretien inn offense nou, ki kapav aide nou pou pardonne li? Anou prend l’exemple Job. Sa ti faire li beaucoup di-tort kan so bann “camarade”​—Éliphaz, Bildad ek Tsophar​—ti accuse li sans okenn preuve. (Job 10:1; 19:2) A lafin, Jéhovah ti corrige sa bann ki ti faire bann fausse accusation-la. Jéhovah ti dire zot al guette Job ek offert enn sacrifice pou zot peché. (Job 42:7-9) Mais Jéhovah ti aussi demann Job pou faire enn kitsoz. Ki li ti bizin faire? Jéhovah ti dire li prié pou sa bann zom ki ti accuse li-la. Job ti faire seki Jéhovah ti demann li ek Jéhovah ti beni li parski li ti pardonne zot. (Lire Job 42:10, 12, 16, 17.) Ki leson nou kapav tiré? Enn la priere sincere pou enn kikenn ki’nn offense nou kapav aide nou pou pa garde rancune kont li.

CONTIGNE ENA ENN GRAND L’APPRECIATION POU BANN QUALITÉ JÉHOVAH

18, 19. Couma nou kapav ena enn pli grand l’appreciation pou personnalité Jéhovah?

¹⁸ Pena doute ki sa finn encourage nou kan nou finn aprann plis lor bann qualité ki Jéhovah ena. Nou finn trouvé ki Li abordable, Li pa faire preference, Li genereux, Li raisonnable, Li fidele, ek Li pardonné. Bien sur, ena ankor beaucoup pou aprann lor Jéhovah. Nou pou ena la joie pou aprann ankor plis lor Jéhovah pendant l’eternité. (Eccl. 3:11) Nou d’accord avek l’apotre Paul ki ti ecrire: “Ah, bann benediction Bondié, zot grand, so sagesse ek so connaissance, zot bien profond!” Nou kapav dire mem kitsoz lor lamour Bondié ek sa six qualité ki nou finn examiné-la.​—Rom. 11:33.

¹⁹ Nou tou, anou contigne aprann plis lor bann qualité Jéhovah, ki bien attirant. Nou kapav faire sa kan nou etudié lor sa bann qualité-la, medite lor la ek manifesté zot chaque jour. (Éph. 5:1) A mesure ki nou faire sa, pena doute ki nou pou d’accord avek seki sa psalmiste-la ti chanté: “Pou moi, vinn pré ar Bondié, sa li bon pou moi.”​—Ps. 73:28.