LARTIK LETID 7
KANTIK 15 Loue Premie-Ne Zeova!
Ki Bienfe To Gagne Gras-a Zeova So Pardon?
“Se twa ki donn vre pardon.”—PS. 130:4.
PWIN PRINSIPAL
Dan sa lartik-la, nou pou get sertin lexanp dan Labib ki pou montre nou kouma Zeova pardonn nou. Sa pou ogmant nou rekonesans anver Li.
1. Kan enn kikenn dir nou ki li’nn pardonn nou, kifer nou pa vremem kone ki li pe rod dir?
KAN to kone ki to’nn fer enn kitsoz ki’nn bles enn kikenn, sirman to pou bien soulaze si sa dimounn-la dir twa ki li’nn pardonn twa, pa vre! Me bien souvan, kan enn dimounn dir nou ki li’nn pardonn nou, kitfwa nou pa tro kone seki li pe rod dir. Kifer? Parski sa kapav vedir plizir kitsoz. Eski li pe rod dir ki nou touzour bann bon kamarad? Ouswa eski li pe rod dir ki li nepli anvi ki nou koz lor seki’nn arive, me ki nou lamitie pou nepli parey kouma avan? Avredir, kan enn kikenn dir nou ki li pardonn nou, nou pa vremem kone ki li pe rod dir.
2. Dan Labib, ki nou aprann lor Zeova so pardon? (Get not osi.)
2 Parkont, fason ki Zeova pardone, li bien diferan ar fason ki nou pardonn lezot. Kifer? Parski personn pa kapav pardonn parey kouma Zeova. Enn ekrivin psom ti dir: “Parski se twa [Zeova] ki donn vre pardon, akoz sa bann dimounn ena enn gran respe pou twa.”a (Ps. 130:4) Wi, kan Zeova pardone, se enn “vre pardon.” Se gras-a Zeova ki nou kapav kone ki sa vedir vremem pardone. Dan sertin verse Lekritir Ebre, bann ekrivin Labib servi enn mo pou dekrir fason ki Zeova pardone. Selman, zame zot pa servi sa mo-la pou dekrir fason ki bann dimounn pardone.
3. Kifer Zeova so pardon bien diferan ar fason ki bann dimounn pardone? (Izai 55:6, 7)
3 Kan Zeova pardonn enn kikenn, Li efas net pese sa dimounn-la. Lerla, sa dimounn-la kapav revinn pros ar Li. Nou vremem rekonesan ki Zeova pardonn nou net, ek Li mem fer sa plizir fwa!—Lir Izai 55:6, 7.
4. Kouma Zeova ed nou pou konpran ki savedir vre pardon?
4 Me si Zeova so pardon li diferan ar fason ki nou, bann dimounn inparfe, nou pardone, eski nou kapav vremem konpran ki savedir vre pardon? Wi. Nou kapav konpran Zeova so pardon gras-a bann zoli lexanp ki ena dan Labib. Dan sa lartik-la, nou pou examinn sertin lexanp ki pou montre nou fason ki Zeova pardone. Sa bann lexanp-la pou montre nou ki kan enn kikenn repanti, Zeova efas so pese ek Li les sa dimounn-la revinn so kamarad. Amezir ki nou pou examinn sa bann lexanp-la, sa pou ogmant nou lamour ek nou rekonesans pou nou Papa Zeova, ki ena boukou lamour ek mizerikord.
ZEOVA PRAN NOU BANN PESE
5. Ki arive kan Zeova pardonn nou?
5 Labib souvan konpar nou bann pese ar bann pwa ki bien lour. Kan Lerwa David ti koz lor so bann pese, li ti dir: “Mo bann fot boukou pli ot ki mo latet, parey kouma enn fardo ki bien lour, zot tro lour pou mwa.” (Ps. 38:4) Selman, kan enn kikenn repanti, Zeova pardonn so bann pese. (Ps. 25:18; 32:5) Mo Ebre ki servi pou tradir “pardon” vedir “pran” ouswa “sarye.” Kan enn kikenn fer enn pese, souvan li santi li koupab ouswa li gagn onte. Me kan Zeova pardonn nou bann pese, se koumadir Li tir sa bann santiman negatif ki kouma bann pwa lour lor nou ledo, Li pran zot, Li sarye zot, Li ale.
“Pardonn” (Ps. 32:5)
6. Ki lot lexanp Labib servi pou koz lor fason ki Zeova pardone? Explike.
6 Labib servi enn lot lexanp pou montre nou kouma Zeova pran nou bann pese ek sarye zot bien lwin ar nou. Psom 103:12 dir: “Parey kouma landrwa kot soley leve li bien lwin ar landrwa kot soley kouse, parey osi Li finn met nou bann pese bien lwin ar nou.” Soley leve dan les ek li al kouse dan lwes. Sa de pwin-la zame zwenn zot kamarad. Sa lexanp-la montre nou ki, kan Zeova pardonn nou bann pese, Li amenn zot bien lwin ar nou. Sa vremem rasir nou, pa vre! Kan Zeova pardonn nou, Li vremem pardonn nou net!
“Parey kouma landrwa kot soley leve li bien lwin ar landrwa kot soley kouse” (Ps. 103:12)
7. Ki bann lexanp Labib servi pou montre seki Zeova fer ar nou bann pese? (Mishe 7:18, 19)
7 Kan Zeova pran nou bann pese ek Li sarye zot bien lwin ar nou, eski savedir ki Li kontign gard zot avek Li? Non. Konsernan Zeova, Lerwa Ezekias ti dir: “To’nn zet tou mo bann pese deryer to ledo.” Ouswa, kouma not dan sa verse Izai la dir: “To’nn tir tou mo bann pese devan to lizie.” (Iza. 38:9, 17; not) Sa lexanp-la montre nou ki kan Zeova pardonn enn kikenn ki repanti, Li zet so bann pese bien-bien lwin. Pou explik sa verse-la, enn liv referans dir ki ‘pou Bondie se koumadir zame nou pa’nn fer pese.’ Pou nou konpran pli bien sa lide-la, ena enn lot lexanp dan Labib ki trouv dan Mishe 7:18, 19. (Lir.) Sa bann verse-la montre ki Zeova zet nou bann pese dan fon lamer. Dan lepase, kan ti zet enn kitsoz dan fon lamer, pena sime ki ti kapav regagn li.
“To’nn zet tou mo bann pese deryer to ledo” (Iza. 38:17)
“To pou zet tou zot pese dan fon lamer” (Mish. 7:19)
8. Ki nou’nn aprann ziska ler?
8 Gras-a sa bann lexanp-la, nou’nn aprann ki kan Zeova pardonn nou, Li pran nou bann pese net ek nou nepli bizin santi nou koupab pou sa. Parey kouma David ti dir: “Ere bann dimounn ki finn gagn pardon pou zot bann move aksion ek ki zot bann pese finn kouver; ere sa dimounn ki Zeova pa pou pran kont so pese ditou.” (Rom. 4:7, 8) Wi, se samem vre pardon!
ZEOVA EFAS NOU BANN PESE
9. Ki lexanp Labib servi pou montre kouma Zeova pardonn nou net?
9 Zeova servi bann lezot lexanp pou montre nou ki gras-a laranson, Li kapav efas pese bann dimounn ki repanti. Labib dir ki Zeova lav ek rins bann pese. Lerla, sa kikenn ki’nn fer pese la vinn prop. (Ps. 51:7; Iza. 4:4; Zer. 33:8) Labib explike kouma Zeova fer sa. Li dir: “Mem si zot pese rouz vif, sa bann pese-la pou vinn blan kouma lanez; mem si zot rouz kouma enn latwal letof rouz fonse, zot pou vinn blan kouma lalenn.” (Iza. 1:18) Kan ena enn tas rouz fonse lor enn linz, li extra difisil pou tir sa tas-la. Zeova servi sa lexanp-la pou montre nou ki Li kapav lav nou bann pese ziska ki nou nepli trouv zot.
“Mem si zot pese rouz vif, sa bann pese-la pou vinn blan kouma lanez” (Iza. 1:18)
10. Ki lot lexanp Labib servi pou montre kouma Zeova pardonn nou net?
10 Parey kouma nou ti trouve dan lartik avan, Labib konpar nou bann pese ar bann det. (Mat. 18:32-35) Alor, sak fwa ki nou fer enn pese kont Zeova, se koumadir nou det pe ogmante. Akoz sa, nou ena enn gro det anver Li! Selman, kan Zeova pardonn nou, se koumadir Li kennsel sa det-la. Ek kan Li kennsel nou det, Li pa revinn lor la ankor. Kan nou reflesi lor Zeova so pardon, sa vremem rasir nou, pa vre!
“Mo’nn kennsel tou to bann det” (Mat. 18:32-35)
11. Kan Labib dir ki Zeova efas nou bann det, ki savedir? (Zist. 3:19)
11 Zeova pa zis kennsel nou bann det; Li efas zot net. (Lir Zistwar Bann Zapot 3:19.) Anou pran enn lexanp pou konpran sa. Fer koumadir enn kikenn inn kennsel nou det; li’nn rey ouswa li’nn met enn lakrwa lor sa som larzan ki nou ti dwa la. Selman, anba lakrwa-la, nou ankor kapav trouv seki’nn ekrir. Parkont, si li efas li, som-la pou disparet net. Dan lepase, lank ki bann dimounn ti servi pou ekrir, ti efase fasilman. Ti bizin zis pas enn kout leponz mouye lor la, ek seki ti ekrir ti disparet net. Alor, kan enn kikenn ti “efas” enn det, det-la ti disparet net. Ti nepli ena okenn tras sa det-la; se koumadir zame li pa ti existe. Nou bien rekonesan anver Zeova parski Li pa zis kennsel nou bann det, me Li efas zot net!—Ps. 51:9.
“Pou ki li efas zot bann pese” (Zist. 3:19)
12. Ki lot lexanp ankor Zeova servi?
12 Zeova servi enn lot lexanp pou montre kouma Li efas nou bann pese. Li dir: “Mo pou efas to bann erer koumadir zot inn kasiet deryer enn niaz ek to bann pese koumadir zot inn kasiet deryer enn gro niaz.” (Iza. 44:22) Kan Zeova pardone, se koumadir Li pe servi enn gro niaz pou kasiet nou bann pese, pou ki nepli kapav trouv zot ditou.
“Mo pou efas to bann erer koumadir zot inn kasiet deryer enn niaz” (Iza. 44:22)
13. Kan Zeova pardonn nou bann pese, ki lefe sa bizin ena lor nou?
13 Ki nou aprann ar sa bann lexanp-la? Kan Zeova pardonn nou bann pese, fode pa nou kontign santi nou koupab pou seki nou’nn fer. Gras-a sakrifis Zezi, Zeova inn kennsel nou det net. Nepli ena okenn tras sa bann det-la! Se koumsa ki Zeova pardonn nou kan nou repanti. Se samem vre pardon!
ZEOVA AKSEPTE KI NOU REVINN SO KAMARAD
Gras-a Zeova so pardon, nou kapav ena enn bon lamitie avek Li (Get paragraf 14)
14. Kan Zeova pardonn nou, kifer nou kapav fer Li konfians? (Get zimaz osi.)
14 Kan Zeova pardonn nou, nou kapav sir ki Li anvi ki nou revinn so kamarad. Kan nou konn sa, sa ed nou pou nou nepli santi nou koupab pou bann move kitsoz ki nou’nn fer dan lepase. Alor, fode pa nou panse ki Zeova ankor ankoler ar nou ek ki Li pou rod enn fason pou pini nou. Zeova zame pa pou fer enn kitsoz koumsa! Kan Zeova dir ki Li pardonn nou, kifer nou kapav fer Li konfians? Zeova ti dir profet Zeremi: “Mo pou pardonn zot erer ek mo pou nepli rapel zot pese.” (Zer. 31:34) Lapot Pol ti servi mem lexpresion kan li ti dir ki Zeova “pou nepli rapel zot bann pese.” (Ebre 8:12) Me ki sa lexpresion-la vedir?
“Mo pou nepli rapel zot pese” (Zer. 31:34)
15. Kan Zeova dir ki Li nepli rapel nou bann pese, ki savedir?
15 Dan Labib, lexpresion “rapel” pa touletan vedir pans enn kitsoz ki’nn arive. Avredir, sa kapav osi vedir fer enn kitsoz. Par exanp, kan enn bandi ti demann Zezi pou ‘rapel li kan li vini dan so Rwayom,’ li pa ti pe dir Zezi zis pans li. (Lik 23:42, 43) Avredir, li ti anvi ki Zezi fer enn kitsoz pou li. Ek dan so repons, Zezi ti fer li konpran ki li ti pou resisit li. Dan mem fason, kan Zeova dir ki Li nepli rapel nou bann pese, savedir ki Li’nn pardonn nou, ek ki dan lavenir, Li pa pou pini nou pou sa bann pese-la.
16. Ki Labib dir lor liberte ki nou gagne gras-a vre pardon?
16 Labib servi enn lot lexanp pou montre nou ki gras-a vre pardon, nou gagn liberte. Akoz nou inparfe, Labib dir ki nou bann “esklav pese.” Me gras-a pardon Zeova, nou’nn ‘libere ar nou bann pese.’ (Rom. 6:17, 18; Rev. 1:5) Wi, kan nou kone ki Zeova inn pardonn nou, nou ere parey kouma enn esklav ki’nn gagn so liberte.
“Finn liber zot ar pese” (Rom. 6:18)
17. Kifer Labib konpar Zeova so pardon ar gerizon? (Izai 53:5)
17 Lir Izai 53:5. Labib dir ki akoz nou fer pese, nou koumadir bann dimounn ki ena enn maladi mortel. Me gras-a sakrifis Zezi, Zeova inn geri nou. (1 Pier 2:24) Kan nou fer pese, nou gat nou lamitie ar Zeova. Me gras-a laranson, Zeova kapav pardonn nou ek nou kapav revinn pros ar Li. Kan enn kikenn ki ena enn maladi grav reisi geri, li bien kontan, pa vre! Dan mem fason, nou osi nou kontan kan Zeova pardonn nou, parski gras-a sa nou kapav revinn pros avek Li ek regagn so faver.
“Akoz so bann blesir, nou’nn gagn gerizon” (Iza. 53:5)
KI LEFE ZEOVA SO PARDON BIZIN ENA LOR NOU?
18. Ki nou’nn aprann lor Zeova so pardon gras-a bann lexanp ki ena dan Labib? (Get osi lankadre “Kouma Zeova Pardonn Nou?”)
18 Dan sa lartik-la, nou’nn examinn plizir lexanp lor Zeova so pardon. Ki nou’nn aprann ar sa bann lexanp-la? Kan Zeova pardonn nou, Li pardonn nou net ek Li pa revinn lor la. Gras-a sa, nou kapav ena enn bon lamitie avek Li. Fode pa nou bliye osi ki vre pardon se enn kado ki Zeova donn nou. Mem si nou pa merit sa, Li donn nou sa kado-la parski Li zenere ek Li kontan nou.—Rom. 3:24.
19. (a) Pou ki kitsoz nou bizin rekonesan? (Romin 4:8) (b) Ki nou pou examine dan prosin lartik?
19 Lir Romin 4:8. Nou bien rekonesan ki nou Bondie Zeova, Li Bondie “vre pardon,” pa vre! (Ps. 130:4) Selman, si nou anvi ki Zeova pardonn nou, ena enn kitsoz bien inportan ki nou bizin fer. Zezi ti dir: “Si zot pa pardonn bann dimounn pou zot bann erer, zot Papa osi pa pou pardonn zot.” (Mat. 6:14, 15) Alor, li bien inportan ki nou swiv lexanp Zeova ek ki nou pardonn lezot. Me kouma nou kapav fer sa? Se seki nou pou examine dan prosin lartik.
KANTIK 46 Mersi Zeova
a Bann Lekritir Ebre servi bann mo ki montre ki se zis Zeova tousel ki kapav donn vre pardon, setadir pardonn net bann pese. Dan boukou lezot tradiksion Labib, pena sa lide inportan la dan Psom 130:4.