To Kapav Sir ki Zeova Inn Pardonn Twa

1-2. Ki nou resanti kan nou konpran ki Zeova inn pardonn nou bann pese? (Get zimaz lor kouvertir.)

LERWA David ti santi li koupab akoz bann pese ki li ti fer. (Ps. 40:12; 51:3; not ki ena lao) Selman, li ti repanti, li ti fer bann sanzman ki bizin, ek Zeova ti pardonn li. (2 Sam. 12:13) Kan David ti konpran ki Zeova ti pardonn li, li ti santi li soulaze ek sa ti rann li ere.—Ps. 32:1.

² Parey kouma David, kan nou konpran ki Zeova inn montre mizerikord anver nou ek inn pardonn nou bann pese, nou osi nou kapav ere. Mem si nou fer enn pese grav, sa rekonfort nou kan nou kone ki Zeova pou pardonn nou, si nou vremem repanti, nou priye Li pou gagn so pardon, nou koz ar bann ansien, ek nou fer tou seki nou kapav pou pa refer sa pese-la ankor. (Prov. 28:13; Zist. 26:20; 1 Zan 1:9) Sa rekonfort nou osi kan nou kone ki, kan Zeova pardonn enn pese ki nou’nn fer, Li pa pou revinn lor la ankor ek Li pa pou pini nou pou sa!—Eze. 33:16.

3-4. Kouma Jennifer ti santi li apre so batem, ek ki nou pou examine dan sa lartik-la?

³ Selman, parfwa nou kapav ena bann dout ek nou panse ki Zeova pa’nn vremem pardonn nou. Se seki Jennifer ti resanti. Mem si li’nn grandi dan laverite, kan li ti adolesan, li ti fer bann move kitsoz ek li ti kasiet sa so bann paran. Boukou lane apre, li ti fer bann sanzman ki bizin, li’nn donn Zeova so lavi ek li’nn pran batem. Jennifer dir: “Dan lepase, souvan mo ti komet limoralite sexiel, souvan mo ti bwar ziska sou, mo ti enn kikenn ki ti bien ankoler, ek larzan ti kitsoz ki pli inportan pou mwa. Mo ti kone ki Labib dir ki gras-a sakrifis Zezi, Zeova kapav pardonn nou bann pese. Me mem si mo ti repanti ek mo ti demann Zeova pou pardonn mwa, mo pa ti vremem sir ki Li ti pardonn mwa.”

⁴ Eski parfwa to trouv sa difisil pou krwar ki Zeova inn vremem pardonn twa pou bann pese ki to’nn fer dan lepase? Si to santi twa koumsa, rapel ki Zeova ena boukou mizerikord. David ti sir ki Zeova ti pardonn li. Ek Zeova anvi ki nou ere, parey kouma David ti ere kan Li ti pardonn li. Dan sa lartik-la, nou pou gete kifer nou bizin vremem sir ki Zeova inn pardonn nou, ek nou pou gete ki kitsoz kapav ed nou pou fer sa.

KIFER NOU BIZIN SIR KI ZEOVA INN PARDONN NOU?

5. Ki Satan anvi fer nou krwar? Donn enn lexanp.

⁵ Kan nou sir ki Zeova inn pardonn nou, nou pa pou tom dan enn parmi bann piez ki Satan servi. Satan anvi fer nou krwar ki nou bann pese telman grav ki Zeova zame pa pou pardonn nou. Fode pa nou bliye ki Satan anvi fer nou aret servi Zeova, ek li pou esey fer tou seki li kapav pou li reisi fer sa. Anou gete seki ti arive kan enn frer dan lasanble Korint ti komet limoralite sexiel ek ki bann ansien ti tir li dan lasanble. (1 Kor. 5:1, 5, 13) Kan li ti repanti, Satan ti anvi ki bann frer ek ser dan lasanble pa pardonn li. Li ti anvi ki zot inior li ek ki zot pa re-akeyir li dan lasanble. Satan ti anvi osi ki sa zom ki ti repanti la panse ki li pa merite gagn pardon Zeova. Li ti anvi ki sa zom-la “akable par enn tro gran tristes” ek ki li aret servi Zeova. Azordi, Satan ankor servi sa piez-la. Li anvi fer nou krwar ki Zeova zame pa pou pardonn nou bann pese, ek lerla nou aret servi Zeova akoz sa. Selman,“nou konn bien [Satan] so bann manigans,” pa vre!—2 Kor. 2:5-11.

6. Ki kitsoz kapav ed nou pou nou aret santi nou koupab?

⁶ Kan nou sir ki Zeova inn pardonn nou, sa kapav ed nou pou nou aret santi nou koupab. Kan nou fer enn pese, nou santi nou koupab. (Ps. 51:17) Ek se enn bon kitsoz ki nou santi nou koupab, parski sa pou motiv nou pou fer bann sanzman ki bizin ek pou fer seki drwat. (2 Kor. 7:10, 11) Selman, si nou kontign santi nou koupab apre ki nou’nn repanti pou nou bann pese, sa kapav telman dekouraz nou ki nou kapav aret servi Zeova. Parkont, kan nou vremem sir ki Zeova inn pardonn nou, sa kapav ed nou pou nou aret santi nou koupab. Lerla, nou pou kapav servi Zeova parey kouma Li Li anvi, setadir avek enn konsians kler ek avek lazwa. (Kol. 1:10, 11; 2 Tim. 1:3) Me kouma nou kapav vremem sir ki Zeova inn pardonn nou?

KI KITSOZ KAPAV ED NOU POU NOU VREMEM SIR KI ZEOVA INN PARDONN NOU?

7-8. Kouma Zeova ti dekrir Limem ar Moiz, ek ki kitsoz nou kapav sir? (Exod 34:6, 7)

⁷ Reflesi lor kouma Zeova dekrir Limem. Par exanp, reflesi lor seki Zeova ti dir Moiz kan li ti lor Montagn Sinai.a (Lir Exod 34:6, 7.) Parmi tou bann kalite ki Zeova ti kapav servi pou dekrir Limem, Li ti dir Moiz ki Li “enn Bondie ki ena mizerikord ek konpasion.” Alor, si enn kikenn ki kontan Zeova fer enn pese ek li repanti, eski to panse ki Zeova pa pou pardonn li? Si Zeova pa pardonn sa dimounn-la, savedir ki Li move ek ki Li pena mizerikord. Ek Zeova pa koumsa!

⁸ Nou kapav sir ki kan Zeova dir ki Li ena mizerikord, Li dir laverite. Nou kapav krwar seki Li dir parski Zeova zame koz manti! (Ps. 31:5) Alor, si to trouv sa difisil pou krwar ki Zeova inn vremem pardonn twa, demann tomem: ‘Eski mo sir ki Zeova Li vremem ena mizerikord ek konpasion, ek ki Li pardonn ninport kisann-la ki repanti?’ Si to krwar sa, alor to kapav sir ki Li’nn pardonn twa osi.

9. Dapre Psom 32:5, dan ki fason Zeova pardonn nou bann pese?

⁹ Reflesi lor seki Labib dir lor fason ki Zeova pardonn bann dimounn. Par exanp, reflesi lor seki David ti dir lor pardon Zeova. (Lir Psom 32:5.) David ti dir: “To ti pardonn erer mo bann pese.” Mo Ebre ki’nn servi dan sa verse-la pou “pardone” vedir “tire,” ouswa “pran ale.” Alor, kan Zeova ti pardonn David, David ti santi ki Zeova ti tir enn pwa lour lor li, ek ki Li ti pran sa pwa-la Li ti ale. Kan David ti konpran ki Zeova ti pardonn li, li ti santi li soulaze ek sa ti rann li ere. (Ps. 32:2-4) Parey kouma David, nou osi nou kapav ena sa bann santiman-la. Kan nou’nn vremem repanti, fode pa ki nou kontign santi nou koupab pou bann pese ki nou’nn fer. Okontrer, nou bizin ere parski Zeova inn tir sa pwa-la lor nou, ek Li’nn pran sa pwa-la Li’nn ale.

10-11. Kan Labib dir ki Zeova “pre pou pardone,” ki sa aprann nou lor Zeova? (Psom 86:5)

¹⁰ Lir Psom 86:5. Dan sa verse-la, David dir ki Zeova “pre pou pardone.” Sa vedir ki Zeova pa ankoler vit kan nou fer bann erer, ek ki Li touletan anvi pardonn bann ki repanti. Kifer Zeova pre pou pardone? Deziem parti sa verse-la explike ki, Zeova so “lamour fidel li an-abondans anver tou bann ki priye [li].” Dan lartik ki nou ti etidie avan, nou ti aprann ki Zeova promet ki Li pou montre lamour fidel anver bann ki kontan Li, ek ki zame Li pa pou abandonn zot. Alor, si enn kikenn ki’nn fer enn pese li repanti, Zeova pou kontign montre lamour fidel anver li ek Li pou ‘pardonn li avek tou so leker.’ (Iza. 55:7, not) Si to trouv sa difisil pou krwar ki Zeova inn vremem pardonn twa, demann tomem: ‘Eski mo sir ki Zeova pre pou pardonn tou bann ki repanti ek ki priye Li pou gagn so pardon?’ Si to krwar sa, alor to kapav sir ki Li’nn pardonn twa osi.

¹¹ Labib rasir nou osi kan li dir nou ki Zeova konn nou bien, ek ki Li kone ki nou inparfe. (Ps. 139:1, 2) Nou trouv sa bien dan enn psom ki David ti ekrir, ek sa psom-la kapav ed nou pou nou vremem sir ki Zeova inn pardonn nou.

PA BLIYE SEKI ZEOVA RAPEL

12-13. Dapre Psom 103:14, ki kitsoz Zeova rapel, ek ki sa fer nou konpran?

¹² Lir Psom 103:14. David donn enn lot rezon kifer Zeova pre pou pardonn bann ki repanti. Li dir ki Zeova “rapel ki nou finn fer ar lapousier.” Savedir ki Zeova kone ki nou inparfe. Pou nou konpran sa pli bien, anou examinn inpe plis seki David ti dir.

¹³ David dir ki Zeova “konn bien kouma nou finn forme.” Zeova ti servi “lapousier later” pou form Adan, ek Li konn bien bann limit ki bann imin ena. (Zen. 2:7) Par exanp, nou bizin manze, dormi, ek respire. Mem bann imin ki ti parfe, ti ena sa bann limit-la. Selman, kan Adan ek Ev ti fer pese, lexpresion “finn fer ar lapousier” inn vedir enn lot kitsoz ankor. Akoz pese, bann imin inn gagn bann lezot limit, kouma par exanp nou’nn vinn inparfe ek nou ena tandans pou fer bann move kitsoz. Selman, Zeova pa zis kone ki nou inparfe; David dir ki Li “rapel” ki nou inparfe. Dan sa verse-la, lexpresion “rapel” vedir ki, parski Zeova kone ki nou inparfe, sa pous Li pou fer enn kitsoz dan nou faver. Dan enn sertenn fason, David ti pe rod dir ki Zeova kone ki parfwa nou pou fer bann erer, me kan Li trouve ki nou vremem repanti, Li montre mizerikord anver nou ek Li pardonn nou.—Ps. 78:38, 39.

14. (a) Ki kitsoz ankor nou kapav aprann dan Psom 103 lor fason ki Zeova pardonn nou? (Psom 103:12) (b) Ki leson nou kapav aprann lor fason ki Zeova ti pardonn David? (Get lankadre “Kan Zeova Pardonn enn Pese, Li Bliye Pese-la.”)

¹⁴ Ki kitsoz ankor nou kapav aprann dan Psom 103 lor fason ki Zeova pardonn nou? (Lir Psom 103:12.) David dir ki kan Zeova pardonn nou, Li “met nou bann pese bien lwin ar nou,” “parey kouma landrwa kot soley leve [les] li bien lwin ar landrwa kot soley kouse [lwes].” Les ek lwes, se de pwin ki bien lwin ar zot kamarad. Avredir, sa de pwin-la zame zwenn zot kamarad. Ki sa aprann nou lor fason ki Zeova pardonn nou bann pese? Konsernan sa verse-la, enn liv explike ki Bondie amenn nou bann pese telman lwin ar nou ki se koumadir mem so loder disparet net. Alor, kan Zeova pardonn enn pese, nou kapav sir ki zame Li pa pou repans lor la ankor ek ki zame Li pa pou rapel nou sa.—Eze. 18:21, 22; Zist. 3:19.

15. Si nou trouv sa difisil pou krwar ki Zeova inn pardonn nou, lor ki kitsoz nou bizin reflesi?

¹⁵ Si to trouv sa difisil pou krwar ki Zeova inn pardonn twa, seki David dir dan Psom 103 kapav ed twa. Reflesi lor seki Zeova resanti pou twa. Li rapel ki to inparfe ek Li pardonn tou bann ki repanti pou zot pese. Se samem ki to’nn fer, pa vre! Pa bliye osi ki Zeova inn fini pardonn twa. Savedir ki zame Li pa pou repans lor pese ki to’nn fer, ek zame Li pa pou rapel twa sa. Alor, Li pa pou revinn lor la ankor ek Li pa pou pini twa pou sa. Zeova pa kontign pans lor bann pese ki to’nn fer dan lepase, alor twa osi fode pa to fer sa! (Ps. 130:3) Kan nou sir ki Zeova inn vremem pardonn nou, sa pou ed nou pou nou aret santi nou koupab, ek nou pou kapav kontign servi Zeova avek lazwa.

16. Kifer li danzere ki nou kontign pans lor bann pese ki Zeova inn fini pardone? Donn enn lexanp. (Get zimaz osi.)

¹⁶ Anou pran enn lexanp. Kan enn kikenn pe roul enn loto, li normal ki li get dan so retrovizer pou trouve si ena enn masinn ki pe vini deryer li. Li kapav fer sa detanzantan; selman sa pou bien danzere si li kontign get dan so retrovizer kan li pe roul so loto. Kifer? Parski pou li roul bien, li bizin kontign get so sime devan li. Dan mem fason, parfwa li bon ki nou pans lor bann erer ki nou’nn fer dan lepase; sa kapav ed nou pou pa refer mem erer. Selman, si nou kontign pans lor enn pese ki Zeova inn fini pardone, sa kapav fer nou perdi nou lazwa ek nou pa pou reisi fer nou maximum dan nou servis pou Zeova. Alor, anou res konsantre lor nou servis pou Zeova, ek anou kontign reflesi lor zoli lavenir ki Li’nn promet nou, kot nou “pa pou rapel” okenn move souvenir.—Iza. 65:17; Prov. 4:25.

KONTIGN KONVINK TO LEKER

17. Kifer nou bizin kontign konvink nou leker ki Zeova kontan nou ek ki Li’nn pardonn nou?

¹⁷ Nou bizin kontign konvink nou leker ki Zeova kontan nou ek ki Li touletan pre pou pardonn nou. (1 Zan 3:19, not) Kifer? Parski Satan pa pou aret fer zefor pou konvink nou ki Zeova pa kontan nou ouswa ki Li pa’nn pardonn nou. Se bann metod ki Satan servi pou esey fer nou aret servi Zeova. Ek plis nou koste ar lafin, plis li pou fer zefor pou fer sa “parski li kone ki li ena zis enn tigit letan.” (Rev. 12:12) Selman, fode pa nou les li gagne!

18. Ki nou bizin fer pou ki nou konvink nou leker ki Zeova kontan nou ek ki Li’nn pardonn nou?

¹⁸ Dan lartik avan, nou ti trouve seki nou bizin fer pou ki nou vremem sir ki Zeova kontan nou. Ek dan lartik ki nou’nn etidie azordi, nou’nn trouve kouma nou kapav vremem sir ki Zeova inn pardonn nou. Par exanp, nou bizin reflesi lor kouma Zeova ti dekrir Limem. Nou bizin osi pran letan pou reflesi bien lor seki Labib dir lor fason ki Zeova pardonn nou. Fode pa nou bliye osi ki Zeova kone ki nou inparfe, ek ki akoz sa Li pou montre mizerikord anver nou. Pa bliye osi ki kan Zeova pardonn nou, Li pardonn nou net. Si nou rapel sa bann kitsoz-la, nou pou ere parski nou pou vremem sir ki Zeova inn montre mizerikord anver nou. Lerla, parey kouma David, nou pou kapav dir, “Mersi Zeova, parski to’nn ‘pardonn erer mo bann pese’!”—Ps. 32:5.