Eski ou pou marche avek Bondié?

“Marche avek to Bondié dan enn fason modeste.”—MIKA 6:8.

1, 2. Kifer bann sentiment ki Jéhovah ena envers nou, zot pareil couma bann sentiment enn parent ki montré so zenfant marché?

MAZINN sa scene-la: enn ti-baba pé tini lor so deux ti lipié, ek li faire so premier pas ziska ki li reussi arrive kot so papa ou so mama ki pé attann li lé-bras grand ouvert. Sa parette enn kitsoz bien banal, mais pou sa bann parent-la, c’est enn grand kitsoz, c’est enn moment ki promette beaucoup pou l’avenir. Zot attann ki dan bann mois ek bann l’année ki pé vini, zot pou kapav marche ensam avek zot zenfant, la main dan la main. Zot souhaité ki zot pou kapav forme zot zenfant ek soutenir li dan beaucoup fason pendant bien longtemps.

² Jéhovah ena mem sentiment pou so bann zenfant ki lor la terre. Enn fois, concernant so peuple, Israël, ki Li ti appel aussi Éphraïm, Li ti dire: “Mo ti montré Éphraïm couma marché, mo ti prend zot lor mo lé-bras . . . Mo ti riss zot avek la corde, avek la corde l’amour.” (Hoshéa 11:3, 4) Ici, Jéhovah decrire Li-mem couma enn papa ki ena l’amour pou so zenfant, ek ki avek patience, montré li couma marché, ek mem kitfois, Li prend li kan li tombé. Jéhovah, Li pli bon Papa ki existé, ek Li envie montré nou couma marché. Li content aussi accompagne nou pendant ki nou pé faire progré. Pareil couma verset-clé sa lartik-la montré, nou kapav marche avek Bondié! (Mika 6:8) Mais ki sa vedir marche avek Bondié? Kifer nou bizin faire sa? Couma li possible pou faire sa? Ek ki benediction nou gagné kan nou marche avek Bondié? Anou examine sa quatre question-la enn par enn.

Ki sa vedir marche avek Bondié?

3, 4. (a) Kifer l’exemple enn kikenn ki marche avek Bondié, li enn l’exemple facile pou comprend? (b) Ki sa vedir marche avek Bondié?

³ Bien-sur, enn dimoune ki’nn faire avek la chair ek lezo, pa kapav vrai-mem marche avek Jéhovah, ki enn l’esprit. (Exode 33:20; Jean 4:24) Alors, c’est dan enn fason symbolik ki la Bible dire ki bann dimoune marche avek Bondié. C’est enn joli l’exemple ki tou dimoune dan le monde kapav comprend, n’importe ki so pays ek so culture, ou-soit n’importe ki lepok li’nn vive. Apré tou, ki dimoune pa kapav comprend ki sa vedir marche ensam avek enn lot dimoune? Seki sa l’exemple-la montré, faire nou comprend ki ena enn sentiment tendresse entre sa deux dimoune ki pé marche ensam-la, ek ki zot bien proche. Nou commence comprend seki sa vedir marche avek Bondié. Mais, anou explik sa pli bien.

⁴ Rappel l’exemple bann dimoune fidel couma Hénok ek Noé. Kifer la Bible dire ki zot ti marche avek Bondié? (Genèse 5:24; 6:9) Souvent dan la Bible, mot “marché” vedir vive dan enn certaine fason. Hénok ek Noé ti choisir pou vive dan enn fason ki ti en harmonie avek volonté Jéhovah. Zot ti different avek bann dimoune ki ti entoure zot, zot ti rod direction Jéhovah ek zot ti obeir so bann instruction. Zot ti ena confiance en Li. Eski sa vedir ki Jéhovah ti prend tou decision dan zot place? Non. Jéhovah finn donne nou liberté pou choisir seki nou pou faire, ek Li envie ki nou servi nou “capacité pou raisonné” kan nou servi sa liberté-la. (Romains 12:1) Seulement, kan nou prend bann decision, avek humilité nou laisse bann pensée Jéhovah, ki beaucoup pli superieur ki nou bann pensée, dirige nou capacité pou raisonné. (Proverbes 3:5, 6; Isaïe 55:8, 9) Oui, c’est lerla ki nou pou marche avek Jéhovah dan nou la-vie.

5. Kifer Jésus ti koz lor ajoute enn coudée ar la vie enn dimoune?

⁵ La Bible souvent compare la vie ar enn voyage. Parfois, li dire sa dan enn fason direct, mais lezot fois, dan enn fason indirect. Par exemple, Jésus ti dire: “Kisannla, kan li tracassé, kapav ajoute enn sel coudée ar so la-vie?” (Matthieu 6:27) Li possible ki nou pa trop comprend kan nou lire sa verset-la. Nou demann-nou: ‘Kifer Jésus ti koz lor ajoute “enn coudée” ar la vie enn dimoune, alors ki normalement servi enn coudée pou mesure bann longueur, mais servi le temps pou mesure la vie enn dimoune?a Ici, Jésus ti pé compare la vie ar enn voyage. Oui, li ti pé enseigné ki, li pa vaut la peine tracassé, parski sa pa pou aide ou pou ajoute mem pa enn ti pas dan ou la-vie. Eski sa vedir ki nou pa kapav faire nanyin pou marche avek Bondié pli longtemps? Non au contraire! Sa amenn nou pou examine nou deuxieme question: Kifer nou bizin marche avek Bondié?

Kifer nou bizin marche avek Bondié?

6, 7. Ki bann dimoune imparfait bien bizin, ek kifer nou bizin tourne-nou vers Jéhovah pou gagne sa?

⁶ Dan Jérémie 10:23, nou trouve enn premier raison kifer nou bizin marche avek Jéhovah. Sa verset-la dire: “Mo konn bien, ô Jéhovah, ki enn dimoune pa finn crée pou decidé ki chemin li pou prend. Enn dimoune ki pé marché pa finn crée pou dirige so pas.” Sa vedir ki nou humain, nou pena ni capacité, ni droit pou dirige nou la-vie. Nou bien bizin enn guide. Bann ki persisté pou amenn zot la-vie couma zot envie, independant avek Bondié, zot faire mem erreur ki Adam ek Ève. Alors ki zot pa ti ena droit, sa premier couple-la ti decidé par zot-mem seki bon ek seki mauvais. (Genèse 3:1-6) Mais nou “pa finn crée” avek sa droit-la.

⁷ Eski ou pa pensé ki ou bizin ena enn guide dan ou la-vie? Toulé-jour, nou bizin prend tout sorte decision. Certain parmi sa bann decision-la, zot difficile ek zot kapav ena enn l’effet lor nou l’avenir ek lor l’avenir nou famille. Mais pense enn coup, ena enn kikenn ki’nn vive beaucoup pli longtemps ki nou ek ki beaucoup pli sage ki nou, ki content pou aide nou pou prend sa bann decision-la! Malheureusement, la plupart dimoune zordi prefere ena confiance dan zot prop jugement, ek dirige zot la-vie zot-mem. Zot pa prend compte seki Proverbes 28:26 dire: “Celui ki mette so confiance dan so prop leker, li bet, mais celui ki marche dan la sagesse, li, li pou sapé.” Nou leker traitre, ek Jéhovah pa envie ki nou gagne bann malheur ki nou kapav gagné, si nou faire confiance sa traitre-la. (Jérémie 17:9) Li envie ki nou marche avek sagesse, ki nou mette nou confiance en Li ek nou considere Li couma nou Guide ek Celui ki donne nou bann instruction ki sage. Si nou faire sa, nou pou marche en securité dan nou la-vie, nou pou satisfait ek nou la-vie pou ena enn sens.

8. Ki arrive bann dimoune a cause peché ek l’imperfection, pourtant ki Jéhovah envie pou nou?

⁸ Enn deuxieme raison kifer nou bizin marche avek Bondié, concerne quantité lé-temps ki nou envie marché, setadir vive. La Bible decrire enn realité bien triste ki pé attann nou tou. Dan enn sens, tou dimoune imparfait pé marche dan mem direction. Ecclésiaste 12:5 decrire bann l’epreuve ki bann dimoune gagné kan zot vinn vié; li dire: “Bann dimoune pé al dan zot lakaz ki dure longtemps, ek bann ki ploré finn tourné dan la rue.” Ki été sa ‘lakaz ki dure longtemps-la’? C’est la tombe, kot nou tou allé a cause nou peché ek nou l’imperfection. (Romains 6:23) Mais Jéhovah pa envie ki nou marche zis pendant enn tigit lé-temps, depuis nou naissance ziska nou la-mort, setadir ki nou konn enn la-vie courte ek troublé. (Job 14:1) C’est zis kan nou marche avek Bondié ki nou kapav ena l’espoir pou marche quantité lé-temps ki Li ti crée nou pou marché au commencement, setadir, pou touletan. Eski c’est pa sa-mem ki ou envie? Ala kifer ou bizin marche avek ou Papa.

Couma nou kapav marche avek Bondié?

9. Kifer parfois Jéhovah ti cachiette Li-mem devant so peuple, pourtant, ki l’assurance Li ti donné dan Isaïe 30:20?

⁹ Troisieme question ki nou pou examiné asterla, merite tou nou l’attention. Couma eski nou kapav marche avek Bondié? Nou gagne la reponse dan Isaïe 30:20, 21: “Zot Grand Instructeur nepli pou cachiette Li-mem, ek zot lizié pou vinn vrai-mem bann lizié ki trouve zot Grand Instructeur. To zoreille pou tann enn parole derriere toi, ki dire: ‘Ala chemin-la. Marche ladan,’ si zot bizin al a droite ou si zot bizin al a gauche.” Dan sa passage bien encourageant-la, li possible ki dan verset 20, Jéhovah ti pé rappel so peuple ki, kan zot ti rebellé, Li ti coumadir pé cachiette Li-mem. (Isaïe 1:15; 59:2) Mais dapré sa text-la, Jéhovah pa pé cachiette; au contraire Li pé deboute dan enn fason bien visible devant so bann serviteur fidel. Sa faire nou pense enn professeur ki pé deboute devant so bann zeleve, ek ki pé montré zot seki li envie zot aprann.

10. Dan ki sens eski ou pé ‘tann enn parole derriere ou’ ki sorti ar ou Grand Instructeur?

¹⁰ Verset 21 servi enn lot l’exemple. Dapré sa verset-la, Jéhovah pé marche derriere so bann serviteur ek Li pé guide zot dan enn bon direction. Dapré certain bibliste, sa l’expression-la kapav concerne fason ki enn berger parfois marche derriere so bann mouton, li crié pou li guide zot ek empeche zot pou al dan enn mauvais direction. Couma sa l’exemple-la concerne nou? Eh bien, kan nou laisse Parole Bondié guide nou, nou pé lire bann parole ki finn ecrire ena plusieurs millier l’année. Coumadir sa bann parole-la pé vinn derriere nou, parski zot finn ecrire bien-bien longtemps. Pourtant, zot ena mem valeur zordi, ki jour ti ecrire zot. Bann conseil ki ena dan la Bible kapav guide nou dan bann decision ki nou prend toulé-jour, ek zot kapav aide nou pou faire bann projet pou l’avenir. (Psaume 119:105) Kan nou rod sa bann conseil-la avek sincerité ek nou applik zot dan nou la-vie, Jéhovah vinn nou Guide. Lerla, nou pé marche avek Bondié.

11. Dan Jérémie 6:16, ki l’exemple bien touchant Jéhovah finn servi pou conseil so bann serviteur, mais couma eski zot ti reagir?

¹¹ Eski nou-mem nou pé laisse Parole Bondié guide nou de pré coumsa? Li bon ki de temps en temps, nou arreté, ek nou examine nou-mem dan enn fason honnete. Anou guette enn verset ki pou aide nou pou faire sa. Li dire: “Ala seki Jéhovah inn dire: ‘Arrete-zot lor bann chemin ek guetté, ek prend renseignement lor bann chemin ki ti ena avant. Kot-sa bon chemin-la été asterla? Marche ladan pou ki zot gagne tranquillité dan zot la-vie.’ ” (Jérémie 6:16) Sa bann parole-la faire nou pense enn voyageur ki’nn arrive kot enn la-croisée ek ki demandé ki direction li pou prend. Lor plan spirituel, bann Israélite ki ti rebellé kont Jéhovah ti bizin faire pareil. Zot ti bizin retourne lor “bann chemin ki ti ena avant.” C’est lor sa ‘bon chemin-la’ ki zot bann ancetre fidel ti marché, mais ki zot, zot finn abandonné. Mais malheureusement, bann Israélite pa ti prend compte sa rappel ki Jéhovah ti donne zot-la. Sa verset-la ajouté: “Mais zot finn contigne dire: ‘Nou pa pou marche ladan.’ ” Mais dan nou lepok modern, bann serviteur Bondié pa finn faire pareil couma bann Israélite ar sa conseil-la.

12, 13. (a) Couma bann chrétien oint finn suive conseil ki trouve dan Jérémie 6:16? (b) Couma nou kapav examine nou-mem pou guetté couma nou pé vive zordi?

¹² Depuis la fin 19^eme siecle, bann chrétien oint finn applik conseil ki trouve en Jérémie 6:16 ar zot-mem. En tant ki enn group, zot finn prend la tête pou retourne dan “bann chemin ki ti ena avant,” ek zot ti faire sa avek tou zot leker. Zot pa ressemblé bann chrétien apostat dan la chrétienté, parski zot, zot finn suive avek fidelité “model bann parole ki faire gagne la vie” ki Jésus Christ finn laissé ek ki so bann disciple finn respecté dan premier siecle nou lepok. (2 Timothée 1:13) Ziska zordi, bann chrétien oint pé aide sakenn so camarade ek aussi bann “lezot brebis” pou suive sa bon chemin ki faire gagne la vie-la, chemin ki la chrétienté finn abandonné.—Jean 10:16.

¹³ Parski zot finn donne la nourriture spirituel dan l’heure ki bizin, l’esclave fidel et avisé finn aide plusieurs million dimoune pou trouve “chemin ki ti ena avant” ek pou marche avek Bondié. (Matthieu 24:45-47) Eski ou parmi sa bann dimoune-la? Si oui, ki ou kapav faire pou ki ou pa eloigne-ou ar Jéhovah, ek commence suive ou prop chemin? Li bon ki de temps en temps ou arreté ek ou examine ou-mem pou guetté ki maniere ou pé marché dan ou la-vie. Si ou lire la Bible ek bann publication ki basé lor la Bible regulierement, ek ou assisté tou bann reunion ek l’assemblée ki organisé par bann chrétien oint zordi, lerla ou pé laisse ou formé pou marche avek Bondié. Ek kan ou mette en pratik bann conseil ki ou gagné, ou pé vrai-mem marche avek Bondié, ek ou pé suive “bann chemin ki ti ena avant.”

Anou marché coumadir nou pé “trouve sa Kikenn ki invisible-la”

14. Si Jéhovah réel pou nou, ki l’effet sa pou ena lor bann decision personnel ki nou prend?

¹⁴ Pou nou kapav marche avek Jéhovah, Li bizin enn kikenn ki réel pou nou. Pa blié ki Jéhovah ti donne bann Israélite fidel l’assurance ki Li pa ti cachiette-Li devant zot. Zordi aussi, Li faire so peuple konn Li couma enn Grand Instructeur. Eski Jéhovah réel coumsa pou ou, coumadir ou pé trouve Li pé deboute devant ou pou instruire ou? C’est sa qualité la-foi-la ki nou bizin si nou envie marche avek Bondié. Moïse ti ena sa qualité la-foi-la, “parski li ti tini ferme, coumadir li ti pé trouve sa Kikenn ki invisible-la.” (Hébreux 11:27) Si Jéhovah réel pou nou, alors nou pou prend compte seki Li pensé kan nou prend bann decision. Par exemple, nou pa pou mem pensé pou faire le mal ek apré essaye cachiette nou peché ar bann ancien dan congregation ek ar nou famille. Au contraire, nou pou faire zeffort pou marche avek Bondié mem si personne pa trouve nou. Nou aussi, nou bien decidé pou suive seki le roi David ti dire: “C’est avek enn leker rempli ar fidelité ki mo pou marche dan mo lakaz.”—Psaume 101:2.

15. Couma, kan nou frequente nou bann frere ek soeur spirituel, sa aide nou pou trouve Jéhovah couma enn kikenn ki réel?

¹⁵ Jéhovah comprend ki nou bann dimoune imparfait, ek ki parfois nou kapav trouve sa difficile pou croire dan seki nou pa trouvé. (Psaume 103:14) Li faire beaucoup pou aide nou surmonte sa faiblesse-la. Par exemple, Li finn rassemblé “enn peuple pou so nom” parmi tou bann nation ki ena lor la terre. (Actes 15:14) Alors ki nou pé servi Jéhovah ensam dan l’unité, nou fortifié sakenn nou camarade. Kan nou tann dire couma Jéhovah finn aide enn frere ou enn soeur spirituel pou surmonte so defaut ou-soit pou faire face ar enn problem grave, sa faire nou Bondié vinn pli réel pou nou encore.—1 Pierre 5:9.

16. Couma l’etude lor la vie Jésus pou aide nou pou marche avek Bondié?

¹⁶ Mais surtout, Jéhovah finn donne nou l’exemple so garson. Jésus ti dire: “Mo-mem chemin, ek la verité ek la vie. Personne pa kapav vinn vers mo Papa sans passe par moi.” (Jean 14:6) Kan nou etudié la vie Jésus, c’est pli bon fason pou faire Jéhovah vinn pli réel pou nou. Tou seki Jésus ti dire ek ti faire, ti reflete dan enn fason parfait personnalité so Papa ek So fason agir. (Jean 14:9) Aussi, kan nou prend bann decision, li bon ki nou reflechi bien ki Jésus ti pou faire dan nou place. Si nou faire sa, ek nou prié avant nou prend bann decision, sa vedir ki nou pé marche lor trace Jésus. (1 Pierre 2:21) Lerla, nou pé marche avek Bondié.

Ki benediction nou pou gagné?

17. Si nou marche dapré bann principe Jéhovah, ki “tranquillité” nou pou gagné dan nou la-vie?

¹⁷ Nou gagne beaucoup bienfait kan nou marche avek Jéhovah. Pa blié seki Jéhovah ti promette so peuple pou arrivé si zot rod enn “bon chemin.” Li ti dire zot: “Marche ladan pou ki zot gagne tranquillité dan zot la-vie.” (Jérémie 6:16) Ki sa “tranquillité” ki zot ti pou gagné-la? Eski sa vedir ki nou pou amenn enn la-vie facile ki rempli ar plaisir ek bann kitsoz materiel? Non. Jéhovah donne nou enn pli bon kitsoz, enn kitsoz ki mem dimoune pli riche lor la terre pa trouvé facilement. Amenn enn la-vie trankil, sa vedir ena la paix de l’esprit, la joie, satisfaction dan nou la-vie ek lor plan spirituel. Sa tranquillité-la c’est enn garanti ki ou finn choisir pli bon fason pou vive ou la-vie. Sa la-paix de l’esprit-la li bien rare dan sa lé-monde difficile kot nou pé vive zordi-la!

18. Ki benediction Jéhovah envie donne ou, ek ki ou bizin bien decidé pou faire?

¹⁸ Bien-sur, la vie li-mem, li enn grand benediction ki Bondié inn donne nou. Vaut mieux enn la-vie courte, ki pena la vie ditou. Pourtant, jamais Jéhovah ti envie ki ou amenn enn la-vie courte, kot ou ena bien la-force kan ou jeune ek ou souffert kan ou vinn vié. Non, Jéhovah envie ki ou gagne bann grand benediction. Li envie ki ou marche avek Li pou touletan! Nou trouve sa dan Mika 4:5: “Tou bann peuple zot, zot pou marche sakenn dapré nom zot bondié, mais nou, nou pou marche dapré nom Jéhovah nou Bondié pou touletan, oui pou toujours.” Eski ou saisi l’occasion pou gagne sa benediction-la? Eski ou envie vive seki Jéhovah appel “vrai la-vie”? (1 Timothée 6:19) Alors, faire tou seki ou kapav pou marche avek Jéhovah zordi, demain, ek toulé-jour pou l’eternité!

[Note]

Ki ou pou reponn?

• Ki sa vedir marche avek Bondié?

• Kifer ou ressenti enn besoin pou marche avek Bondié?

• Ki pou aide ou marche avek Bondié?

• Ki benediction bann ki marche avek Bondié gagné?

[Zimage, page 29]

A travers la Bible, nou tann la voix Jéhovah derriere nou ki dire: “Ala chemin-la”

[Zimage, page 31]

Dan reunion, nou gagne nourriture spirituel dan l’heure ki bizin