Kontign “Viv par Lafwa”

1. Kifer Pol ti ere kan li ti reflesi lor fason ki li ti viv so lavi?

KAN lapot Pol ti pre pou mor, li ti reflesi lor fason ki li ti viv so lavi, ek sa ti rann li ere. Akoz sa, li ti kapav dir: “Mo’nn galoup lekours-la ziska lafin, mo’nn gard lafwa dan Bondie.” (2 Tim. 4:6-8) Meyer desizion ki Pol ti pran dan so lavi, se ki li ti servi Zeova, ek li ti sir ki sa ti fer Zeova plezir. Nou osi nou anvi pran bann bon desizion ek nou anvi gagn faver Bondie. Kouma nou kapav fer sa?

2. Ki savedir “viv par lafwa”?

² Kan Pol ti koz lor limem ek lor bann lezot Kretien ki fidel, li ti dir: “Nou viv par lafwa, ek pa par seki lizie trouve.” (2 Kor. 5:7) Ki Pol ti pe rod dir? Bann dimounn ki pena lafwa dan Zeova, zot kont lor seki zot trouve, tande, ek resanti pou zot pran bann desizion. Parkont, kan enn kikenn mars par lafwa, li pran bann desizion ki montre ki li ena konfians dan Zeova. So bann aksion montre ki li sir ki, kan li swiv bann konsey ki ena dan Labib, li pou gagn bann bienfe.—Ps. 119:66; Ebre 11:6.

3. Ki bann bienfe nou gagne kan nou “viv par lafwa”? (2 Korintien 4:18)

³ Parfwa, nou tou nou kont lor seki nou trouve, nou tande, ek lor seki nou resanti pou nou pran bann desizion. Selman, si nou kont zis lor sa bann kitsoz-la pou nou pran bann desizion inportan, nou kapav fer bann erer. Kifer? Parski defwa nou pa kapav fer konfians seki nou trouve, seki nou tande, ek seki nou resanti. Si nou pran bann desizion zis lor sa bann kitsoz-la, avek letan nou pou fer bann kitsoz ki Zeova pa anvi nou fer. (Ekle. 11:9; Mat. 24:37-39) Parkont, si nou viv par lafwa, nou pou pran bann desizion ki pou “fer Lesegner plezir.” (Efe. 5:10) Anplis, kan nou swiv bann konsey ki Bondie donn nou, nou pou anpe ek nou pou vremem ere. (Ps. 16:8, 9; Iza. 48:17, 18) Ek si nou kontign mars par lafwa, nou pou viv pou touletan.—Lir 2 Korintien 4:18.

4. Kouma nou kapav kone si nou pe viv par lafwa ouswa si nou pe viv par seki nou lizie trouve?

⁴ Kouma nou kapav kone si nou pe viv par lafwa, ouswa si nou pe viv par seki nou lizie trouve? Pou nou konn sa, nou bizin demann nou-mem: ‘Kan mo pran bann desizion, lor ki kitsoz mo konte? Eski mo kont zis lor bann kitsoz ki mo trouve, ouswa eski mo kont lor bann konsey ki Zeova donn mwa?’ Dan sa lartik-la, nou pou trouve kouma nou kapav kontign viv par lafwa dan trwa domenn inportan: (1) Kan nou bizin swazir enn travay, (2) kan nou pe rod enn kikenn pou marye, ek (3) kan lorganizasion Zeova donn nou bann instriksion. Ek dan sak domenn, nou pou gete lor ki kitsoz nou bizin reflesi pou ki nou kapav pran bann bon desizion.

KAN NOU BIZIN SWAZIR ENN TRAVAY

5. Lor ki kitsoz nou bizin reflesi kan nou pe swazir enn travay?

⁵ Nou tou nou anvi gagn enn travay ki permet nou gagn seki nou bizin, pou ki nou kapav pran nou fami swin. (Ekle. 7:12; 1 Tim. 5:8) Ena travay ki pey bien ek ki kapav fer nou gagn ase kas pou nou pran nou fami swin ek pou nou met enn larzan dekote. Parkont, ena bann travay ki pey mwins ek kot nou gagn zis ase kas pou nou donn nou fami seki zot bizin. Kan nou pe swazir enn travay, li normal ki nou pou gete ki kantite kas nou pou gagne. Selman, si se zis lor sa ki nou pran nou desizion, sa pou montre ki nou pa pe viv par lafwa.

6. Kan nou bizin swazir enn travay, kouma nou kapav montre ki nou pe viv par lafwa? (Ebre 13:5)

⁶ Si nou viv par lafwa, nou pou reflesi osi lor lefe ki sa travay-la pou ena lor nou lamitie avek Zeova. Nou kapav demann nou-mem: ‘Eski sa travay-la pou fer mwa fer bann kitsoz ki Zeova deteste?’ (Prov. 6:16-19) ‘Eski sa travay-la pou fer mwa rat mo bann renion ek pas mwins letan pou prese ek pou etidie Labib? Eski mo pou pas mwins letan ar mo fami akoz sa travay-la?’ (Fil. 1:10) Si to reponn wi pou sa bann kestion-la, li pou pli bon ki to pa aksepte travay-la, mem si li difisil pou to gagn enn travay dan to pei. Kan nou viv par lafwa, nou pran bann desizion ki montre ki nou sir ki Zeova pou pran nou swin ek ki Li pou donn nou seki nou bizin.—Mat. 6:33; lir Ebre 13:5.

7-8. Kouma enn frer dan Lamerik Disid inn montre ki li viv par lafwa? (Get zimaz osi.)

⁷ Javier,a enn frer ki res Lamerik Disid, ti konpran linportans pou viv par lafwa. Li dir: “Mo ti fer demars pou gagn enn extra bon travay ki ti pou pey mwa de fwa plis ki mo ansien travay, ek sa ti pou rann mwa vremem ere.” Selman, Javier ti extra anvi fer pionie. Li dir: “Mo ti bizin al fer enn interview pou sa travay-la. Avan interview-la, mo ti priye Zeova. Mo ti sir ki Zeova kone ki pli bon pou mwa. Mo ti anvi gagn enn pli bon travay ek gagn plis kas, me mo pa ti pou aksepte enn travay ki ti pou anpes mwa fer plis pou Zeova.”

⁸ Javier dir: “Pandan interview-la, manager-la ti dir mwa ki mo ti pou bizin fer overtime souvan. Avek respe, mo ti explik li ki mo pa ti pou kapav fer overtime akoz mo servis pou Zeova.” Lerla, Javier ti refiz travay-la. De semenn apre, li ti koumans fer pionie. Ek de-trwa mwa apre, li ti gagn enn travay part-time. Javier dir: “Zeova ti tann mo bann lapriyer ek Li ti ed mwa pou gagn enn travay ki ti pou permet mwa fer pionie. Mo bien kontan ki mo’nn reisi gagn enn travay ki permet mwa ena plis letan pou servi Zeova ek servi mo bann frer ek ser.”

9. Ki nou kapav aprann ar lexanp Trésor?

⁹ Me ki nou bizin fer si nou rann nou kont ki nou travay pe anpes nou viv par lafwa? Anou get lexanp Trésor, enn frer ki res Kongo. Li dir: “Mo ti gagn enn bon travay. Enn sel fwa dan lavi gagne sa kalite travay-la! Mo ti gagn trwa fwa plis kas ki mo ti pe gagne dan mo ansien travay, ek zot tou ti bien respekte mwa.” Selman, Trésor souvan ti rat so bann renion parski li ti bizin fer overtime. Anplis, sertin travayer ti pe met presion lor li pou ki li kasiet bann magouy ki zot ti pe fer dan travay. Trésor ti anvi kit so travay. Selman, li ti per tansion li pa gagn enn lot travay. Ki kitsoz ti ed li? Li dir: “Abakouk 3:17-19 ti ed mwa pou konpran ki, mem si mo kit sa travay-la ek ki mo gagn mwins kas, Zeova ti pou pran mwa swin. Alor, mo ti kit travay-la.” Trésor dir: “Boukou patron panse ki bann travayer pou sakrifie ninport ki kitsoz, mem zot lavi fami ek zot bann aktivite spiritiel, pou gagn enn travay ki pey bien. Me mwa, mo bien kontan ki mo’nn reisi gard mo lamitie avek Zeova, ek ki mo ena enn bon relasion ar mo fami. Enn an plitar, Zeova ti ed mwa pou trouv enn bon travay ki ti permet mwa ena enn lavi sinp ek ena plis letan pou servi Li. Kan nou met Zeova an premie dan nou lavi, kitfwa pandan inpe letan nou pou ena mwins kas. Selman, Zeova pou pran nou swin.” Wi, si nou ena konfians dan bann konsey ek dan bann promes Zeova, nou pou kontign viv par lafwa ek Li pou beni nou.

KAN NOU PE ROD ENN KIKENN POU MARYE

10. Kan enn dimounn pe rod enn kikenn pou marye, ar ki kitsoz li bizin fer bien atansion?

¹⁰ Maryaz se enn kado Zeova, ek li normal ki enn kikenn anvi marye. Kan enn ser interese ar enn frer, sirman li pou get frer-la so personalite, so laparans, so repitasion, fason ki li zer larzan, fason ki li azir anver so fami, ek ser-la pou gete osi si frer-la rann li ere.b Tou sa bann kitsoz-la inportan. Selman, si ser-la konsantre li zis lor sa bann kitsoz-la, li pa pou montre ki li pe viv par lafwa, me ki li pe viv zis par seki so lizie trouve.

11. Kan nou pe rod enn kikenn pou marye, kouma nou kapav montre ki nou pe viv par lafwa? (1 Korintien 7:39)

¹¹ Zeova bien fier kan Li trouv nou bann frer ek ser swiv bann konsey ki ena dan Labib kan zot rod enn kikenn pou marye. Par exanp, zot atann ki zot ena ase matirite avan ki zot koumans frekante. (1 Kor. 7:36) Kan zot rod enn kikenn pou marye, zot rod bann kalite ki montre ki sa dimounn-la pou enn bon konzwin devan lizie Zeova. (Prov. 31:10-13, 26-28; Efe. 5:33; 1 Tim. 5:8) Si enn kikenn ki pa Temwin koumans interese ar zot, zot swiv konsey 1 Korintien 7:39 ki dir marye “selman dan Lesegner.” (Lir.) Zot fer sa parski zot kone ki Zeova pou touletan pran zot swin ek pou soutenir zot emosionelman.—Ps. 55:22.

12. Ki nou kapav aprann ar lexanp Rosa?

¹² Anou get lexanp Rosa, enn pionie ki res Kolonbi. Enn misie dan so travay ti koumans interese ar li, ek Rosa osi ti koumans ena bann santiman pou li. Rosa dir: “Sa misie-la ti enn bon dimounn, ek li ti ed bann dimounn dan so kominote. Li ti bien zanti avek mwa. Li ti ena tou bann kalite ki mo ti anvi mo mari ena. Selman, li pa ti enn Temwin. . . . Sa ti bien difisil pou mo dir li ki mo pa ti anvi sorti ar li. Anplis, sa lepok-la, mo ti pe santi mwa tousel ek mo ti anvi marye, me mo pa ti pe trouv personn dan laverite.” Selman, Rosa pa ti konsantre li zis lor seki so lizie ti trouve. Li ti reflesi lor lefe ki so desizion ti pou ena lor so lamitie ar Zeova. Lerla, li ti koup tou kontak ar sa misie-la, ek li ti res bien okipe dan so servis pou Zeova. Inpe letan apre, li ti gagn linvitasion pou asiste Lekol pou Bann Evanzelizater Rwayom Bondie, ek aster-la li pe servi kouma pionie spesial. Rosa dir: “Zeova inn donn mwa boukou benediksion, ek sa finn donn mwa boukou lazwa.” Li pa touletan fasil pou fer seki Zeova anvi nou fer, sirtou kan sa konsern nou bann santiman. Selman, kan nou ena mem fason panse ki Zeova, nou pou touletan gagn bann bienfe.

KAN LORGANIZASION ZEOVA DONN BANN INSTRIKSION

13. Ki kapav arive kan nou gagn bann instriksion ar lorganizasion Zeova?

¹³ Bann ansien, bann responsab sirkonskripsion, biro nasional, ek Komite Santral souvan donn nou bann instriksion ki ed nou pou servi Zeova. Selman, li kapav arive ki parfwa nou pa konpran kifer bann frer inn donn nou sertin instriksion. Ouswa kitfwa nou kapav ena bann dout lor bann instriksion ki zot inn donn nou. Lerla, olie ki nou konsantre nou lor sa bann instriksion-la, nou konsantre nou lor bann dimounn ki’nn donn nou sa bann instriksion-la, setadir nou bann frer ki inparfe.

14. Ki kitsoz pou ed nou pou viv par lafwa kan nou gagn bann instriksion? (Ebre 13:17)

¹⁴ Kan nou viv par lafwa, nou ena konfians ki se Zeova Limem ki pe gid so lorganizasion ek ki Li konn bien nou sitiasion. Ek akoz sa, nou obeir avek enn bon latitid. (Lir Ebre 13:17.) Nou kone ki kan nou obeir, sa pou ede pou ki ena linite dan lasanble. (Efe. 4:2, 3) Mem si bann frer ki diriz nou zot inparfe, nou sir ki Zeova pou beni nou kan nou obeir zot. (1 Sam. 15:22) Ek mem si bizin sanz enn instriksion, nou ena konfians ki Zeova pou sanz li dan ler ki bizin.—Mish. 7:7.

15-16. Mem si li ti trakase kan ti gagn enn nouvo instriksion, ki kitsoz ti ed enn frer pou viv par lafwa? (Get zimaz osi.)

¹⁵ Anou gete ki bienfe nou gagne kan nou ena lafwa ek kan nou swiv bann instriksion ki lorganizasion Zeova done. Dan Perou, boukou dimounn koz Espagnol. Selman, laplipar parmi zot koz osi bann lezot lang, ek enn parmi sa bann lang-la se Ketchua. Pandan plizir lane, bann frer ek ser ki koz Ketchua ti pe rod bann dimounn ki koz sa lang-la dan teritwar. Selman, pou ki zot swiv bann lalwa ki gouvernman ti mete, zot ti bizin fer sertin sanzman dan fason ki zot ti pe prese. (Rom. 13:1) Ek kan zot ti gagn enn nouvo instriksion lor fason ki zot ti bizin rod bann dimounn ki koz Ketchua, sertin frer ek ser ti panse ki sa ti pou pli difisil pou zwenn bann dimounn ki koz sa lang-la. Selman, kan zot ti obeir sa instriksion-la, Zeova ti beni bann zefor ki zot ti pe fer pou zwenn bann dimounn ki koz sa lang-la.

¹⁶ Kevin, ki enn ansien dan enn lasanble Ketchua, ti enn parmi enn bann frer ki ti trakase kan ti gagn sa instriksion-la. Li dir: “Mo ti demann momem, ‘Kouma nou pou fer aster pou zwenn bann dimounn ki koz Ketchua?’” Anou gete ki Kevin ti fer. Li dir: “Mo ti reflesi lor Proverb 3:5, ek mo ti mazinn lexanp Moiz. Zeova ti donn li bann instriksion ki kitfwa pa ti paret lozik. Li ti dir Moiz liber bann Izraelit ek amenn zot kot Lamer Rouz. Dan sa sitiasion-la, se koumadir bann Izraelit pa ti pou kapav sape dan lame bann Ezipsien ki ti pe tay deryer zot. Me kanmem sa, Moiz ti obeir bann instriksion ki li ti gagne ek Zeova ti beni li kan Li ti fer enn mirak pou sap zot.” (Ex. 14:1, 2, 9-11, 21, 22) Kevin ti dispoze pou adapte li ar sa nouvo fason prese-la. Ki bann bon rezilta li’nn gagne gras-a sa? Kevin dir: “Sa ti extraordiner pou trouve kouma Zeova ti beni nou. Avan, nou ti bizin mars boukou dan predikasion ek parfwa nou ti pe zwenn zis enn ouswa de dimounn ki koz Ketchua. Aster-la, nou pres dan bann teritwar kot ena pli boukou dimounn ki koz sa lang-la, ek gras-a sa, nou gagn pli boukou konversasion, pli boukou vizit, pli boukou letid Labib, ek pli boukou dimounn asiste nou bann renion.” Sa montre ki, kan nou viv par lafwa, Zeova pou touletan beni nou.

17. Ki kitsoz to’nn aprann dan sa lartik-la?

¹⁷ Dan sa lartik-la, nou’nn get trwa domenn inportan ki pou ed nou pou kontign viv par lafwa. Selman, nou bizin kontign viv par lafwa dan tou domenn nou lavi, kouma par exanp, kan nou swazir nou bann divertisman, ek kan nou pran bann desizion ki konsern nou ledikasion ouswa fason ki nou grandi nou bann zanfan. Kan nou pran bann desizion, fode pa ki nou konsantre nou zis lor seki nou trouve, me nou bizin plito konsantre nou lor nou lamitie ar Zeova, lor so bann konsey, ek lor promes ki Li’nn fer nou pou pran nou swin. Si nou fer sa, nou pou kapav “mars lor nom Zeova nou Bondie pou touletan.”—Mish. 4:5.